ລະບຽບພວກເລວີ16
ວັນລຶບລ້າງບາບ
1ພຣະເຈົ້າຢາເວກ່າວແກ່ໂມເຊຫລັງຈາກທີ່ລູກຊາຍສອງຄົນຂອງອາໂຣນຜູ້ທີ່ຕາຍໄປໃນຂະນະພວກເຂົາເຂົ້າມາຫາພຣະເຈົ້າຢາເວ.2ພຣະເຈົ້າຢາເວກ່າວແກ່ໂມເຊວ່າ: “ຈົ່ງເຕືອນອາໂຣນອ້າຍຂອງເຈົ້າບໍ່ໃຫ້ເຂົ້າໄປໃນສະຖານທີ່ສັກສິດທີ່ສຸດຫລັງຜ້າກັ້ງທີ່ຢູ່ຕໍ່ໜ້າພຣະທີ່ນັ່ງແຫ່ງພຣະຄຸນທີ່ຢູ່ເທິງຫີບພັນທະສັນຍາຕາມໃຈຊອບ ຫລື ບໍ່ດັ່ງນັ້ນ ລາວຈະຕ້ອງຕາຍ. ເພາະເຮົາຈະມາປາກົດໃນເມກເໜືອພຣະທີ່ນັ່ງແຫ່ງພຣະຄຸນ.3“ຕໍ່ໄປນີ້ເປັນຂໍ້ປະຕິບັດໃນການທີ່ອາໂຣນຈະເຂົ້າໄປຍັງສະຖານສັກສິດທີ່ສຸດ: ລາວຕ້ອງໄດ້ນຳເອົາງົວເຖິກເພື່ອເປັນເຄື່ອງບູຊາໄຖ່ບາບ ແລະ ແກະຜູ້ສຳລັບເປັນເຄື່ອງເຜົາບູຊາໄປ4ເຂົາຕ້ອງນຸ່ງເສື້ອຄຸມຍາວທີ່ບໍລິສຸດທີ່ເຮັດດ້ວຍຜ້າຝ້າຍລິນິນກັບເຄື່ອງແຕ່ງກາຍຊັ້ນໃນດ້ວຍຜ້າຝ້າຍລິນິນທີ່ຕິດກັບຮ່າງກາຍຂອງລາວ, ລາວຕ້ອງຮັດສາຍມັດແອວດ້ວຍຜ້າຝ້າຍລິນິນ ແລະ ຄຽນຫົວດ້ວຍຜ້າຝ້າຍລິນິນ. ສິ່ງເຫລົ່ານີ້ເປັນເຄື່ອງແຕ່ງກາຍອັນບໍລິສຸດ, ດັ່ງນັ້ນລາວຕ້ອງອາບນ້ຳກ່ອນທີ່ຈະສຸບເຄື່ອງເຫລົ່ານີ້ໃສ່.5ຈາກຊຸມຊົນອິດສະຣາເອນອາໂຣນຈະເອົາແບ້ຜູ້ສອງໂຕເພື່ອເປັນເຄື່ອງບູຊາໄຖ່ບາບ ແລະ ແກະຜູ້ໜຶ່ງໂຕສຳລັບເປັນເຄື່ອງເຜົາບູຊາ.6“ໃຫ້ອາໂຣນຖວາຍງົວໜຸ່ມໜຶ່ງໂຕເປັນເຄື່ອງບູຊາໄຖ່ບາບເພື່ອເຮັດພິທີລຶບລ້າງບາບໃຫ້ຕົນເອງ ແລະ ຄອບຄົວ7ຈາກນັ້ນລາວຈະຕ້ອງນຳເອົາແບ້ສອງໂຕມາຕໍ່ໜ້າພຣະເຈົ້າຢາເວທີ່ທາງເຂົ້າເຕັນນັດພົບ.8ລາວຈະຕ້ອງຈັບສະຫລາກສຳລັບແບ້ທັງສອງນັ້ນ ສະຫລາກໜຶ່ງສຳລັບພຣະເຈົ້າຢາເວ ແລະ ອີກສະຫລາກໜຶ່ງສຳລັບແບ້ຮັບບາບ 