SINU32
Sikpile Odiki Obuɛ Ku Ɔyɔ Ɔkyɛ
Dawid onu. maskil.
1Suoto siyɔɔ otii wɔbɛɛyɔ ɔtanlolaa ɔbla nɔɔ bɛɛkyɛ ni,nnwɔ sikpile beetĩi nii.2Suoto siyɔɔ otii wɔsikpile di Saate nwu diebu atɛ nwɔ ni,ku otii wɔ ninwuna kamɛ di sɛlaa ku afunu diesi ni.3Nse lelo kanana yi,akufi nii ninwɛ osieta dii nimu atũnni nii oso.4Diekye kakũ ku kakyɛkɔnɛɛ lɛfɔ lawɛ osie di suoto nii;osie nii lawakasɔfɛ kabiene kufĩ kpankpa kamɛ. nsi. Yila kɛɛkɛ5Ni labuɛ sikpile nii latɔkɔ fɔ nɛ,ntatĩtĩi ɔsaabla kpile nii kafɔɔ.Labuɛ nlɛ, "Kamadiki ɔtanlolaa ɔblanii mbuɛ ntɔkɔ Saate nwu"-ni faayɔ sikpile niilɛpɔɔ okpi faakyɛ mi nɛ. Yila kɛɛkɛ6Nioso ta otii biala ninle ni Yaa otii apɛ ɔlaa ata fɔdi obe wɔ abanya fɔ ni;nwaako nse ntu kplɛ nwu leyii,alɛ dilaadu nwɔ ni.7Afɔ ninle kawofakɔ nii;fabanyu mi di dibuo kamɛfammana mi fankyi kafɔɔ ku didiki sinu. Yila kɛɛkɛ8Matuo fɔ asaa, nintuo fɔ kafɔɔ osuku wɔ fabakyɛ ni;kamaka fɔ, nnyu fɔ kafɔɔ.9Tante fɛle pɔnkɔ ee bɔkɛɛ wɔ nintuka ni atoo,anaa ni lɛsɔnukafɔɔ lɛbɔɔsaa ku okũ dikpeni man-yɔ mankpa nwɔ niinse diele nkpo blɔbakaa fɔ.10Bakpiletɛ dibuo mpɔ kpinwu,kafɔɔ Saate nwu lɛbɔmbɔ le ninaa ni kaloo,mmana otii wɔ nintika nwɔ disi.11Binya suoto lɛyɔɔ di Saate nwu kamɛ, biɛpɔ, aye ba ninte ni tinini;aye ba bamuu di situ kamɛ lɛkpa ni, bisa sinu!The Seed Company