1 Wakolinto8
1Ndugu zangu, hulonda mmanye mbuli ya wende wa Mulungu awatendele want'hu wamtogole Kilisito weli uko Makedonia.2Watogozi ao wagezigwa nk'hani kwa kuhenyezwa, mbali denk'ho dyao dikala kulu nk'hani na wakala wakulava kwa moyo ingawa wakala wachiwa wafoseleze.3Kweli hudaha kuwalongela kuwa wakala wakulava vila wadahile na kufoseleza, na habule mnt'hu awalongele mbali kwa kulonda wenyewe.4Wachilomba nk'hani chisank'hane nao kwa kuwasank'hanila want'hu wa Mulungu.5Wasank'hana kuhuma malolelo yetu. Kwa kukola vila Mulungu akubweda, waandusa kuilavila wenyewe kwa Mdewa kamala wakailava kumwetu.6Ivoelo, chimulomba Tito, kwavila nio yeye aiyandusile sank'hano iyo. Nae naaikomeleze sank'hano ino ya wende kumwenu.7Mweye mna chila chint'hu. Utogozi, udahi wa kulonga, umanyi, mkulonda kutenda mbuli nyingi zidamane na ubwedo wenu kumwetu. Ivo chikuwalombeni mgendelele na moyo uno wa kulava,8Sikuwasulutiza, mbali hulonda kulola ubwedo wenu gesa ni wa kweli muukuwataza want'hu wamwenga.9Mweye mkumanya vila Mndewa wetu Yesu Kilisito ivoawenk'hile wende wake, yeye ingawa kakala na chila chint'hu, mbali kaitenda mchiwa kwaajili yenu, ili awenk'he utajili kulawana na uchiwa wake.10Mbali mbuli hulonda kuwalongela ni ino. Ikufaya kumwenu kutenda haluse yala muyaandusile mwaka ufosile. Mweye mkala na moyo wa kulava.11Ivo, ikomelezeni sank'hani iyo ya kulava kwa moyo, na gesa ivomuwile na nk'hwina ya kutaza, ivo tendeni kwa kuilava gesa ivomkudaha kuikomeleza.12Ikawa mnt'hu ana moyo wa kulava, Mulungu naahokela chila akuchilava, kwavila Mulungu hakuhokela vint'hu mnt'hu iyo abule.13Icho hulonda si kuwaongezela mahenyeko ili wamwenga watazigwe, mbali icho hulonda wose mtazigwe.14Mwili nacho haluse kiongezekele kiwataze wala wakukilonda, ili naao wakawa navyo viongezekele wawatazeni mweye chipindi mkahungukilwa, kwa kutenda ivo wose namtazane,15gesa ivoiyandikwe Mmaandiko ya Mulungu, “Aduganye vingi haongezekelwe, na ila aduganye chidogo hahungukilwe.”16Humwink'ha hewala Mulungu, amwink'hile Tito moyo wa kuwataza mweye, gesa ivonimtazile nie.17Kwavila ivochimulombile eze kumwenu katogola. Mbali vilavila yeye mwenyewe kakala nank'hwina nk'hulu ya kwiza kuwataza.18Tito chikumtuma hamwenga na ndugu ila akutogoligwa na want'hu wose wamtogole Kilisito kwa sank'hano yake ya kulonga Mbuli Idamane.19Sio ayo muhala, mbali kasaguligwa na want'hu wakumtogola Kilisito ili awe hamwenga na cheye chipindi chikugala utazi kwa want'hu. Mbuli chikuzitenda kwaajili ya utunyo wa Mndewa na kulagisa ivochikuwabweda wamwenga.20Hachikulonda kuoneka na mnt'hu yoyote kuwa chibananga muukutimalalila vint'hu vila want'hu wavilavile kwa moyo wawe.21Icho chikukilonda ni kutenda goya halongozi ha Mndewa na halongozi ha want'hu.22Ivo chikumtuma ndugu yetu imwenga awe hamwe na kina Tito. Ndugu iyo chimwink'ha magezo mengi, chikamuona kuwa ana moyo wa kuwataza want'hu, kwavila haluse akuwatogola nk'hani mweye.23Elo ikawa hana mnt'hu akulonda kumanya mbuli za Tito, ino ni miyangu na chikusank'hana hamwe kwaajili ya kuwatazeni mweye. Vilavila ikawa hana mnt'hu akulonda kumanya mbuli za wano wamwenga wezile hamwenga nao, wano ni ndugu zetu, watumigwa na want'hu wamtogole Kilisito, naao wakumtunya Kilisito.24Ivoelo, walagiseni want'hu ao ubwedo wenu, ili mapelela ya want'hu wakumtogola Kilisito, wamanye kuitunya kwetu kwaajili yenu ni kweli.
The Word for the World International