2 Krungchakuüa28
1Juda pren kowi Ahaz chowm mang mih dow pirmi ning khe chekhai. Aia dow laitaruk ning mowr Jerusalem marow kowi chowmla mang khai. Aia dow CHAKRAMANG mik kowi aiungma mih lup a-pu David chang iawng tawi chang dowi chekhai.2Aia dow Israel manguüa iawng tawi chang angak khai. Now aia nachupiiaah kownkow kri hown thawp Baal thurai rup khai.3Now aia dow Ben-Hinawm lawngrawi kowi chang tawncher phuchua khai. Aia dow aia kowh chapa kowi khowm padow maih kowi nawmah hanow phuchuala arup khai. Naiawng hai Israeluüa pur hownia kowh CHAKRAMANG prütta mih chenchapuüa iawng suiiai kaniaima mih lup aia tawi chang khai.4Aia dow arah kroma mih kowi kowh chupiiara kowi ün, hungh luk kowi ün hai aram chakma mih singh klim towng kowi ün tawncher hown chang phuchua reng chekhai. Now nam iungma mih maikhük paw towk reng chekhai.5Ahaz kowh naiawngün angak rakowi aia kowi dow CHAKRAMANG aia kowh Thurai mih Siria pren mang rut kowi ap-ah khai. Aia dow Siriauüa tut-e tasen sum khai, now aia kowh siphai sangrum mih kowi paw khümla hanow Damaska marow kowi pawla khai. Aia kowi mih Israel mang Peka rut kowi paw ap-ah khai, now Israel mang dow aia kowh siphaiuüa kowi ahuma saita pe khai.6Remalia chapa Peka dow pani sang Juda siphai 120,000 ia kowi saiah khai. Tawngplawng kowchow panow Judauüa dow amatni pipu-uüa chupiiaah mih CHAKRAMANG Thurai kowi nuata khai.7Efraim chenchap tasen mih siphai Zikri dow mang Ahaz kowh chapa Maseia, mang kim khet mih maru iuk Azrikam hai mang Ahaz dak kowi kowh lang kri mih Elkana büah kowi saiah khai.8Now Israel siphaiuüa dow Judauüa kowh masi hai chauüa kowi khümla 200,000 ia büah khai. Now nakowi kowh dawngthawnguan paw Samari marow kowi ahuma pawla büah khai.9Samari marow kowi dow CHAKRAMANG kowh risi Oded pami uowi lowk ia chekhai. Israel siphaiuüa Samari marow kowi uang plan mih khin khe risi Oded dow amatni hown hawt takrum khai. Now Israel siphaiuüa kowi risi Oded tek pe mih, “CHAKRAMANG enni pipu-uüa kowh Thurai dow Judauüa luk kowi lainowmma kunmarau khai. Naiawng rakowi Judauüa kowi dow CHAKRAMANG mih enni rut kowi apta enni khai. Tawkche enni dow amatni kowi mapaw saksing sanaah dowi matchang saiah khai. Nami satang dow Thurai tut-e ting khai bowt.10Now kawmat dow Judauüa hai Jerusalem marow kowi kowh maru-uüa kowi enni nachangla nar kown mih enni ka tuak khai. Tawkche enni paw CHAKRAMANG enni kowh Thurai tut-e enni chang ngak mih enni tuk dowi ü?11Naiawng rakowi ang kowh laiklow sünta büa diah. Enni uang khümla mih Judauüa kowi tainau-uüa iawng tuakah now amatni pren kowi pe mangta büa diah. Tawngplawng kowchow panow CHAKRAMANG kowh kramra uowima mih kunmaraura dow enni luk kowi uang ting khowk,” pakhai.12Israel aluchowuüa dow risi Oded kowh laiklow nauta ne khai. Naiawng rakowi amatni dow tasenra hownia uang mang mih maru-uüa pur kowi hawt iowng büah khai. Naiawngün Israel aluchowuüa dow Jehohanan kowh chapa Azaria, Mesilemawt kowh chapa Berekia, Salum kowh chapa Jehiskia hai Hadlai kowh chapa Amasa büah chekhai.13Nakhowk khe amatni hawt tek pe mih, “Naiawngün maru-uüa kowi enni nauang ia pawla kown nadowi. Enni che uang pawla hanow CHAKRAMANG tut-e a-i chang lup ngak mih chekhai. A-i kowh ngak aiawng uowi mih klen kowi enni uang plan bawng angak iawk kown