O Hu-hulo'o3
1Ma moi geena, o haubayanga ma oraha geena la o ta'o haange o wange i'umulu'o'au, de o Petrus de o Yohanes yohi'aie ma Jou ma Dutu awi Woade.2'Ido'a o ngoana ma amo'o'a nage yohironga <<O Ngoana 'Ira-rahai>>, geena'a womatengo wopa-paluga 'awomaboanohi. O nyawa guuna o wange 'ihinoimi o nyawa wiaha'a geena'a la o pipi womaga-gaaho'o o nyawa-nyawa'a nage ma oraha yoohama ma Jou ma Dutu awi Woa ma bibini'a.3Ma oraha wo'ima'e o Petrus de o Yohanes yoohamou ma Jou ma Dutu awi Woa ma bibini'a, de o pipi wogaaho'o.4Ho ona wige-gelelo una'a de o Petrus wotemo, <<Bee'a nomagelelono ngomino!>>5Geena'a de o nyawa guuna wo'ige-gelelo de womahinganono done aha o 'o'iani wi'ula.6Ma o Petrus wotemo una'a, <<To ngoi 'ai pipi 'amaile ma ma 'a'oiwa. Ma o'iau naga demaena ngoio'a, geena toni'ula: Ho de ma Yesus Kristus o Nazaret ma nyawa Guuna awi 'uaha, ngoi tonihulo'o nomagoa'ie la notagi!>>7Geena'a de wopa-paluga guuna awi giama ma guida'a o Petrus wagagao de widuhunu wigoa'a de 'aihigila'au 'i'uata o nyawa guuna awi dou de awi pupuungu.8Geena'a de una womatebulu womagoa'a, de womulaenge wo'a-'adagi wai'a waino. De aha una de o Petrus de o Yohanes yomahidoohama ma Jou ma Dutu awi Woa bibini'a, ena womadagi ma de womatebu-tebulu de ma Jou ma Dutu wihilamo-lamo'o.9De o nyawa moi-moi wima'e una wotagi-tagi ma de wihilamo-lamo'o ma Jou ma Dutu.10Geena'a de ona wina-na'o na'o 'una geena wotabagaaho'o nage biaha wogogelu'u <<O Ngoana 'Ira-rahaio'a>> Ma Jou ma Dutu awi Woa'a. Hiadono ona duru yoheranga 'o'iau idadi una'a.11O nyawa guuna 'awo'inii-nii'i o Petrus de o Yohanes. De ma oraha ona yahaange yaadoni'a o ngii moio'a nage yohironga <<O Salomo awi Terasa>>, O nyawa moi-moi yo'ihiigilolitino hababu duru yoheranga.12Wa'utu o Petrus wo'ima'e o nyawa-nyawa goona, de wotemo, <<Ee ri-riadoto o Israel ma nyawa-nyawa, dodoau ho nioheranga woai'i? De dodoau ho nioge-gelelo ngomino? Harage de nia niatibangu'u o nyawa nuuna woai'i hababu 'a to ngomi mia 'uaha de mia wowango itiai?13Ma Jou ma Dutu nage o Abraham de o Ishak de o Yakub wihuba-huba, to ngone nanga edete de nanga dotumu wihuba-huba, Unau guuna wodiaio'au o nyawa wipuji de wihoromati o Yesusi'a, to Una awi Gilaongo. O Yesus guunau nage moiu'u niwiolu'u o de niwihigiama ma hoato'au ma o gubernur Pilatusi'a la wihu'umu, wa'utu o Pilatus womau wipidili.14Una Wotiai de wowango duga 'a wileleani ma Jou ma Dutu, ma ngini 'aniwiolu'u de niogaaho'o la o Pilatus wipidili woto-tooma womatengongini'a.15Nginiou, ri-riadodoto, ninitooma o Yesus, 'ena momongo Unau geena o nyawa moi-moi manga wowango matiti. Duga ma Jou ma Dutu wihimomi'o'au ngaro wohonengo'au ma. Ngomi ma hirete mia ha'ihii geena.16Ngini niwina'o nyawa nuuna ma hila wopaluga, niwima'e una woai'o'au. Una woai'o'au mangale wonga'u o Yesus awi 'uaha. Hababu wonga'u o Yesusi'a ho 'igou-goungu woai'o'au tingini niabiono'a neena.17E, Ri-riadoto! Ngoi tana'o o'iau naga gee ngini de nia balu-baluhu niodi-diai o Yesusi'a, geena ma hababu ngini 'aniana'owa 'o'iau niodiai.18De geenau ma Jou ma Dutu wodiai idadi 'o'iau naga gee wohingahuo'au ma nge'omo o nabi moi-moi geena la ma 'Oana o Nyawa Wohiha-halamata nage ma Jou ma Dutu wohijajio'au halingou wohangihara.19Hababu geena ri-riadodoto, niotoba o baradoha niodiai de niolio ma Jou ma Dutu'a la nia baradoha wai'ili.20La ma Jou ma Dutu aha wodiai nia hininga 'ihanaanga, de Una wohulo'o o Yesus aha woboa ngini'a, hababu ma Jou ma Dutu wiili'o'au Una ma ngale wodadi o 'Oana o Nyawa wohiha-halamata.21Una halingou womanoa o horogaa'a hiadono ma Jou ma Dutu wodiai 'o'iau hona moi-moi ma hungi, harage de 'a ma hilahi ma Jou ma Dutu wotemo'au ma nge'omo awi nabi-nabi'a nage 'awile-leani Una'a.22Ma nabi Musa wotemo, <Ma Jou ma Dutu tingini nia Jou aha wigoa'a o nabi moi naga nginino, harage de ngoioli woigoa'a. Ngini halingou niwihigihene o'iau naga moi-moi nage wotemo ngini'a.23Nagoonau wihigihenua o'iau naga gee o nabi guuna wohidemo, ona aha yohi'atinga'a ma Jou ma Dutu awi 'awaha'a de yo'ibinaha!> >>24Geena'a de o Petrus wotemoli, <<O nabi gee yohingahuo'au o habari ma Jou ma Dutuno, 'imulaenge ma Nabi Samueloka de ino o nabi-nabi ma regu yotu-tuuluno, moi-moi goona yohidemo'au ma hilahi ma ngale o oraha neena.25Ma Jou ma Dutu awi jaji moi-moi nage o nabi yohidemo-demo'au, geena ma dumutu ngini'a. De ma Jou ma Dutu yoma'ajaji nia edete de nia dotumi'a, geena dau ma doda'a ma Jou ma Dutu wotemo o Abrahami'a onane: <Ma ngale ani ngoa'a de ani danongui'u, Ngoi aha tohibara'ati o hagala nyawa o dunia'a.> >> O jaji geena ma dumutu ngini'ali ma.26<<Hababu geena ma Jou ma Dutu wigoa'a awi Gilaongo wohingou-ngounu, de wihulo'o wohilano nginino la niwihibara'ati ngini'a. Niwihibara'ati ma nge'omo Una niwiduhunu nimatogumu o baradoha niodiai.>>
The Seed Company