লুক12
1হাজার হাজার দিংঙাবি নিমকো সোতা এটোং-বেটোংপা জিংকোবেপা জিংদিংমি। আত্রং ইশুহা হাংসুরোমা নাগাইহা আপনিকো য়োংতোংবিহিং জাংয়ে, “নাবিহা ফরিসিবিকো কোব্রেং বুইপাওয়া সোঁরাবিসো তানাং য়ুং! কুং জাংকো কেংওয়াহা, আবিকো তেইপি নোচেংবিসো তানাং য়ুং,2হাংপাতানাহা তুংমসা এওয়া নুওয়াংবি হাসেনি, আকু তাংসা ওয়েচপুরোওয়া, আসা ম্যইমসা এওয়া হাসে নুওয়াংবিনি, আকু তাংসা সিদা চ্যইরোওয়া।3নাবিকো নাঘিওয়াতা জাংওয়া নুওয়াংহা জেইসুংকো হাহাইওয়াতা হিংরোওয়া। চেকেপা নাপোতা স্যাকা সুকুপা য়্যইসুওয়া নুওয়াংহা সাকো গুইপুসো বান্ন্যাপা হিংপারোওয়া।”4ইশুহা ন্যাসারাং জাংয়ে, “ও কুং ব্যারোবাই, কা নাবিহিংয়া জাংরোওয়া, দিংঙাবিহিংপা মাচ্ছুংগে। আবিহা নাকো জুপাহিং মেংচে স্যাকো চুরোওয়া, আদো নাবিকো লাংবেহিংয়া আবিহা হাইরে জোমক্যইরোওয়া।5হাংসুহিংপা চুসুংনেকোগা? কা নাবিহিং জাংরোওয়া, সিপুনতেনুকো নোইতারে নরকতা বাডোইকো চুওয়া সেংজাহিংপারাং চুসুংনেরোওয়া। আজিপ্পারাং কা নাবিহিং জাংরোওয়া, আকুহিংপা মেংচে চুসুং।6কাং, ঙাপু বাংগেরা জিয়াহা নিহসে টাংকাতা মোলোংকোগা? বাংগেরাবিহা হাসে তুপা মুংদো সেংজাহা আকু ইপুহিংনে মালারিংমগা।7আদো নাবিকো সেংজাহা নাবিকো ইগে ইগে পুরিংবিরে চেংমি নিও। আকো সোতা মাচ্ছুংগে, উইসে বাংগেরা জিয়াবিরোমা নাবিহা সেংজাকো নাগাইতা সিয়োপারাং পাংক্যইপা নিও।8“কা নাবিহিং জাংরোওয়া, হাংসু কাহিং দিংঙাবিকো নাগাইতা প্রভু তামসা নাই, আকুহিংয়া কা দিংঙাকো চেংওয়ারে সেংজাকো পোইংবিকো নাগাইতা কুং তামসা নাইরোওয়া।9আদো হাংসু কাহিং দিংঙাকো নাগাইতা মানাইমি তামসা জাং, আকুহিংয়া কারে সেংজাকো পোইংবিকো নাগাইতা মানাইমি তামসা জাংরোওয়া।10হাংসু দিংঙাকো চেংওয়াকো তোইতা মেংতাপা য়্যই, আকুহা ছমা মুংরোওয়া, আদো পবিত্র লাংবেকো তোইতা মেংতাপা য়্যইওয়াবিহা হাত্রংরে ছমা মোমুংরোওয়া।11“দিংঙাবিহা নাবিহিংয়া প্যইমসা জোংসুওয়া সাকো মাটা দিংঙাবিকোতা, সরকারি মাটা দিংঙাবিকোতা, আসা কাইজিকোতা পুরারোওয়া। আত্রংহা নাবিহা হাং জাংনেকোমে তামসা সিংদুমঘ্যই,12হাংপাতানাহা পবিত্র লাংবেরাং নাবিহিংয়া হাং জাংনেকোমে আত্রংরাং তাংসা নুওয়াংবি ঝিপারোওয়া।”13উইসে দিংঙাবিকো প্যাকোসো ইচো দিংঙাহা ইশুহিং জাংয়ে, “উটকেওয়া, ‘কুং আপাকো মোংটো-কেটো কাহিং পোপিকো’ তামসা কুং ডুওয়াহিং জাংপি।”