ອ່ານ ZEKHARIAH 1

ZEKHARIAH1

Israel kha Ngaesiku lan Hyynaw

¹Darias nynh siapharan lang a tangnaw kum ningnaw, sawpaw sah taryanaw khe, Bawipaw bya tuh Iddo ccapaw Berekhiah, Berekhiah ccapaw profeh Zekhariah kalan khe yn thua zah a hopaw tuh:²Bawipaw tuh na minpaaw hae tungvaw a thin myarya ria.³Tukeiccuze vaaw Bawipaw bya kha minmin kalan hynhte hopah hae: Vaaw Bawipaw nynh a hopaw tuh ka kalan yn ki oh lah, nae kalan kae kiru cih, cite vaaw Bawipaw nynh a ci.⁴Nae minpaaw hae te lokuh nan oh. Langmawlya e profeh hae nynh minmin kha, “Vaaw Bawipaw nynh hynhte a ho, ahoy leipaw nae hiinzia te ahoy leipaw nae cyisahnaw kyate oun ki oh,” cite a hopya hae. Thuasalama minmin nynh yn thaepah khyh hae, pawlang yn ria khyh hae, cite Bawipaw nynh a ci.⁵Nae minpaaw hae tuh teimou a um vae hae? Te Profeh hae so zungzae a hiin hae tou?⁶Thuasalama ka ryalahtu profeh hae kya kaw ka pya hae paw ka bya te ka phungbya hae nynh nae minpaaw hae kha phah khyh hae tou? Tukeiccuze minmin nynh ngaesikuh hae zah, “Vaaw Bawipaw nynh cyi lan a paccyn hawte, aening hiinzia te cyisahnaw thyhte aening tungvaw a cyi vae,” cite a ho hae. Masaty Vizin: Marang Ccikuh hae paw

⁷Darias nynh siapharan lang a tangnaw kum ningnaw, sawpaw sah haw lae kheitnaw Shebat sawpaw, nin kuin lae pali nin khe, Bawipaw bya tuh Iddo ccapaw Berekhiah, Berekhiah ccapaw profeh Zekhariah kalan khe yn thua; Zekhariah nynh a hopaw tuh,⁸Khuazi khe marang sepaw a ccikuhpaw ccungccapaw lu kheit kha ka muih! Tuh-e paw tuh accya kya-e myrte thingku hae laku khe a thadyn; a nulang khe asepaw, puakakaepaw te arawpaw marang hae a um hae.⁹Te kae nynh, “Ka bawipaw, e hae hynh pawmou athua hae?” ka cipya. Bya kae hokuhpaw vaawpaw nynh kae kha, “Pawmou athua hae cipaw kha kae muihsah cih,” yn cipya.¹⁰Myrte thingku hae laku a thadynpaw ccungccapaw nynh, “Minmin tuh laephi pynpi kya ccia bungthung khylan Bawipaw nynh a saw hae paw nynh thua,” a ci.¹¹Te minmin nynh myrte thingku hae laku a thadynpaw Bawipaw vaawpaw kha, “Laephi kya kae cceih bungthung vae, laephi pynpi tuh daerarin lan a um,” a cipya hae.¹²Bawipaw vaawpaw nynh, “Pou vaaw Bawipaw , hynh-e kum sung sari lungkhu na thinrianuapaw Jerusalem te Judah khuapi hae hynh hohseciamou thawcci leite na um cih hae?” a ci.¹³Tetuh Bawipaw nynh kae te bya kae hokuhpaw vaawpaw kha bya hoypaw te lungtangnaw bya khate bya a khung.¹⁴Bya kae hokuhpaw vaawpaw nynh kae kha yn hopah zah, E bya hynh siakhae ccavae: Vaaw Bawipaw nynh hynhte a ho, Kae tuh Jerusalem te Zion hanlan myarya ka eiung.¹⁵Ngaengante um hae paw minphuin hae tungvaw myaryamaw ka thinria; pawccecize thawte ka thinria khyh lyakhe minmin nynh hoyleinaw kha houh a rae hae.¹⁶Tukeiccuze, Bawipaw nynh hynhte aho, Jerusalem kha ngaethyaumsahte ka kinua vae; a lungkhu khe ka inn kha sak athua cih, Jerusalem kha tounawpaw arui te tou athua cih, cite vaaw Bawipaw nynh a ci.¹⁷Vaawpaw nynh siakhae lanpaw bya yn hopyapaw tuh, Vaaw Bawipaw nynh hynhte a ho: Ka khuapi hae tuh paepae lui lan bua a hoirum cih hae; Bawipaw nynh Zion kha lungtangnaw bua a pya cih zah Jerusalem kha bua a po cih. Vaeningnaw Vizin: Saki hae te Sosuhtu hae

¹⁸Ka dothung zah saki ki pali kha ka muih.¹⁹Bya kae hokuhpaw vaawpaw kha, “E hae hynh pawmou athua hae?” cite ka khia. Te aning nynh, “E hae tuh Judah ram, Israel ram te Jerusalem khua kha phiariphiarae a phiasakuh hae paw saki hae nynh thua hae,” cite yn khung.²⁰Te Bawipaw nynh sosuhtu hae lu pali kha yn muihsah.²¹Te kae nynh, “Minmin hynh paw ryalaw lan mou oun ccia hae?” cite ka khia zah, vaawpaw nynh, “E saki hae tuh, a lu a hang khopaw lu kheit san a um khyh ccaw cite Judah kha phiariphiarae a phiasakuhpaw saki hae nynh thua hae; thuasalama, e sosuhtu hae tuh minmin kha risah khylan, te Judah ccungccaw hae kha phiariphiarae nung khylan Judah ram kha rawsete mih ki a hangnua hae paw minphuin hae ki kha khya khylan oun thua vae hae,” a ci. Vaethumnaw Vizin: Arui te A Toupaw Ccungccapaw

¹Ka dothung zah a kuih kya tounawpaw arui a ccyngpaw ccungccapaw lu kheit kha ka muih.²Te kae nynh, “Teilangmou na cceih cih?” cite ka khia zah, aning nynh, “Jerusalem khua akopaw te asaepaw kha tou lan ka cceih cih,” a ci.³Te bya kae hokuhpaw vaawpaw tuh malang yn cceih, te ccangpaw vaawpaw lu kheit nynh amaw kha tungku khylan cciadue zah,⁴“Ccue lah, khuh-e ccangvaepaw khuh hopya tua: Jerusalem kya ccungccaw zapi te sarangpaw hae a um hae keiccuze khualungrua a um leipaw khua hae kya um hawte, Jerusalem kya a um cih hae.⁵Bawipaw nynh a hopaw tuh, Kae tuh khua po voilu lan a koihpaw maee lungrua ka thua cih zah, khua lungkhu kya umpaw phu-enaw ka thua cih, a ci cite la hopah,” a cipya. Ngianaw

⁶Tho oh, tho oh! Thahlang e ram kyate ccue oh, cite Bawipaw nynh a ci; pawccecize vaawlui zakaw aki ki pali hae hawte phiariphiarae kae nung vae oh, cite Bawipaw nynh a ci.⁷Tho oh! Babilon ccanung kya um hae paw nanning, Zion lang ccue oh.⁸Nanning ae luade oh paw minphuin hae te asekuh lante vaaw Bawipaw (a phu-enaw nynh kae kha yn saw koute) hynhte a ho: Thanccingte, nanning ae ty oh paw nynh ka mitlungdy kha yn ty vae.⁹Minmin kha ka kuih ka hangnua cih hae zah, minmin tuh mih see hae hanlan a luade hae paw uccaw lang a tang cih hae. Tetuh kae hynh vaaw Bawipaw nynh yn saw cipaw na nyh vae cih oh.¹⁰Pou Zion ccanung, hlawsah lah, na lungtua sah! Pawccecize kae cceih zah na ngaelung kya ka um cih, cite Bawipaw nynh a ci.¹¹Tuin nin vae tuh, minphuin patae nynh Bawipaw kya a kyngkuh cih hae zah ka ccungccaw athua cih hae; te na ngaelung kya ka um cih. vaaw Bawipaw nynh kae hynh na kalan yn saw cipaw na nyh cih.¹²Bawipaw nynh ram thyaapaw kyakhe Judah kha a hanpaw lante rho lang a ccou cih zah, Jerusalem kha bua a po cih.

¹³Ccungccaw balyn, Bawipaw malang daebabi lan um oh; pawccecize aning tuh a umnaw hmin thyaapaw kyate a thokuh vae. Vaepalinaw Vizin: Joshua te Satan

¹Te Bawipaw vaawpaw malang a thadynpaw ranpibawi lupi Joshua te amaw kha seibe khylan a ranglang a thadynpaw Satan kha yn muihsah.²Bawipaw nynh Satan kha, “Pou Satan, Bawipaw nynh nang kha kae pe! Jerusalem a potu Bawipaw nynh nang kha kae pe! E ccungccapaw hynh maee kyate poh thuaapaw ccungngue thua khyh tou?” a ci.³Joshua tuh athupaw boeining kha lawkuh zah vaawpaw malang a thadyn.⁴Vaawpaw nynh a malang a thadyn hae paw kha, “Athupaw a boeining hynh khahpah oh,” a cipya hae. Te aning nynh Joshua kha, “Dotua, na seimenaw kha ccaring kae lawpya vae, nang kha boeining hoypaw kae lawsakuh cih,” a cipya.⁵Te kae nynh, “A lu vawlan athyaapaw pungde khungsah hae sah,” cite ka ho. Tukeiccuze minmin nynh athyaapaw pungde kha a lu vawlan khungsah hae zah boeining kha a lawsahku hae; Bawipaw vaawpaw tuh a pe khe a thadyn.

⁶Te Bawipaw vaawpaw nynh Joshua kha tynkaring lan bya hopah zah,⁷“Vaaw Bawipaw nynh hynhte a ho: Nang nynh ka laanpi kha na zui zah, ka rya na law zetuh, ka inn kha na uk cih zah ka voidu kha na do-oih cih, e kya a thadyn hae paw laku kya teenaw kaw te pounaw kaw kae pya cih.⁸Pou ranpibawi lupi Joshua, nang te na malang a haung hae paw na ban hae ryte ngaetua oh! Minmin tuh yn cyihkuh cih paw muihsahnaw nynh athua hae: Ka seepaw Thingkaran kha ka thuakhae cih.⁹Joshua malang ka nungpaw lung kha dotua oh, khah-e lung ccangkheit kya mitmae ccangsari a um, khah-e lung vawlan khe karynte ccaw ka zei cih, e ram a seimenaw kha nin kheit lungkhu ka vuapah cih, cite vaaw Bawipaw nynh a ci.¹⁰Tuin nin khe nanning nynh nae misu ku te nae thaeku ku kaw lang ccia khylan lu kheit te lu kheit na kokuh cih oh, cite vaaw Bawipaw nynh a ci,” cite a hopya. Thing hae

¹Bya kae hokuhpaw vaawpaw tuh bua yn thua zah, a ihpaw ccungccaw tho hawte, kae kha yn tho.²Aning nynh kae kha, “Pawmou na muih?” cite yn khia zah, kae nynh, “Sui mawcci te raepaw maeekhuatung kha ka muih, tuh-e a dung khe pakekhupaw ccangkheit, maeekhua ccangsari, tuh-e pakekhupaw te tuh-e maeekhua ccangsari piadenawpaw paih ccangsari a um.³Maeekhuatung a pe khe oliv thingku ku ning um zah, pakekhupaw a voi a rang khe ku kheit cci a um,” cite ka ho.⁴Bya kae hokuhpaw vaawpaw kha, “Ka bawipaw, e hae hynh pawmou athua hae?” cite ka khia.⁵Bya kae hokuhpaw vaawpaw nynh kae kha, “E hae hynh pawmou athua hae cipaw na nyh khyh hae tou?” yn cipah zah, kae nynh, “Ka bawipaw, ka nyh khyh hae,” ka cipya.⁶Vaawpaw nynh kae kha, “E hynh Zerubbabel kalan yn thuapaw Bawipaw bya nynh thua: Thungnaw liate thua khyh, huhan liate mah thua khyh, ka muisaw liate nynh thua, cite vaaw Bawipaw nynh a ci.⁷Pou mua lepaw, nang tuh pawmou na thua? Zerubbabel malang khe bialae lang na tang cih; ccungccaw hae nynh, ‘Apuithya, Apuithya!’ cite a sia lya hae khe, aning nynh beikinn adungparyh lung kha a khang cih,” a ci.

