YOB4
Lɛkakatɛ Kasale
1Ninfɛ di Elifas, Teman otii nwu ladiki kanya alɛ:2“Nse otii owo komiɛ alɛ akakatɛko fɔ, fabanya ɔblɔ?Kafɔɔ owe nimatĩi osuku ku ɔkakatɛ?3Nyu mmle fatootuo ni batii kpinwu asaa,ku mmle fatookpee ni nnɛɛ kpiɛkpiɛ osie.4Sɛlaa lɛfɔ ntɔɔkyakaako mba niatuula nii;fatookpee akunkyi kpɔkɔkpɔkɔ osie.5Kafɔɔ kanunua ɔlaa ntootũ fɔ, ni di nnɛɛ ntoofee fɔ nɛ;kutɔɔwa fɔ di suoto, ni diɛbla fɔ ɔkpɛ nɛ.6Diele Yaa lɛfɔ lɛyɛkɛ ninle fɔ disi-tikasaadi nnɛɛ ofee sisuku lɛfɔ kafɔɔ nle osuku onyu lɛfɔ nɛ?7“Bu nwu fanyu nunua: Otii wɔ ninan-ye nwu ni ole ntodikpi?Ɔfɛ batodiwɔɔsa batininitɛ?8Lɛtɛ anu lenyu nii, batii ba ninkpɛ ni okpile kofeku mba nimpɛ ni kubuɛ okpee ntɛsɛ nya.9Di Yaa owiidi didiki, manwɔɔ;di lɛblɔfiɛ nɔɔ kamɛ, mankpi.10Bakyata makumii, anwi kafɔɔ,kafɔɔ bakyata siene anyɛɛ lefefee.11Kyata nkpi ta aawɛ bɔkɛɛ amufũ awee ni oso,ni di kyata-sanko abi kafɔɔ nsamii nɛ.12“Baawakoe ɔlaa onwii di lewofa kamɛ,atoko nii lanu nwu kɔfɛɛfɔ.13Di obe wɔ latoobu ni disi di alaafɔ suoto ku kakyɛ,di obe wɔ di batii nte bɔɔkyɔsĩi ni osie kanya,14lɛyɛkɛ ku ditũtũkũ lamufũ midiata akufi nii amuu latũkũ.15Ninwuna ninwii labafe di anu nii,ni di sinwini se di suoto nii lataka siayila nɛ.16Diayila,kafɔɔ ntatofo be diale.Lewo layila di anu nii,ni lanu sɛlɔ buɛɛ nɛ:17'Otii-nyu kafuo ote tinini olenkee Yaa?Otii kafuo ɔte klekle olenkee Blatɛ nɔɔ?18Nse Yaa diefũ bakpɛmblatɛ nɔɔ anu,nse Yaa nnya okpile di batɔkyɛntɛ nɔɔ suoto,19ni lɛ nfɛ di mba ninsi ni di kɔtɛ ayo kamɛ,di asɔse ninya nle ni kudu,mambibiɛ ma manlenkee ni akukudi!20Di olesɛ ku kɔtɔɔfɔ obo kamɛ manfefee kukuikukui;manwɔɔ, dinaa ni kaloo, manantofo nii.21Diele akpaayo lɛma sikũ beebudi bɛɛtɛ kaasɔ,di mmle baakpi ni di lɛsaa ɔtantofo kamɛ?’The Seed Company