2 Krungchakuüa9
1Seba pren kowi kowh masiuüa mang dow mang Sawlawmawn kowh ming iung nang iung tawi ta khai. Naiawng rakowi nami masiuüa mang dow Sawlawmawn kowi nauang chaingah kownkow uang khai. Aia dow maru kawm hai ut hawmh ün uang pawla now Jerusalem marow kowi uang khai. Ut luk kowi dow nam iungma mih chap, kuh hai asung khakma mih hua ahuma aia uang pawla khai. Aia dow mang Sawlawmawn tut-e uang ting hanow aia sak kowi kowh lüntakra uowi mih maten lüntaah khai.2Now Sawlawmawn dow nami masiuüa uang lüntaah mih maten hawt tek pe khai. Aia nowng klangah dowi mih akratma mih tawngpaw uowi dowi chekhai.3Nahanow nami masiuüa mang dow Sawlawmawn chanlaima pami tuk khai bowt. Aia dow Sawlawmawn thawpah mih mang kim paw khi khai.4Nami klen kowi pawitang kowi kowh chakkham ün, aia maru iukuüa kowh uowi rah ün, aia maru-uüa khupah mih tawnguat klangiungma mih ün, aia kowh tui pek mih maru-uüa kowi ün hai CHAKRAMANG kim kowi changla tikah mih uanap mih tawncher hu mih ün paw nami masiuüa mang khila khai. Naiawngün khita hanow aia dow awda khai.5Mang Sawlawmawn kowi aia tek pe mih, “Ang matia pren kowi ang uowi khe kowh en kowh lup hai en kowh chanlaira lawnguan kowi ang ta mih na khai nowm!6Nachenganchepaw makowi uangah khükhü ang mik hown ang uang khi dowi matchang naiawngün lawnguan ang owm dowi chekhai. En lawnguan kowi kowh ang tawi taah mih dow dawnglang khowm uowi dowi tak chekhai. En kowh chanlaira hai dawngthawnguan dow maru uang tek ang mih lak-e lang hu chekhai.7En kowh maru iukuüa dow lainowmma kaucha iuk! Tawngplawng kowchow panow amatni dow en pur uowi reng chekhai, now en kowh chanlaira laiklow ta reng chekhai.8CHAKRAMANG en kowh Thurai dow akiow pauowi lah. Aia dow awmrawm en kowh Israel kowi kowh mang chowm rah kowi pe chowm en khai. Aia dow Israeluüa kowi chowngchowng saksakma sakrauah reng rakowi tara nowm hai achinawmma nauowila reng kownkow thawp en mang mih chekhai,” pakhai.9Seba pren mang mih mang Sawlawmawn kowi kuh 100 mawn lak-e hu, nam iungma mih chap hai asung khakma mih hua ün ahuma peah khai. Nam iungma mih chap mang Sawlawmawn kowi Seba pren mang peah mih iawng iung mih pren kowi katpaw khi dowi tak chekhai.10(Nami klen kowi Hiram kowh chawnlawngün dow Ofir hownia kuh ün uang pawla pe khai. Now almuk singh hai asung khakma mih uanh ün uang pawla khai.11Mang Sawlawmawn dow naiawngün almuk singh mih CHAKRAMANG kim hai mang kim vüi changla achüng khai, now meng sarauüa vüi tingteng hai taraw paw aia thawpla khai. Naiawng khowt mih almuk singh hu dow ani mowr kowi katpaw pren kowi uang pawla dowi tak chekhai, khi paw khi dowi tak chekhai).12Mang Sawlawmawn mih Seba pren masiuüa mang lüah mih maten peah khai. Aia kowi nami masiuüa uang peah mih lak-e nami masiuüa kowi aia peah mih lang hu chekhai. Nami kung kowi dow masiuüa mang mih aia kowh maru-uüa hown aiamat pren kowi kowmang khai bowt.13Ning towng mang Sawlawmawn tut-e kuh uang ting reng mih dow 25,000 set ngia chi chekhai.14Nami klen kowi kun chang miuüa, Arab pren manguüa hai Israel pren kowi kowh kruitown miuüa hownia paw kuh hai tai uang ting reng chekhai.15Mang Sawlawmawn dow phengah mih kuh hown kawngma aiukma mih 200 klüng hai achachow mih 300 klüng thawpla khai. Naiawngün aiukma mih kawngma lowk kowi kuh