⁸Bawipaw bya tuh ka kya yn thua zah,⁹“E inn aleihpaw kha Zerubbabel nynh a bing vae; aning nynh inn hynh phe a lyn cih. Tetuh vaaw Bawipaw nynh kae hynh nae kalan yn saw cipaw na nyh cih oh.¹⁰Ryalaw adihpaw law ccyh lyaze pawlang a ria lei hae paw miakaw nynh mih lungtua cih zah, Zerubbabel kuih kya-e tounawpaw arui kha a muih cih hae.
“E maeekhua ccangsari tuh laephi pynpi po lekuh lan a muih hae paw Bawipaw mit hae nynh athua hae,” a ci.¹¹Te kae nynh, “Maeekhuatung a voi a rang um hae paw hynh-e oliv thingku ku ning hae hynh pawmou athua hae?¹²Te chitui bunawpaw sui paih ccangning nynh chitui a bu hae paw hynh-e oliv ku akaran ran ning hae hynh pawmou athua hae?” cite ka khia.¹³Vaawpaw nynh kae kha, “E hae hynh pawmou athua hae cipaw na nyh khyh tou?” cite yn khia zah kae nynh, “Ka bawipaw, ka nyh khyh,” ka cipya.¹⁴Tetuh aning nynh, “E hae tuh laephi pynpi kya-e Bawipaw pe a thadyn hae paw chitui thuh athua hae paw lu ning nynh thua hae,” a ci. Vaetaruhnaw Vizin: Azoupaw Ccakue

¹Bua ka dothung zah a zou cciamangpaw ccakue kha ka muih.²Te vaawpaw nynh kae kha, “Pawmou na muih?” cite yn khia zah, kae nynh, “A zou cciamangpaw ccakue kha ka muih; tuh-e tuh dong kuin sae zah dong haw ako,” ka cipya.³Tetuh aning nynh kae kha, “E hynh ram pynpi kya a thuapaw thyalawnaw nynh thua; a ruhpaw miakaw tuh hynh-e ccakue voikheit lang azeiku thyhte vua athua cih zah, hynhute bya a kinkuhpaw miakaw tuh ccakue voikheit lang azeiku thyhte vua athua cih.⁴Vaaw Bawipaw nynh a hopaw tuh, tuh-e ccakue tuh phe ka saw vae zah, miruh inn lungkhu lang te ka min phyate hynhute bya a kinkuhpaw miakaw inn lungkhu lang a tee cih; te tuh-e inn kya a um cih zah, inn kya-e thing te lung ryte inn tuh a roh cih,” yn cipya. Vaesarinaw Vizin: Abawng lungkhu e Nopinung

⁵Te bya kae hokuhpaw vaawpaw tuh yn toikuh zah kae kha, “Dothung lah, yn langkuhpaw uccaw khuh dotua,” yn cipya.⁶Kae nynh, “Khuh-e khuh pawmou athua?” cite ka khia zah aning nynh, “Oun langkuhpaw abawng bawng kheit nynh thua. E tuh ram pynpi kya um hae paw mih hoyleinaw nynh thua,” yn cipya.⁷Kuee te raekuhpaw ahu tuh hungkuh zah, abawng lungkhu kya nopinung lu kheit a haung!⁸Te vaawpaw nynh, “E nopinung hynh Hoyleinaw nynh thua,” a ci. Te tuh-e nopinung tuh abawng lungkhu lang nohde zah, abawng kha kuee te raekuhpaw ahu kha a hu.⁹Te ka dothung zah nopi hae lu ning oun pou hae paw kha ka muih. Mih sake kya muisaw a um; minmin tuh kaepaw-pavaw sake alopaw sake kha hoi hae zah, abawng kha laephi te vaawlui laku lang a zoukhae hae.¹⁰Tetuh bya kae hokuhpaw vaawpaw kha, “Teilangmou abawng khuh a zoukhae hae?” cite ka khia.¹¹Aning nynh, “Abawng hanlan inn sakpya khylan Shinar ram lang nynh a zoukhae hae; inn a paccynpah kou hae te, abawng kha tuin kya nungnawpaw kya a nung cih hae,” yn cipya. Vaetaryanaw Vizin: Marangle Ccangpali

¹Te bua ka dothung zah sohin mua ccangning laku kyate oun pou hae paw marangle hae ccangpali kha ka muih.²Ccangkheitnaw marangle kya asepaw marang hae, ccangningnaw marangle kya amanpaw marang hae,³ccangthumnaw marangle kya arawpaw marang hae, ccangpalinaw marangle kya tuh puakakae lante apyaapaw marang hae a um hae.⁴Te bya kae hokuhpaw vaawpaw kha, “Ka bawipaw, e hae hynh pawmou athua hae?” cite ka khia.⁵Vaawpaw nynh, “E marangle hae tuh laephi pynpi kya-e Bawipaw malang te a poupaw, vaawlui khivae ccangpali nynh thua.⁶Amanpaw marang hae kya-e marangle tuh thahlang ram lang a cceih, arawpaw marang hae tuh niccaw ram lang cceih hae zah, apyaapaw marang hae tuh alia ram lang a cceih hae,” yn cipya.⁷Marang hae he oun pou hae te, laephi kya ccia bungthung lan thawte a zuaku hae. Te vaawpaw nynh, “Cceih oh lah, laephi kya la cceih bungthung oh,” a cipya hae. Tukeiccuze minmin nynh laephi kya a cceih bungthung hae.⁸Te vaawpaw nynh kae kha yn ko zah, “Thahlang ram lang a cceih hae paw nynh ka muisaw kha thahlang ram kya a haeungsah vae hae,” a ci. Siapharan lang Khangnaw

⁹Bawipaw bya tuh ka kya yn thua zah:¹⁰Kyngte cciakhae hae zah Babilon langte oun ki vae hae paw Heldai, Tobijah te Jedaiah kya-e sui te ngun kha suelua hae; tuin nin khe Zefaniah ccapaw Josiah inn lang cciatua.¹¹Sui te ngun kha lah lah, bawilukhung kha na rae koute Jehozadak ccapaw ranpibawi lupi Joshua lu kya khungsah tua;¹²te Joshua kyakhe vaaw Bawipaw nynh hynhte a ho: E kya a min Thingkaran cikuhpaw ccungccapaw a um: aning tuh a umnaw hmin kya a toih cih zah, Bawipaw beikinn kha a sak cih.¹³Bawipaw beikinn a sak cih paw tuh amaw nynh thua; aning tuh siapharan phu-enaw kha a ccou cih zah a bawitungkhung vawlan haungte a uk cih. A bawitungkhung pe khe ranpibawi lu kheit a um cih zah, mih lu ning laku kya daenaw te ngingnaw a um cih.¹⁴Tuh-e bawilukhung tuh Heldai, Tobijah, Jedaiah te Zefaniah ccapaw Josiah nynh a do-oih cih hae zah, Bawipaw beikinn kya liathuinaw uccaw lante a um cih.