14আদো ইশুহা আকুহিংয়া জাংয়ে, “ও ব্যারো, নাবি নিহসোকো মোংটো পোপিকো তামসা হাংসু কাহিং অধিকার পিচাংগা?”15আসা ইশুহা ন্যাসারাং জাংয়ে, “তাংসা মিচওয়াবিসো তানাং য়ুং, হাংপাতানাহা দিংঙাবিহিংপা নিওয়া মোংটো-কেটো আসা পুংজিবিতাহা দিংঙাকো সাদি মায়ুংমগা।”16আকো নোইতা ইশুহা আবিহিংয়া ইচো মিংচি ল্যায়ে, “ইচো পুপুউ দিংঙাকো মোংটোতা উইসে মাওং সেয়ে।17আকুহা তুংসিং নাপোসোরাং ‘কুং ই তাংসা মাওংহা হাংতা একোমে? এদুরাং মোতো, নেহা হাং জোনেকোমে?’ তামসা নোয়ে।18নেহা কা এপা জোরোওয়া, অ্যাত্যইচংওয়া তোপাবি য়্যামসা টেরবো টেরবো মাওং এওয়া তোপাবি বানাইরোওয়া, আসা আউতারাং কুং মোওংবি আসা লেরা সোংসাবিরে এরোওয়া।19আকো নোইতাহা আপনিহিংনাং জাংরোওয়া, ‘ও কুং সাদি, নাতিহিংপা উইসে লো চোইপা তেংওয়া সোংসাবি নিও। নেহা লেংকে-গাকেমসা চা, আং, আসা গাগ্রুমসা য়ুং’।”20“আদো সেংজাহা আকুহিংয়া জাংয়ে, ‘ও দুংজি মাতাওয়া, হিনি লিসুংরাং নাতিহা সিপুরোওয়া, আসা নাকো নোমসা এওয়া মোওংবি আসা সোংসাবিহা হাংসুকো জিংকোগা’?21“আপনিকো সোতা মোংতো-কেটো দুংপামসা এওয়া, আদো সেংজাকো নাগাইতা পুপুউ মিজিংওয়া দিংঙাবিহা এপারাং জিংরোওয়া।”22আকো নোইতা ইশুহা য়োংতোংবিহিং জাংয়ে, “আকো সোতা কা নাবিহিংয়া জাংরোওয়া, আপনিকো জুপাকো সোতা হাং চানেকোমে আসা হাং লুনেকোমে সিংদুমঘ্যই,23হাংপাতানাহা সাদিহা চাওয়া আংওয়ারোমা টেবোগা, আসা জুপাহা লুওয়া আংদুংবিরোমা টেবোগা।24জিয়া-জিপেইবিহিং কাং, আবিহা মিকোরে মামিমগা, চ্যাকোরে মাচ্যামগা, আবিকোহা মোওং এওয়া সারে মোতো আসা অংসে এওয়া তোপারে মোতো। আদো সেংজাহা আবিহিংয়া চাকো পিচামগা। নাবিহা আকু জিয়া-জিপেইবিরোমা সিওপা পাংক্যইপা নিও।25নাবিতাহা হাংসু সিংদুমসা আপনিকো লো আস্যই সিওপা বেইপাকো চুকোগা?26নাবিহা ই অ্যাত্যইচোওয়া কামরে জোকো মোচুনাহা দোসরা নুওয়াংকো হাংপা সিংদুমগা?27“চুংচাতা মাইওয়া লিলি মাইবেবিহিং কাং, আবিহা কামরে মোজোমগা, লুচাকো আংদুংবিরে মাফিমগা। আদো কা নাবিহিংয়া জাংরোওয়া, সোলোমন জাইপুহিংপারে এসে মোংটো-কেটো আসা পুংজিবি নিমসারে আকুহা লিলি মাইবেবি ত্যাবাওয়া এনতাওয়া আংদুংরে মালুতো।28আদো হিনিকো মাইওয়া আসা জুকুংকো য়োংপুমসা মেহতা চুংপুওয়া সাম্যাহিংনে সেংজাহা এপা এনতাপা কাংকো চুনাহা, আকুহা নাবিহিংয়া লুচাওয়া আংদুংহা মিচাকোগা? হানি নাবিকো দেংওয়াহা?29আকো সোতা হাং চাকোমে, আসা হাং আংকোমে তামসা মোমোঘ্যই আসা সেংদুমঘ্যই,30হাংপাতানাহা সেংজাহিং মানাইওয়া দিংঙাবি মেংচে এপাজিংওয়া সেংদুমগা, আদো নাবিহিংয়া ই তাংসা ঘ্যইমগা তামসা লোডিংবাকো আপাহা গেমগা।