lakke mih dow raiat set ngia chi, now kawngma achachow mih kowi dow lowk kowi pre set ngia chi chekhai. Naiawngün dow Lebanawn Kaurawng Kim kowi aia towah khai.17Akung kowi mang Sawlawmawn mih ngasai sa hown mang chowm rah aiukma mih thawp lowk khai, now nami mang chowm rah dow kuh achangma mih hown sowah khai.18Nami mang chowm rah dow apün müa abowk uowi taruk bowk chekhai. Nami chowm rah pur kowi dow khawk tangra uowi lowk chekhai. Naiawngün abowk towng mapra ret lowk paipra ret lowk chi krangsi rup uowi laipre buk chekhai. Nami mang chowm rah kung pra kowh tane müa aluk prakowi dow uilumma chekhai. Now chowm rah hawmlawm pra hai lakuai prakowi dow bawng tangra uowi chekhai, now bawng tangra ria kowi dow krangsi rup iowng dawnglawng chekhai. Naiawng mih mang chowm rah dow akeng pren kowi miapaw thawp dowi chekhai.20Sawlawmawn kowh tui kham bia dow kuh hown kowh thawpah mih kangowh chekhai. Now Lebanawn Kaurawng Kim kowi kowh pu bia aikam paw achangma mih kuh hown kowh thawpah mih kangowh chekhai. Mang Sawlawmawn chowm mang mih khin khe dow tai mih mapaw asung uowi dowi. Naiawng rakowi aia kowh dow tai hown kowh thawpah mih uanh tawngpaw uowi dowi chekhai.21Mang Sawlawmawn kowh chawnlawng paw cham tawi chang kun kownkow mang Hiram kowh chawnlawng hown cham tawi kowi reng chekhai. Mang Hiram kowh chawnlawng te miuüa mih mang Sawlawmawn kowh chawnlawng te miuüa kowi tawi khowng te pe chawnlawng reng chekhai. Naiawngün chawnlawng dow sum ning e pakat chi uang plan hanow kuh, tai, ngasai sa, iuk hai uahaw ün uang pawla reng chekhai.22Naiawng rakowi mang Sawlawmawn dow lusa kowi kowh akeng mih manguüa maten lak-e lang kureng hai lang chanlai chekhai.23Sawlawmawn kowi kowh Thurai peah mih chanlaira hownia kowh laiklow nauang tawi sünta kownkow pren maten hownia manguüa uang khai.24Uang miuüa maten dow kuh uanh tai uanh, khupdip tawngklai, tasen müa rutchün khawkleng, nam iungma mih chap, kawrnga hai kawrngaramchük ün mang Sawlawmawn vüi uang pawla pe reng chekhai. Aia dow naiawng ning towng hawt ka reng chekhai.25Naiawng hai Sawlawmawn kowh dow kawrnga kari hai kawrnga mih ahuma uowi khai. Aia kowh kawrnga kawm dow 12,000 pum chekhai. Naiawngün kowi dow kawrnga kari towk rah marow kowi ne, now aia uowi rah Jerusalem marow kowi ne aia towah khai.26Aia dow Iufratis aw hownia Filistinuüa kowh pren hai Aigupta pren sünghi mowr kowi kowh mang uowi mih maten luk kowi aia kruitownah khai.27Mang Sawlawmawn chowm mang mih khin khe Jerusalem marow kowi kowh tai hu krang dow hua iawng towbowt, now sidar sing hu krang paw awkaw kowi kowh uidut singh iawng towbowt.28Now mang Sawlawmawn kowh kawrnga dow Aigupta pren hownia hai akeng pren hownia kowh uang pawla mih chekhai.29Mang Sawlawmawn changah mih lup lawnguan maten dow chabowih sum buk mih kowi arui uowi chekhai. Naiawngün dow Risi Nathan ruiah mih bowih, Silo marow hownia kowh Ahija ruiah mih bowih hai Nebat kowh chapa mang Jeroboam lawnguan kowi kowh risi Ido kowh mukmang bowih kowi arui uowi chekhai.30Mang Sawlawmawn dow Jerusalem marow kowi kowh Israel chenchap maten luk kowi 40 ning mowr chowmla mang khai.31Nami kung kowi aia dow kowng hanow David marow kowi maru dupah khai. Aia takcha kowi dow achapa Rehoboam mih ta chowm mang khai.
The Seed Company