¹⁵Laansaw lang um hae paw tuh oun cceih cih hae zah Bawipaw beikinn saknaw kya a bawm cih hae; te vaaw Bawipaw nynh kae hynh nae kalan yn saw cipaw na nyh cih oh. Nanning nynh Bawipaw nae Pachia bya kha zuakute na zui oh zetuh, e hynh acyihkuh cih. Athyaruhpaw Looh-aesungnaw Seibenaw

¹Darias nynh siapharan lang a tangnaw kum palinaw, Kislev acikuhpaw sawpaw sah takuanaw, nin pali nin khe Bawipaw bya tuh Zekhariah kalan yn thua.²Bethel khuaccaaw hae nynh Sharezer te Regem-melek kha mih ccungccaw hae ryte Bawipaw thawccinaw kha ngia khylan te³vaaw Bawipaw inn kya umpaw ranpibawi hae te profeh hae kyakhe, “Kum patae rya kae la law vae hawte, sawpaw sah pangawnaw kya rawkhuite looh-aesungte tou kae um ung cih?” cite khia khylan a saw hae.⁴Te vaaw Bawipaw bya tuh ka kya yn thua zah:⁵Ram lungkhu e ccungccaw balyn te ranpibawi hae kha hopah hae: Kum sung sari lungkhu, sawpaw sah pangawnaw te sah sarinaw kya looh-ae na sung oh zah rawkhuite na um vae oh ze, looh-ae na sung oh paw kha kae ka hanlan athua zawtou?⁶Na ae na nia vae oh ze, naemaw hanlan kyalya na ae na neih khyh oh tou?⁷Jerusalem tuh ccungccaw um zah a kaethung lya te a pepan e khua hae, Negeb te Shefelah kya mah ccungccaw a um lya hae ze, Bawipaw nynh langmaw profeh hae kyate a la phypaw bya kha hynh-e bya hae hynh thua khyh tou? Pachia Kaw-einaw te Detahnaw

⁸Bawipaw bya tuh Zekhariah kalan yn thua zah a hopaw tuh:⁹Vaaw Bawipaw nynh hynhte a ho: Hmerarih lan byapia oh, lu kheit te lu kheit ngaethyaumsakunaw te thawccikunaw kha langsakuh oh;¹⁰nomae hae, ngawraw hae, ramccang ccungccaw hae te ryachi hae kha tuaasah nan oh; lu kheit te lu kheit laku nae thinlung kya ahoy leipaw tuanaw hoikuh nan oh, a ci.¹¹Thuasalama minmin nynh ngae ry khyh hae, mih lungkhung zah a thae khyh nawlan hae mih nakaring kha a huku hae.¹²A ccangpyanaw kha thuasah, vaaw Bawipaw nynh a muisaw te langmaw profeh hae kyate a hopaw bya hae kha thuasah a thae khyh nawlan hae mih thinlung kha a khungsahku hae. Tukeiccuze vaaw Bawipaw kyate myarya lepaw thin-unaw tuh yn thua.¹³Ka ko hae zah a thae khyh hae hawte, minmin nynh yn ko hae zemah ka thae khyh, cite vaaw Bawipaw nynh a ci,¹⁴te minmin nynh a ny lei hae paw minphuin hae balyn laku khe khiccung khate phiariphiarae ka nung hae. Tukeiccuze a cciataw hae paw ram tuh a cceih bungthungpaw lu kheit san a um lei lan ciate ccungccaw phe dae zah, um ry a umpaw ram tuh accakaepaw lang rae athua vae. Zion kha Byakinpyakunaw

¹Vaaw Bawipaw bya tuh ka kya yn thua zah:²Vaaw Bawipaw nynh hynhte a ho: Kae tuh Zion hanlan myaryamaw ka eiung zah, myarya thin-unaw te aning hanlan ka eiung.³Bawipaw nynh hynhte a ho: Kae tuh Zion lang ka ki cih zah, Jerusalem kya ka um cih; Jerusalem tuh alungzipaw khuapi cite ko athua cih zah, vaaw Bawipaw mua tuh mua thyaapaw cite ko athua cih.⁴Vaaw Bawipaw nynh hynhte a ho: Nungpi te paawpi hae tuh mih kum myarya a tang vae keiccuze hoitang ccarou ccyngkute Jerusalem laanpi hae kya bua a haung cih hae.⁵Khuapi kya-e laanpi hae tuh a zue hae paw imua nopi pise hae te phe abeih cih hae.⁶Vaaw Bawipaw nynh hynhte a ho: Tuh-e tuh atu she kya a laehy hae paw hynh-e ccungccaw hae hanlan athua kho lei lanpaw alo zemah, kae ka hanlan tuh athua kho leipaw alo cih zawtou? cite vaaw Bawipaw nynh a ho.⁷Vaaw Bawipaw nynh hynhte a ho: Ka ccungccaw hae kha nithua lang e ram te niccaw lang e ram kyate ka khum cih hae zah,⁸Jerusalem kya um khylan ka cciakhae cih hae. Lungzinaw te dingnaw liate minmin tuh ka ccungccaw hae athua cih hae zah kae tuh mih Pachia ka thua cih.

⁹Vaaw Bawipaw nynh hynhte a ho: Vaaw Bawipaw inn, beikinn kha sak khylan athonaw kha bing athua lyaze a la um hae paw profeh hae nynh a ho hae paw hynh-e bya hae hynh atu she kya a thae hae paw nanning nynh nae thawsaesakuh oh.¹⁰Pawccecize tuin ccyh athua maw tuh ccungccaw hae hanlan te sarangpaw hae hanlan ryalaw mee um khyh, a tee hae paw hanlan te a pou hae paw hanlan rhaw hae kyate khynnaw um khyh, ccungccaw hae balyn kha lu kheit te lu kheit ka dousaku hae.¹¹Thuasalama a laehypaw hynh-e ccungccaw hae hynh langmawlya hawte ka ccuepe vae lan khyh hae, cite vaaw Bawipaw nynh a ci.¹²Lungdaete ccacii kha a vua vae cih hae; misu ku nynh athae thae cih, laephi nynh ccathae a pousah cih zah, vaawlui nynh dangtui a ccawsah cih; e uccaw hae balyn hynh a laehypaw hynh-e ccungccaw hae ka ccousah cih hae.¹³Pou Judah hae te Israel hae, nanning tuh minphuin ccangpaw hae laku kya thyalawnawpaw lang na la tang oh hawte, nanning kha kae khum cih oh zah hythua ccounawpaw lang na tang cih oh. Rih nan oh, nae thawsae sah.

