লুক15
1সাইয়ুহা উইসে তোংক্যা জুমবি আসা দোসরা পাপি দিংঙাবি ইশুকো ঝিপাওয়া নুওয়াং হিংকো লেহে।2আদো ফরিসি আসা তাংজিকো উটকেওয়াবিহা ন্যাক্যানুকুপা য়্যইসুমসা এপা জাংসুয়ে, “ই দিংঙাহা পাপিবিহিং মোউমসা চিত্তা গামসা চা-আংচাংমি।”3আকো সোতা ইশুহা আবিহিংয়া ইচো মিংচি ল্যায়ে,4“নাবিকো প্যাকোতা হাংসুকো নাকাইপু লুকাবিনি! আকু নাকাইপু লুকা নিওয়া দিংঙাতাহা ইপুবেমি য়াংপুনাহা লুকাকো গিরিওয়াহা হাং জোকোগা? আকুহা নিরানব্বই লুকাবিহিং চুংচাতারাং হুইতেমসা ইপু য়াংপুওয়া লুকাহিং মোদোনু চোইপা মোমোকোগা?5য়াংপুওয়া লুকা দোচানুওয়া আকুহা য়াংতামসা আপনিকো বুচুংতা পুপামসা সাতা পারারোওয়া।6আসা আপনিকো ব্যারোবিহিং আসা সাবেইবিহিং মোউমসা জাংরোওয়া, ‘কুং, য়াংপুওয়া লুকাহা কাহা দোচায়ে! লেই, য়াংবি তাংসা য়াংতাসুকো।’7এপারাং কা নাবিহিং জাংরোওয়া, পশ্চতাপ জোমঘ্যইওয়া নিরানব্বই জনা তাংজিকো দিংঙাবিরোমা ইচো পাপি দিংঙা পাপসো লাপামসা সেংজাকোতা ওয়াংনাহা লোডিংবাতাহা তাংসা গাগ্রুরোওয়া।”8ন্যাসারাং ইশুহা ইচো মিংচি ল্যায়ে, “ইচো মেমেকোতা ত্যাচো জাতাংকো টাংকা নিমি। আকু ত্যাচো টাংকাতাহা ইচোমি য়াংপুনাহা আকুহা হাং জোকোগা? দিব্রি নোমসা, আকু জাতাংকো টাংকাহিং মোদোনু চোইপা সা-সাইমসা আকুহা মোমোকোগা?9আসা আকুহা দোচানুওয়া আকো ব্যারোবিহিং আসা সাবেইবিহিং মোউমসা এপা জাংরোওয়া, ‘নেহা য়াংবিহা য়াংতানেরোওয়া, হাংপাতানাহা কুং য়াংপুনতেওয়া জাতাংকো টাংকাহা কা দোচায়ে।’10কা নাবিহিং জাংরোওয়া, এপারাং ইচো পাপসো লায়োংনাহা সেংজাহা আপনিকো পোইংবিহিংপা লোডিংবাতা গাগ্রুরোওয়া।”11ইশু ন্যাসারাং ইচো মিংচি ল্যায়ে, “ইচো দিংঙাকো নিহসো চেংওয়া নিমি।12সাইয়ুহা চিংসোইওয়া চেংওয়াহা আপাহিং জাংয়ে, ‘আপা, নাকো মোংটো-কেটোতা কা হাসে মুংচানেকোমে আকু কাহিং পোপি।’ আসা আপাহা আকু মোংটো-কেটোহা নিহসো চেংওয়াহিংসা পোপিয়ে।13“সাইয়ু নিহয়ুকো নোইতাহা চিংসোইওয়া চেংওয়াহা আপনিকো মিংতা মুংচাওয়া পুংজিবি পুমসা তানাংকো লোইতা হ্যাপুয়ে। আসা আউতা আকুহা চা-আংমসা, লেংকে-গাকেমসা তাইকো পুংজিবি মাপাপুয়ে।14আকোতা নিওয়া পুংজিবি মাচানতেনুওয়া আত্রংরাং আকু লোইতাহা চাওয়া আংওয়া মোতোপা জিংপুয়ে আসা আকুহিংয়া আউতা দুঃখ ওয়াংয়ে।15আসা আকুহা আকু লোইকো ইচো দিংঙাকোতা হোমসা কাম য়াকায়ে। আকু দিংঙাহা আকুহিংয়া পাকা ল্যাচোইওয়া কাম পিচায়ে।16আকুহা পাকাবি হাইচা তাতিরে আকু পাটোবি চামসা ফেমা মেইপাকো কেংচাংমি। আদো হাংসুরে আকুহিংয়া হাইরে মিচাচাংমি।