9ອາໂຣນຈະຕ້ອງນຳເອົາແບ້ໂຕທີ່ໃຊ້ຖວາຍແກ່ພຣະເຈົ້າຢາເວມາເປັນເຄື່ອງບູຊາໄຖ່ບາບ.10ແຕ່ແບ້ທີ່ໄດ້ຮັບເລືອກໂດຍຈັບສະຫລາກໃຫ້ເປັນແບ້ຮັບບາບນັ້ນຈະຖືກນຳມາຖວາຍທັງທີ່ຍັງມີຊີວິດຕໍ່ໜ້າພຣະເຈົ້າຢາເວເພື່ອເປັນການລຶບລ້າງບາບໂດຍປ່ອຍມັນເຂົ້າໄປໃນຖິ່ນແຫ້ງແລ້ງກັນດານເພື່ອເປັນແບ້ຮັບບາບ.11“ອາໂຣນຈະຕ້ອງນຳເອົາງົວມາເພື່ອເປັນເຄື່ອງບູຊາໄຖ່ບາບຂອງຕົນເພື່ອເຮັດພິທີລຶບລ້າງບາບໃຫ້ແກ່ຕົນເອງ ແລະ ຄອບຄົວຂອງຕົນ ແລະ ນຳງົວມາຂ້າເພື່ອເປັນເຄື່ອງບູຊາໄຖ່ບາບຂອງຕົນ12ລາວຈະເອົາໝໍ້ກະທະທີ່ເຕັມດ້ວຍຖ່ານໄຟຈາກແທ່ນບູຊາຕໍ່ໜ້າພຣະເຈົ້າຢາເວ ແລະ ກຳເອົາຜົງເຄື່ອງຫອມທີ່ບົດລະອຽດສອງກຳມືນຳເຂົ້າໄປຫລັງຜ້າກັ້ງ.13ລາວຈະໂຮຍເຄື່ອງຫອມໃສ່ເທິງໄຟຕໍ່ໜ້າພຣະເຈົ້າຢາເວ ແລະ ຄວັນຂອງເຄື່ອງຫອມຈະປິວຂຶ້ນໄປຍັງຝາອັດຫີບພັນທະສັນຍາ, ເພື່ອວ່າລາວຈະບໍ່ຕາຍ14ລາວຈະນຳເລືອດບາງສ່ວນຂອງງົວເຂົ້າໄປ ແລະ ໃຊ້ນິ້ວມືຈຸ່ມເລືອດແລ້ວຊິດໃສ່ດ້ານໜ້າຂອງພຣະທີ່ນັ່ງແຫ່ງພຣະຄຸນເຈັດເທື່ອ.15“ແລ້ວອາໂຣນຈະຂ້າແບ້ເປັນເຄື່ອງບູຊາໄຖ່ບາບສຳລັບປະຊາຊົນ ແລະ ນຳເລືອດຂອງແບ້ເຂົ້າໄປດ້ານຫລັງຜ້າກັ້ງ ແລ້ວເຮັດເຊັ່ນດຽວກັບທີ່ເຮັດກັບເລືອດງົວຄືລາວຈະຊິດເລືອດນັ້ນໃສ່ຂ້າງເທິງ ແລະ ຂ້າງໜ້າຂອງພຣະທີ່ນັ່ງແຫ່ງພຣະຄຸນ.16ດ້ວຍວິທີນີ້ອາໂຣນຈະເຮັດພິທີລຶບລ້າງບາບສຳລັບສະຖານທີ່ບໍລິສຸດທີ່ສຸດເພາະການເປັນມົນທິນ ແລະ ການກະບົດຂອງຊາວອິດສະຣາເອນ, ບໍ່ວ່າບາບຂອງພວກເຂົາຈະເປັນຢ່າງໃດ. ພວກເຂົາກໍຈະຕ້ອງເຮັດຢ່າງດຽວກັນກັບເຕັນນັດພົບ, ເຊິ່ງຢູ່ທ່າມກາງການເປັນມົນທິນຂອງພວກເຂົາ.17ຫ້າມບໍ່ໃຫ້ມີຜູ້ໃດຢູ່ໃນເຕັນນັດພົບຂະນະທີ່ອາໂຣນເຂົ້າໄປເຮັດພິທີລຶບລ້າງບາບໃນສະຖານທີ່ສັກສິດທີ່ສຸດຈົນກວ່າເພິ່ນຈະອອກມາ, ຍັງມີການລຶບລ້າງບາບສຳລັບຕົນເອງ, ຄອບຄົວ ແລະ ຊຸມຊົນອິດສະຣາເອນທັງໝົດອີກດ້ວຍ.18“ຈາກນັ້ນອາໂຣນຈະໄປທີ່ແທ່ນບູຊາທີ່ຢູ່ຕໍ່ໜ້າພຣະເຈົ້າຢາເວ ແລະ ເຮັດພິທີລຶບລ້າງບາບສຳລັບແທ່ນນັ້ນ. ເພິ່ນຈະເອົາເລືອດຂອງງົວ ແລະ ເລືອດຂອງແບ້ບາງສ່ວນທາທີ່ເຂົາຂອງແທ່ນບູຊາ.19ເພິ່ນຈະເອົານິ້ວມືຈຸ່ມລົງໃນເລືອດແລ້ວຊິດໃສ່ເທິງແທ່ນບູຊາເຈັດເທື່ອເພື່ອເປັນການຊຳລະແທ່ນບູຊານັ້ນໃຫ້ບໍລິສຸດພົ້ນຈາກມົນທິນຂອງຊາວອິດສະຣາເອນ.20“ເມື່ອອາໂຣນເຮັດພິທີລຶບລ້າງບາບສຳລັບສະຖານທີ່ບໍລິສຸດທີ່ສຸດ, ທີ່ເຕັນນັດພົບ ແລະ ແທ່ນບູຊາສຳເລັດ, ເພິ່ນຈະນຳແບ້ທີ່ຍັງມີຊີວິດຕົວນັ້ນມາທາງໜ້າ.21ເພິ່ນຈະຕ້ອງວາງມືທັງສອງເບື້ອງໃສ່ເທິງຫົວແບ້ທີ່ມີຊີວິດນັ້ນ ແລະ ສາລະພາບຄວາມຊົ່ວຮ້າຍທຸກຢ່າງ ແລະ ການທໍລະຍົດຂອງປະຊາຊົນອິດສະຣາເອນ. ການບາບທັງໝົດ ແລະ ໄດ້ມອບສິ່ງທັງໝົດໄວ້ເທິງຫົວແບ້. ເພິ່ນຈະສົ່ງແບ້ໄປຍັງຖິ່ນແຫ້ງແລ້ງກັນດານໂດຍມອບໝາຍໃຫ້ຊາຍຄົນໜຶ່ງຕິດຕາມໄປ.22ແບ້ນັ້ນກໍຈະແບກຮັບບາບທັງໝົດຂອງປະຊາຊົນເຂົ້າສູ່ຖິ່ນແຫ້ງແລ້ງກັນດານ, ຊາຍຜູ້ນັ້ນຈະປ່ອຍມັນໄວ້ໃນທີ່ນັ້ນ.23“ຈາກນັ້ນອາໂຣນເຂົ້າໄປໃນເຕັນນັດພົບ ແລະ ຖອດຊຸດຜ້າຝ້າຍລິນິນທີ່ໃຊ້ນຸ່ງເຂົ້າໄປໃນສະຖານທີ່ສັກສິດທີ່ສຸດ ແລະ ວາງໄວ້ໃນທີ່ນັ້ນ.24ເພິ່ນຈະອາບນ້ຳເພື່ອຊຳລະຕົນເອງໃນບ່ອນສັກສິດ ແລະ ນຸ່ງເສື້ອຜ້າຊຸດປົກກະຕິ. ແລ້ວເພິ່ນຈະອອກໄປຖວາຍເຄື່ອງເຜົາບູຊາສຳລັບຕົນເອງ ແລະ ເຄື່ອງເຜົາບູຊາສຳລັບປະຊາຊົນ, ເພື່ອເຮັດພິທີລຶບລ້າງບາບໃຫ້ຕົນເອງ ແລະ ປະຊາຊົນ.25ເພິ່ນຈະເຜົາໄຂມັນຂອງເຄື່ອງບູຊາໄຖ່ບາບເທິງແທ່ນບູຊາດ້ວຍ.26“ຊາຍຄົນທີ່ໄປປ່ອຍແບ້ເປັນແບ້ຮັບບາບຕ້ອງໄດ້ຊັກເສື້ອຜ້າ ແລະ ອາບນ້ຳ, ຫລັງຈາກນັ້ນລາວອາດເຂົ້າມາໃນຄ້າຍພັກໄດ້.27ງົວ ແລະ ແບ້ທີ່ໃຊ້ເປັນເຄື່ອງບູຊາໄຖ່ບາບ, ເຊິ່ງເພິ່ນໄດ້ນຳເລືອດຂອງມັນເຂົ້າໄປໃນສະຖານທີ່ສັກສິດທີ່ສຸດເພື່ອເຮັດພິທີລຶບລ້າງບາບນັ້ນ, ຕ້ອງນຳເອົາໄປໄວ້ນອກຄ້າຍພັກເຊັ່ນ: ໜັງ, ຊີ້ນ ແລະ ໄສ້ຂອງສັດນັ້ນຈະຕ້ອງເຜົາໃຫ້ໝົດ.28ຜູ້ເຮັດໜ້າທີ່ເຜົາສິ່ງເຫລົ່ານັ້ນຕ້ອງຊັກເສື້ອຜ້າຂອງຕົນ ແລະ ອາບນ້ຳໃຫ້ສະອາດ, ຫລັງຈາກນັ້ນລາວອາດເຂົ້າມາໃນຄ້າຍພັກໄດ້.29“ນີ້ເປັນຂໍ້ປະຕິບັດຖາວອນສຳລັບພວກເຈົ້າຄື: ໃນວັນທີສິບເດືອນທີເຈັດພວກເຈົ້າຈົ່ງຕັດສິດຂອງຕົນ ແລະ ບໍ່ເຮັດວຽກໃດໆ, ບໍ່ວ່າຈະເປັນຄົນທ້ອງຖິ່ນອິດສະຣາເອນ ຫລື ເປັນຄົນຕ່າງດ້າວທີ່ອາໄສຢູ່ທ່າມກາງພວກເຈົ້າ,30ເພາະໃນວັນນີ້ຈະມີການລຶບລ້າງບາບສຳລັບພວກເຈົ້າ, ເພື່ອຊຳລະພວກເຈົ້າໃຫ້ສະອາດ. ແລ້ວພວກເຈົ້າຈະສະອາດພົ້ນຈາກບາບທັງໝົດຕໍ່ໜ້າພຣະເຈົ້າຢາເວ.31ນີ້ເປັນວັນຊະບາໂຕແຫ່ງການພັກຜ່ອນ ແລະ ເຈົ້າຕ້ອງຕັດສິດຂອງຕົນ, ນີ້ເປັນຂໍ້ປະຕິບັດຖາວອນສຳລັບພວກເຈົ້າ.32ປະໂລຫິດຜູ້ທີ່ໄດ້ຮັບການເຈີມ ແລະ ໄດ້ສະຖາປະນາໃຫ້ເປັນມະຫາປະໂລຫິດສືບທອດຈາກພໍ່ຂອງຕົນຈະເປັນຜູ້ເຮັດພິທີລຶບລ້າງບາບ. ເພິ່ນຈະຕ້ອງສວມຊຸດສັກສິດທີ່ເຮັດຈາກຜ້າຝ້າຍລິນິນ33ແລະ ເຮັດພິທີລຶບລ້າງບາບສຳລັບສະຖານທີ່ສັກສິດທີ່ສຸດ, ສຳລັບເຕັນນັດພົບ ແລະ ແທ່ນບູຊາ ແລະ ສຳລັບປະໂລຫິດ ແລະ ສະມາຊິກທັງໝົດຂອງຊຸມຊົນ.34“ນີ້ເປັນລະບຽບການຖາວອນສຳລັບພວກເຈົ້າຄື: ໃຫ້ເຮັດພິທີລຶບລ້າງບາບປີລະຄັ້ງສຳລັບບາບທັງໝົດຂອງປະຊາຊົນອິດສະຣາເອນ”.ແລະ ລະບຽບການນີ້ກໍໄດ້ຖືກປະຕິບັດຕາມທີ່ພຣະເຈົ້າຢາເວໄດ້ສັ່ງໂມເຊໄວ້ແລ້ວນັ້ນ.
Biblica, Inc.