HAGGAI1
Beikinn Sak lan Kawpyanaw
1Siapharan Darias nynh siapharan lang a tangnaw kum ningnaw, sawpaw sah taruhnaw, nin kheit nin khe Bawipaw bya tuh profeh Haggai kyate Judah ram uktu bawi, Shealtiel ccapaw Zerubbabel kalan te Jehozadak ccapaw Joshua, ranpibawi lupi kalan yn thua.2Vaaw Bawipaw nynh hynhte a ho: E ccungccaw hae nynh Bawipaw inn saknaw ccyh zaw loh khyh, a ci hae.3Tetuh Bawipaw bya tuh profeh Haggai kalan yn thua zah a hopaw tuh:4E inn tuh rohbabu lan a um lyaze, naemaw tuh nae inn ahoyhoypaw kya um ccyh athua zawtou?5Tukeiccuze atu vaaw Bawipaw nynh a hopaw tuh: Nae hiinzia hynh tuaku tua oh.6Nanning nynh ccacii patae na tu oh zah, looh beihtaraw kyalya kha na rue oh; na ae oh zemah phe byn lan na ae khyh oh; na nia oh zemah phe byn lan na neih khyh oh, boeining na lawku oh zemah, lu kheit sanmah a khualung khyh; nae ryalaw mee na mue oh zemah a uapaw zaw lungkhu lang sang khylan na mue oh.7Vaaw Bawipaw nynh hynhte a ho: Nae hiinzia kha tuaku tua oh.8Mua lang kaete thing kha lah oh lah, inn kha sak oh, tuhteze nynh tuh-e inn lungkhu khe ka lungrythua cih zah sawtuanaw ka ccou cih, cite Bawipaw nynh a ci.9Nanning nynh patae kha na ccung oh zemah na mue oh paw tuh beihtaraw; tuh-e tuh innvaw he na thuakhae oh te, ccaring ka mung. Pawccemou? cite vaaw Bawipaw nynh a ci. Nanning balyn nynh naemaw inn raveih lang na ccue lya oh khe, ka inn tuh rohbabu lan a um keiccu nynh thua.10Tukeiccuze luki lang e vaawlui nynh dangtui ccawsah khyh zah, laephi nynh ccathae pousah khyh.11Ram te mua hae kya thuasah, ccathae, misutui thawpaw, chitui kya thuasah, laephi kyate apoupaw miakaw kya thuasah, ccungccaw hae te sarangpaw hae kya thuasah, mih ryalawnaw balyn kya thuasah khuaakannaw kha ka konua vae.12Tetuh Shealtiel ccapaw Zerubbabel, Jehozadak ccapaw Joshua, ranpibawi lupi te a laehypaw ccungccaw balyn nynh Bawipaw mih Pachia bya kha thuasah, Bawipaw mih Pachia nynh a sawpaw profeh Haggai bya kha thuasah ngae hae zah, ccungccaw hae nynh Bawipaw raw kha a ri hae.13Tetuh Bawipaw zeccuetu Haggai nynh ccungccaw hae kyakhe, “Bawipaw nynh nae kya ka um,” a cipaw Bawipaw bya kha a hopya hae.14Judah ram uktu bawi, Shealtiel ccapaw Zerubbabel, te Jehozadak ccapaw Joshua, ranpibawi lupi, te a laehypaw ccungccaw hae balyn kha Bawipaw nynh mih lung a thosah hae; minmin nynh oun cceih hae zah mih Pachia, vaaw Bawipaw inn kyakhe,15sawpaw sah taruhnaw, nin kuin lae pali nin khe rya a law hae. Malang Ccyh kya Beikinn Phu-enawDarias nynh siapharan lang a tangnaw kum ningnaw,1sawpaw sah sarinaw, nin kuin lae kheit nin khe Bawipaw bya tuh profeh Haggai kalan yn thua zah:2Judah ram uktu bawi, Shealtiel ccapaw Zerubbabel, te Jehozadak ccapaw Joshua, ranpibawi lupi, te a laehypaw ccungccaw hae balyn kha hynhte hopah hae.3E inn langmawlya a phu-enaw kha a muih boi paw nanning laku kya hummou a um ung? Atu hynh pawtemou na muih oh? Nae muihnaw kya accakaepaw hawte thua khyh tou?4Tuhzemah, pou Zerubbabel, na rawthung sah, cite Bawipaw nynh a ci. Pou Jehozadak ccapaw Joshua, ranpibawi lupi, na rawthung sah; ram kya-e ccungccaw hae balyn, nae rawthung sah, cite Bawipaw nynh a ci; ryalawtua oh, cite vaaw Bawipaw nynh a ci,5Izip ram