SINU33
Katansa Onu
1Aye batininitɛ, bisa suoto lɛyɔɔ sinu bita Saate nwu;diesiɛko alɛ mba nimbla ni asaa di osuku kanya lɛtansa nwɔ.2Bitansa Saate nwu ku sanku;biyɔ ekũ lefosi kyitaa bisa sinu bitɔɔ.3Bisa onu fɔle bitɔɔ;bifɛ sanku nwu ninumbe kanya, biɛfaa ku suoto lɛyɔɔ.4Diekye Saate nwu ɔlaa nkpe, nwaako kafɔɔ kule;anle anukwale di asaa amuu ambla nii.5Saate nwu mbɔmbɔ ɔsaabla tinini ku lɛkakanko biene;lɛbɔmbɔ nɔɔ le ninaa ni kaloo leyii kasɔ.6Saate nwu ɔlaa kanya baabla osi,kanya nɔɔ owiidi aayɔ aabla osi asaa.7Ansiisa lekpo ntu nwu di dikuuku kamɛ;an-yɔ kakyofokɔ nwu antɛ di asaa ntɛkɔ.8Bita kasɔ kamuu kayɛkɛ Saate nwu;bita batii di kayi kamuu batɔɔ dibu.9Diekye aakakatɛ, ni aadie nɛ;aadiki kanya, ni aayila kpinkpĩ nɛ.10Saate nwu nlalaasa nnle asibu;ankpɔkpɔtɔsa nle di batii nwu lɛtɛ ni bɔɔbla ni.11Kafɔɔ Saate disibu nni ninyila kpinkpĩ obe lele,otu nɔɔ dibiesaa nte ninta ana amuu.12Suoto siyɔɔ kale ka di Yaa lɛma ninle ni Saate nwu,batii ba eediki ɛɛta ni atesaa nɔɔ ole.13Saate nwu nnyu ankyeko osiaanya batii bamuu;14di kasiɛkɔ nɔɔ aanyubatii ba bamuu ninsi ni kaasɔ suoto-15nnwɔ niɛbla ni bamuu situ,antofo ni lɛsaa biala bɔɔbla nii.16Ɔka kuonwii ninlenkee ta bakpɛtɛ nɔɔ lɛpɔ oso;kpɛtɛ kuonwii ninfe ta osie kplɛ nɔɔ oso.17Pɔnkɔ diele lɛsalɛsaa ɛɛta didiki osuku onyu;nu akpe osie kplɛ omuu yi, anfuo didiki ɔta.18Kafɔɔ Saate nwu anu ntika di batii ba ninyɛkɛ nwɔ ni suoto,di batii ba di osuku onyu lɛma nsi ni di lɛbɔmbɔ nɔɔ le ninaa ni kaloo kamɛ,19alɛ abadiki ma ankyeko kukpi kamɛanta ma manwɛ nkpa di kɔka obe kamɛ.20Busi buonyu osuku munta Saate nwu;nnwɔɔ ninle kyakaakotɛ loo ku kubidifunsaa loo nɛ.21Nnwɔɔ kamɛ di situ loo nnya suoto lɛyɔɔ nɛ,diekye buotika disi di leyooto nɔɔ klekle nwu suoto.22O Saate, ta lɛbɔmbɔ lɛfɔ nwu ninaa ni kaloo ditika wo di suoto,ta mmle buɔyɔ osuku onyu loo buotika ni di suoto lɛfɔ.The Seed Company