ອ່ານ 𐴈𐴝𐴔𐴡𐴥𐴓𐴢 1

𐴈𐴝𐴔𐴡𐴥𐴓𐴢1

𐴂𐴝𐴑-𐴌𐴟𐴀 𐴊𐴞𐴦𐴁𐴝𐴌 𐴖𐴝𐴦𐴊𐴝

¹𐴀𐴡𐴥 𐴅𐴡𐴕𐴝𐴥𐴁𐴢 𐴃𐴞𐴘𐴡𐴉𐴞𐴥𐴓𐴝𐴏𐴢, 𐴀𐴝𐴣𐴀𐴌 𐴀𐴝𐴒𐴡𐴌 𐴑𐴞𐴃𐴝𐴁𐴡𐴃𐴢 𐴀𐴝𐴀𐴛 𐴀𐴟𐴀𐴙𐴕 𐴁𐴠𐴒𐴧𐴟𐴥𐴕𐴡𐴌 𐴁𐴝𐴦𐴁𐴟𐴃𐴠 𐴁𐴠 𐴓𐴠𐴙𐴑𐴧𐴞𐴥, 𐴎𐴞𐴀𐴕 𐴀𐴞𐴏𐴝𐴤𐴘𐴠 𐴐𐴟𐴥𐴌𐴟𐴃𐴧𐴟 𐴓𐴡𐴥𐴃𐴞 𐴒𐴡𐴙𐴅𐴧𐴞𐴥𐴓𐴢 𐴀𐴠𐴊𐴧𐴠 𐴃𐴝𐴦𐴓𐴞𐴔 𐴊𐴞𐴀𐴓𐴢,²𐴀𐴡 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴎𐴠 𐴊𐴞𐴕 𐴀𐴞𐴥𐴁𐴝𐴌𐴠 𐴀𐴝𐴏𐴔𐴝𐴕𐴡𐴃𐴢 𐴃𐴟𐴓𐴞𐴤𐴉𐴠𐴓𐴝 𐴒𐴞𐴥𐴘𐴠. 𐴎𐴝𐴘𐴁𐴝𐴌 𐴀𐴝𐴒𐴠 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴁𐴝𐴏𐴞𐴥𐴓𐴡𐴘𐴧𐴝 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌𐴠 𐴂𐴝𐴑-𐴌𐴟𐴀𐴌 𐴊𐴟𐴖𐴝𐴌𐴝 𐴇𐴠𐴥𐴊𐴝𐴘𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴊𐴞𐴀𐴓𐴢.³𐴀𐴞𐴥𐴁𐴝𐴘𐴠 𐴊𐴟𐴑 𐴉𐴝𐴘 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴕𐴞𐴎𐴡𐴌𐴠𐴥 𐴎𐴝𐴇𐴠𐴥𐴌 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴥𐴁𐴝 𐴎𐴞𐴕𐴊𐴝 𐴀𐴝𐴏𐴠𐴤 𐴊𐴠 𐴇𐴞𐴥𐴘𐴝𐴕 𐴁𐴞𐴐𐴧𐴝𐴥𐴐𐴢 𐴒𐴡𐴌𐴝𐴥 𐴎𐴝 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴁𐴡𐴀𐴗𐴃𐴢 𐴏𐴝𐴥𐴁𐴟𐴃𐴢 𐴀𐴡𐴥𐴑𐴧𐴡𐴓𐴢 𐴊𐴞𐴀𐴓𐴢. 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴏𐴝𐴓𐴞𐴐𐴢 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴊𐴝𐴈𐴝𐴤 𐴊𐴞𐴥𐴊𐴞 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴁𐴝𐴦𐴁𐴟𐴃𐴠 𐴈𐴡𐴖𐴝𐴤𐴃𐴢 𐴀𐴝𐴐𐴧𐴞𐴥𐴓𐴢.⁴𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞𐴃𐴠, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠 𐴇𐴡𐴥𐴑𐴟𐴔 𐴔𐴝𐴕 𐴊𐴞𐴀𐴓𐴢, ”𐴃𐴟𐴣𐴀𐴝𐴥𐴌𐴝 𐴅𐴠𐴌𐴟𐴥𐴏𐴝𐴓𐴠𐴔 𐴏𐴝𐴥𐴌𐴞 𐴕𐴡 𐴎𐴝𐴘𐴧𐴡𐴒𐴡𐴥𐴘, 𐴁𐴡𐴥𐴓𐴑𐴠 𐴁𐴝𐴉𐴡𐴌 𐴖𐴝𐴦𐴊𐴝 𐴒𐴡𐴙𐴅𐴧𐴝𐴥 𐴇𐴝𐴥𐴊𐴞𐴘𐴝𐴌 𐴀𐴠𐴕𐴃𐴠𐴎𐴝𐴌 𐴒𐴡𐴌𐴡𐴤, 𐴎𐴞𐴘𐴝𐴥𐴕𐴡𐴌 𐴁𐴝𐴦𐴁𐴟𐴃𐴠 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴃𐴧𐴟 𐴉𐴟𐴥𐴙𐴕𐴧𐴡.⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴝𐴇𐴝𐴥𐴘𐴝𐴘𐴠 𐴃𐴡 𐴉𐴝𐴕𐴞𐴥𐴃𐴢 𐴀𐴠𐴥𐴕𐴝 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴘𐴠, 𐴔𐴡𐴕𐴃𐴡𐴌 𐴘𐴝𐴦𐴌 𐴇𐴡𐴦𐴊𐴧𐴞𐴕𐴡𐴌 𐴁𐴟𐴥𐴃𐴡𐴌𐴠 𐴃𐴟𐴣𐴀𐴝𐴥𐴌𐴝𐴌𐴠 𐴂𐴝𐴑-𐴌𐴟𐴀 𐴓𐴡𐴥𐴘 𐴁𐴝𐴥𐴂𐴄𐴞𐴏𐴔𐴝 𐴊𐴞𐴥𐴘𐴝 𐴎𐴝𐴘𐴁𐴡.“