kyate na pou lya oh ze, bya kae kinpyaku oh thyhte, nae kya ka um, a ci. Ka muisaw tuh nae laku kya a um; rih nan oh.6Pawccecize vaaw Bawipaw nynh hynhte a ho: sosoh aro te, vaawlui, laephi, rili te laerou kha vaekheit bua ka hy ung cih;7minphuin hae balyn kha ka thyngsakuh cih hae, tuhteze nynh minphuin hae balyn kya-e sisua tuh yn thua cih zah, e inn hynh phu-enaw te phe ka biasah cih.8Sui te ngun tuh ka kya-e nynh thua cite vaaw Bawipaw nynh a ci.9E inn nyalang e a phu-enaw tuh langmawlya e a phu-enaw laeze alehua cih, cite vaaw Bawipaw nynh a ci; e hmin kyahin hoirumnaw ka nung cih, cite vaaw Bawipaw nynh a ci. Penaw te Byakinpyakunaw10Darias nynh siapharan lang a tangnaw kum ningnaw, sawpaw sah takuanaw, nin kuin lae pali nin khe Bawipaw bya tuh profeh Haggai kalan yn thua zah:11Vaaw Bawipaw nynh hynhte a ho: Ranpibawi hae kha byapaenaw kong khiatua hae:12Lukhakheit nynh athyaapaw saw kha a boeining te lungde zah, tuh-e tuhte sanlou, saw avoipaw, misutui, chitui, looh hankhakheit kha a ty lanze, tuh-e tuh athyaapaw lang a tang cih tou? cite khia hae zah, ranpibawi hae nynh, “Thyaa lan khyh,” a ci hae.13Tetuh Haggai nynh, “Michi rhua a ty keiccuze athyaa leipaw lukhakheit nynh hynh-e hae ccangkhakheit kha a ty lanze, tuh-e tuh athupaw lang a tang cih tou?” cite khia hae zah, ranpibawi hae nynh, “Athupaw lang a tang cih,” a ci hae.14Te Haggai nynh, e ccungccaw hae te ka malang um hae paw hynh-e minphuin hae tuh tuhawte nynh athua hae, cite Bawipaw nynh a ci; mih kuih te rya a law hae paw miakaw tuh tuhawte nynh athua; minmin nynh silawhang vawlan a pya hae paw tuh thyaa khyh.15Thuasalama atunin te malang ccyh kya yn thua lanpaw kha tuatua oh. Bawipaw beikinn kya lung ccangkheit vawlan lung ccangkheit khangthy athua maw kya pawtemah na um oh?16Lukhakheit nynh looh apumkuhpaw phu kuin kalan he a ccia ze, phu haw kyalya a um; lukhakheit nynh misutui ang sung pangaw kha law lan cite misu mianaw akhu kalan he a ccia ze, ang kuin kyalya a um cih.17Naemaw te nae ryalaw athae-apaw balyn kha aku chinaw, aku rounaw te hya khate de kae tah oh; tuhzemah ka kalan nae kithui khyh oh, cite Bawipaw nynh a ci.18Sawpaw sah takuanaw, nin kuin lae pali nin, atunin te malang tuh hoyte tua ccavae oh. Bawipaw beikinn aleihpaw na bing nin oh kyate hoyte tua ccavae oh:19Byng kya ccacii ccangkheit san a um tou? Misu ku, thaeku ku, ccalee ku te oliv ku hae tuh athae thae loh khyh hae tou? Atunin te vae tuh hythua kae pya vae cih oh. Zerubbabel kha Byakinpyakunaw20Tuh-e sawpaw nin kuin lae pali nin khe, Bawipaw bya tuh Haggai kalan vae ningnaw yn thua:21Judah ram uktu bawi Zerubbabel kyakhe, vaaw te lae kha ka hy vae cih,22peenaw hae kya-e bawitungkhung hae kha ka dawleih vae cih; minphuin hae kya-e peenaw thawzung kha ka roh vae cih, te marangle hae te a ccikuhtu hae kha ka dawleih vae cih hae; marang hae te a ccikuhtu hae lu kheit cci tuh mih ban hae thaloi khate a chih cih hae.23Vaaw Bawipaw nynh a hopaw tuh, pou ka ryalahtu Zerubbabel, Shealtiel ccapaw, tuin nin khe nang kha kae lah cih zah minkhianawpaw kuihpu lang kae rae cih, cite Bawipaw nynh a ci; nang kha phe kae po vae, cite vaaw Bawipaw nynh a ci.
Bible Society of Myanmar