17“আত্রংহা আকো তুংসিংতা নোচেং উইয়ে আসা জাংয়ে, ‘কুং আপাকো সাতাহা ডেইয়াবিরে গাইপা চামসাপারাং লাপামগা, আদো কাহা ইতাহা আমা পাংপুমসা সিপুদাংতেহে।18কা নেহা কুং আপাকোতা হোমসা জাংয়ারোওয়া, আপা, কা নাকো আসা সেংজাকো নাগাইতা পাপ জোমি নিও।19নেহা কাহা নাকো চেংওয়া জিংকো বেপারে মোতো, আদো কাহিং নাকো চেংওয়া বেপা মোকোদো, ইচো ডেইয়া বেপা নোমসা এপি।’20আকো নোইতা আকুহা লোপুমসা আপাকো সাতা লায়োংয়ে।
“আপাহা আকুহিংয়া তানাংসো ওয়াংপাদাংওয়া তিংয়ে। আসা আকুহা চেংওয়াহিং তিংতানি লামতুপুমসা টানাংসো ঠুইপুমসা চেংওয়াহিং ওয়্যাতোংমসা চুম্মন জোয়ে।21“আত্রংহা চেংওয়াহা জাংয়ে, ‘ও আপা, কাহা সেংজা আসা নাকো নাগাইতা পাপ জোমি নিও। নেহা কা ন্যাসারাং নাকো চেংওয়া জিংকো বেপারে মোতো।’22“আদো আপাহা সাতা নিওয়া ডেইয়াবিহিং মোউমসা জাংয়ে, ‘সেন্নেপা হানিরোমা এনতাওয়া আংদুং, আংটি আসা কোরোং লামসা ইহিং লুপাপি।23আসা চাকো আংকো সোতা তৈয়ার জো। আসা সাকো বুচুইওয়া তুইমসা এওয়া বের্চেং কাংমসা স্যা,24হাংপাতানাহা ই কুং চেংওয়াহা সিপুনতেমগা, আদো ন্যাসারাং ঙারোমি নিও, য়াংপুনতেমগা, আদো দোচায়ে।’ আসা আবিহা তাংসা য়াংতাসুয়ে।25“আত্রংহা আকো ডেসোইওয়া চেংওয়াহা লুংনিংতা নিমি। আকু সাকো আবেইতা দেয়োংনুওয়া আকুহা য়াংতামসা য়ৌসোইওয়া আসা লেহদি লেহপাদিংওয়া হিংয়ে।26আসা আকুহা ‘ইহা হাং জিংদিংগা?’ তামসা আউতা নিওয়া ডেইয়াহিং মোউমসা উইয়ে।27আসা আকু ডেইয়াহা জাংয়ে, ‘নাকো এ লায়োংমি নিনা, আকো সোতা নাকো আপাহা তুইমসা এওয়া বুচুইক্যওয়া বের্চেং স্যামসা ইতা চাকো আংকো পিচাদিংনা, হাংপাতানাহা নাকো এ এনতাপা লায়োংমি নিও।’28“ই হিংমসা ডুওয়াহা সেদ্রাংপুয়ে, আসা সাকো নাপোতারে হোকোরে মেকেংতো। আকো সোতা আপাহা লেমসা আকুহিং ‘সিরিতা তে’ তামসা নোইপারেহে।29“আদো আকুহা আপাহিং এপা জাংয়ে, ‘কাং, এসে ইনিং চোইপা কাহা নাকো ডেইয়া বেপা কাম জোমি নিও, নাকো আজ্ঞা জোওয়া সেই তাংসা কা জোমি নিও, আদো নাতিহা কাহিংয়া হাত্রংরে ব্যারোবিহিংপা গামসা চাকো তামসা ইপু এচেংরে মিচাতো।30আদো নাকো মোংটো-কেটো পিইচামসা নুংনাংসুমসা ন্যাস্যা মাপাওয়া নাকো চেংওয়া ওয়াংনুওয়া, নাতিহা বুচুইক্যইওয়া বের্চেং স্যামসা তাংসাহিং মোউমসা চাকো পিচাপক্যইমকোতা!’31“আত্রংহা আপাহা আকুহিংয়া জাংয়ে, ‘কুং চেংওয়া, নাতিহা হাত্রংদো কাহিংপারাং নিও, কুংতা নিওয়া মোংটো-কেটোবিহা তাংসা নাকোরাংগা।32হিনিহা য়াংবিহা য়াংতাসুনেকোগা, হাংপাতানাহা সিপুনতেওয়া নাকো ই এহা ঙারোয়ে! য়াংপুনতেমগা, আদো ন্যাসারাং দোচায়ে’!”