⁶𐴇𐴠𐴥𐴃𐴡𐴓𐴧𐴝 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴀𐴠𐴑𐴧𐴝𐴥𐴕𐴡𐴃𐴢 𐴎𐴡𐴔𐴝 𐴀𐴡𐴥𐴘𐴧𐴠, 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴔𐴝𐴓𐴞𐴑, 𐴃𐴟𐴀𐴛 𐴀𐴠 𐴀𐴡𐴑𐴃𐴡𐴥𐴃𐴢 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌𐴠 𐴌𐴝𐴙𐴅𐴧𐴡 𐴖𐴝𐴦𐴉𐴠𐴏𐴢 𐴓𐴡𐴘𐴊𐴞𐴁𐴝 𐴕𐴞𐴑𐴞؟“

⁷𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴎𐴠 𐴀𐴡𐴑𐴃𐴡𐴥 𐴀𐴠𐴊𐴧𐴠 𐴃𐴝𐴌𐴞𐴥𐴑 𐴁𐴝𐴉𐴠 𐴕𐴞𐴎𐴡𐴌 𐴀𐴝𐴊𐴞𐴥𐴑𐴝𐴌𐴠 𐴄𐴞𐴥𐴑 𐴒𐴡𐴌𐴞𐴥 𐴌𐴝𐴙𐴑𐴧𐴠𐴥, 𐴇𐴞𐴥𐴀𐴕 𐴎𐴝𐴕𐴡𐴕 𐴃𐴟𐴣𐴀𐴝𐴥𐴌𐴝𐴌 𐴈𐴝𐴔 𐴕𐴡.⁸𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴂𐴝𐴑-𐴌𐴟𐴀 𐴀𐴝𐴘𐴁𐴡𐴤, 𐴃𐴟𐴣𐴀𐴝𐴥𐴌𐴝 𐴁𐴡𐴓𐴢 𐴉𐴝𐴘𐴁𐴝; 𐴀𐴝𐴦𐴌 𐴅𐴠𐴌𐴟𐴥𐴏𐴝𐴓𐴠𐴔 𐴀𐴡𐴃𐴢, 𐴘𐴡𐴇𐴟𐴥𐴊𐴞𐴘𐴝𐴌 𐴀𐴠𐴊𐴧𐴠 𐴏𐴝𐴔𐴝𐴥𐴌𐴞𐴘𐴝𐴌 𐴀𐴝𐴒𐴝𐴒𐴟𐴌𐴝𐴃𐴢, 𐴀𐴠𐴊𐴧𐴠 𐴊𐴟𐴕𐴞𐴘𐴝𐴙𐴌 𐴐𐴠𐴥𐴐𐴢 𐴔𐴝𐴃𐴝𐴥 𐴉𐴡𐴙𐴅𐴧𐴡𐴕𐴃𐴡 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴒𐴡𐴁𐴝𐴤 𐴀𐴡𐴥𐴘𐴁𐴝.“

