Yaaguub2

Girad baadꞌiina

1Isanaayaan, Wꞌankwanaayoon Yasuuꞌaab Umasiih, umatuuni Wꞌankwanaay yꞌaamananaayeet, girad baadꞌiina.2Masalan, umajlisiyookna tak gaal eera halakaawwa alya dimꞌaraawwa kwayiit yꞌiini hookna, aree miskiin tak yiwaashi halaka kwayiit han yꞌiini hookna.3Unafar ugabaab daayiib ashishtiit, “Timiisꞌanii tidaayiinaateeb tooy sꞌaa!” tiyadneek, laakiin umiskiinii dehaay, “Baruuk beentooy gada, tari weer mhiin whaashiib sꞌaa!” tiyadneek aree,4uun ibitkeekna girad ikati aree amagt niyaati gaadiya kiikwaas hookna han?
5Isanaayaanwa tikwaataanwa aashiboob, sinaakirnaheeb. Ukwaasana imiskiina toon tuduniyaatiib eefeen, wꞌiimaaniib gabaab ikatiini jillaay waasaab kiiki han? Barooh areeyeen baliib waadiyaayaneet tehadꞌaayi kwasaameen bareeh kiikeena han?6Laakiin baraakna imiskiina abaabteena! Nꞌati tirtiit hookna tumhakama ookiik irafifneekna igabaab kiikeena han?7Oosmooh ushariif baraakna haay waliikamteeneeb, oosim udaayiib neewiyaan bareeh kiikeen han?
8Awooh sidiku, tehadꞌaayeeti hag eektabeeb eefeeb teetriimneet tuuna daayiitu. Aaktab “Ushawawook ugarooyiitook areeyaa.” iyadna.9Laakiin dehay galib irawi kehii tisehayiisneek, maagnaayt tigwibibna. Whag tikatꞌana akay gwababikina iikti tiyadna.10Gaat wasi kantꞌi uutak, kasteeh tiwasi kitꞌaab ikati, aree gwababikina ikati.11Been “Baajakiinna” diyaab han “Baadirna” diyaabi. Jiknaab bitkaayeek, laakiin tak diraab tikatiyeek, whag kitꞌaab tikatiya.
12Fadagooyt iniiw Whag haakami indiyeeb udehayiit hadiidaana aree sakaana.13Kassaah baliin tirhama baabariin, rhamaat baabari hukwim haakamami iyadna. Tirhama whukwimii dehaay ansirameen.
14Isanaayaan, tuun kak daayiitu? Uutak wꞌiimaan abari indiyeek laakiin haay biishagaamayeek aree uun wꞌiimaan barooh ishidhhiin?15Masalan, sanuuk tari kwaatuuk halakaab kiibari, oombꞌiit mꞌari han kiibari.16Gaal bareesookna bariiyooh dehaay, “Difaa, daayiinaayt dehook minniimani, fisha halaka kwayaa aree daayiit mꞌari tamaa!” indiyeek, laakiin baruuh shanha ikatiyeet toona dehaay biifaaysayeek, tuun kak daayiinaayt tikati?17Oontꞌaaneet, wꞌiimaan han uukna shagaab imuurim biidiyeek ayaab ikati.
18Laakiin gaal, “Baruuk iimaan tibariya, ani shagaab abari.” iyaad indi.
Iimaan anu ushagaayook rhisaaheeb, ani wꞌiimaanu ushagaayiisu rhisi hook andi.
19Gaal Kwaasana eefiyeet toona aamanteena. Daayiitu! Laakiin aajin han beet toona aamaneena, aree mirkwaayii idheen.
20Baruuk uutak wꞌafrii, wꞌiimaan shagaab anu takweet biibariiyeet toona badehaat harriiw han?21Hoobuun Ibraahiim wꞌoorooh Isehaag tikaraamaati mhiini kehii karaamaateeb ifirꞌihoob, shiboot dehaay hasaabt kitti han?22Aflaay shibibna barooh wꞌiimaanuuhwa ushagaayuuhwa hiddaab iifiin. Aree wꞌiimaanuuh ushagaayiisooh daayiib timmiimiya.23Uuktaab diyaab ikatiyeet tuuna sidik tikati, uuktaab “Ibraahiim Ukwaasana aamaniya, beet tuuna aree shibootiit dehaay tehasab.” diyaabi. Aflaay baruuh Ukwaasanaay wꞌaraaw itoosaam.24Shibibna unafar toona tusakiiniyeetii Ukwaasanaay geeb shibu tak ikati, wꞌiimaanii oobhaat kiiki.
25Oontꞌaaneet, Raahaab tujakiin ushagaayiisooh shiboot dehaay hasaabt kitti han? Batuuh Israaꞌiili jawaasiis tehadar aree weer salalii giigsita.26Ugaru shuuk anu ayaab ikatiyeet toonaatiit, aflaay wꞌiimaan han ushaga anu ayaab ikati.

The Seed Company

https://app.library.bible/content/752fe0f7dfba7b5f