¹⁴Vaaw Bawipaw nynh hynhte a ho: Nae minpaaw hae nynh ka thin he yn riasah hae tuh, synpyaku leite nae tungvaw kya ronaw thuasah lan ka paccynku hawte,¹⁵atu she kya mah Jerusalem te Judah hae tungvaw kya hoynaw rae lan bua ka paccynku; rih nan oh, cite vaaw Bawipaw nynh a ci.¹⁶E hae hynh na cyi lan oh paw nynh thua: Lu kheit te lu kheit byaccing kha hokuh oh, nae koikua hae kya ahmete byapia oh lah, daenaw hanlan rae oh,¹⁷lu kheit te lu kheit nae thinlung kya ahoy leipaw kha paccynnuakuh nan oh, ahme leipaw byakinkunaw kha ry nan oh; pawccecize hynh-e uccaw hae balyn hynh ka hua, cite Bawipaw nynh a ci. Lungtua lan umpaw Looh-aesungnaw

¹⁸Vaaw Bawipaw bya tuh ka kya yn thua zah:¹⁹Vaaw Bawipaw nynh hynhte a ho: Sawpaw sah palinaw kya looh-aesungnaw, sah pangawnaw kya looh-aesungnaw, sah sarinaw kya looh-aesungnaw te sah hawnaw kya looh-aesungnaw tuh Judah hae hanlan lungtua lungpawnaw poi kha tua ccyh athua cih hae: tukeiccuze byaccing te daenaw kha ry oh. Jerusalem lang Ccianaw

²⁰Vaaw Bawipaw nynh hynhte a ho: Minphuin hae, khuapi patae kya um hae paw tuh oun cceih cih hae;²¹khuapi khuakheit kya um hae paw nynh ccangpaw khua lang a cceih cih hae zah, “Rang oh, Bawipaw thawccinaw ngia khylan te vaaw Bawipaw kha ccung khylan cceih oh sih; kae mah ka cceih cih,” a ci cih hae.²²Ccungccaw patae te athungpaw minphuin hae tuh vaaw Bawipaw kha Jerusalem kya ccung khylan te Bawipaw thawccinaw kha ngia khylan a cceih cih hae.²³Vaaw Bawipaw nynh hynhte a ho: Tuin nin vae tuh bya aphuinphuin ho hae paw minphuin kya-e pise lu haw nynh Judah ccungccaw lu kheit kha a boeining te a kyng cih hae zah, “Pachia tuh na kya a um cipaw kha kae thae keiccuze nang ryte cceihkheih oh sih,” cite a hopah cih hae. Israel Rhaw hae kha Byapianaw¹Hodaebya.Bawipaw bya nynh Hadrak ram teDamaskas khua kha a rawse cih.Israel phin hae balyn kyalya thua leiteSiria khuapi kha mahBawipaw kya-e nynh thua.²Hadrak ramri a umpawHamath khua mahamaw kya-e nynh thua,Tair khua te Sidon khua tuhmyarya a haw hae zemahamaw kya-e nynh thua hae.³Tair nynh rhawlungrua kha a raeku,ngun kha vuiping hawtepumkuh zah,sui kha laanpi kya umpawtuiccua hawte a pumku.⁴Thuasalama Bawipaw nynha hoirumnaw kha a lawpah cih,a sisua kha rili lungkhu langa phungpah cih zah,khuapi kha maee te soi athua cih.

⁵Ashkelon khua nynhtuh-e tuh a muih cih zah a rih cih;Gaza khua nynh mah a muih cih zahlungriathaete a um cih;Ekron khua maha ngaehoinaw azo keiccuzetuhcite athua cih.Gaza siapharan tuh azo cih;Ashkelon khua kyaccungccaw um lan khyh;⁶Ashdod khua kyakaapia hae a um cih hae,Filistin hae mih lysakunaw khaka thangsah cih.⁷Aning nynh a aepaw chiise khaa khalang kyate ka lah cih zah,aning nynh a boupawanungsikuhpaw khaa haw hae laku kyate ka lah cih;a laehypaw ccungccaw tuhah Pachia hanlana laehypaw athua cih zah,Judah phin lungkhu ephin kheit hawte athua cih,Ekron khuaccaaw hae tuhJebus hae hawte athua cih hae.⁸Humhung nynh maha ccianua bungthung khyh nawlan,ka inn kyakhe rhawviatu lanteryahmin ka tahkuh cih;tuaasahtu nynh minmin khabua thiing vae lan khyh hae,pawccecize ka mit ccaccei teatu phe ka muih vae.Oun Thua Cih paw Uktu⁹Pou Zion ccanung,na lung myarya tua sah!Pou Jerusalem ccanung,thawte siatua!Pawccecize na siapharan tuhna kalan yn cceih cciamang;aning tuh taetu thua zahtaenaw te yn cceih,thinlung nepaw thua zahlann tungvaw a ccikuh,lann taraw tungvaw,lann a taw tungvaw ccikute yn cceih.¹⁰Kae nynh Efraim ram kyatemarangle kha ka dee cih zah,rhawtuknawpaw marang khaJerusalem kyate ka dee cih;rhawtuknawpaw li khavua athua cih zah,minphuin hae khadaenaw bya ka hopah cih hae;ka uknaw tuh rili ccangkheit kyaterili ccangkheit kyaciaa phah cih zah,Vawpi kyate laephiadianaw cia a thua cih.

¹¹Nang na hanlan tuh, nang te ah raekheihpawka byakinnaw chiise keiccuze,thongccah hae pawna ccungccaw hae khatui um leinaw laekarung kyateka luesah cih hae.¹²Pou ngaehoinaw a hoi hae pawthongccah hae,nae rhawlungrua lungkhu langkithui oh; nanning khahiin hoynaw leit ningkae pyathui cih oh, cite atunin ka ho vae.¹³Pawccecize Judah khaka li hawte ka koi vae;Efraim kha the lang ka rae vae.Pou Zion, na ccapaw hae khamih lung ka thosah cih zah,pou Grik, na ccapaw hae khaka dousah cih hae,nang kha rhawkaw thaloi langkae mang cih.

¹⁴Bawipaw tuh mih tungvaw kheyn langkuh cih zah,a the tuh khozawlaekuhpawhawte a kaw cih;Bawipaw PACHIA nynhmungkae a tu cih zah,alia lang e khiccung rytea cceih cih hae.¹⁵Vaaw Bawipaw nynhminmin kha a thungkhaw cih hae,minmin nynh a roh cih hae zahdeihnawpaw lung hae khaa syde cih hae;mih chii kha misutui hawtea neih cih hae zahpakekhupaw abia hawteabeih cih hae,silawhang apaki hawteciadadae lan a um cih hae.¹⁶Tuin nin vae tuhBawipaw mih Pachia nynhminmin kha a khum cih hae,pawccecize minmin tuha ccungccaw hae nynh thua hae;a ram kyakhebawilukhung kya-eaphutepaw lung hawte a aw cih hae.¹⁷A hoynaw te a puithyanaw tuhpawcih baban mou ale!Ccathae nynh ccangvae hae khamih thawsaesah cih hae zah,misutui thawpaw nynhliaccaw hae khamih thawsaesah cih hae.Judah te Israel Kithuinaw¹Hawkhuaa araw ccyh kyaBawipaw kalan khuaa kha ngia oh,khise maeking kha rae zahnanning hanlan khuaa a rawsahpaw teccungccaw miakaw hanlanloo kya aku a posahpaw tuhBawipaw nynh thua.²Terafim khozi hae nynhaccakaepaw bya kha ho hae zahapawe hae paw nynhakyh leipaw vizin kha a muih hae;maansahthya hae paw nynhakyh leipaw maan kha sah hae zah,accakaepaw ngaengannaw kha a pya hae.Tukeiccuze ccungccaw hae tuhtuu hae hawte khiavuikuh hae zah,tuurin a um khyh keiccuze a teing hae.

