O Hu-hulo'o2
1Ma oraha o Yahudio'a yadiai manga bira ma hihawu ma Wange gee yohironga o Pentakosta yaadono de o nyawa yonga'u-nga'u yomapoluno o ngii moio'a.2Itodo'anino ena yoihene ena harage de o rato ma luluhu da'uu'u o diwangu'u, ma luluhu geena o woa moi yomalomu-lomuno'a gee yaluwungu'u.3De yama'e o 'iau moi harage de o u'u 'ito'a-to'ara nage ma rupa harage o ahi-ahili 'i'a-'adagi de yo'iduguti ona'a yo'imoi-moi.O Omaha 'Iofi-ofi harage de u'u 'ito'a-to'ara ma rupa ho 'ao ahi-ahili yo'iduguti4Geena'a de o Omaha 'Iofi-ofi yo'iparetano ho ona yomaade-ade de o nyawa ma regu manga demo imote'e o Omaha 'Iofi-ofi 'i'ula'au ona'a.5Ma oraha geena o Yahudio'a ma nyawa naga o daeraa 'i'ini-'ini'ino o dunia'a neena, yomanoa o Yerusalemo'a. Ona geena wihingounu ma Jou ma Dutu'a6Ma oraha yoihene ma luluhu geena de o nyawa duru manga lepe'a yoboa yomalomu. Ona moi-moi ge yo'itodo'ana hababu yoihene o nyawa yonga'u-nga'u goona yomaade-ade imote'e to ona nage yoihe-ihene manga demo moi de moi.7Ona moi-moi duru yoheranga ho yotemo, <<Wae! Yomaade-ade goona moi-moi o Galileano to?8De cara'iau ho ngone poihene ona yomaade-ade de to ngone moi de moi nanga demo?>>9Ngone o Partia ma nyawa, o Media ma nyawa, o Elam ma nyawa, o Mesopotamia ma nyawa, o Yudea ma nyawa, o Kapadokia ma nyawa, o Pontus ma nyawa de o Asia ma nyawa,10o Frigia ma nyawa, o Pamfilia ma nyawa, o Mesir ma nyawa, de o Libia ma daeraano o Kirene ma dateo'a. De ngone'a o Romano ma yoboano,11o Yahudio'a, de 'a o Yahudio'awa, ma yoohamo'au o Yahudio'a nanga agamano. De maenali ma yoboano o Kreta ma nyawa de o Arab ma nyawa. Ma ngone moi-moi poihene ona yomaade-ade de to ngone moi-moi nanga demo nage o'iau hona 'ihera-heranga ma Jou ma Dutu wodiai.12Ona moi-moi duru yoherana ho yoma'ahano moi de moi, <<Wae neena ma mangariti o 'iau?>>13Ma naga maregu ma yo'ihohedu. Ona yotemo, <<La o nyawa noona 'ayo'ieto'u!>>14Geena'a de o Petrus de o hu-hulo'o maregu yamogioo'o de moi yomagoa'a ho o Petrus waamo-amo'ie wotemo o nyawa yolepe-lepe'a goona onane, <<Ri-riadodoto, o Yahudio'a ma nyawa de moi-moi ma nage nimanoa-noa o Yerusalemo'a! Nioihene nihidi-diai hababu neena halingou tohingahu ngini'a.15Ngomi 'a mietowa harage de nia niadi-dibanga. Neena aha o ta'o hiwo o de-dewelanohi ho. 