ໂຢຮັນ20
ອຸບມຸງຫວ່າງເປົ່າ
1ຕອນເຊົ້າຂອງວັນຕົ້ນສັບປະດາໃນຂະນະທີ່ຍັງມືດຢູ່, ມາຣີຊາວມັກດາລາໄດ້ມາທີ່ອຸບມຸງຝັງສົບ ແລະ ເຫັນວ່າກ້ອນຫີນຖືກກຶ່ງອອກຈາກປາກອຸບມຸງແລ້ວ.2ດັ່ງນັ້ນ ນາງຈຶ່ງແລ່ນໄປຫາຊີໂມນເປໂຕ ແລະ ສາວົກຄົນອື່ນຜູ້ທີ່ພຣະເຢຊູເຈົ້າຮັກນັ້ນ ແລະ ເວົ້າວ່າ, “ພວກເຂົາໄດ້ເອົາອົງພຣະຜູ້ເປັນເຈົ້າອອກຈາກອຸບມຸງແລ້ວ ແລະ ພວກເຮົາບໍ່ຮູ້ຈັກວ່າພວກເຂົາເອົາພຣະອົງໄປໄວ້ບ່ອນໃດ!”3ດັ່ງນັ້ນ ເປໂຕກັບສາວົກຄົນອື່ນຈຶ່ງອອກໄປທີ່ອຸບມຸງ,4ທັງສອງຄົນແລ່ນໄປ ແຕ່ສາວົກຄົນອື່ນແລ່ນໄວກວ່າເປໂຕ ເພິ່ນຈຶ່ງມາຮອດອຸບມຸງກ່ອນ.5ເພິ່ນກົ້ມລົງ ແລະ ເບິ່ງເຂົ້າໄປທາງໃນກໍເຫັນຜ້າຝ້າຍລິນິນວາງຢູ່ ແຕ່ເພິ່ນບໍ່ໄດ້ເຂົ້າໄປທາງໃນ.6ແລ້ວຊີໂມນເປໂຕທີ່ນຳມາຕາມຫລັງກໍແລ່ນຊື່ເຂົ້າໄປໃນອຸບມຸງເລີຍ, ເພິ່ນເຫັນຜ້າຝ້າຍລິນິນວາງຢູ່7ພ້ອມກັບຜ້າທີ່ພັນອ້ອມຫົວຂອງພຣະເຢຊູເຈົ້າ. ຜ້ານັ້ນຍັງວາງຢູ່ບ່ອນເກົ່າ ເຊິ່ງແຍກຕ່າງຫາກຈາກຜ້າຝ້າຍລິນິນ.8ແລ້ວສາວົກຄົນອື່ນທີ່ມາຮອດອຸບມຸງກ່ອນກໍໄດ້ເຂົ້າມາທາງໃນນຳກັນ, ເພິ່ນໄດ້ເຫັນ ແລະ ໄດ້ເຊື່ອ.9(ພວກເພິ່ນຍັງບໍ່ເຂົ້າໃຈຂໍ້ພຣະຄຳພີທີ່ມີຂຽນໄວ້ວ່າພຣະເຢຊູເຈົ້າຕ້ອງເປັນຄືນມາຈາກຕາຍ.)ພຣະເຢຊູເຈົ້າປາກົດແກ່ນາງມາຣີຊາວມັກດາລາ
10ແລ້ວສາວົກທັງສອງຄົນກໍກັບຄືນເມືອເຮືອນຂອງຕົນ,11ແຕ່ນາງມາຣີໄດ້ຢືນຮ້ອງໄຫ້ຢູ່ຂ້າງນອກອຸບມຸງ. ໃນຂະນະທີ່ນາງຮ້ອງໄຫ້ຢູ່ນັ້ນ ນາງໄດ້ກົ້ມລົງເບິ່ງເຂົ້າໄປໃນອຸບມຸງ12ແລະ ໄດ້ເຫັນເທວະດາສອງຕົນໃສ່ຊຸດສີຂາວ ນັ່ງຢູ່ໃນບ່ອນທີ່ພວກເຂົາເຄີຍວາງສົບຂອງພຣະເຢຊູເຈົ້າ, ຕົນໜຶ່ງຢູ່ເບື້ອງຫົວ ອີກຕົນໜຶ່ງຢູ່ເບື້ອງຕີນ.13ເທວະດາທັງສອງຕົນນັ້ນໄດ້ຖາມນາງມາຣີວ່າ, “ນາງເອີຍ, ເປັນຫຍັງເຈົ້າຈຶ່ງຮ້ອງໄຫ້?”ນາງມາຣີຕອບວ່າ, “ເພາະພວກເຂົາໄດ້ເອົາອົງພຣະຜູ້ເປັນເຈົ້າຂອງຂ້ານ້ອຍໄປແລ້ວ ແລະ ຂ້ານ້ອຍບໍ່ຮູ້ຈັກວ່າພວກເຂົາເອົາພຣະອົງໄປໄວ້ຢູ່ໃສ”.14ແລ້ວນາງມາຣີກໍໄດ້ຫັນຫລັງມາ ແລະ ເຫັນພຣະເຢຊູເຈົ້າຢືນຢູ່ທີ່ນັ້ນ, ແຕ່ນາງບໍ່ຮູ້ຈັກວ່າແມ່ນພຣະເຢຊູເຈົ້າ.15ພຣະອົງກ່າວວ່າ, “ນາງເອີຍ, ເປັນຫຍັງເຈົ້າຈຶ່ງຮ້ອງໄຫ້? ເຈົ້າກຳລັງຊອກຫາຜູ້ໃດ?”