³Tuurin hae tungvaw ka thinria,cciakhaetu hae kha de ka tah cih hae;vaaw Bawipaw nynh a tuuphu,Judah hae kha do-oih hae zah,huhan a hoipaw rhawtuknawpawa marang lang a rae cih hae.⁴Apaki lang e abyapi huapaw lung thuasah,bu saknawpaw pangreih thuasah,rhawtuknawpaw li thuasah,rhawbawi miakaw thuasahminmin kyate oun langkuh cih hae.⁵Minmin tuh rhaw hae khalaanpi e tuiccua kya a syde hae pawrhawtuknaw kya-erhawkaw hae hawte athua cih hae.Bawipaw tuh mih kya a um keiccuze,minmin nynh rhaw a tuk cih hae zah,marang ccikuh hae pawrhawkaw hae khamaethya a bong cih hae.

⁶Kae nynh Judah hae khathawzung ka pya cih hae zah,Josef phin hae kha ka khum cih hae.Minmin kha ngaethyaka umsah hae keiccuze ka kikhae cih hae zah,ka vua boi lei hae paw hawte athua cih hae;pawccecize kae tuh Bawipaw mih Pachiaka thua zah, mih bya khaka thaepah cih hae.⁷Te Efraim ccungccaw hae tuhrhawkaw hae hawte athua cih hae zah,misutui neihpaw hawte mih lungtua cih.Mih ccaaw hae nynh tuh-e tuha muih cih hae zah mih lungpaw cih,Bawipaw kya mih lungtua cih.

⁸Minmin kha ka shawkhaw vae hae keiccuzesyntawnaw pyate ka ko cih hae zahka suelua cih hae,minmin tuh atakaw lyaa lung hae hawte a lungthui cih hae.⁹Minphuin ccangpaw hae kyaphiariphiarae ka nung hae zemah,asawnaw e ram hae kyakhekae kha yn liathui cih hae,mih ccaaw hae khaa do-oih cih hae zah a kithui cih hae.¹⁰Izip ram kyate mih inn langka kikhae cih hae zahAssiria ram kyate ka suelua cih hae;Gilead ram te Lebanon ram langka cciakhae cih hae,minmin hanlan umnawazaw lei lan ciate a lung cih hae.¹¹Riathaenaw rili kha a zua cih hae zah,rili tuileih kha detah athua cih,Nal vawpi akhunaw balyn tuh arou cih.Assiria a lysakunaw khabiabung athua cih zah,Izip huhan tuh azo cih.¹²Minmin kha Bawipaw liatea thungpaw lang ka rae cih hae zah,a min liate a cceih cih hae, citeBawipaw nynh a ci.

¹Pou Lebanon,na sidar thing hae khamaee nynh a u ccaw,na thuakaw hae kha hungtua!²Pou maeccaw ku hae,rawtua oh, pawccecize sidarthing hae tuh pu hae zah,asung-epaw thing hae tuharoh vae hae!Bashan kya umpawrantah thing hae, rawtua oh,pawccecize myarya lungpawtuhpi thing hae tuh nge athua vae hae!³Tuurin hae nynh mih phu-enawazo keiccuze a raw hae paw tuhngaetua oh!Jordan vahue a phu-enaw tuharo vae keiccuzechindeih hae siaruanaw tuhngaetua oh!Tuurin Phuin Ning

⁴Bawipaw ka Pachia nynh hynhte a ho: Chia lanpaw tuuphu kha a rintupaw hawte thuatua oh.⁵Tuh-e tuu hae kha a retu hae nynh a chia hae zemah detahnaw teing khyh hae; a zuatu hae nynh, “Kae tuh ka hoirum vae keiccuze Bawipaw tuh thehoyte um sah,” a ci hae; minmin a rintu hae tuurin hae maw nynh tuu hae kha ngaethyaumsah khyh hae.⁶Ram lungkhu um hae paw kha ngaethya ka umsah vae lan khyh hae, cite Bawipaw nynh a ci. Ccungccaw miakaw kha mih innpaw kuih kalan te mih siapharan kuih kalan ka ap cih hae; tuh-e hae nynh ram kha a roh cih hae zah, mih kuih kyate lu kheit sanmah ka luesah lan khyh hae.

⁷Tukeiccuze tuu te kungku hae paw ccelang, kae tuh chia lanpaw tuu hae kha a rintupaw lang ka tang. Hoitang ccangning kha ka law; ccangkheit kha Thawccinaw cite min ka phu zah, ccangpaw ccangkheit kha Lungngingnaw cite min ka phu, te tuu hae kha ka rin hae.⁸Sawpaw sah kheit lungkhu tuurin lu thum kha ka vua hae, pawccecize mih tungvaw ka ngaesang kho vae khyh, minmin nynh mah kae kha yn hua hae.⁹Te kae nynh, “Kae tuh nanning ae rintu oh paw ka thua vae lan khyh. A chih cih paw tuh chih sah; ro athua cih paw tuh roh sah; a laehy hae paw tuh sa kheit te sa kheit aekuh hae sah!” cite ka ho.¹⁰Ccungccaw hae balyn ryte ka raepaw byakinnaw kha rote, Thawccinaw cikuhpaw ka hoitang kha ka lah zah ka khya.¹¹Tukeiccuze tuin nin khe tuh-e byakinnaw tuh ro thua zah, kae yn do hae paw, tuu te kungku hae paw nynh tuh-e tuh Bawipaw bya nynh thua cipaw a ny hae.¹²Te kae nynh minmin kha, “Ahoy na ci oh ze, ka ryalaw mee yn pya oh; na ci khyh oh ze yn pya nan oh,” ka cipya hae. Tukeiccuze ka ryalaw mee lang ngunphua shekel sung thum kha a tou hae.¹³Bawipaw nynh kae kha, “Khah-e ngunphua kha sisua bawng lungkhu lang vuatua,” yn cipya. Ka mee yn khyanaw hae paw ngunphua myarya lungpaw shekel sung thum kha ka lah zah, Bawipaw inn kya umpaw sisua bawng lungkhu lang ka vua.¹⁴Tetuh Judah te Israel laku uno kyngkunaw kha rote, Lungngingnaw cikuhpaw ccangningnaw ka hoitang kha ka khya.