𐴀𐴞𐴏𐴝𐴤𐴌𐴠 𐴀𐴝𐴏𐴔𐴝𐴕𐴡𐴃𐴢 𐴃𐴟𐴓𐴞𐴤𐴉𐴠𐴓𐴝 𐴒𐴞𐴥𐴘𐴠

⁹𐴇𐴞𐴥𐴀𐴕 𐴈𐴡𐴀𐴘𐴢 𐴁𐴝𐴦𐴊𐴠, 𐴀𐴞𐴥𐴃𐴝𐴌𐴝𐴌 𐴏𐴟𐴑𐴡𐴌 𐴔𐴟𐴀𐴕𐴃𐴟 𐴀𐴞𐴥𐴁𐴝𐴌𐴠 𐴃𐴟𐴓𐴞𐴤𐴉𐴠𐴓𐴝 𐴒𐴞𐴥𐴘𐴠, 𐴀𐴝𐴦𐴌 𐴀𐴠𐴑𐴧𐴝𐴥𐴕 𐴔𐴞𐴘𐴟𐴥𐴓𐴝𐴘𐴠 𐴀𐴞𐴥𐴁𐴝𐴌𐴠 𐴀𐴞𐴥𐴃𐴝𐴌𐴝𐴌 𐴕𐴡𐴎𐴡𐴌𐴡𐴃𐴧𐴟 𐴀𐴝𐴌𐴒𐴗𐴝𐴓𐴢 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.

¹⁰𐴀𐴞𐴥𐴁𐴝 𐴎𐴝𐴦𐴌𐴒𐴡𐴥𐴘 𐴊𐴠 𐴇𐴞𐴥𐴘𐴝𐴓𐴝 𐴀𐴞𐴥𐴃𐴝𐴌𐴝 𐴀𐴝𐴏𐴔𐴝𐴕𐴡𐴌 𐴀𐴟𐴎𐴟 𐴏𐴟𐴑 𐴓𐴝𐴒𐴝𐴘𐴊𐴞 𐴏𐴝𐴀𐴘𐴢 𐴃𐴝𐴥𐴙𐴑𐴧𐴠 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴝𐴏𐴞𐴔𐴁𐴞𐴃𐴢 𐴊𐴟𐴘 𐴎𐴡𐴕 𐴊𐴡𐴥𐴓𐴝 𐴇𐴡𐴦𐴌 𐴉𐴞𐴕𐴊𐴝𐴤 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝𐴌 𐴋𐴝𐴥𐴑𐴡𐴃𐴧𐴟 𐴃𐴞𐴥𐴘𐴝𐴘𐴧𐴠,¹¹𐴀𐴝𐴦𐴌 𐴈𐴡𐴀𐴌 𐴊𐴠, ”𐴀𐴡𐴥 𐴒𐴝𐴓𐴞𐴓𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴃𐴞𐴥𐴘𐴝𐴘 𐴀𐴝𐴏𐴔𐴝𐴕𐴡𐴌 𐴀𐴟𐴎𐴟 𐴑𐴞𐴘𐴝𐴥 𐴏𐴝𐴀𐴘𐴢 𐴃𐴝𐴥𐴙𐴑𐴧𐴡؟ 𐴀𐴠 𐴀𐴞𐴏𐴝𐴤, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴡𐴥𐴃𐴧𐴟 𐴀𐴝𐴏𐴔𐴝𐴕𐴡𐴃𐴢 𐴃𐴟𐴓𐴞𐴤𐴉𐴠𐴓𐴝 𐴒𐴞𐴥𐴘𐴠, 𐴀𐴞𐴥𐴁𐴝 𐴎𐴠𐴕𐴊𐴞𐴓𐴧𐴝 𐴒𐴡𐴌𐴞 𐴀𐴝𐴏𐴔𐴝𐴕𐴡𐴃𐴢 𐴎𐴝𐴦𐴌𐴒𐴡𐴥𐴘 𐴊𐴠 𐴊𐴠𐴙𐴑𐴧𐴡𐴥 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴖𐴝𐴦𐴉𐴠𐴏𐴢 𐴀𐴝𐴘𐴁𐴡𐴤.“

