Neemíasi13
Fádirigu hama Lewitagu
1Weyuméme ligía, aba taliihóun liliburun Moisesi houn gürigia, aba ladarirún bürüwañu ñein luagu siñá lan hádangiñebaña lan lumutuniña Bungiu Amonna hama Moábüna.2(Lugundun michu hamá éigini ni duna houn Ísüraelina lídanbei haweiyasun le háfuridagüle Ehiptugiñe fáyeirügü haméi Balaamü lun líñaraguniña, gama lumoun aba lasansiruni Wabungiute íñarawaguni ligía lun abinirúnime.)3Dan lubeiti haganbunbalin le lariñagubei lúrudu, aba hagidaruniña sun ha mígisihañabaña hama terencha haganaguagiñe Ísüraelina.4Lubaragiñe meha le, fádiri meha Eliasíbü arihubei tau burí gamasein to tani litenpulun Wabungiute. Keiti gaduhegua lubéi Eliasíbü luma Towíasi,5aba líchugun aban rumu wéiritu lun, to meha ídanboun lareidúa idewesei, kupali, tumegegu ténpulu, lidiisin fánreinti lídangiñe san le lani türigu, diwéin luma garaba, le hafanran Lewitagu, eremuhatiña hama óunigirutiña bena, lumoun burí le óundarawaguagüdübei houn fádirigu.6Úatina Herusalén lídanbei lasuseredun sun le, lugundun lidan irumu darandi-biama lau larúeihan Árütaherühesi le lurúeite Babilónia giributina lumoun urúei, gama lumoun átiri dan lárigiñe, aba namuriahan üma luma urúei,7lun nagiribudun Herusaléun. Ligíaaliti narihini wuribati le ladügübei Eliasíbü lau lagundaaraguagüdüni Towíasi íchiga rumu lun lidan tibürürün litenpulun Bungiu.8Wéiriti numagundan lau katei ligía, aba nasagaruni sun lílagu Towíasi bóugudin.9Lárigiñe aba nariñagun houn lun harumadagüdüni rumu ligía ligibugiñe Bungiu, lun híchuguni tílagu luban Bungiu lidoun lubara, idewesei luma kupali.10Aganbatina giñe luagu michugúniwa lan heigin Lewitagu houn, ani Lewitagu lan hama eremuhatiña ha arihubaña lau kultu, anuraha lan kada aban lageiroun.11Ábati nadeinhan houn ábutigu luagu chagaguaü le tídanbei litenpulun Bungiu. Lárigiñe aba nóundaruniña fádirigu hama Lewitagu, aba níchuguniña lidoun habara,12aba hanügüni sun lílana Hudá lidiisin fánreinti türigu, diwéin luma garaba tidoun gamasein.13Aba níchuguni fádiri Selemíasi lun ligía lan ariha tau gamasein luma Sadoku le abürühabei luma aban Lewita gíriti Pedaíasi; aba giñe níchuguni Anán, le liráü Sakuru le libari Mataníasi lun líderaguni, lugundun hemenigiwati hawagu. Hagíabati afanreinha houn hapanaagu.14Nubungiute: Haritaguabatia nuagun luagu le nadügübei, mabulieidabei sun katei buiti le adüga náalibei tuagu litenpulun Nubungiute luma luagu eseriwiduni le adügǘbei tidan!15Lidoun dan ligía, aba narihin luagu ñéinñanu lan gürigia Hudá, aribichagutiña beibei lidan lidaani emeraaguni barügua hagía türigu wariguagüda hagía diwéin, beibei, igu luma sun luwuyeri anügüni hawagun burigü, luagu giñe barǘ hamani Herusaléun lidan luéyuri emeraaguni. Ábati nadeinhan houn luagu halugurahani hebegidina lidan luéyuri emeraaguni.16Bóugudin luéi lira, ñéinñanu fiu hádangiñe lílana uburugu Tiru, ha aganóubaña ñein, barütiña burí úduraü luma sun luwuyeri ebegidinaü aluguraha houn huríu lidan luéyuri emeraaguni.17Ábati nadeinhan houn lílana Hudá, aba nariñagun houn:—Kame san hadügei wuribani le, awiyedei luéyuri emeraaguni?18Anihánmeme meha katei le hadügübei hagüchagu, ligía lanügünbei Bungiu saragu lamiselu wawagun luma luagun uburugu le odi busentün hagañidagüdünitima Bungiu lun Ísüraeli lau hawiyedagüdüni luéyuri emeraaguni?19Ábati níchugun dimurei lun oura lan lagumeserun laguñeedun lagumuhóun guñoun luba luéyuri emeraaguni, lun ladourún lubenari Herusalén, lun lan madaarún lan darí larugan lárigiñe weyu ligía. Aba níchugun fiu hádangiñe numusun bénabu lun mebelu lan ilaü lidan luéyuri emeraaguni.20Rédeitiña alugurahatiña hama agañeihatiña saragu wéiyaasu ásügürei áriebu bóugudi luéi Herusalén,21aba nasigenehan hama adeinha au houn luagu herederun ásügürei áriebu ligibugiñe baríeiru, aba nariñagun houn luagu ánheinya lan hadüga nadaüragubaña lan. Lúmagiñe dan ligía, miábinhaña lidan luéyuri emeraaguni.22Lárigiñe aba nariñagun houn Lewitagu lun harumadaguagüdün houngua lun houdin óunigirei bena lun mawiyedún lan lidan luéyuri emeraaguni Nubungiute, mabulieidabana giñe luagu le, gudemehabubá nun, según lueirin bareini!23Arihatina giñe lidoun dan ligía luagu añahein lan fiu huríu amarieidutiña hama würiña Asüdóduna, Amonna hama Moábüna;24hamidan hádangiñe hasaanigu, hererun Asüdóduna hadimurehabei luma hererun amu néchanigu, gama lumoun mariñagaditiña lun hererun huríu.25Asigenehatina hama, aba níñaraguniña. Buleseitina fiu hádangiñe aba náhuluni hádiburi, aba nafosuruniña lun háfiñurun luagu liri Bungiu luagu mígirun hamaña lanme hasaanigu lun hamarieidun hama terencha, ni hagía.26Aba giñe nariñagun houn
—Ligía meha lifigounbei Salomón, le lurúeite Ísüraeli! Ani lau sun ua lan meha aban urúei kei ligía hadan saragu néchanigu, ani hínsiñe ligía lun Bungiu, aba líchuguni urúeime lidan sun Ísüraeli, afigougüda hamuti würiña terencha.27Máhabadiwa lubeiti lun hafigouhan ítara anarime ligibugiñe Bungiu lau hamarieidun hama würiña terencha.28Anuraagüda numuti aban hádangiñe lirahüñü Hoyadá, le liráü fádiri le íñugutimabei, le libarimu Sanbalátü le Oronna niñúarürugugiñe.29Nubungiute, mabulieidaguabá hawéi ha adaseirubalin afadirihani, luma daradu le hani fádirigu, Lewitagu!30Aba lubeiti narumadagüdüniña luéi sun katei le terenchabei, aba níchuguniña fádirigu hama Lewitagu kada aban lidan lubara;31aranseha numuti lederegerun watu lidan lidaani, luma lederegerun furumiñeti alubahani. Nubungiute, haritaguabá nuagun lun fuleseihabubá nun!
Bible Society of Honduras