ນາງມາຣີຄິດວ່າພຣະອົງເປັນຄົນຮັກສາສວນຈຶ່ງຕອບວ່າ, “ນາຍເອີຍ, ຖ້າທ່ານໄດ້ເອົາພຣະອົງໄປ ຂໍທ່ານບອກຂ້ານ້ອຍໃຫ້ຮູ້ແດ່ວ່າທ່ານເອົາພຣະອົງໄປໄວ້ຢູ່ໃສ ແລະ ຂ້ານ້ອຍຈະໄດ້ໄປຮັບເອົາພຣະອົງ”.16ພຣະເຢຊູເຈົ້າຈຶ່ງກ່າວກັບນາງວ່າ, “ມາຣີເອີຍ”.
ນາງມາຣີຫັນໜ້າກັບມາຫາພຣະອົງ ແລະ ຮ້ອງອອກມາເປັນພາສາອາຣາມິກວ່າ, “ຣັບໂບນີ!” (ເຊິ່ງແປວ່າ “ອາຈານ”).17ພຣະເຢຊູເຈົ້າກ່າວວ່າ, “ຢ່າໜ່ວງໜ່ຽວເຮົາໄວ້ເທາະ ເພາະເຮົາຍັງບໍ່ໄດ້ຂຶ້ນໄປຫາພຣະບິດາເຈົ້າ. ຈົ່ງໄປຫາພວກພີ່ນ້ອງຂອງເຮົາ ແລະ ບອກພວກເຂົາວ່າ, ‘ເຮົາກຳລັງຈະຂຶ້ນໄປຫາພຣະບິດາເຈົ້າຂອງເຮົາ ແລະ ພຣະບິດາເຈົ້າຂອງພວກເຈົ້າ, ຈະຂຶ້ນໄປຫາພຣະເຈົ້າຂອງເຮົາ ແລະ ພຣະເຈົ້າຂອງພວກເຈົ້າ’ ”.18ດັ່ງນັ້ນ ນາງມາຣີຊາວມັກດາລາຈຶ່ງໄປບອກຂ່າວນີ້ແກ່ພວກສາວົກວ່າ, “ຂ້ານ້ອຍໄດ້ເຫັນອົງພຣະຜູ້ເປັນເຈົ້າແລ້ວ!” ແລະ ໄດ້ເລົ່າເຖິງສິ່ງທີ່ພຣະອົງໄດ້ກ່າວກັບນາງ.
ພຣະເຢຊູເຈົ້າປາກົດແກ່ພວກສາວົກ
19ຕອນຄ່ຳຂອງວັນຕົ້ນສັບປະດານັ້ນ, ເມື່ອພວກສາວົກມາຢູ່ນຳກັນ ພວກເພິ່ນອັດປະຕູໃສ່ກະແຈເພາະຢ້ານພວກຢິວ, ພຣະເຢຊູເຈົ້າກໍໄດ້ເຂົ້າມາຢືນຢູ່ໃນທ່າມກາງພວກເພິ່ນ ແລະ ກ່າວວ່າ, “ສັນຕິສຸກຈົ່ງຢູ່ກັບພວກເຈົ້າທັງຫລາຍ!”20ເມື່ອພຣະອົງກ່າວແລ້ວ ພຣະອົງໄດ້ໃຫ້ພວກເຂົາເບິ່ງມື ແລະ ຂ້າງຂອງພຣະອົງ. ເມື່ອພວກສາວົກເຫັນອົງພຣະຜູ້ເປັນເຈົ້າແລ້ວ ກໍເຕັມໄປດ້ວຍຄວາມຊື່ນຊົມຍິນດີ.21ພຣະເຢຊູເຈົ້າກ່າວອີກວ່າ, “ສັນຕິສຸກຈົ່ງຢູ່ກັບເຈົ້າທັງຫລາຍ! ພຣະບິດາເຈົ້າໄດ້ໃຊ້ເຮົາມາຢ່າງໃດ ເຮົາກໍໃຊ້ພວກເຈົ້າໄປຢ່າງນັ້ນ”.22ເມື່ອກ່າວດັ່ງນັ້ນແລ້ວ ພຣະອົງເປົ່າລົມຫາຍໃຈອອກໃສ່ພວກເພິ່ນພ້ອມທັງກ່າວວ່າ, “ຈົ່ງຮັບເອົາພຣະວິນຍານບໍລິສຸດເຈົ້າ.23ຖ້າພວກເຈົ້າອະໄພຄວາມບາບຂອງຜູ້ໃດ, ຜູ້ນັ້ນກໍໄດ້ຮັບການອະໄພແລ້ວ, ແຕ່ຖ້າພວກເຈົ້າທັງຫລາຍບໍ່ອະໄພໃຫ້ກັບຜູ້ໃດ ພວກເຂົາກໍບໍ່ໄດ້ຮັບການໃຫ້ອະໄພ”.ພຣະເຢຊູເຈົ້າປາກົດແກ່ໂທມາ
