Нав7
1Но израиль эрге-влак [кугу] сулыкым ыштеныт – Господьлан пӧлек шотеш пытараш кӱлмӧ гыч [шкаланышт налыныт]. Иуда тукым гыч Ахан, Харми эрге – Харми Завдийын эргыже, Зерахын уныкаже лийын – пытараш кӱлмӧ гыч налын. Тунам израиль эрге-влаклан Господьын шыдыже ылыжын.2Иисус Иерихон гыч еҥ-влакым Гайыш колтен. Гайже Беф-Авен воктене, Вефиль дечын эрвелныла, лийын. Тудо нунылан каласен: «Кайыза, мландым ончен лекса». Нуно каеныт, Гайым ончен лектыныт.3Иисус деке пӧртылмеке, тудлан каласеныт: «Тушко чылаштлан кайыме ок кӱл. Гайым сеҥен налаш кок-кум тӱжем еҥат сита. Чылаштым ит толаштаре, [тушто] еҥ шагал».4Тыге тушко кум тӱжем наре еҥ каен, но Гайыште илыше-влак деч нунылан куржашышт логалын.5Гайыште илыше-шамыч нунын кумло куд еҥыштым пуштыныт – нуным ола капка деч Севарим марте поктен каеныт да курык тайылыште кырен шалатеныт. Тидын деч вара израильтян-влакын шӱмыштым кугу лӱдмаш авалтен.6Иисус шке вургемжым кушкедын, Господьын шондыкшо ончыко кумык возын да тушто кас марте киен. Израильын кугуракше-влакат тыгак ыштеныт. Нуно чыланат вуйышкышт пуракым шавеныт.7Иисус каласен: «О, Господь Юмем! Молан Тый тиде калыкым Иордан гоч вончыктаренат? Мемнам аморрей-влакын кидышкышт пуаш да пушташ мо? Мыланна лучо Иордан вес велне кодаш да тушто илаш ыле!8О, Господь! Израильын тушман деч куржмыж деч вара мый ынде мом каласем?9Хананей да тыште илыше-влак тидын нерген колыт, мемнам авырат да лӱмнам мланде ӱмбачын ӱштыл шуат. Тунам Тый шке лӱметын чапшым кузе арален кодет?»10Господь Иисуслан каласен: «Кынел! Молан тый кумык возынат?11Израиль сулыкым ыштен. Тиде калык нунын дене ыштыме ойпидышем пудыртен. Нуно пытараш кӱлмӧ гыч налыныт. Нуно шолыштыныт, шойыштыныт, шке арвер коклашкышт шылтеныт.12Теве молан те, израиль эрге-влак, тушман ваштареш шоген огыда керт, да нунын деч куржашда логалеш. Ынде те шкеже пытарыме лийшаш улыда. Шке кокла гычда мом пытараш кӱлмым огыда пытаре гын, Мый тетла тендан дене ом лий.13Кынел, калыкым святитле да каласе: шкендам эрласе кечылан святитлыза, вет Израильын Господь Юмыжо тыге ойла: ”Тыйын коклаште пытараш кӱлмӧ арвер уло, Израиль. Тудым шке дечет кораҥдымешке, тый тушман ваштареш шоген от керт”.14Эрла [чыланат] тукым почеш тукым толза. Господь могай тукымым ончыкта, тек урлык дене толеш. Господь могай урлыкым ончыкта, тек еш дене толеш. Господь могай ешым ончыкта, тек ик еҥ дене толеш.15Кӧн дене пытараш кӱлмӧ арверым муыт, тек мо улыж дене пырля тулеш йӱлалтат. Тудо Господьын ойпидышыжым пудыртен, израильтян-влак коклаште шотдымо пашам ыштен».16Эрдене эр кынелын, Иисус Израильлан тукым дене толаш кӱштен – Иуда тукым ончыктымо лийын.17Вара Иудан урлыкшо-влаклан толаш кӱштен – Зерах урлык ончыктымо лийын. Зерах урлыклан еш дене толаш кӱштен – Завдий [еш] ончыктымо лийын.18Тудын ешыжлан ик еҥ дене мияш кӱштен – Ахан, Харми эрге, ончыктымо лийын. Хармиже Иуда тукым гыч Зерахын Завдий эргыжын эргыже лийын.19Тунам Иисус Аханлан каласен: «Эргым, Израильын Господь Юмыжлан чапым пу, Тудын ончылно чыла почын ойло. Мом ыштенат – мылам каласе, нимом ит шылте».20Ахан Иисуслан вашештен: «Чынак, Израильын Господь Юмыж ончылно мый сулыкыш пуренам. Теве мом ыштенам:21руалтен налме пого коклаште мый Сеннаар гыч кондымо ик чапле вургемым, кокшӱдӧ сикль шийым да витле сикль нелытан шӧртньӧ моклакам ужым. Мыйын чыла тидым пеш чот налмем шуын колтыш, да мый нальым. Нуным мый омашыште мландыш уренам, ший эн йымалне [кия]».22Иисус еҥ-влакым колтен, нуно [станыш] Аханын омашышкыже куржыныт. Чынжымак, чыла тиде арвер омашыште мланде йымак урымо лийын, эн йымалне ший киен.23Нуно чыла тидым омаш гыч налыныт да Иисус ден моло израильтян-влак деке конденыт, Господь ончыко пыштеныт.24Иисус ден чыла израильтян-влак Аханым, Зерах эргым, тыгак шийым, вургемым, шӧртньӧ моклакам, тудын эргыж ден ӱдыржӧ-влакым, шолдыра ден тыгыде вольыкшым, осёлжо-влакым, омашыжым – чыла, мо тудын лийын – Ахор лапверыш наҥгаеныт.25Иисус каласен: «Молан тый мемнан ӱмбак ойгым конденат? Господь ынде тыйын ӱмбакет ойгым конда». Израильтян-влак Аханым да тудын ешыжым, вольыкшым кӱм кышкен пуштыныт да чылажымат тулеш йӱлалтеныт,26а тиде вер ӱмбаке кугу кӱ орам оптен шынденыт. Тиде кӱ ора тачат шога. Тидын деч вара Господьын шыдыже лушкен. А тиде вер таче мартеат Ахор лапвер маналтеш.
Institute for Bible Translation, Finland