লুক13
1আকু সময়তা আউতা নিওয়া লেরা দিংঙাবিহা ইশুহিং জাংয়ে, “রোমি কাইজি পিলাতোসহা বলি পিচাদিংনুওয়া হাসে ইচো গালীলিবিহিং স্যামে, আবিকো য়ুতিহা সেংচেংবিকো বলি জোওয়া য়ুতিহিংপা লাসিচপুয়ে।”2আত্রংহা ইশুহা আবিহিংয়া জাংয়ে, “এপারাং সিপুওয়া গালীলিবিহা দোসরা দিংঙাবিরোমা সিওপা পাপিগা তামসা নাবিহা নোমগা?3কা নাবিহিং জাংরোওয়া, এপা মোকোমি, আপনি আপনিকো পাপহিং পশ্চতাপ জোমসা মাল্যানাহা নাবিরে এপারাং দাংপুরোওয়া।4আসা সিলোয়ামকো হিয়োওয়া সা ইপুমসা সিপুওয়া আকু আটারো জনা দিংঙাবিরে য়রুশালেমকো দোসরা দিংঙাবিরোমা সিওপা পাপি নিও তামসা নাবিহা নোমগা?5এপা মোকোমি, আদো কা নাবিহিং জাংরোওয়া, নাবিমি আপনি আপনিকো পাপহিং পশ্চতাপ মোজোনাহা নাবিরে এপারাং দাংপুরোওয়া।”6আকো নোইতা ইশুহা আবিহিং ইচো মিংচি হিংপায়ে, “ইচো দিংঙাকো আংগুরকো দুংরাইবিরিতা ইতেং মুইরাসেকো সিংতেং তিংমি নিমি। মুইরাসেকো সিংতেংতা মুইরাসেকো ফল সেমে না মেসেমে তামসা গিরিওয়া কাংরেনুওয়া মুইরাসেতাহা ফল সেওয়া মিতিংতো।7আত্রংহা আকুহা দুংরাই কাংওয়া দিংঙাহিং জাংয়ে, ‘কাং, কা লো সুংনিং চোইপা মুইরাসেকো সিংতেংতা ফল সেমমে তামসা কাংয়ে, আদো মেসেতো। নেহা ইহিংয়া থেপুই, হাংপা এপারাং মোংটোহিং দাচপাকোগা?’8“আদো ডেইয়াহা জাংয়ে, ‘গিরিওয়া, কা ই মুইরাসেকো দেবেতা হুরাপা দাইরোওয়া আসা মল লুমসা সিংতেংহিংয়া ন্যাসারাং লো ইনিং কাংরোওয়া।9আসা দোরমামি সেদানাহা এনতারোওয়া, মেসেদানাহা নেপুই।’”10ইকোই ইশুহা সানুকো দিনতাহা য়হুদিবিকো জোংসুওয়া সাতা ঝিপাদিংনুওয়া11আউতাহা ইচো আটারো বর্ষাসো সিংঙো দ্যইংচাপুমসা হাইওয়া মেমে নিমি। আকুহা মুরু গোংগোংপুওয়াকো সোতা গেংপা জাকো মোছুমি।12ইশুহা আকু মেমেহিংয়া তিংয়ে, আসা মোউমসা জাংয়ে, “নাতিহা নেহা ই য়োংন্যাসো সাংচাপুয়ে।”13আকুহা আকু মেমেকো মুরুতা খুই এহে, আসা আকুহা আত্রংতারাং গেংপা জামসা সেংজাহিং তাচায়ে।14আকু মেমেহিং সানুকো দিনতা ইশুহা সাংপাওয়াকো সোতা আকু জোংসুওয়া সাকো মাটাহা সেদ্রাংপুয়ে। আকুহা দিংঙাবিহিং জাংয়ে, “কাম জোওয়াহা সাটুয়ু নিও! সানুকো দিনতাহা হাংপা সাংকো ওয়াংচাংমগা? ই দিন ল্যামসা দোসরা দিন মোতোংগা?”15আদো প্রভুহা আবিহিংয়া এপা জাংয়ে, “ও তেপিবাই, নাবিহা সানুকো দিনতাহা পিকা আসা গধাবিহিংয়া গোয়ালিসো ল্যামসা তি পেয়োংকো মাপুরামগা?16অব্রাহামকো ই চেমেহা আটারো বর্ষা চোইপা শয়তানকো পাসোতা পোরেমি নিমগা। সানুকো দিন তামসা আকুহিংয়া মাসাংপাকোগা?”17ইশুকো এপা জাংওয়া হিংমসা আকুহিং মোসোংপা জোমবিহা লেপেপুয়ে। আদো ইশুকো আআংপেপেচপুওয়া কাম জোওয়াতা তাংসা দিংঙাবিহা গাগ্রুচপুয়ে।