𐴔𐴝𐴃𐴧𐴞𐴥𐴘𐴝𐴏𐴡𐴌𐴠 𐴏𐴝𐴥𐴇𐴝𐴁𐴞 𐴀𐴞𐴥𐴏𐴝𐴉𐴠 𐴁𐴝𐴏𐴞𐴥𐴓𐴡𐴘𐴧𐴠

¹²𐴘𐴝𐴥𐴌𐴁𐴝𐴦𐴊𐴠, 𐴏𐴝𐴥𐴇𐴝𐴁𐴞 𐴒𐴟𐴥𐴕 𐴎𐴝𐴘𐴃𐴟𐴕 𐴉𐴝𐴀𐴌 𐴈𐴡𐴀 𐴊𐴠 𐴘𐴞𐴥𐴁𐴝𐴃𐴧𐴟 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴖𐴝𐴦𐴉𐴠𐴏𐴢 𐴒𐴞𐴦𐴘𐴠𐴥𐴒𐴡𐴘. 𐴇𐴠𐴥 𐴉𐴝𐴀𐴌𐴒𐴗𐴝𐴥 𐴐𐴡𐴥𐴀𐴌𐴡𐴃𐴧𐴟 𐴃𐴡𐴑𐴡𐴌𐴞𐴁𐴝𐴕 𐴀𐴝𐴊𐴝𐴤 𐴔𐴝𐴙𐴓𐴢 𐴊𐴟𐴌𐴠𐴥 𐴀𐴝𐴐𐴧𐴞𐴥𐴓𐴢.¹³𐴀𐴞𐴥𐴃𐴝𐴌𐴝 𐴐𐴡𐴥𐴀𐴌𐴡𐴃𐴢 𐴉𐴡𐴀𐴣𐴏𐴞 𐴖𐴡𐴌𐴡𐴌 𐴄𐴝𐴓𐴝𐴌 𐴑𐴝𐴔𐴝𐴥𐴌𐴝𐴃𐴢 𐴒𐴞𐴦𐴘𐴠𐴥, 𐴎𐴠𐴍𐴠𐴥 𐴀𐴞𐴥𐴃𐴝𐴌𐴝 𐴃𐴝𐴥𐴑𐴞𐴃𐴡. 𐴀𐴞𐴥𐴃𐴝𐴌𐴝 𐴀𐴡𐴥𐴙𐴓𐴊𐴠: 𐴉𐴞𐴃𐴡𐴌, 𐴘𐴡𐴇𐴝𐴥𐴕𐴧𐴝, 𐴘𐴝𐴑𐴟𐴁𐴢, 𐴀𐴠𐴕𐴊𐴠𐴌𐴞𐴘𐴝𐴏𐴢, 𐴉𐴞𐴓𐴞𐴥𐴂𐴢, 𐴃𐴡𐴥𐴔𐴝𐴏𐴢, 𐴁𐴝𐴌𐴃𐴡𐴥𐴓𐴡𐴔𐴞𐴘𐴡, 𐴔𐴡𐴃𐴞, 𐴀𐴝𐴓𐴉𐴝𐴥𐴘𐴧𐴝𐴏𐴡𐴌 𐴉𐴟𐴖𐴝 𐴘𐴝𐴑𐴟𐴁𐴢, 𐴏𐴝𐴥𐴘𐴔𐴡𐴕 𐴎𐴞𐴁𐴝𐴤 𐴀𐴠𐴥𐴎𐴧𐴡𐴕 𐴎𐴠𐴥𐴓𐴡𐴃𐴢, 𐴀𐴠𐴊𐴧𐴠 𐴘𐴝𐴑𐴟𐴁𐴡𐴌 𐴉𐴟𐴖𐴝 𐴘𐴡𐴇𐴟𐴥𐴊𐴝.¹⁴𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴞𐴏𐴝𐴤𐴌 𐴔𐴝𐴦 𐴔𐴡𐴌𐴞𐴘𐴝𐴔, 𐴀𐴡𐴙𐴕𐴧𐴡 𐴇𐴡𐴦𐴎𐴧𐴡𐴕 𐴔𐴝𐴘𐴝𐴉𐴟𐴀𐴝𐴙𐴕, 𐴀𐴠𐴊𐴧𐴠 𐴀𐴞𐴏𐴝𐴤𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌 𐴉𐴟𐴥𐴖𐴝𐴣𐴃𐴞 𐴀𐴠𐴑 𐴔𐴡𐴕𐴠 𐴕𐴞𐴃𐴧𐴞 𐴊𐴟𐴖𐴝 𐴒𐴡𐴙𐴃𐴧𐴡𐴥.

