Exodus20
1तब परमेश्वर ई वचन से इस्राएलियन से कहलन,2हम तोर परमेश्वर यहोवा ही, जिनकर तूँ आराधना करऽ हऽ, हम तोहनी के मिस्र देश के गुलामी से छुड़ा के लईली हे।3तूँ हमरा छोड़ के दूसरा के परमेश्वर कर के उपासना नऽ करिहऽ।4तूँ अपना ला कोई मूर्ति खोद के नऽ बनईहऽ, आउर नऽ कोई के प्रतिमा बनईहऽ जे आकाश में चाहे धरती पर चाहे पानी में हे।5तूँ ओकरा दण्डवत नऽ करिहऽ, आउर नऽ ओकर उपासना करिहऽ; काहेकि हम तोर परमेश्वर यहोवा जलन रखे वाला परमेश्वर ही, आउर जे हमरा से दुश्मनी रखऽ हथन ओकर बेटा, पोता आउर परपोता के पुरखन के सजा देते रहऽ ही।6आउर जे हमरा से प्रेम करऽ हथन आउर हमर आज्ञा मानऽ हे उनका पर हजारो गुना करुणा करऽ ही।7तूँ अपन परमेश्वर के नाम बेकार में मत लिहऽ। काहेकि जे यहोवा के नाम बेकार लेतन परमेश्वर ओकरा दोषी ठहरईतन।8तूँ विश्रामदिन के याद रखिहऽ।9तोरा ला अपन सभे काम करे लागी हरेक सप्ताह छौ दिन हे।10बाकि हरेक सप्ताह के सतमा दिन तोर परमेश्वर यहोवा के विश्रामदिन हे ओकरा में नऽ तऽ तूँ कोई तरह के काम काज करिहऽ आउर नऽ तोर बेटा, नऽ तोर बेटी, नऽ तोर दास, नऽ तोर दासी, नऽ तोर जानवर, नऽ कोई परदेशी, जे तोर फाटक के भीतर रहऽ हे।11काहेकि छौ दिन में यहोवा आकाश आउर धरती आउर समुद्र आउर जे कुछ ओकरा में हे बनईलन हे आउर सतमा दिन आराम कईलन, येहिगुने यहोवा विश्रामदिन के आशीर्वाद देलन आउर पवित्र कईलन।12तूँ अपन बाप आउर अपन माय के आदर करिहऽ, जेकरा से जे देश परमेश्वर यहोवा तोरा देलन हे ओकरा में तूँ बड़ी दिन तक जिन्दा रहबऽ।13तूँ खून नऽ करिहऽ।14तूँ व्यभिचार नऽ करिहऽ।15तूँ चोरी नऽ करिहऽ।16तूँ कोई के विरोध में झूठा गवाही नऽ दिहऽ। 17तूँ कोई के घर के लालच नऽ करिहऽ; आउर नऽ कोई के मेहरारु के लालच करिहऽ आउर नऽ कोई के दास दासी, चाहे बैल, गदहा, नऽ कोई के कोई आउर चीज के लालच करिहऽ।18जखनी सभे लोग गरजन आउर बिजली आउर नरसिंगा के आवाज सुन के आउर धुईयाँ ऊपर उठते पहाड़ के देखते रहलन, आउर देखते, काँपते पहाड़ से दूर खड़ा हो गेलन।19आउर ऊ मूसा से कहे लगलन, “तूँही हमनी से बात करऽ, तऽ हमनी सुन सकम, बाकि परमेश्वर हमनी से बात नऽ करतन, अईसन नऽ होवे कि हमनी मर जाऊँ।”20मूसा लोगवन से कहलन कि, “डेरा नऽ काहेकि परमेश्वर ई ला नऽ अईलन हे कि तोहनी के परीक्षा करतन आउर उनकर भय तोहनी के मन में बनल रहे, कि तोहनी पाप नऽ करिहऽ”21तब ऊ लोग दूरे खड़ा रहलन बाकि मूसा ऊ भोर अंधार के नजदीक गेलन जहाँ परमेश्वर हलन।22तब यहोवा मूसा से कहलन, तूँ इस्राएलियन के हमर ई वचन सुनावऽ कि तूँ लोगवन अपने आप देख लऽ हे कि हम तोहनी से आकाश से बात कईली हे।23तऽ येहिगुने तूँ हमरा साथे कोई के शामिल नऽ करिहऽ चाहे अपना ला चाँदी चाहे सोना से देऊतवन नऽ बनवईहऽ।24हमरा ला मट्टी के एगो वेदी बनावऽ आउर अपन भेड़-बकरियन आउर गाय बैलवन के होमबलि आउर मेलबलि के ऊपर चढ़ईहऽ, जहाँ-जहाँ हम अपन नाम के याद करायम उहाँ-उहाँ हम आके तोहनी के आशीर्वाद देम। 25जदि तूँ हमरा ला पत्थल के वेदी बनवईहऽ, तऽ तरासल पत्थलवन से बनवईहऽ, काहेकि जहाँ तूँ ओकरा पर हथियार लगईवऽ तऽ ओकरा अशुद्ध कर देवऽ।26हमर वेदी पर सीढ़ी से कहियो नऽ चढ़िहऽ, कहीं अईसन नऽ होवे कि तोर देह ओकरा पर नंगा देखाय देवे।
Bridge Connectivity Solutions Pvt. Ltd.