Yaaguub3
1Isanaayaanwa tikwaataanwa, gwida bareesookna tukaniisaati kooja biikaayneet toonaati. Hinin yꞌallameen winneet gwidakaana haakamami niyad.2Kassaan gwida salalaayee goofamnay. Imiidalabeen kaleewnayeek, timmiimaab nikati, aree kassooh ugarooyoon kaleewnayeet toona adgirnay.3Dehoon atꞌiiniyi jillaay hataayi yafiib lijaam nidꞌihoob, barooh nhariwi mhiinka beeti nakisnay.4Tari tumarkabtiib kwinaa: wint markab akra baraamii hantaaytiniyeek han, laakiin ukabtin winneet adhamiit moojaatii batooh hantaaysiini aree toojha teharriiweetka beeti giigsiini.5Uun han bak ikati, umiidalaab adhami kitꞌani ugarooy ikati, laakiin baruuh akra faash ikwasi. Dabaloot nꞌeetiit sarru win dhaw tinliiw.6Umiidalaab han nꞌeet ikati. Baruuh ugarooy ikitꞌanii bitik tuduniyaati maag ikati. Baruuh kassooh unafar inmiig, kassooh umidhhanooh nꞌeet hooy danꞌi, aree baruuh uukna toonꞌi jahannam daayiini.7Uudehay kasteeh tidhhaniya itꞌabiikt ikwasiin, eekilaywa, buutranfiifaawwa, yꞌaashoowwa,8laakiin gaal han umiidalaab itꞌabiik kiikwaas. Baruuh baakaleewamay maag ikati, aree madoor sim ataabi.9Umiidalaabii Wꞌankwanaayoon Ubaaba nhamid, aree bariisooh oodehay neeꞌati, Ukwaasana barooh ookna tꞌiiteeb ikwaaseeb, neeꞌati.10Aflaay wꞌaatwa ideharaawwa been umiidalaab ooknaay fafti yꞌiini. Isanaayaanwa tikwaataanwa, tuun tuuna bitkaayeet toonaati.11Yami thaw nafir yamwa hami yamwa mhalleeh asti fafalsiini han?12Tiini hindi saytuun fanri? Tari inab tiin fanri? Abadan, miilaki thawii nafir yam kitmiriya.13Bareekna aaw hookna fagarkaabu aree afhamakaabu? Baruuh udaayi kwiraayiisooh barhisi, fagarandiitee tikatiit daayiinaayti shagaay barhisi.14Laakiin iginꞌaayaakna hasaadaateet hamiinaaytwa dhoodhsamtiibwa eettiibneek, beet toona haay baafishna, aree oosdik baaꞌankiraana.15Baliit tifagarandi tibreetee nꞌati tikwaat kiikeena laakiin tubuutii yꞌaata, Ukwaasanaay Ishuukee yꞌaat kiikeena, oobliisiit ikatiin.16Hasaadaatwa dhoodhsamtiibwa daayeeneebka, beentooy ribshaaytwa kastooh tumaagnaayti dꞌuuywa ikatiin.17Laakiin tifagarandi tibreetee yꞌeent hankaab kastaah nhasta. Malya umꞌasgi reerwa, shibootwa, araweetwa ikwasiin. Bataah timmiimaat rhamaatwa, daayi firaaywa, adilwa, nhisuuytwa ikwasiin.18Umꞌasgikina mꞌasgi teera teeraayeen shiboot eewikna.
The Seed Company