Нав6
1Тунам Иисуслан Господь каласен: «Мый тыйын кидышкет Иерихоным да тудын кугыжажым, [тушто улшо] виян сарзе-влакым пуэм.2Чыла сарзыда дене кечылан ик гана ола йыр коштын савырныза. Тыге куд кече ыштыза.3Кидышкышт тага тӱкӧ дене ыштыме пучым кучен, шондык ончыч шым иерей кайышаш. Шымше кечын ола йыр шым гана савырныза, а иерей-влак тек пучыштым пуалтат.4Кунам пуч пуалта да те пуч йӱкым колыда, тек уло калык кугу йӱкын кычкыралеш. Тунам ола пырдыж негызше марте сӱмырла, да [уло] калык олашке чыла могырым керылт пура».5Иисус, Нав эрге, [израиль] иерей-влакым ӱжын да нунылан каласен: «Господьын ойпидыш шондыкшым нумал кайыза, а шондык ончыч тек шым иерей шым пуч дене кая».6Иисус каласен: «[Еҥ-влаклан кӱштыза,] тек ола йыр коштын савырнат. А Господьын шондыкшо ончыч тек саргуралан еҥ-влак каят».7Кунам Иисус кӱштымашым пуэн, Господь ончылно шым пучым нумал кайыше шым иерей, пучым [кугу йӱкын] пуалтен, тарванен каен. Нунын почеш Господьын ойпидыш шондыкшо каен.8Пучым пуалтен кайыше иерей-влак ончылно саргуралан еҥ-влак ошкылыныт. [Господьын ойпидыш] шондыкшо деч вара моло еҥ-влак каеныт. Тиде жапыште пуч пуалтыме йӱк чарнен огыл.9Иисус калыклан тыге кӱштен каласен: «Ида кычкыре, йӱкдамат ида лук. Умшада гыч ик мутат ынже лек. Кычкыраш кӱлмӧ кече шумеке, мый тыланда каласем – тунам кычкырыза».10Тыге нуно Господьын [ойпидыш] шондыкшо дене ола йыр ик гана коштын савырненыт. Вара, станыш толын, тушто йӱдым эртареныт.11[Вес кечын] Иисус эрден эр кынелын, иерей-влак угыч Господьын [ойпидыш] шондыкшым нумал каеныт.12Господьын шондыкшо ончыч шым иерей шым пучым пуалтен ошкылын. Нунын ончыч саргуралан еҥ-влак каеныт, а Господьын [ойпидыш] шондыкшо почеш моло еҥ-влак ошкылыныт. Тиде жапыште пуч пуалтыме йӱк чарныде шоктен.13Вес кечынат ола йыр ик гана коштын савырненыт, вара станыш пӧртылыныт. Тыге нуно куд кече ыштеныт.14Шымше кечын нуно ӱжара дене тӧр кынелыныт да ончычсо семынак ола йыр коштын савырненыт, но шым гана. Тиде кечын гына ола йыр шым гана савырненыт.15Кунам иерей-влак шымше гана пучыштым пуалтеныт, Иисус калыклан кӱштен каласен: «Кычкырыза! Олам Господь тыланда пуэн!16Господьлан пуымо надыр пӧлек шотеш тиде ола пӱтынек пытарыме лийшаш. Мо тушто уло – чылажат Господь [Саваофын] лийшаш. Лач яжар ӱдырамаш Раав да тудын пӧртыштыжӧ улшо-влак илыше кодшаш улыт, вет тудо мемнан колтымо еҥ-шамычым шылтен.17Но мом, Господьлан надыр шотеш пӧлеклен, пӱтынек пытараш кӱлеш, тидын деч шкендам аралыза: тышечын иктаж-мом налыда гын, те шкежат пытарыме лийыда да израиль [эрге-влакын] станышкышт туткар ден колымашым кондеда.18Тек чыла ший ден шӧртньӧ, вӱргене ден кӱртньӧ ӱзгар Господьлан святитлыме надыр шотеш Тудын поянлыкым аралыме верышкыже пыштыме лийыт».19Кунам пуч йӱк шергылтын, калык кычкыралын. Пуч йӱк шергылтмеке да [уло] калыкын кугун [да виян] кычкыралмекше, [ола] пырдыж [пӱтынек] негыз марте сӱмырлен. [Уло] калык чыла могырымат олашке керылт пурен да тудым сеҥен налын.20Олаште мо улым – пӧръеҥ ден ӱдырамашымат, самырык ден шоҥгыеҥымат, шолдыра ден тыгыде вольыкымат, осёлымат – нуно, Господьлан надыр шотеш пӧлеклен, пӱтынек пытареныт, [чылаштымат] керде дене пуштыныт.21А тиде мландым ончаш толшо кок самырык пӧръеҥлан Иисус каласен: «Саде яжар ӱдырамашын пӧртышкыжӧ кайыза да, товатлен сӧрымыда семынак, тушеч шкенжым да тушто улшо чыла еҥым лукса».22[Олам] ончаш толшо нине пӧръеҥ-влак [тиде яжар ӱдырамашын пӧртышкыжӧ] пуреныт да Раавым, ачаж ден аважым, иза-шольыжым, тушто улшо чыла еҥым, чыла родо-тукымжым луктыныт да Израиль стан воктеке наҥгаеныт.23Олам да чыла, мо тушто лийын, тул дене йӱлалтеныт. Лач ший ден шӧртньым, вӱргене ден кӱртньӧ арвер-влакым Господьын пӧртшын поянлыкым аралыме верышкыже [пышташ] налыныт.24А яжар ӱдырамаш Раавым, ачажын уло ешыжым, чыла лишыл еҥжым Иисус илышым коден. Тудын тукымжо таче кечынат израиль калык коклаште ила, вет тудо Иисусын Иерихоным ончаш колтымо еҥже-влакым шылтен.25Тудо жапыште Иисус тыгай каргымаш шомакым ойлен: «Кӧ Иерихон олам угычын чоҥен нӧлталеш, тудо Господь ончылно каргыме лиеш. Негызым пышта – кугэргыжым йомдара, капкам шогалта – изирак эргыжым йомдара». [Лач тыгак Вефиль гычын Азан ыштен. Негызым пыштымыж годым Авирон кугэргыже колен, а утаралт кодшо изирак эргыже капкам шогалтымыж годым пытен.]26Господь Иисус пелен лийын. Иисусын чапше мланде мучко шарлен.
Institute for Bible Translation, Finland