Exodus19
1इस्राएली लोग मिस्र देश से निकलला के तिसरका महीना के पहिले दिन सीनै के जंगल में पहुंचलन।2आउर जखनी ऊ रपीदीम से चल के सीनै के जंगल में अईलन, तब ऊ लोग जंगल में पड़ाव खड़ा कईलन।3तऽ मूसा परमेश्वर भीर बात करे ला पहाड़ पर चढ़ गेलन, आउर यहोवा पहाड़ पर से उनका पुकार के कहलन, “याकूब के घराना से अईसन कहऽ आउर इस्राएलियन के ई हमर वचन सुनावऽ,4तूँ देख लऽ हे कि हम मिस्रियन के साथे का कईली हे, तोरा उकाब पक्षी के जईसन पंख लगा के चढ़ा के लईली हे।5येहिगुने अखनी जदि तूँ जरुर हमर बात मानवऽ। आउर हमर वादा के पालन करबऽ, तऽ सभे लोगवन में से तूँही हमर अपन धन ठहरवऽ; समूचे धरती तऽ हमरे हे।6तूँ हमर नजर में पुरोहितवन के राज्य आउर पवित्र जाति ठहरवऽ। जे बतियन तोरा इस्राएली लोग से कहेला हे ऊ एही हे।”7तऽ मूसा पहाड़ से उतरलन आउर पुरनियन लोग के बोलईलन कि आउर ई सभे बतियन जेकरा कहे ला आज्ञा यहोवा देलन हल, ओकरा समझा देलन।8सभे लोग मिल के बोललन जे कुछ यहोवा कहलन हे ऊ सभे हमनी रोज करम। ''तऽ मूसा पहाड़ पर चढ़ गेलन आउर परमेश्वर से ऊ बात कहलन जे लोग से कहलन हल।9तऽ यहोवा मूसा से कहलन “ध्यान से सुन हम बादल के अंधार में चल के तोरा भीर आयेम, येहिगुने जखनी हम तोरा से बात करम तऽ ऊ लोग सुनतन, आउर ऊ हमेशा तोरा पर विश्वास करतन।” आउर मूसा यहोवा से लोगन के बात के कहलन।10तब यहोवा मूसा से कहलन, “लोगवन के भीर जा आउर ओकरा आज आउर कल पवित्र करऽ, आउर ऊ जरुर अपन कपड़ा धो लेतन।11आउर ऊ तिसरका दिन तैयार हो जईतन, काहेकि यहोवा सभे लोगवन के देखे ला सीनै पर्वत पर उतर अईतन12आउर तूँ लोगवन के चारो तरप बाड़ा बाँध दिहऽ आउर ओखनी से कहिहऽ; तूँ लोग सावधान रहिहऽ कि कोई पहाड़ पर नऽ चढ़तन आउर ओकर बाड़ा के भी नऽ छूतन; आउर जे कोई पहाड़ के छूतन ऊ जरुर मार देवल जईतन।13ओकरा कोई हाथ से नऽ छूतन, जे छूतन ओकरा पर पथराव कईल जायत चाहे ओकरा तीर से वेधल जायत; चाहे आदमी हो चाहे जानवर हो ऊ जिन्दा नऽ बचे के चाही। "जखनी महाशब्द करे वाला नरसिंगा के शब्द देर तक सुनाय पड़त, तऽ लोग पहाड़ के नीचे आ जईतन।”14तऽ मूसा पहाड़ से उतर के लोगवन के भीर आके उनका पवित्र कईलन; आउर ऊ अपन कपड़ा धो लेलन।15आउर ऊ लोगवन से कहलन, तिसरका दिन तक तैयार हो जईहऽ आउर तोहनी के कोई औरत से शारीरिक सम्बन्ध बनावे के नऽ हे।16जखनी तिसरका दिन आयेल तब भोरे-भोरे बादल गरजे आउर बिजली चमके लगल आउर पहाड़ पर करिया घटा छा गेल आउर फिरू नरसिंगवन के आवाज बड़ा भारी हो गेल, आउर छावनी में जेतना लोग हलन सभे काँपे लगलन।17तब मूसा लोगवन के परमेश्वर से भेंट करावे ला छावनी से निकाल के ले गेलन आउर पहाड़ के नीचे खड़ा हो गेलन।18आउर यहोवा जे आग में होके सीनै पहाड़ पर उतरलन हल ई चलते समूचे पहाड़ धुईयाँ से भर गेल, आउर ओकर धुईयाँ भठ्ठा जईसन उठ रहल हल आउर समूचे पहाड़ बहुत काँँप रहल हल।19फिरू जखनी नरसिंगवन के आवाज बढ़ते आउर भारी होते गेल तब मूसा बोललन, आउर परमेश्वर आवाज दे के ओकरा उतार देलन।20तब यहोवा सीनै पहाड़ के चोटी पर उतरल; आउर मूसा के पहाड़ के चोटी पर बोलईलन, आउर मूसा ऊपर चढ़ गेलन।21तब यहोवा मूसा से कहलन, नीचे उतर के लोगवन के समझा दऽ, कहूँ अईसन नऽ होवे ऊ बड़ा तोड़ के यहोवा के देखे ला घूंस जईतन आउर ओकरा में से बहुत लोग मारल जईतन।22आउर पुरोहित जे यहोवा के नजदीक आयेल जायल करऽ हथन ऊ भी अपने के पवित्र करतन, कल अईसन नऽ होवे कि यहोवा ओकरा पर टूट पड़तन।23तऽ मूसा यहोवा से कहलन, "ऊ लोगन सीनै पर्वत पर नऽ चढ़ सकतन; तूँ तऽ हमरा ई कह के चेतइलऽ हे कि पहाड़ के चारो तरप आउर बाड़ा बाँध के ओकरा पवित्र रखिहऽ।24यहोवा मूसा से कहलन, “पहाड़ से उतरऽ आउर हारून के साथे तूँ ऊपर आ जा बाकि पुरोहित आउर साधारण लोग कहीं बाड़ा तोड़ के नऽ चढ़ जईतन, कहूँ अईसन नऽ होवे कि यहोवा उनका सजा दे देतन।”25तब मूसा पहाड़ से नीचे उतरलन आउर लोगवन से कहलन जौन बात यहोवा परमेश्वर उनका से कहलन हल।
Bridge Connectivity Solutions Pvt. Ltd.