'Amoiwa yo'ieto o ta'o oneena de.16Ma geena, ma Jou ma Dutu wohingahuo'au ma nge'omo o Nabi Yoel :17Ma Jou ma Dutu wotemo, <Ma oraha o dunia ma baha yaadonou,Ngoi aha tohiguti 'ai Omaha o nyawa'a moi-moi.Ho aha nia ngoa'a o naulu de o ngewe'a yohingahu 'ai demo nage tohingahuo'au ona'a.Nia do-doguulu de niamo-moholehe aha yama'e o mama'e gee to'ihimaiti.Nia balu-baluhu aha yonanele ma ngale o nanele gee Ngoi to'i'ula'a.18De o nyawa-nyawa gee 'ile-leleani o naulu e'ola o ngewe'aaha to'i'ula 'ai Omaha ma oraha geena.De ona aha yohingahu to Ngoi 'ai demo.19Ngoi aha todiai o haala 'ihera-heranga da'u o diwango'a,de o dudunguu 'ila-laagomo o dunia'a neena;done aha naga o aunu de o u'u, de o dowo 'i'i-'ipirini.20O wange ma la'o aha italuhu,de o mede iterebo'o harage de o aunu.Geena idadiohi ihila, aha de ma Jou Awi wange 'iboa,mangale wo'iadili o nyawa moi-moi.Geena o wange ma amo'o de i'u'umati.21De nagoonau bato yomahigaho'o ma Jou'a,aha yo'ihihalamata!>22E, ri-riadodoto o Israel ma nyawa, niohigihene o'iau naga ge tinihidemo neena: O Yesus o Nazaret ma nyawa guuna ma Jou ma Dutu wiili'o'au de wi'ula'au o 'arajaanga. Ma Jou ma Dutu wohinyata ngini'a de o haala 'ihera-heranga de o du-dunguu 'ila-laagomo tingini nia hidogorona'a ma nge'omo o Yesus guuna. Geena moi-moi ri-riadoto, ngini mahirete niana'o'au.23Ma ngaro niana'o'au geena, ngini niwihigiama ma hoato'au o nyawa yoti-tingi'ai'a, ho wihidele o Salipo'a hiadono wohonenge. Geena 'aimatero de ngini niwitooma. Ma geena ma Jou ma Dutu awi dumutu de awi mau 'a ma hilahi, Una ge wihigiama ma hoata o Yesus ngini'a.24Ma ma Jou ma Dutu wihiwango'ali de wihipidili naga o hangihara'a o honengo'a. Ma Jou ma Dutu wihimomi'o'au hababu Una o hongene 'ayaa'unuwa wiparetano.25Geena harage o Daut wohidemo'au ma hilahi mangale o Yesus, <Ngoi 'aitauri'a towima'e ma Jou 'ai biono'a.Una 'aitauri'a naga de de ngoi ho ngaro o'iau naga bato ma 'atohawanua.26Geenau ho 'ai hingina 'aiga-garago,de 'atowihilamo-lamo'o ma Jou ma Dutu.De 'ai roehe tamao 'ihanaanga,hababu tomahinganono Una'a.27Hababu Ngona aha 'anoimada'awa o nyawa yohone-honenge manga ngii'u,de Ngona 'anamada'awa Ani Gilaongo tonihingou-ngounu 'atodewedelu'u o boohu'o'a.28Ngona noihimaito'au o nge'omo nage 'ihi'ai'a o wowango 'ahiado-adoni'a.De duru togarago hababu Ngona 'aitauri'a de de ngoi.> >>29De o Petrus wotemoli, <<Ri-riadodoto! Ngoi idadi tomaade-ade tinihito-tongooti'a ngini'a mangale o Daut, to ngone nanga edete de nanga dotumu guuna. Una wohongeno'au de wipoohu'o'au, de awi boohu'u naga de ma enahi ngone'a hiadono neena.30Ma Jou ma Dutu wojajio'au o Dauti'a hiadono wo'oboto'a na'o womatengo awi ahala o Dautino done aha ma Jou ma Dutu wigoa'a wodadi o 'Oana. De aha wopareta harage de o Dautu wopareta. O Dautu wana'o'au ma jaji geena de una o nabi moi ho wana'o o'iau aha done idadi de wohidemo'au na'o womatengo ma 'Oana Wohiha-halamata nage ma Jou ma Dutu wohijajio'au guuna aha wowangoli ngaro wohongeno'au ma. De o Dautu wotemo,<Una 'awimada'awa naga 'a o boohu'o'a;awi roehe aha 'ayodewedelu'uwa geena'a.