31আদো হানিরোমা নাগাইহা সেংজাকো রাজ্যহিং মো, আসা আকুরাং ই তাংসা নাবিহিং পিচারোওয়া।”32ইশুহা ন্যাসারাং জাংয়ে, “ও আত্যইচোওয়া পারা, মাচ্ছুংগে, হাংপাতানাহা সেংজাহা নাবিহিংয়া আপনিকো রাজ্য পিচাকো গাগ্রুপা নিও।33নাবিহা আপনিকো মোংটো-কেটো পিইচাওয়া ন্যাস্যাবিহা জোরোংবিহিং পিচা। আকু নাকো পুংজিহা লোডিংবাতা দুংরোওয়া, লোডিংবাকো ন্যাস্যা এওয়া পেকুওয়াহা হাত্রংরে মায়াইমগা আসা মাঅ্যাহপা এনতাপা য়ুংমগা। আউতাহা কুইমবিরে কুমক্যইমগা আসা পেতারে চামক্যইমগা,34হাংপাতানাহা হাংতা নাকো পুংজিনি! আউতারাং নাকো তুংসিংরে নিরোওয়া।”35আকো নোইতা ইশুহা জাংয়ে, “আপনিকো কেপাতা বুজিংওয়া এনতাপা বুজিংমসা তৈয়ার জোমসা য়ুং আসা নাবিকো দিব্রি লালাইপামসা এ্যহ।36আসা নাবিহা আপনিকো গিরিওয়া বিয়ৌসো লারেমসা লাপুং বেরেনুওয়া, মাজিংপা সেন্নেপা আকো সোতা লাপুং ওয়েপিওয়া ডেইয়াবি ত্যাবাপা জিং।37গিরিওয়া লারেনুওয়া মাজিংপা খুইমসা গাদিংওয়া আকু ডেইয়াবিহা আশিষিত জিংরোওয়া আসা য়াংতারোওয়া। আজিপ্পারাং কা নাবিহিংয়া জাংরোওয়া, আকু গিরিওয়াহা ডেইয়াবিহিংয়া আরসিং ওয়াংওয়াবিহিং ত্যাবাপা জোমসা চাওয়া আংওয়াবি তৈয়ার জোরোওয়া, আসা আকুহা আবিহিংয়া এনতাপা চাকো আংকো পিচারোওয়া।38আসা আকু সাকো গিরি লিসুং আদিরাত চোইপা সুমমুংপা জোমসা ওয়াংনুওয়া ডেইয়াবিহিং মাজিংপা গাদিংওয়া দোসুনাহা আকু ডেইয়াবিহা আশিষিতগা!39“আদো ই নুওয়াং কোইমসা য়ুং, কুইওয়া হাত্রং ওয়াংকোমে তামসা সাকো গিরিমি গেনাহা আকুহা মাজিংপা য়ুংকোগা, আসা কুইওয়াহিং সা য়্যামসা কুকো মিচাকোগা।40এপারাং নাবিরে হাত্রংদো তৈয়ার জিংমসা য়ুং, হাংপাতানাহা দিংঙাকো চেংওয়াহা নাবি মেলেরো তামসা নোদিংনুরাং দেরেরোওয়া।”41আত্রং পত্রসহা ইশুহিং উইয়ে, “ও প্রভু, নাতিহা ই মিংচিহা কাবিহিং মেংচে জাংমগা, না দোসরা তাংসাকো সোতা জাংমগা?”42প্রভুহা জাংয়ে, “হাংসু দাটাচ্যইওয়া আসা দুংজি নিওয়া ডেইয়া জিংকোগা? আকুহিংয়া আকো গিরিওয়াহা আকো সাকো মাটা বানাইরোওয়া আসা আকু ডেইয়াহা দোসরা ডেইয়াবিহিংয়া সময়-সময়তা চাকো আংকো পিচারোওয়া।43আকু সাকো গিরি লায়োংমসা ওয়াংনুওয়া আকুমি দোসরা ডেইয়াবিহিং এপারাং জোদিংওয়া দোসুনাহা, আকুহিংয়া ইনাম পিচারোওয়া।44আজিপ্পারাং কা নাবিহিংয়া জাংরোওয়া, গিরিহা আপনিকো তাংসা পুংজিবিতা আকুহিংয়া অধিকার পিচারোওয়া।