লুক14
1সাইয়ু সানুকো দিনতা ইশুহা ইচো ফরিসি মাটাকো সাতা আমা চাকো হোয়ে। আউতা নিওয়া দিংঙাবিহা ইশুহিং এনতাপা প্যারাপামসা ন্যইদিংমি।2ইচো খুই কোকোই বুপুওয়া দিংঙাহা ইশুকো নাগাইতা গাদিংমি নিমি।3ইশুহা তাংজিকো উটকেওয়াবি আসা ফরিসিবিহিং উইয়ে, “মোসাকো লিংপাংকো হিগাতা নিওয়া সেই সানুকো দিনতাহা হাইমবিহিং সাংপাকো তুকোগা না মাতুকোগা?”4আদো আবিহা হাইরে মোয়্যইতো। ইশুহা আকু হাইওয়া দিংঙাহিং সুমসা সাংপায়ে আসা নিংপুয়ে।5আকো নোইতা ইশুহা আবিহিং জাংয়ে, “সানুকো দিনতা নাবিহা আপনিকো চেং, মোকোনাহা ইপু পিকা, হোক্রাতা হুইচানাহা সেন্নেপা মোনোপাকোগাসা?”6আদো আবিহা ই জাংওয়াকো তোইতাহা হাইরে য়্যইমক্যইতো।7আউতা চাকো ওয়াংওয়া দিংঙাবিহা এনতা-এনতাওয়া গাদিং মোওয়া তিংমসা ইশুহা আবিহিংয়া ইচো মিংচি ল্যায়ে,8“নাবিহা দিংঙাবিকো বিয়ৌতা হোনুওয়া এনতাওয়া গাদুবিতা জেংমসা মাগা। নাবিরোমা ডিয়োওয়া দিংঙাবিহিংনে বিয়ৌতা মোউমি নিকো চুরোওয়া।9আকু বিয়ৌকো সাকো গিরিওয়া লেমসা ‘নাকো ই গাওয়াহা আকুহিং গাকো পিচা আসা নাতিহা লিতা গা’ তামসামি জাংনাহা নাতিহা লেফেনেরোওয়া।10আকুরোমা বিয়ৌতা হোনুওয়া নোইস্যাকো গাদুতা হোমসা গা, আসা গিরিহা লেমসা নাতিহিংয়া জাংরোওয়া, ‘ও ব্যারো, নাতিহা এনতাওয়া জায়গাতা গাচা।’ আত্রংহা নাতিহিংপা চাকো গাওয়াবিকো প্যাকোতা নাকোহা টেবো মিং জিংরোওয়া।11হাংপাতানাহা আপনি টেবো জিংকো কেংওয়াবিহা হাংসুরোমা আত্যইচুপুরোওয়া, আসা আপনিহিং আত্যইচিংপা নোমবিহা হাংসুরোমা টেবো জিংরোওয়া।”12ইশুহা আপনিহিং চাকো মোউওয়া ফরিসিহিং জাংয়ে, “নাতিহা উইসে দিংঙাবিহিং চাকো মোউনুহা নাকো আপনি ব্যারোবি, আপনিকো এবি, নাকো পামিবি, আসা পুপুউ সাবেইবিহিং মেংচে মোমোউচা আবিহা নাতিহিংনে সুপাকো সোতা আবিকো বিয়ৌতা মোউরোওয়া।13আদো নাতিহা উইসে দিংঙাবিহিং চাকো আংকো পিচানাহা, জোরোংবিহিং, তেইকো মোচুমবিহিং আসা মিচো মিতিংবিহিং চাকো পিচা।14আত্রং নাতিহা আশিষ মুংচারোওয়া, হাংপাতানাহা নাতিহিং সুউকো আবিকোতা হাইরে মাতারোওয়া। আদো তাংজি নিওয়া দিংঙাবি সিমসা ঙারোনুওয়া সেংজারাং ইনাম পিচারোওয়া।”15ইশুকো জাংওয়া হিংমসা আকুহিংপা চাওয়া ইচো দিংঙাহা জাংয়ে, “সেংজাকো রাজ্যতা চাকো মুংচাওয়া দিংঙাবিহা আশিষিতগা।”16ইশুহা আকুহিংয়া মিংচি হিংপায়ে, “ইচো দিংঙাহা চাকো আংকো পিচারো তামসা উইসে দিংঙাহিং মোউয়ে।17আকুহা চাওয়া আংওয়া তৈয়ার জিংতেনুওয়া আপনিকো ডেইয়াহিং এপা জাংকো নিংপুয়ে, ‘নেহা ওয়াংপুই, তাংসা তৈয়ার জিংতেয়ো।’