¹⁵𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴎𐴠𐴣𐴃𐴧𐴠𐴥 𐴃𐴡𐴑𐴡𐴌𐴞𐴁𐴝𐴕 𐴀𐴠𐴑-𐴐𐴡𐴥 𐴑𐴟𐴌𐴞 𐴎𐴡𐴕 𐴀𐴞𐴔𐴝𐴕𐴊𐴝𐴥𐴌 𐴎𐴡𐴔𐴝 𐴀𐴡𐴥𐴘𐴧𐴠, 𐴉𐴞𐴃𐴡𐴌 𐴀𐴟𐴍𐴞𐴤 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠,¹⁶”𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴞𐴏𐴝𐴤𐴌𐴠 𐴒𐴠𐴌𐴠𐴉𐴃𐴝𐴌-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌 𐴉𐴡𐴣𐴃𐴢 𐴊𐴝𐴈𐴝𐴤𐴘𐴊𐴡𐴘𐴝 𐴀𐴝𐴐𐴧𐴞𐴥𐴓𐴢 𐴊𐴠 𐴘𐴡𐴇𐴟𐴥𐴊𐴝𐴌 𐴁𐴝𐴦𐴁𐴟𐴃𐴠 𐴂𐴝𐴑-𐴌𐴟𐴀𐴘𐴠 𐴊𐴝𐴖𐴟𐴊𐴡𐴌 𐴊𐴟𐴖𐴝𐴌𐴝 𐴈𐴡𐴀𐴙𐴓𐴢 𐴊𐴠 𐴂𐴝𐴑-𐴑𐴝𐴓𐴝𐴔𐴡𐴌 𐴈𐴡𐴃𐴝𐴤 𐴇𐴞𐴥𐴀𐴕 𐴉𐴟𐴌𐴝 𐴀𐴡𐴥𐴖𐴝𐴌 𐴎𐴡𐴌𐴟𐴌 𐴀𐴝𐴐𐴧𐴞𐴥𐴓𐴢.¹⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴃𐴡 𐴀𐴝𐴣𐴀𐴌𐴝𐴌 𐴋𐴝𐴀𐴘𐴡𐴌 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴥𐴃𐴠 𐴀𐴠 𐴈𐴝𐴔 𐴒𐴡𐴌𐴞𐴥𐴁𐴝𐴌 𐴇𐴞𐴥𐴏𐴧𐴝 𐴉𐴝𐴀𐴙𐴓𐴢.“