24ຝ່າຍໂທມາ (ທີ່ເອີ້ນວ່າດີໄດມັດ ) ໜຶ່ງໃນສາວົກສິບສອງຄົນທີ່ບໍ່ໄດ້ຢູ່ນຳພວກສາວົກໃນເວລາທີ່ພຣະເຢຊູເຈົ້າມາປາກົດ.25ດັ່ງນັ້ນ ສາວົກຄົນອື່ນຈຶ່ງບອກລາວວ່າ, “ພວກເຮົາໄດ້ເຫັນອົງພຣະຜູ້ເປັນເຈົ້າແລ້ວ!”ແຕ່ໂທມາໄດ້ກ່າວກັບພວກເພິ່ນວ່າ, “ຖ້າຂ້ອຍບໍ່ໄດ້ເຫັນຮອຍຕະປູຢູ່ທີ່ຝາມືຂອງພຣະອົງ, ບໍ່ໄດ້ເອົານິ້ວມືແຍ່ໃສ່ທີ່ຮູຕະປູນັ້ນ ແລະ ບໍ່ໄດ້ເອົາມືແຍ່ໃສ່ທີ່ຂ້າງຂອງພຣະອົງ ຂ້ອຍກໍຈະບໍ່ເຊື່ອ”.26ໜຶ່ງອາທິດຕໍ່ມາ ພວກສາວົກຂອງພຣະອົງໄດ້ຢູ່ຮ່ວມກັນໃນເຮືອນຫລັງນັ້ນອີກ, ໂທມາກໍຢູ່ກັບພວກເພິ່ນດ້ວຍ. ປະຕູກໍອັດໃສ່ໄລກອນໄວ້ ແຕ່ພຣະເຢຊູເຈົ້າກໍເຂົ້າມາຢືນຢູ່ໃນທ່າມກາງພວກເພິ່ນ ແລະ ກ່າວວ່າ, “ສັນຕິສຸກຈົ່ງຢູ່ກັບພວກເຈົ້າທັງຫລາຍ!”27ຫລັງຈາກນັ້ນ ພຣະອົງກ່າວກັບໂທມາວ່າ, “ຈົ່ງເອົານິ້ວມືຂອງເຈົ້າມາວາງໃສ່ບ່ອນນີ້ ຈົ່ງເບິ່ງມືຂອງເຮົາ ແລະ ເອົາມືຂອງເຈົ້າມາວາງໃສ່ທີ່ຂ້າງຂອງເຮົາ. ຈົ່ງເຊົາສົງໄສ ແລະ ຈົ່ງເຊື່ອ”.28ໂທມາເວົ້າວ່າ, “ອົງພຣະຜູ້ເປັນເຈົ້າຂອງຂ້ານ້ອຍ ແລະ ພຣະເຈົ້າຂອງຂ້ານ້ອຍ!”29ແລ້ວພຣະເຢຊູເຈົ້າບອກລາວວ່າ, “ເພາະເຈົ້າໄດ້ເຫັນເຮົາເຈົ້າຈຶ່ງເຊື່ອບໍ ຄວາມສຸກມີແກ່ຜູ້ທີ່ບໍ່ໄດ້ເຫັນແຕ່ກໍຍັງເຊື່ອ”.30ພຣະເຢຊູເຈົ້າເຮັດໝາຍສຳຄັນອື່ນອີກຫລາຍປະການຕໍ່ໜ້າພວກສາວົກຂອງພຣະອົງ ເຊິ່ງບໍ່ໄດ້ບັນທຶກໄວ້ໃນພຣະຄຳພີເຫລັ້ມນີ້.31ແຕ່ເລື່ອງເຫລົ່ານີ້ໄດ້ບັນທຶກໄວ້ກໍເພື່ອພວກເຈົ້າທັງຫລາຍຈະໄດ້ເຊື່ອວ່າ ພຣະເຢຊູເຈົ້າເປັນພຣະເມຊີອາ ພຣະບຸດຂອງພຣະເຈົ້າ ແລະ ໂດຍຄວາມເຊື່ອໃນນາມຂອງພຣະອົງນັ້ນ ພວກເຈົ້າຈະມີຊີວິດ.
Biblica, Inc.