¹⁵Te Bawipaw nynh kae kha yn hopah zah: Ccungkia leipaw tuurinpaw kya-e uccaw hae kha bua lawtua.¹⁶Pawccecize ram lungkhu kya tuurin lu kheit kha ka langsakuh cih, aning nynh vyavya chihpaw tuu hae kha pawlangria lan khyh, laanpi a vae paw tuu kha ccung lan khyh, vaemaw a muepaw kha dansah lan khyh, adanpaw tuu kha looh dang lan khyh, thuasalama athopaw tuu hae kha tuh mih ccumakeih kha a zu cih zah a ae cih.¹⁷Tuuphu a ccuetawpaw, ccungkia leipawka tuurin hanlan ngaethya lan kou um!A kuih te a ranglang mit khathaloi nynh ccawphu vae sah!A kuih tuh khaleih rou sah,a ranglang mit tuh marae moh sah! a ci.Jerusalem nynh Taenaw¹Hodaebya.
Israel te asekuhpaw Bawipaw bya: Vaawlui kha tharae daw zah laephi kha mah rae zah ccungccaw lungkhu kya muisaw a raetupaw Bawipaw nynh hynhte a ho:²Dotua, Jerusalem tuh a pepan umpaw minphuin hae hanlan ruinawpaw banang lang ka rae cih; Jerusalem kha he a koihlu hae te, Judah kha mah a koihlu cih hae.³Tuin nin khe Jerusalem kha minphuin hae balyn hanlan aripaw lungtung lang ka rae cih; tuh-e lungtung a hang hae paw balyn tuh mimaw toulou kha vaemaw a muesakuh cih hae. Laephi vaw e minphuin hae balyn tuh Jerusalem dou khylan pynkheihlan a sueluakuh cih hae.⁴Bawipaw nynh a hopaw tuh, tuin nin khe marang miakaw kha ka siisakuh cih hae zah, a ccikuh hae paw kha ka ngaeesah cih hae. Thuasalama Judah hae kha tuh ka do-oih cih hae, minphuin ccangpaw hae kya-e marang miakaw kha mih mit ka mohsah cih.⁵Tetuh Judah phin hae nynh, “Jerusalem khuaccaaw hae tuh vaaw Bawipaw mih Pachia liate thawzung a hoi hae,” cite a hokuh cih hae.

⁶Tuin nin khe Judah phin hae tuh maeething pumnuapaw maeephupi hawte thuasah, loohcce hae laku aruapaw maee hawte thuasah ka thuasah cih hae; minmin nynh mih pepan voilang ranglang umpaw minphuin hae balyn kha a roh cih hae, Jerusalem khua tuh amaw umnaw hmin, Jerusalem kya mawkhe bua a um cih.

⁷David ciihan hae phu-enaw te Jerusalem khuaccaaw hae phu-enaw tuh Judah phu-enaw laeze hangthung athua khyh nawlan, Bawipaw nynh Judah rhawkaw hae kha taenaw a pyaty cih hae.⁸Tuin nin khe Bawipaw nynh Jerusalem khuaccaaw hae kha a thungkhaw cih hae, tuhteze nynh minmin laku e thawzung zya hae paw tuh tuin nin khe David hawte thuasah, David ciihan hae tuh Pachia hawte thuasah, mih malang umpaw Bawipaw vaawpaw hawte thuasah athua cih hae.⁹Tuin nin khe Jerusalem dou khylan oun cceih hae paw minphuin hae balyn kha ro khylan ka ccung cih hae. Thuingpaw hanlan Rawnaw

¹⁰David ciihan te Jerusalem khuaccaaw hae tungvaw kya ngaethyaumsahnaw thinlung te sawsang rynaw thinlung kha ka bu cih, tuhteze nynh minmin nynh a thuing hae paw ccungccapaw kha he a do hae te, lu kheit kyalyapaw ccaaw hanlan a rahpaw hawte, tuh-e paw hanlan a rah cih hae, ccatawccaw hanlan a rahpaw hawte, tuh-e paw hanlan thawte a rah cih hae.¹¹Tuin nin vae tuh Jerusalem khua e rawnaw tuh Megiddo accya kya umpaw Hadad-rimmon hanlan rawnaw ciate ale cih.¹²Ram tuh a rah cih, innbyn raveih tuh mawmaw raveihte a rah cih hae; David ciihan kya-e innbyn tuh amaw taekhiate, mih zu hae tuh mimaw taekhiate a rah cih hae; Nathan ciihan kya-e innbyn tuh amaw taekhiate, mih zu hae tuh mimaw taekhiate a rah cih hae.¹³Levi ciihan kya-e innbyn tuh amaw taekhiate, mih zu hae tuh mimaw taekhiate a rah cih hae; Shimei innbyn tuh amaw taekhiate, mih zu hae tuh mimaw taekhiate a rah cih hae;¹⁴te tuhlaepaw innbyn hae tuh mawmaw innbyn raveihte, mih zu hae tuh mimaw taekhiate a rah cih hae.

¹Tuin nin khe David ciihan te Jerusalem khuaccaaw hae mih seinaw te mih nungsikunaw kha ccikan nawlan tuidy ccangkheit aphyh cih. Zohtuh Beiknaw Vuanaw

²Vaaw Bawipaw nynh a hopaw tuh, tuin nin khe zohtuh hae min kha liathui athua vae khyh nawlan ram kyate ka vua cih; profeh hae te athyaa leipaw muisaw hae kha mah ram kyate ka vua cih hae.³Profeh lukhakheit tuh bua yn langku lanze, amaw a saahkuhtu hae a nung te a paaw nynh, “Nang tuh Bawipaw min te hynbya na ho keiccuze na hiin vae lan khyh,” cite a hopah cih hae zah, profehbya a ho lyakhe a saahkuhtu hae a nung te a paaw nynh amaw kha po zua lan a thuing cih hae.⁴Tuin nin vae tuh profeh hae tuh profehbya a ho vae hae ze, minmin lu kheit cci nynh a muih hae paw mih vizin keiccu mih maethah cih; milae kha ling khylan saming angkiccua kha kikuh vae lan khyh hae,⁵minmin lu kheit cci nynh, “Kae tuh profeh ka thua khyh, loophopaw nynh ka thua; ka di lya mawte laephi te a vuekuakuhpaw nynh ka thua,” cite a ho cih hae.⁶Te lukhakheit nynh, “Na by kya-e vaemaw hynh paw keiccu mou athua?” cite a khia hae ze, “Ka ban hae inn kya ka muepaw vaemaw nynh thua,” cite a khung cih hae.
Tuurin Detahnaw, Tuu hae Phiakunaw⁷Pou thaloi, kae te ryalahkheihpaw,ka tuurinpaw kharawsete thonuaku tua, citeVaaw Bawipaw nynh a ci.Tuu hae tuh phiariphiarae a um ccaw hae,tuurinpaw kha ziatua;tuu taraw hae kha rawseteka kuih ka maeleihnua cih hae.⁸Bawipaw nynh a hopaw tuh,ram pynpi kyaccungccaw pum thum pum ning khavuate ro athua cih hae zah,pum thum pum kheit tuha laehy cih hae.⁹Te pum thum pum kheit tuhmaee lungkhu ka nung cih hae zah,ngun kha thyaasah hawteka thyaasah cih hae,sui kha syntawtua hawteka syntawtua cih hae.Minmin nynh ka min khayn ko cih hae zah ka oi cih hae.Kae nynh, “Minmin tuhka ccungccaw hae nynhthua hae,” cite ka ho cih zah,minmin nynh, “Bawipaw tuhkae Pachia nynh thua,” cite a ho cih hae.Malang Ccyh Rhawtuknaw te Nyathya Taenaw