¹⁸𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴠 𐴕𐴞𐴎𐴡𐴌 𐴑𐴟𐴈𐴝𐴔𐴡𐴌 𐴊𐴝𐴔 𐴓𐴡𐴘 𐴀𐴠𐴑𐴧𐴝𐴥𐴕 𐴎𐴡𐴁𐴞𐴕 𐴑𐴞𐴕𐴧𐴠𐴥, 𐴀𐴝𐴦𐴌 𐴇𐴠𐴥𐴍𐴠 𐴀𐴞𐴥𐴃𐴠 𐴔𐴝𐴃𐴝𐴥 𐴇𐴠𐴥𐴔𐴧𐴞𐴑𐴧𐴝 𐴒𐴡𐴥𐴌𐴞 𐴉𐴡𐴌𐴞 𐴀𐴞𐴥𐴃𐴝𐴌 𐴉𐴠𐴄𐴢 𐴉𐴝𐴥𐴍𐴞𐴘𐴡𐴌𐴠 𐴀𐴝𐴣𐴃𐴞𐴒𐴞𐴥𐴓𐴝 𐴁𐴠𐴒𐴧𐴟𐴥𐴕 𐴕𐴠𐴦𐴓𐴞𐴒𐴞𐴘𐴡𐴥𐴘.¹⁹𐴇𐴞𐴥𐴘𐴝𐴕 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴉𐴟𐴥𐴙𐴕𐴧𐴠, 𐴇𐴠𐴥𐴃𐴡𐴓𐴧𐴝 𐴎𐴝𐴒𐴝 𐴇𐴞𐴥𐴘𐴝𐴕𐴡𐴌𐴠 𐴀𐴞𐴥𐴃𐴝𐴌𐴝𐴌 𐴎𐴟𐴁𐴝𐴕𐴡𐴃𐴢 𐴀𐴝𐴑𐴠𐴓𐴊𐴝𐴔𐴝 𐴕𐴝𐴔 𐴊𐴞𐴘𐴠𐴥, 𐴎𐴞𐴘𐴝𐴥𐴕𐴡𐴌 𐴔𐴝𐴀𐴕𐴞 𐴀𐴡𐴥𐴙𐴓𐴊𐴠, 𐴓𐴡𐴖𐴢 𐴖𐴡𐴌 𐴎𐴡𐴁𐴞𐴕.

²⁰𐴉𐴞𐴃𐴡𐴌𐴠 𐴈𐴡𐴃𐴝𐴤 𐴈𐴡𐴖𐴝𐴤 𐴎𐴝𐴌𐴞 𐴌𐴝𐴙𐴑𐴧𐴞𐴥𐴓𐴢, ”𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴎𐴡𐴁𐴟𐴌 𐴐𐴡𐴥𐴌𐴞𐴉𐴡𐴃𐴢 𐴀𐴠𐴕𐴊𐴞𐴓𐴧𐴝 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤,’𐴀𐴞𐴥𐴃𐴝𐴌 𐴁𐴞𐴥𐴍𐴝 𐴇𐴝𐴥𐴓𐴞 𐴀𐴡𐴥𐴘𐴎𐴡𐴒𐴧𐴡𐴘,𐴇𐴡𐴕𐴡𐴤𐴑𐴞𐴘𐴠 𐴇𐴞𐴥𐴘𐴝𐴕𐴡𐴃𐴢 𐴕𐴡 𐴃𐴝𐴥𐴑𐴡𐴗𐴑.‘ 𐴀𐴝𐴌𐴡𐴤 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤,’𐴀𐴞𐴥𐴃𐴝𐴌 𐴎𐴞𐴔𐴧𐴝𐴊𐴝𐴌𐴞 𐴀𐴝𐴌 𐴀𐴠𐴎𐴧𐴡𐴕𐴠 𐴓𐴡𐴘𐴉𐴠𐴓𐴡𐴗𐴑.‘