18ইশুহা জাংয়ে, “সেংজাকো রাজ্যহিংয়া কা হাংহিংপা নোওকোগা? সেংজাকো রাজ্যহা হাং ত্যাবাপা নিংগা?19ইহা তৌরিকো অংটি ত্যাবাপা নিও, ইচো দিংঙাহা অংটি পুমসা আপনিকো লুংনিংতা মিকায়ে, আসা আকুহা দেপুমসা সিংতেং জিংপুয়ে, আসা জিয়া-জিপেইবিরে আকো গেইবেবিতা বাসা বানাইয়ে।”20আসা ইশুহা জাংয়ে, “সেংজাকো রাজ্যহিংয়া ন্যাসারাং কা হাংহিংপা নোওকোগা?21ইহা বুইপাওয়া মেং লুওয়া কোব্রেং ত্যাবাপাগা। ইচো মেমেহা সুংচো দেংগেকো পিতোতা আস্যস্যই সোঁরা লাসিমসা ন্যাইমসা এনুওয়া তাংসা পিটোবিহা বুইপামসা ওয়াংমগা।”22ইশুহা য়রুশালেমতা হোদাংনুওয়া শহর শহর আসা লোই-লোইতা ঝিপামসা হোয়ে।23আত্রংহা ইচো দিংঙাহা আকুহিং উইয়ে, “প্রভু, আস্যস্যই দিংঙাবি মেংচে উদ্ধার মুংকোগা?”
ইশুহা আকুহিং জাংয়ে,24“সেংজাকো লোইকো আপেচওয়া লাপুংসো নাপোতা হোকো সেতেং, হাংপাতানাহা উইসে দিংঙাবিহা নাপোতা হোকো সেতেংরোওয়া, আদো হোমক্যইরোওয়া।25আত্রংহা সাকো গিরিহা লোমসা লাপুং গিপুরোওয়া। নাবিহা বাইরেসো লাপুং বেইমসা এপা জাংরোওয়া, ‘প্রভু, কাবিহিং লাপুং ওয়েপি।’ আত্রংহা আকুহা জাংরোওয়া, ‘নাবিহা হানিসো ওয়াংমে কা মানাইমি।’26আত্রংহা নাবিহা জাংরোওয়া, ‘কাবিহা নাতিহিংপারাং গামসা চামি, আংমি আসা নাতিহা কাবিকো লোইবিতা সাবিতা ঝিপাচাংমি।’27আদো আকুহা ন্যাসারাং জাংরোওয়া, ‘কা নাবিহিংয়া মানাইমি। ও মেংতাপা কাম জোমবাই, কুংসো তানাং হ্যাতু।’28হাত্রং অব্রাহাম, ইসাক, য়াকুব আসা তাংসা অগমবক্তাবিহিং সেংজাকো রাজ্যকো নাপোতা তিং, আত্রংহা আপনিহিংয়া বাইরেতা বাদোইচাপুওয়া তিংনুওয়া নাবিহা কাইরোওয়া আসা সেতাং কিত্তিরোওয়া।29দিংঙাবিহা নুসো, দিসো, দাংসো, মাংসো, তাংসাসো লেমসা সেংজাকো রাজ্যতা আকুহিংপা চাকো গারোওয়া।30আদো নেকো নোই জিংওয়াবিহা নাগাই জিংরোওয়া, আসা নেকো নাগাই জিংওয়াবিহা নোই জিংরোওয়া।”31আত্রংরাং ইচো নিহসো ফরিসিবিহা ইশুকোতা লেমসা জাংয়ে, “নাতিহা ইসো নোপুমসা ইদ্যাতা হোপুই, হাংপাতানাহা গালীল জায়গাকো টেবো কাইজি হেরোদ অ্যান্টিপাসহা নাতিহিংয়া স্যাকো কেংদিংয়ো।”32ইশুহা আবিহিংয়া জাংয়ে, “হোমসা আকু মাংস্রিহিং জাংয়াতু, ‘হিনিহসো জুকুংহা কাহা জেসাংবি নোপাওয়া আসা হাইমবিহিং সাংপাওয়া কাম জোরোওয়া, আসা সাসুংয়ুংতাহা কুং কামহা ত্যইরোওয়া।’33আদো হিনি, জুকুং আসা ইইরে কাহা হোকোহা হোনেরোওয়া, হাংপাতানাহা য়রুশালেম ল্যামসা হাংতারে অগমবক্তাহিংয়া মাস্যারোওয়া।34“য়রুশালেমকো দিংঙাবাই, ও য়রুশালেমকো দিংঙাবাই, নাবিহা অগমবক্তাহিংয়া স্যাপুয়ে, আসা সেংজাহা নাবিকোতা নিংপুমবিহিং নাবিহা লুংটুই টোয়ে, হেপা কেকাকো আংমা আপনিকো কেচেংবিহিং বেগ্রেংকো লিতা তুংমমে, এপারাং কারে নাবিকো চেংওয়া চেমেবিহিংয়া তুংকো কেংয়ে, আদো নাবিহা মামানেতো।35কাং, সেংজাহা নাবিকো দেমসাহিংয়া ল্যাপুরোওয়া। কা নাবিহিংয়া জাংরোওয়া, হাত্রং চোইপা নাবিহা ‘প্রভুসেংজাকো মিংতা ওয়াংওয়াবিহিং আশিষিত নিও’ তামসা মাজাং, আত্রং চোইপা নাবিহা কাহিং মিতিংরোওয়া।”