“আপাহা আকুহিংয়া তানাংসো ওয়াংপাদাংওয়া তিংয়ে। আসা আকুহা চেংওয়াহিং তিংতানি লামতুপুমসা টানাংসো ঠুইপুমসা চেংওয়াহিং ওয়্যাতোংমসা চুম্মন জোয়ে।21“আত্রংহা চেংওয়াহা জাংয়ে, ‘ও আপা, কাহা সেংজা আসা নাকো নাগাইতা পাপ জোমি নিও। নেহা কা ন্যাসারাং নাকো চেংওয়া জিংকো বেপারে মোতো।’22“আদো আপাহা সাতা নিওয়া ডেইয়াবিহিং মোউমসা জাংয়ে, ‘সেন্নেপা হানিরোমা এনতাওয়া আংদুং, আংটি আসা কোরোং লামসা ইহিং লুপাপি।23আসা চাকো আংকো সোতা তৈয়ার জো। আসা সাকো বুচুইওয়া তুইমসা এওয়া বের্চেং কাংমসা স্যা,24হাংপাতানাহা ই কুং চেংওয়াহা সিপুনতেমগা, আদো ন্যাসারাং ঙারোমি নিও, য়াংপুনতেমগা, আদো দোচায়ে।’ আসা আবিহা তাংসা য়াংতাসুয়ে।25“আত্রংহা আকো ডেসোইওয়া চেংওয়াহা লুংনিংতা নিমি। আকু সাকো আবেইতা দেয়োংনুওয়া আকুহা য়াংতামসা য়ৌসোইওয়া আসা লেহদি লেহপাদিংওয়া হিংয়ে।26আসা আকুহা ‘ইহা হাং জিংদিংগা?’ তামসা আউতা নিওয়া ডেইয়াহিং মোউমসা উইয়ে।27আসা আকু ডেইয়াহা জাংয়ে, ‘নাকো এ লায়োংমি নিনা, আকো সোতা নাকো আপাহা তুইমসা এওয়া বুচুইক্যওয়া বের্চেং স্যামসা ইতা চাকো আংকো পিচাদিংনা, হাংপাতানাহা নাকো এ এনতাপা লায়োংমি নিও।’28“ই হিংমসা ডুওয়াহা সেদ্রাংপুয়ে, আসা সাকো নাপোতারে হোকোরে মেকেংতো। আকো সোতা আপাহা লেমসা আকুহিং ‘সিরিতা তে’ তামসা নোইপারেহে।29“আদো আকুহা আপাহিং এপা জাংয়ে, ‘কাং, এসে ইনিং চোইপা কাহা নাকো ডেইয়া বেপা কাম জোমি নিও, নাকো আজ্ঞা জোওয়া সেই তাংসা কা জোমি নিও, আদো নাতিহা কাহিংয়া হাত্রংরে ব্যারোবিহিংপা গামসা চাকো তামসা ইপু এচেংরে মিচাতো।30আদো নাকো মোংটো-কেটো পিইচামসা নুংনাংসুমসা ন্যাস্যা মাপাওয়া নাকো চেংওয়া ওয়াংনুওয়া, নাতিহা বুচুইক্যইওয়া বের্চেং স্যামসা তাংসাহিং মোউমসা চাকো পিচাপক্যইমকোতা!’31“আত্রংহা আপাহা আকুহিংয়া জাংয়ে, ‘কুং চেংওয়া, নাতিহা হাত্রংদো কাহিংপারাং নিও, কুংতা নিওয়া মোংটো-কেটোবিহা তাংসা নাকোরাংগা।32হিনিহা য়াংবিহা য়াংতাসুনেকোগা, হাংপাতানাহা সিপুনতেওয়া নাকো ই এহা ঙারোয়ে! য়াংপুনতেমগা, আদো ন্যাসারাং দোচায়ে’!”
The Seed Company