ü? A-i kowh angak aiawng uowi towbowt, now CHAKRAMANG kowh kramra uowima mih kunmaraura paw a-i luk kowi uowi khowk,” pakhai.14Naiawng rakowi siphaiuüa dow naiawngün uang khümla mih maru-uüa hai uang kala mih uanh aluchowuüa hai maru kawmuüa pur kowi towah khai.15Nami kung kowi Israel aluchowuüa dow Israel siphai hawmh uang pawla mih dawngthawnguan hownia khupdip tawngklai pawah now uang khümla mih maru-uüa pungmadawng kowi kowh tengiow tengklaima miuüa kowi khup pe khai. Now amatni kowi dow tawnguat, phanaikhawk hai chakkham mih peah khai, now ka arau miuüa kowi dow aia phawk pe kanrawn sau khai. Nowng mang dowi miuüa kowi dow kawrngaramchük luk kowi tangla now amatni uowi rah Jeriko marow kowi uang plan saah büah khai. Nami kung kowi amatni dow Samari marow kowi uang plan büah khai.16Nami khin khe mang Ahaz dow Asuria mang tut-e kowlü khowng khai.17Tawngplawng kowchow panow Edawm siphaiuüa dow Judauüa kowi uang plan senah hanow khümla sangrum büah khai.18Now Filistinuüa dow Juda pren kowi kowh awkaw kowi kowh marow hai Negeb süng kowi kowh marow kowi krawi senah khai. Amatni dow Bet-Semes, Aijalawn, Gederawt, Soko Timna hai Gimzo marow ün krawi powngta pe khai. Now naiawngün marow riaret kowi kowh kua maten paw krawi powngta pe khai. Nahanow naiawngün arah maten kowi amatni krawi hing uowi khai.19CHAKRAMANG dow mang Ahaz kowh ngak rakowi Judauüa kowi kuakah sum khai. Tawngplawng kowchow panow Ahaz dow Judauüa kowi pe changah ngak ngamlam khai, now aia paw CHAKRAMANG luk kowi mapaw kaah sakowm dowi chekhai.20Naiawng rakowi Asuria mang Tiglat-Pileser dow aia tut-e uang hanow khowngah lak dow aia kowi uang senah khai.21Nakhowk khe mang Ahaz dow CHAKRAMANG kim, mang kim hai Juda aluchowuüa hownia asung khakma mih dawngthawnguan pawah now Asuria mang kowi krawi sa pe khai. Nachenganchepaw Asuria pren mang saktuak dow taklowi dowi chekhai.22Naiawng akrat pusa hown aia uowi khowk chepaw aia dow CHAKRAMANG luk kowi lang kaah sakowm dowi iawng uowi ngamlam chekhai.23Aia dow Damaska marow kowi kowh thuraiuüa vüi chang tawncher phuchua khai. Tawngplawng kowchow panow aia ka tuak mih, “Aram manguüa kowi naiawngün thuraiuüa mih khowngah khai. Naiawng rakowi ang nakala khowng kownkow naiawngün thuraiuüa vüi ang nachang pe tawncher phuchua kown,” pakhai. Tawkche aia hai Israel maten luk kowi piakra uang ting mih dow naiawngün thuraiuüa kowi chupiiara kowi chekhai.24Ahaz dow Thurai chup kim kowi kowh uanh mih arasang chunah hanow tawpta neknek khai. Now CHAKRAMANG kim kowi miapaw uang ia chupiia dowi kownkow aia dow kimbüng maten krawi büngta bowk khai, now Jerusalem marow kowi kowh arah towng kowi dow akeng thuraiuüa vüi krawi thawp phuchuara khai.25Aia dow akeng mih thuraiuüa vüi nachangla phuchua kownkow Juda pren kowi kowh marow hai kua kowi arah kroma mih kowi kowh chupiiara krawi thawp khai. Naiawng hai CHAKRAMANG aia pipu-uüa kowh Thurai kowi aia towkah kunmarau khai.26Ahaz changah mih lup lawnguan maten dow auown hownia achur pat “Juda hai Israel Manguüa Lawnguan” pami bowih kowi arui uowi bowk chekhai.27Akung kowi Ahaz dow kowng hanow Jerusalem marow kowi maru dupah khai. Tawkche Israel manguüa chengrawng kowi nadowi chekhai. Now aia takcha achapa Hezekia mih ta chowm mang khai.
The Seed Company