ইশুহা আকুহিং জাংয়ে,24“সেংজাকো লোইকো আপেচওয়া লাপুংসো নাপোতা হোকো সেতেং, হাংপাতানাহা উইসে দিংঙাবিহা নাপোতা হোকো সেতেংরোওয়া, আদো হোমক্যইরোওয়া।25আত্রংহা সাকো গিরিহা লোমসা লাপুং গিপুরোওয়া। নাবিহা বাইরেসো লাপুং বেইমসা এপা জাংরোওয়া, ‘প্রভু, কাবিহিং লাপুং ওয়েপি।’ আত্রংহা আকুহা জাংরোওয়া, ‘নাবিহা হানিসো ওয়াংমে কা মানাইমি।’26আত্রংহা নাবিহা জাংরোওয়া, ‘কাবিহা নাতিহিংপারাং গামসা চামি, আংমি আসা নাতিহা কাবিকো লোইবিতা সাবিতা ঝিপাচাংমি।’27আদো আকুহা ন্যাসারাং জাংরোওয়া, ‘কা নাবিহিংয়া মানাইমি। ও মেংতাপা কাম জোমবাই, কুংসো তানাং হ্যাতু।’28হাত্রং অব্রাহাম, ইসাক, য়াকুব আসা তাংসা অগমবক্তাবিহিং সেংজাকো রাজ্যকো নাপোতা তিং, আত্রংহা আপনিহিংয়া বাইরেতা বাদোইচাপুওয়া তিংনুওয়া নাবিহা কাইরোওয়া আসা সেতাং কিত্তিরোওয়া।29দিংঙাবিহা নুসো, দিসো, দাংসো, মাংসো, তাংসাসো লেমসা সেংজাকো রাজ্যতা আকুহিংপা চাকো গারোওয়া।30আদো নেকো নোই জিংওয়াবিহা নাগাই জিংরোওয়া, আসা নেকো নাগাই জিংওয়াবিহা নোই জিংরোওয়া।”31আত্রংরাং ইচো নিহসো ফরিসিবিহা ইশুকোতা লেমসা জাংয়ে, “নাতিহা ইসো নোপুমসা ইদ্যাতা হোপুই, হাংপাতানাহা গালীল জায়গাকো টেবো কাইজি হেরোদ অ্যান্টিপাসহা নাতিহিংয়া স্যাকো কেংদিংয়ো।”32ইশুহা আবিহিংয়া জাংয়ে, “হোমসা আকু মাংস্রিহিং জাংয়াতু, ‘হিনিহসো জুকুংহা কাহা জেসাংবি নোপাওয়া আসা হাইমবিহিং সাংপাওয়া কাম জোরোওয়া, আসা সাসুংয়ুংতাহা কুং কামহা ত্যইরোওয়া।’33আদো হিনি, জুকুং আসা ইইরে কাহা হোকোহা হোনেরোওয়া, হাংপাতানাহা য়রুশালেম ল্যামসা হাংতারে অগমবক্তাহিংয়া মাস্যারোওয়া।34“য়রুশালেমকো দিংঙাবাই, ও য়রুশালেমকো দিংঙাবাই, নাবিহা অগমবক্তাহিংয়া স্যাপুয়ে, আসা সেংজাহা নাবিকোতা নিংপুমবিহিং নাবিহা লুংটুই টোয়ে, হেপা কেকাকো আংমা আপনিকো কেচেংবিহিং বেগ্রেংকো লিতা তুংমমে, এপারাং কারে নাবিকো চেংওয়া চেমেবিহিংয়া তুংকো কেংয়ে, আদো নাবিহা মামানেতো।35কাং, সেংজাহা নাবিকো দেমসাহিংয়া ল্যাপুরোওয়া। কা নাবিহিংয়া জাংরোওয়া, হাত্রং চোইপা নাবিহা ‘প্রভুসেংজাকো মিংতা ওয়াংওয়াবিহিং আশিষিত নিও’ তামসা মাজাং, আত্রং চোইপা নাবিহা কাহিং মিতিংরোওয়া।”
The Seed Company