Chiyubunuzyo12
1Alimwi chigambyo chipati chakaliboniya kujulu. Kwakali mwanakazi, zisamo zyakwe zyakali zuba, amweezi kunsi amawulu aakwe, mpawo amusini wanyeenyezi amutwe wakwe zilikkumi azibili.2Wakali mitide alimwi wakalila kumyoongwa amachise akutumbuka.3Mpawo kwakayubunuka chigambyo chipati kumulengalenga. Laanga, simwaaba mupati usalalisya, wakali amitwe iilimusanu ayibili ameja alikkumi, alimwi amisini iilimusanu ayibili amitwe yakwe.4Mpawo muchila wakwe wakayila chipanzi chimwi chazipanzi zitatu chanyeenyezi zyamulengalenga, mpawo wakaziwisizya anyika. Alimwi simwaaba wakayimikila kunembo lyamwanakazi wakali waamba kutumbuka mwana, kuti atumbuka alye mwana wakwe.5Eelyo mwanakazi ooyu wakatumbuka mwana mulombe, ooyo uyooyendelezya manyika woonse amusako walubulo. Pesi mwana wakwe mulombe wakakwempwa kuliLeza akuchuuno chakwe.6Mpawo mwanakazi wakachijila munkanda, kubusena oobo Leza mbwaakamubambila, ooko nkwakasaninwa kwamazuba alichuulu amyaanda iibili amakumi alimusanu akkumi limwi.7Lino kwakabuka nkondo kujulu. Mikkayeli abaangelo bakwe bakalwanisya simwaaba, alakwe simwaaba abaangelo bakwe kabali kubalwaniya lubo,8pesi simwaaba wakazundwa, mpawo teekwakachili busena bwabo pe kujulu.9Alimwi simwaaba mupati wakawalilwa aansi, ooyo muzoka wachiindi, utegwa Sikuchenga Mupati aSatani, sikuchenga nyika yoonse. Wakawalilwa aansi anyika, abaangelo bakwe10Eelyo ndakamvwa ijwi kalyoompolola kujulu, kaliti, “Lino lwasika lufutuko lwaLeza anguzu zyakwe abwami bwakwe abweendelezi bwaKkirisitu wakwe, nkaambo sikubejelezya bakwesu wawaalilwa aansi, ubabejelezya sikati amasiku kunembo lyaLeza wesu.11Alimwi bakamuzunda abulowa bwaMwana wambelele ajwi lyabukamboni bwabo, nkaambo teebakabuyanda buumi bwabo mane kuyoosika kulufu.12Eelyo nkaambo kacheechi O majulu ngamusekelela, alanu nimukkala mumo! Pesi maawe kulinduwe, O nunyika alwizi, nkaambo Sikuchenga waselukila kulindinywe abukali bupati, nkaambo ulizi kuti chiindi chakwe chachaala nchifwiifwi!”13Alimwi simwaaba naakabona kuti wawaalilwa aansi kunyika, wakaandilila mwanakazi wakatumbuka mwana mulombe.14Pesi mwanakazi wakapegwa mababa aabili ansika mpati kuchitila kuti awuluke kuzwa kumuzoka aaye munkanda, kubusena bwakwe mbwakalileledwe kwachiindi, akwazyiindi akwachisela chachiindi kukukwabililwa kulisimwaaba.15Muzoka wakaselwida mwanakazi meenda aali mbuli mulonga kuzwa mumulomo wakwe, kuti atolwe azambangulwe.16Pesi inyika yakagwasya mwanakazi, aawo nyika niyakajula mulomo wayo mpawo yamena mulonga ooyo simwaaba ngwakali waselula kuzwa kumulomo wakwe.17Eelyo simwaaba wakanyemena mwanakazi, mpawo wakayinka kuyoochita nkondo kulunyungu lwamwanakazi ooyu loonse, kulibaabo babamba malayilile aLeza akupa bukamboni kuliJesu.18Alimwi simwaaba wakayimikila amuse wankomwe yalwizi.
The Word for the World International