¹Bawipaw ccyh tuh anae vae, tuin ccyh kyakhe ae luade oh paw nae uccaw kha nae malang khe a neekuh cih hae.²Jerusalem kha tuk khylan minphuin hae balyn kha ka suelua cih hae zah khuapi kha a lah cih hae, inn hae kha a luade cih hae zah nopi hae kha kyngdete a ikhae cih hae; khuaccaaw hae angankuh kha kyngte a cciakhae cih hae, thuasalama a laehy hae paw kha tuh khuapi kyate vua thua lan khyh hae.³Te Bawipaw tuh yn toikuh cih zah, rhaw a tuk nin lya hawte khah-e minphuin hae kha a tuk cih hae.⁴Tuin nin vae tuh a ccu tuh Jerusalem nithua lang umpaw Oliv Mua vawlan a thadyn cih; Oliv Mua tuh nithua lang te niccaw lang cia ccangning lang akoi cih zah myarya kopaw accya lang a tang cih; tetuh Mua angankuh tuh thahlang a nuekuh cih zah, angankuh tuh alia lang a nuekuh cih.⁵Te Bawipaw mua accya kin te na ccue cih oh, pawccecize mua hae laku e accya tuh Azal cia aphah cih; Judah siapharan Uzziah ccyh lyaze innrysuekuhpaw kyate na ccue lya oh hawte na ccue cih oh. Tetuh Bawipaw ka Pachia tuh a mithyaa hae balyn ryte oun cceih cih hae.

⁶Tuin nin vae tuh khuaccih te dangtui mah um vae lan khyh.⁷Khuadae kyalya po a um cih (tuh-e tuh Bawipaw nynh a nyh), khuazi te khuadae cite um vae lan khyh, pawccecize zete ccyh kya awnaw a um cih.⁸Tuin nin vae tuh Jerusalem kyate hiinnaw tui apou cih, tuh-e tui angankuh tuh nithua lang e rili kalan alua cih zah, angankuh tuh niccaw lang e rili kalan alua cih; hawnin te khuaccih kya po alua cih.

⁹Bawipaw tuh laephi pynpi kya siapharan lang a tang cih; tuin nin vae tuh Bawipaw tuh ccangkheit kyalyapaw Bawipaw , a min minkheit kyalyapaw min athua cih.

¹⁰Ram pynpi tuh Geba khua kyate Jerusalem alia lang e Rimmon khua kyacia bialae lang rae athua cih. Thuasalama Jerusalem tuh a umnaw hmin kya po umte hangthung athua cih zah, Benjamin Koikua kyate langmawlya e koikua hmin kyacia, Apaki Koikua kyacia, Hananel Innhangpaw kyate Siapharan misu mianaw khu kyacia athua cih.¹¹Jerusalem tuh ccungccaw a um cih zah, ronaw kha kharouh teing vae lan khyh; khyndadyh lan a um cih.

¹²Jerusalem a doutu minphuin hae balyn kyakhe Bawipaw nynh hynh-e shethya hynh a thuasah cih: Mih ccu te a thadyn lya hae mawkhe mih ngesaw athuh cih; mih mitkarung lungkhu e mih mit tuh athuh cih zah, mih khalang lungkhu e mih lae tuh athuh cih.¹³Tuin nin khe Bawipaw nynh yn sawpaw siikunaw alepaw nynh minmin kha a thuanua cih hae, mimaw te mimaw a kyngkuh cih hae zah, lu kheit te lu kheit rhawkute a theihkuh cih hae;¹⁴Judah hae nynh heize Jerusalem kya rhaw a tuk cih hae. A pepan e minphuin hae sisua kha luadete suelua athua cih—sui, ngun te boeining patae kha suelua athua cih.¹⁵Tuhcihawpaw shethya tuh rhaw hae kya-e ryahmin hae kya um hae paw marang hae, lann dihpaw hae, kalauh hae, lann hae te sarangpaw miakaw kya a thua cih.

¹⁶Te Jerusalem a doutu hae kya-e a hiinhy hae paw tuh Siapharan, vaaw Bawipaw kha beik khylan te bu poi kha tua khylan kum takyhte Jerusalem lang a cceih cih hae.¹⁷Siapharan, vaaw Bawipaw kha beik khylan Jerusalem lang a cceihthung leipaw laephi vaw e minphuin ccangkhakheit a um lanze, tuh-e hae tungvaw kya khuaarah lan khyh.¹⁸Izip hae nynh cciathung leite khuapi lungkhu lang a tee khyh hae ze, bu poi tua lan a cceihthung leipaw minphuin hae tungvaw kya Bawipaw nynh a thuasahpaw shethya tuh mih tungvaw kya a thua cih.¹⁹Tuhcihawpaw shethya tuh bu poi tua khylan a cceihthung leipaw minphuin hae tungvaw te Izip tungvaw kya detahnaw a thua cih.

²⁰Tuin nin vae tuh marang khinling hae vawlan khe, “Bawipaw hanlan athyaapaw,” cite zei athua cih. Bawipaw inn kya umpaw ang hae tuh silawhang malang umpaw pakekhupaw hae hawte athyaa cih hae;²¹Jerusalem te Judah ram kya umpaw ang hae tuh vaaw Bawipaw hanlan a thyaa cih hae, tuhteze nynh silawtu balyn tuh oun thua cih hae zah, silawnawpaw saw kha thung nawlan tuh-e ang hae tuh a mang cih hae. Tuin nin kyate tuh vaaw Bawipaw inn kya kungku hae paw um vae lan khyh hae.

Bible Society of Myanmar

https://app.library.bible/content/1a340f5ae072b2f4