18“আদো আকু দেরেং মুংওয়া দিংঙাবিহা হাংসুরে ওয়াংকো মেকেংতো। আকো সোতা ইচোহা জাংয়ে, ‘কাহা মোংটো চোইমি নিনা, আকু কাকো হোনেরো। কাহিং মাপ জোপি, কাহা ওয়াংমক্যইরো।’19“দোসরা দিংঙাহা জাংয়ে, ‘কাহা ত্যাপু ছ্যহইপি পিকা চোইমি নিনা, কা আকু কাকো হোনেরো। কা জাংচারোওয়া মেসেদ্রাংপাপি, কা ওয়াংমক্যইরো।’20“ন্যাসারাং দোসরা দিংঙাহা জাংয়ে, ‘কাহা নেগাতিগা বিয়ৌ জোমি নিনা। আকো সোতা কা ওয়াংমক্যইরো।’21“আত্রংহা ডেইয়াহা লায়োংমসা আপনিকো গিরিহিং ই নুওয়াং হিংপায়ে। গিরিহা সিদ্রাংপামসা জাংয়ে, ‘নেত্তা শহরকো টেবো ন্যাতাবিতা, চেব্রেবিতা সেন্নেপা হ্যাতু, আসা জোরোংবিহিং, হাইমবিহিং, মিচো মিতিংবিহিং, আসা তেইমকোইমবিহিং ইতা পারা।’22আসা ডেইয়াহা জাংয়ে, ‘উটকেওয়া, নাকো জাংওয়া সেই তাংসাহিং কা পারামি নিনা। আদো ন্যাসারাং গাদুবিহা উইসে নিনা।’23“ন্যাসারাং গিরিহা ডেইয়াহিং জাংয়ে, ‘শহরকো আত্যইচংওয়া আসা টেবো ন্যাতাবিতা হোমসা দিংঙাবিহিং নাপোতা ওয়াংকো তাংসাহিং সুজামসা পারা, আসা কুং সা মেইপুরোওয়া!24হাংপাতানাহা নাগাইকো দেরেং হিংপাওয়াবিতাহা হাংসুরে কুং পিচাওয়াকো চাওয়া আংওয়াবিহা চাচা মোমুংরোওয়া।’”25সাইয়ুহা উইসে দিংঙাবিহা ইশুহিংপা হাদাংমি। ইশুহা আবিকোতা ন্যইমসা জাংয়ে,26“কুং, নুনুই হুইপামবিহা আপনিকো আয়ু, আপা, মে, চেংওয়া চেমে, আসা ডুওয়া-এবি, আনাবি, আসা আপনিকো সাদিহিংনে কাহিংরোমা সিওপা জেজেংপা জোনাহা, কুং য়োংতোং জিংমক্যইরোওয়া।27হাংসু দিংঙা আপনিকো ক্রুস পুমসা কুং নুনুই মুহুই, আকুহা কুং য়োংতোং জিংকো মোচুরোওয়া।28“হাংসু দিংঙা টেবো সা বানাই দাং, আকুহা নাগাইসোরাং গামসা ন্যাস্যা তেংকোমে না মেতেংকোমে তামসা হিসাপ মোজোকোগা?29মেনাহা টেবো সা লোপাপুনতেনুকো নোইতাহা ত্যইপামক্যইনাহা, তিংওয়া দিংঙাবিহা তাংসা এপা জাংমসা ল্যস্যইপারোওয়া,30‘ই দিংঙাহা সা লোপাকোহা লোপাদাংমগা, আদো ত্যইপাকো মোচুতো।’31“এপারাং, ইচো জাইপুহা দোসরা জাইপুহিংপা লুইসুকো হোদাংনুওয়া ‘দশ হাজার সিপাইবি পুরামসা কা বিশ হাজার সিপাই নিওয়া জাইপুহিংপা জিয়োকোমে না মোজিয়োকোমে’ তামসা নাগাইসো মোনোকোগা?32লুইসুকোমি মোচুকো বেপা জিংনাহা আকু জাইপুহা তানাং নিনুসোরাং আপনিকো পোইংবিহিং হাং জোমসা চাংসুনেকোমে তামসা কোইকো নিংপুরোওয়া।33আকো সোতা নাবিকো প্যাকোতাহা হাংসু কুং সোতা তাংসা মাল্যাতে, আকুহা কুং য়োংতোং জিংকো মোচুরোওয়া।34“নীহা এনতাওয়াগা, আদো নীকো জোমেওয়ামি য়াংপুনাহা আকুহা হেপা ন্যাসারাং জোমেকোগা?35আকুহা লুংনিংকো মোলরে মাজিংরোওয়া। দিংঙাবিহা আকুহিংয়া বাডোইপুরোওয়া। কুং জাংওয়া নুওয়াং এনতাপা হিং আসা কোই।”
The Seed Company