45আদো আকু ডেইয়ামি আপনিকো তুংসিংতা ‘কুং গিরিহা সুমমুংপা জোমসা লেরোওয়া’ তামসা আংমসা আসা গাইমসা দোসরা ডেইয়া-ডেইয়ামেবিহিং দুকো কেংনাহা,46আকু মোনোপা য়ুংদিংনুকো দিনতা আসা আশা মোজোওয়া সময়তা আকো গিরিওয়া দেরেরোওয়া, আসা আকুহিংয়া দন্ড পিচারোওয়া। আকো দশাহা দোসরা মাদেংওয়া দিংঙাবিকো ত্যাবাপা জিংরোওয়া।47“আপনিকো গিরিওয়াওয়া হাং জোকো কেংমে আকু গেমসারে তৈয়ার মোয়ুংওয়া আসা আকো জাংওয়া সেই মোজোওয়া ডেইয়াহা সিওপা দন্ড মুংরোওয়া।48আদো গিরিওয়াকো জোকো কেংওয়া সিদা মোচ্যইপা মেংতাপা কাম জোসুওয়া দিংঙাহা সিওপা দন্ড মোমুংরোওয়া। হাংসুহিং সিওপা পিচামিনি, আকুহিংপাহা সিওপা য়ারোওয়া, আসা এপারাং হাংসুহিং উইসে পিচামিনি, আকুহিংপাহা ঝান উইসে য়ুচারোওয়া।”49ইশুহা জাংয়ে, “কা বাসিমতিতা ন্যায়কো মেহ নৌকো লেমগা, আদো নাগাইসোরাং মেহ নৌপুমতেনাহা এনতাপা জিংকোগা!50কাহা ইচো বাপ্তিস্মা লাংনেরোওয়া। আকু বাপ্তিস্মা মালাংনু চোইপা কাহা লোচোপেংগেংপা জিংরোওয়া।51নাবিহা কা বাসিমতিতা চাংসপাকো লেয়ো তামসা নোমগা? মোকোমি, কাহা স্যাসপাকো লেমি।52হাংপাতানাহা ইসো য়ুতাহা নাচো নিওয়া পাপ্যামাম্যাতাহা স্যাসুনেরোওয়া। সুংচোহা নিহসো দিংঙাকো তোইতা আসা নিহসোহা সুংচোকো তোইতা মোসোংসুরোওয়া।53আপাহা চেংওয়াকো তোইতাআসা চেংওয়াহা আপাকো তোইতা,আয়ুহা চেমেকো তোইতাচেমেহা আয়ুকো তোইতা,এপারাং জুমেহা নামাকো তোইতাআসা নামাহা জুমেকো তোইতা মোসুংপা জোসুরোওয়া।”54ইশুহা উইসে জাদিংওয়া দিংঙাবিহিং জাংয়ে, “দিসো ডিংবা মুউওয়া তিংতানি নাবিহা ‘নেহা ওয়্যাইতি ওয়্যাইরোওয়া’ তামসা জাংমগা, আসা এপারাং ওয়্যাতিরে ওয়্যামগা।55মাংসো বিংঙা ভিনুওয়া নাবিহা ‘নেহা বোরোওয়া’ তামসা জাংমগা, আসা এপারাং জিংকোরে জিংপুমগা।56ও তেপিবাই! নাবিহা বাসিমতি আসা ডিংবাহিং ন্যইমসা ওয়্যাতি ওয়্যাকোমে-না মাওয়্যাকোমে তামসা কোইকোহা চুমগা, আদো ই দেপাওয়া চিহ্নবি ন্যইমসা নাবিহা হাংপা কোইকো মোচুমগা?57নেহা হাং জোনেকোমে তামসা নাবিহা হাংপা মোকোইমগা?58“নাবিহিং দোষ তিংপাওয়া দিংঙাহিংপা কাইজিকোতা চাংসুকো হোদাংনাহা ন্যাতাতারাং আকু দোষ তিংপাওয়া দিংঙাহিংপা চাংসপুই। মেনাহা আকুহা নাতিংহিংয়া কাইজিকোতা সারোওয়া, আসা আকু কাইজিহা সিপাইবিকোতা স্যইপুরোওয়া আসা সিপাইবিহা নাতিহিংয়া জেলতা সুংপুরোওয়া।59কা নাতিহিংয়া জাংরোওয়া, নাতিহা ন্যাস্যা মাটানু চোইপা আউসো নোমক্যইরোওয়া।”
The Seed Company