²¹𐴇𐴠𐴥𐴃𐴡𐴓𐴧𐴝, 𐴀𐴝𐴣𐴀𐴌𐴝𐴃𐴧𐴟 𐴀𐴝𐴌 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴡𐴌𐴠 𐴒𐴡𐴁𐴝𐴤 𐴀𐴞𐴥𐴏𐴝𐴉𐴠 𐴁𐴝𐴏𐴞𐴥𐴓𐴡𐴖𐴝𐴌 𐴎𐴡𐴌𐴟𐴌. 𐴀𐴞𐴥𐴁𐴝 𐴀𐴠𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴃𐴧𐴟 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥 𐴎𐴠𐴃𐴝𐴌𐴝𐴤 𐴇𐴝𐴥𐴀𐴌 𐴀𐴡𐴑𐴃𐴡𐴥𐴃𐴢 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴏𐴡𐴉𐴡𐴥𐴌 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢, 𐴀𐴡𐴣𐴃𐴧𐴠𐴤 𐴎𐴠𐴣𐴃𐴧𐴠𐴥 𐴔𐴝𐴓𐴞𐴑 𐴀𐴞𐴏𐴝𐴤 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢.²²𐴘𐴝𐴥𐴕𐴞 𐴎𐴠𐴃𐴝𐴌𐴝𐴤 𐴘𐴝𐴇𐴝𐴥𐴘𐴝𐴌 𐴁𐴝𐴥𐴂𐴄𐴞𐴏𐴔𐴝𐴃𐴧𐴟 𐴓𐴡𐴥𐴃𐴞 𐴐𐴟𐴥𐴌𐴟 𐴒𐴡𐴌𐴞𐴥 𐴀𐴞𐴏𐴝𐴤𐴌𐴠 𐴀𐴝𐴣𐴀𐴌𐴝𐴌 𐴇𐴝𐴣𐴏𐴡𐴥𐴃𐴧𐴟 𐴃𐴟𐴓𐴞𐴤𐴉𐴠𐴓𐴝 𐴒𐴞𐴥𐴘𐴠 𐴊𐴠 𐴀𐴡𐴑𐴃𐴡𐴥 𐴉𐴡𐴙𐴅𐴧𐴡𐴕𐴃𐴡 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴑𐴎𐴡𐴕 𐴔𐴝𐴕𐴟𐴥𐴙𐴐𐴢 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴒𐴡𐴁𐴝𐴤 𐴁𐴡𐴕𐴝 𐴉𐴡𐴌𐴞𐴁𐴡𐴥, 𐴀𐴞𐴏𐴝𐴤 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴘𐴝𐴕𐴡𐴌 𐴒𐴡𐴁𐴝𐴤 𐴊𐴞𐴥 𐴁𐴡𐴓𐴧𐴝.“