>32O Yesus nuunau nage ma Jou ma Dutu wihiwangoli. Ngomiou moi-moi neena miama'e'au ho miohiha'ihii.33Ma Jou ma Dutu wigoa'o'au de wihigogele o ngii 'iholoi 'ira-rahaio'a mangale wihilamo'o. Geena'a de wadawongo o Omaha 'Iofi-ofi nage ma Dea wohijajio'au mangale wohiguti. De nage ngini nioihene de niama'e neena, hababu o Omaha 'Iofi-ofi Wohigutio'au ngomi'u.34O Daut mahirete 'awodoawa o horogade ma una wotemo,<Ma Jou wotemo 'ai Jou'a:35Nogogelu'u 'ai date'o'ao ngii ge iholoi 'ira-rahai,hiadono Tadiai Ani ha-haturuu moi-moi yoihingounu ngona'ade 'ayomado-doawau!> 36Ma hababu geenau ho o Israel ma nyawa halingou niana'o ma gou-goungu, ma ngale o Yesus gee niwihidelo'au o salipo'a, Unau geena ma Jou ma Dutu widiai Jou de wiili'i wodadi o 'Oana o Nyawa Wohiha-halamata!>>37Ma oraha yoiheno'au o demo-demo geena, de manga hininga'a yatota ho yomatoduba. Geena'a de yohano o Petrusi'a de o hu-hulo'o ma regu'a yotemo, <<Ae ri-riadoto, o 'iau halingou miadiai?>>38De o Petrus wopaluhu, <<Halingou niotoba, de ngini moi-moi niohi'i de ma Yesus Kristus Awi ronga ma dunguu niwinga'u Una'a, la nia baradoha ma Jou ma Dutu waapongo. De ngini aha niadawongo o Omaha 'Iofi-ofi.39Hababu gee ma Jou ma Dutu wohijajio'au 'ogeena, geena ma dumutu ngini'a de nia ngoa'a de nia danongu'u. De o nyawa ma nage naga manga ngii 'i'a-'a'uli'a, geena la o nyawa moi-moi nage ma Jou ma Dutu to ngone nanga Jou wo'iaho-aho'o la yoboa Una'a.>>40'Ogeena o Petrus wo'ihimangariti wohitiai ona'a. De ma lepe una wo'ihitiari la tanu yo'ihihalamata de uwa yowango harage de o nyawa yoti-tingi'ai nage aha ma Jou ma Dutu wo'ihu'umu.41Manga lepe yonga'u o Petrus awi do-doto'o, ho yomahigiamaa ma hoata la yoi'ohi'i. Ho ma wange geena o nyawa yonga'u-nga'u o Yesusi'a yodogoli manga lepe poelua yaribuhu haange.42Ona 'ayomatogu-togumua yomadoto'o de manga hininga ma goungu o hu-hulo'i'a, de 'aitauri'a yomalomu. Ona yoodomo de yomadahaubayanga ma 'ayomalomu-lomu. 43Ao lepe o haala 'ihera-heranga nage o hu-hulo'o goona yodiai hiadono o nyawa moi-moi yoheranga de wihoromati ma Jou ma Dutu'a.44De o nyawa yonga'u-nga'uo'au goona yorimoi ho moi-moi manga 'iau hona moi-moi yorimoi yapa'e.45Naga ona'a 'aitauri'a yawu'unu manga 'iau honaa de ma pipi yohi'a-'ado'u imote'e moi de moi manga paraluu.46O wange 'ihinoimi ona 'ao hininga moi yomalomu ma Jou ma Dutu awi Woa'a. De yoodomo ma 'ayomalomu-lomu manga woa-woa'a, de manga hingina yohitipo'o'u de 'ayoga-garago.47De ona 'awihilamo-lamo'o ma Jou ma Dutu. De o nyawa moi-moi yo'iigo de yo'ihoromati. O wange 'ihinoimi ma Jou Yesus wadiai ho o nyawa yoha-halamata 'a yodogo monga.
The Seed Company