Jeremia25
1Judauüa lawnguan kowi kowh Thurai kowh laiklow mih Jeremia tut-e uang ting khai. Nami laiklow uang ting mih dow Juda pren kowi Josia chapa Jehoiakim chowm mang mih tali ning khe chekhai. Nakhowk khe Babulawn pren kowi Nebuknezar chowm mang mih dow paningchow taih tak chekhai.2Judauüa hai Jerusalem maru-uüa kowi risi Jeremia tek pe mih,3“Juda pren kowi Amawn kowh chapa Josia chowm mang mih laisum ning hownia 23 ning mowr CHAKRAMANG kowh laiklow mih ang tut-e uang ting khai. Nami laiklow dow plan plan ang tek enni khowk. Tawkche ang laiklow enni sünta dowi chekhai.4“CHAKRAMANG dow aia kowh nar risiuüa kowi plan plan uang chin enni khai. Tawkche naiawngün risiuüa laiklow enni sünta dowi chekhai, now ching paw enni pe dowi chekhai.5Amatni dow CHAKRAMANG kowh laiklow krawi tek mih, ‘Enni mih tiama ngak hai lup ngak hownia plan büa diah. Nahanow enni hai enni pipu-uüa kowi kowh ang peah mih pren kowi chowngchowng saksakma enni naka uowi kown.6Akeng thuraiuüa kowi nachupiia kown mih prakowi hang cham tawi krawi büa diah. Enni rut hown kowh enni thawpah mih uanh hown hauang towk ang kunmarau büa diah. Enni che towk ang kunmarau dowi hanow ang napiak enni kown nadowi,’ pakhai,” pape khai.7Jeremia plan tek mih, “CHAKRAMANG tek mih, ‘Tawkche enni dow ang laiklow sünta dowi. Sünta lak dow enni rut hown kowh enni thawpah mih uanh hown enni towk ang kunmarau hanow enni matia luk kowi enni uang pawla piakra khai,’ pakhai.8“Now kawmat dow mukuang siphaiuüa kowh CHAKRAMANG tek mih, ‘Enni dow ang laiklow sünta dowi chekhai.9Naiawng rakowi tawngphak prakowi kowh chenchapuüa kowi hai ang nar Babulawn pren mang Nebuknezar kowi ang nauang hawla pe kown. Mami pren hai aia kowh maru-uüa kowi nakingküaah kownkow hai aria aret kowi kowh chenchapuüa kowi nakingküaah kownkow amatni kowi dow ang nauang pawla pe kown. Naiawngün maru-uüa maten kowi dow asaima ang napiakta kown, now kramra uowima hai rensi küakau ang nachangah kown. Amatni kowh pren dow chowngchowng saksakma piaknama ang nachangah kown.10Now nami pren kowi kowh piaw klow, how klow, masi huaiu piaw klow hai mi tung klow ang narimta pe kown, now amatni kowh maibu nowi paw ang namitta pe kown.11Nami pren maten dow napiak bowk kown, now lainowmma kramra nauowi kown. Naiawngün chenchapuüa dow Babulawn pren mang tut-e 70 ning mowr nauowi nar kown.12Tawkche 70 ning chi kung kowi dow Babulawn pren mang hai aia chenchapuüa kowi amatni kowh angak rakowi ang naripah kown. Now Babulawn pren kowi dow chowngchowng saksakma vüi apiaknama ang nachangah kown.13Babulawn pren kowi hai chenchap maten luk kowi ang nauang pawla piakra kown mih lawnguan dow risi Jeremia tek enni khowk. Naiawngün laiklow dow chabowih kowi arui uowi bowk khowk chekhai. Nami chabowih kowi kowh arui uowi iawng nami pren kowi ang nachangah kown.14Babulawnuüa kowi dow aiukma mih chenchapuüa hai kri kraingma mih manguüa nachangla nar kown; amatni kowi dow amatni chang angak mih iawng ang naripah kown,’ pakhai” pape khai.15CHAKRAMANG Israeluüa kowh Thurai tek ang mih, “Ang hownia grep tui tek mawp mih bia paw diah. Nami grep tui dow ang kowh kunmaraura chekhai. Nami dow ang kowchin en mih chenchapuüa kowi pe khamah diah.16Amatni dow nami grep tui khamta hanow pua mih maru iawng natim bawilawi kown, now thuklama mih maru iawng nakrawi tek naklak kown. Tawngplawng kowchow panow amatni luk kowi dow tasenra ang nauang pawla pe kown,” pakhai.17Nakhowk khe CHAKRAMANG hownia dow grep tui atekma mih bia ang haipaw khai. Now aia chin ang mih chenchap tut-e ang kowkowi hanow amatni kowi dow nami grep tui ang pe khamah khai.18Nami grep tui dow Jerusalem marowchakuüa, Juda pren kowi kowh marowchakuüa, Juda pren manguüa hai maru iukuüa kowi ang pe khamah khai. Naiawng amatni kowi ang pe khamah mih dow ani hownia amatni luk kowi piakra, kramra, kharera hai piatira pauang cham ting lah pakowh chekhai.19Nami klen kowi Aigupta pren mang Faraw, aia kowh maru