²³𐴃𐴡𐴥𐴘 𐴀𐴞𐴥𐴃𐴝𐴌𐴝 𐴊𐴟𐴘 𐴎𐴡𐴕 𐴔𐴝𐴕𐴟𐴥𐴙𐴐𐴡𐴌 𐴁𐴝𐴦𐴁𐴟𐴃𐴠 𐴔𐴡𐴐𐴖𐴝𐴌𐴝 𐴊𐴞𐴘𐴠𐴥, 𐴀𐴠𐴎𐴧𐴡𐴕 𐴀𐴡𐴥𐴙𐴓𐴊𐴠 𐴘𐴟𐴏𐴟𐴥𐴉𐴢, 𐴎𐴞𐴁𐴝𐴤𐴌𐴠 𐴁𐴝𐴌𐴏𐴝𐴥𐴁𐴝 𐴋𐴝𐴑𐴠, 𐴀𐴞𐴥𐴁𐴝𐴌𐴠 𐴘𐴟𐴏𐴃𐴟𐴏𐴢 𐴀𐴡𐴥 𐴋𐴝𐴑𐴞𐴃𐴡𐴥; 𐴀𐴝𐴦𐴌 𐴀𐴝𐴌 𐴀𐴠𐴎𐴧𐴡𐴕 𐴀𐴡𐴥𐴙𐴓𐴊𐴠 𐴔𐴝𐴃𐴧𐴞𐴥𐴘𐴝𐴏𐴢.²⁴𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴊𐴟𐴖𐴝 𐴒𐴡𐴌𐴠𐴥𐴌 𐴊𐴠, ”𐴀𐴡𐴥 𐴔𐴝𐴓𐴞𐴑, 𐴃𐴟𐴀𐴛 𐴃𐴡 𐴇𐴝𐴥𐴀𐴌 𐴀𐴠𐴑𐴎𐴡𐴕𐴡𐴌 𐴊𐴞𐴓𐴢 𐴎𐴝𐴕𐴡. 𐴃𐴟𐴀𐴛 𐴀𐴝𐴣𐴀𐴌𐴝𐴌𐴠 𐴊𐴝𐴈𐴡𐴥, 𐴃𐴟𐴀𐴛 𐴀𐴞𐴃𐴝𐴌𐴝𐴤 𐴊𐴟𐴘 𐴎𐴡𐴕𐴡𐴃𐴧𐴟 𐴇𐴝𐴌𐴠𐴤 𐴁𐴝𐴏𐴞𐴥𐴓𐴡𐴘𐴧𐴡,²⁵𐴎𐴠𐴀𐴕𐴠 𐴘𐴡𐴥𐴒𐴧𐴗𐴝𐴘𐴠 𐴏𐴝𐴥𐴇𐴝𐴁𐴞𐴈𐴝𐴔 𐴒𐴡𐴌𐴞𐴥 𐴉𐴝𐴌𐴠, 𐴎𐴠 𐴈𐴝𐴔 𐴘𐴡𐴇𐴟𐴥𐴊𐴝𐴘𐴠 𐴀𐴠𐴌𐴞 𐴎𐴝𐴒𐴝 𐴖𐴝𐴀𐴕𐴡𐴃𐴢 𐴒𐴞𐴦𐴘𐴠𐴥𐴒𐴡𐴘 𐴎𐴞𐴘𐴝𐴥𐴕𐴡𐴃𐴢 𐴀𐴞𐴥𐴃𐴠 𐴎𐴝𐴘𐴁𐴝𐴌 𐴓𐴝𐴦𐴘𐴠𐴑 𐴀𐴝𐴐𐴧𐴞𐴥𐴓𐴢.“²⁶𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴃𐴝𐴌𐴝𐴥 𐴓𐴧𐴝 𐴓𐴡𐴄𐴝𐴥𐴌𐴞 𐴔𐴝𐴙𐴅𐴧𐴠𐴥 𐴌𐴝𐴥𐴌, 𐴔𐴝𐴃𐴧𐴞𐴥𐴘𐴝𐴏𐴡𐴌 𐴕𐴝𐴔𐴠 𐴓𐴡𐴄𐴝𐴥𐴌𐴞 𐴉𐴡𐴙𐴅𐴧𐴞𐴥𐴓𐴢; 𐴃𐴡𐴥𐴘 𐴘𐴡𐴥𐴒𐴧𐴗𐴝𐴌𐴠 𐴀𐴠𐴒𐴝𐴌𐴡 𐴎𐴡𐴕 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴃𐴢 𐴐𐴝𐴥𐴔𐴞𐴓𐴢 𐴒𐴡𐴌𐴝𐴥 𐴒𐴞𐴥𐴘𐴠.

The Word for the World International

https://app.library.bible/content/87faca8b51c22590