2 Krungchakuüa8
1CHAKRAMANG kowh kim hai aiamat kowh kim chang kowi 20 ning mang Sawlawmawn tating khai.2Nami lup chang chur kung kowi aia dow Sur pren kowi kowh mang Hiram peah mih kua maten plan thawpah khai iawk. Now naiawngün kua kowi dow Israeluüa kowi aia pe uowiah khai.3Nami kung kowi mang Sawlawmawn dow Hamat-Zoba marow kowi kowkowi hanow nami marow dow powngta pe khai.4Aia dow süngrüp süngkangma kowi kowh Tadmawr marow hai Hamat süng kowi dawngthawnguan towk rah marow plan thawpah khai.5Now aluk kowi kowh Bet-Hawrawn marow hai adak kowi kowh Bet-Hawrawn marow tap mih tapplawt hai aklia müa hailawm akhawtma aia thawpah khai.6Nami klen kowi Balat marow hai chakkham nungra marow maten, kawrnga kari hai kawrnga luk kowi kowh chowm miuüa vüi marow ün aia thawp pe khai. Aia dow Jerusalem, Lebanawn hai aia krüa kowi kowh uowi mih pren maten kowi aia nau thawpah kown mih srui krawi thawpta bowk khai.7Nami khin khe paw Israel krungchak nadowi mih Hituüa, Amawruüa, Perizuüa, Hivuüa hai Jebus chenchapuüa dow pren kowi ta sing uowi reng tak chekhai.8Amatni kowi dow Israeluüa saita bowk dowi chekhai. Amatni kowi dow mang Sawlawmawn mih pe changah nar lup khai. Amatni dow ani mowr paw chang nar lup büah reng tak chekhai.9Nachenganchepaw Israeluüa kowi tarapdow aia pe changah nar lup dowi chekhai. Nami takcha Israeluüa kowi dow tasen mih siphai, aia kowh maru iuk, aia dak kowi kowh pren kruitown mih, aia kowh siphai aluchow, aia kowh kawrnga kari te mih hai kawrnga luk kowi kowh chowm mih siphai hawmh aia thawpah khai.10Nami klen kowi nar lup chang miuüa kowi kowh mingkhet mih maru iukuüa paw mang Sawlawmawn kowh dow uowi 250 ia chekhai.11Now Faraw chama Sawlawmawn kowh masi dow David marow hownia lawt hanow aia vüi kowi kowh mang Sawlawmawn thawp pe mih kim kowi uang uowi khai bowt. Nakhowk khe Sawlawmawn tek mih, “Ang kowh masi dow Israel mang David kowh kim kowi nauowi kown nadowi bowt. Tawngplawng kowchow panow CHAKRAMANG kowh sangbowk laitawm tawkpla krawi uowiah mih rah maten dow chimsaima chekhai,” pakhai.12Thurai chup kim kimpuk re-e kowh mang Sawlawmawn thawpah mih CHAKRAMANG kowh phuchuara luk kowi dow CHAKRAMANG vüi tikah mih uanap pawi chang reng chekhai.13Aia dow Mosi ana pek iawng Tanai Ni, Lacher Pawi hai paning kowi sum kat mih pawi chang reng chekhai. Paning kowi sum kat mih pawi dow The pe tuah dowi mih kawm Pawi, Bowthowk Pawi hai Te Pawi chekhai.14Mang Sawlawmawn dow a-pa David ana pek iawng uamowuüa kowi natawi khowngah lup chang kownkow Leviuüa kowi athum athumchow bakah khai. Now ni towng kowh lup uowi iawng natek rowsi meng kownkow hai uamowuüa kowi natawi khowngah lup chang kownkow aia mih Leviuüa kowi towah khai. Now tapplawt towng nachawng kang kownkow kangchawng miuüa kowi athum athumchow bakah khai. Tawngplawng kowchow panow naiawng nachang kown mih ana dow Thurai maru David pela pe mih chekhai.15Uamowuüa hai Leviuüa dow uanh towk rah lawnguan kowi hai akeng mih lawnguan kowi kowh mang David kowh ana pek iawng chün büah khai.16Amatni dow mang Sawlawmawn kowh lup maten CHAKRAMANG chup kim vüi uown phük kimchüng hownia achur pat klangiungma changah khai. Naiawng hai CHAKRAMANG kowh kim thawp dow chur khai.17Nami kung kowi mang Sawlawmawn dow Eziawn-Geber hai Elawt pami arah kowi kowkowi khai. Naiawngün arah uowi mih dow Edawm pren kowi kowh sata pang kowi chekhai.18Mang Hiram dow chawnlawng pre sum buk hai chawnlawng te kiakma miuüa kowi mang Sawlawmawn kowi nakowsa pe kownkow aia kowh maru-uüa kowi kowchinah khai. Amatni bowkbowk dow Ofir pren kowi chawnlawng hown kowkowiah hanow mang Sawlawmawn vüi uang pawla pe kuh 16,200 set ngia khai.
The Seed Company