iukuüa, aia pren kowi kowh aluchowuüa hai aia kowh maru kowi paw nami grep tui mih ang pe khamah khai.20Aigupta kowi kowh prenlang maru-uüa, Uz pren manguüa hai Filistin pren kowi kowh Askelawn marow, Gaza marow, Ekrawn marow hai Asdawd marow manguüa kowi dow nami grep tui ang pe khamah khai.21Edawm prenchakuüa, Moab prenchakuüa hai Amawn prenchakuüa kowi ang pe khamah khai.22Tura pren mang, Sidawn pren manguüa hai sata paipra pown kowi kowh pren manguüa kowi paw ang pe khamah khai.23Dedan prenchakuüa, Tema prenchakuüa hai Buz prenchakuüa kowi paw ang pe khamah khai, now kep ngeupa sam miuüa kowi paw ang pe khamah khai.24Arab pren kowi kowh mang maten hai süngrüp süngkangma kowi kowh prenlang mang maten kowi paw ang pe khamah khai.25Zimri pren, Elam pren hai Media pren manguüa kowi paw ang pe khamah khai.26Nami klen kowi tawngphak prakowi kowh atawnchow hai alakma uowi mih manguüa kowi paw ang pe khamah khai. Nami grep tui dow lusa kowi kowh uowi miuüa chenchap maten kowi ang pe khamah khai. Bowkbowk kung kowi Babulawn pren mang paw nami grep tui mih nakham kown.27Nami kung kowi dow cham krawi tek kownkow CHAKRAMANG tek ang mih, “Mukuang siphaiuüa kowh CHAKRAMANG Israeluüa kowh Thurai tek mih, ‘Enni tut-e ang nauang chin enni tasenra kown. Naiawng rakowi grep tui iawng mih ang kowh kunmaraura dow kham büa diah, pua büa diah, hük büa diah, tim büa diah, now hang rü büah tham bowt,’ pape diah.28Tawkche amatni mih en rut hownia nami grep tui kham kown nau dowi hanow maiawng tek pe diah, ‘Mukuang siphaiuüa kowh CHAKRAMANG tek mih: Enni nakham ngengche kown takla.29Sünta, auown khe ang kowh marow kowi ang narik piakah kown, now enni kowi paw ang naripla enni kown. Enni dow naka ripra ngengche kown. Tawngplawng kowchow panow lusa maru maten luk kowi ang nauang pawla tasenra kown. Ang mukuang siphaiuüa kowh CHAKRAMANG mami laiklow tek khowk,’ pakhai.30“Kawmat dow amatni tut-e risi iawng kowtek laiklow diah.‘CHAKRAMANG dow mukuang hownia nauang iiu tüng klow kown;aia dow aia kowh chimsaima mih uowi rah hownia nauang iiu tüng klow kown,now aia prenchakuüa kowi nakingküa kownkow aia dow atünma natüng klow kown.Küa grep uih khe kowh maru chang klow mih iawng atünma aia natüng klow kown;lusa kowi kowh uowi miuüa kowi nakingküa kownkow atünma aia natüng klow kown.31Aia kowh klow dow prenchur nammowt hownia pat nata kown,chenchapuüa maten kowi aia mih napeah aprek kown.Aia dow maru maten kowi nachet pe tara kown,now maru ngakuüa kowi dow saidawng hown aia nasaiah kown,’ pape diah,” pakhai.32Mukuang siphaiuüa kowh CHAKRAMANG tek mih,“Sünta, phih dow mami chenchap hownia alowk mih chenchap tut-e krawi tauet khai.Prenchur nammowt hownia dow liku uangchak iawng mih piakra tarowng khai bowt,” pakhai.33Nakhowk khe CHAKRAMANG saita mih maru-uüa dow mami lusa mapra chur hownia paipra chur mowr natakuakla pan kown. Amatni vüi kowi amiapaw nauowila uiting uangtak kown nadowi. Amatni kowh uak dow amiapaw nakuaah kown nadowi, now dup paw nadupah kown nadowi. Tawkche amatni dow krawng kowi kowh takuakla pan mih chia kih iawng natakuakla pan kown.34Aw angakma mih ruapur thing miuüa, kar hai uowila uiting uangtak büa diah;aw aluchowuüa, se dawng kowi taiüa büa diah.Tawngplawng kowchow panow nasaita enni kown mih khin dow uang ting khai bowt,enni dow klangiungma mih bia teu mih iawng natapiak nak kown.35Enni dow naia tapet kown nadowi,now powt paw enni naia powt kown nadowi.36Ruapur thing miuüa kowh kar klow sünta büa diah,now aluchowuüa kowh kar meng tün sünta büa diah.Tawngplawng kowchow panow amatni kowh ruapur thing rah süng dow CHAKRAMANG piakta pe nak khowk chekhai.37Athaulangma mih dowm ün dow apiaknama naown kown;nami dow CHAKRAMANG kowh kunmaraura hown apiaknama mih süng iawng nauowi kown.38Aia kowh uowi rah hownia aia dow krangsi iawng nauang lawt kown;CHAKRAMANG kowh kunmarau hai ransu-uüa kowh saidawng hown amatni kowh pren dow napiak kown.
The Seed Company