Yeremia10
Afiɔ Ɔtɔ Ku Onukwale Kasumu Nwu
1Oo Israel batii, binu ɔlaa wɔ di SAATE nwu kobuɛ antɔkɔ ye ni.2Nnya ɔlaa wɔ di SAATE nwu kobuɛ ni alɛ:“Bitantekete nnle nwu sɛsaablaee lɛyɛkɛ dipɛ ye di atuosaa di kolo suoto,kuntɛ difu ninya mpɛ nnle nwu.3Diekye batii nwu amanle sɛsaabla diele lɛsalɛsaa;mambudi kowoso mankyeko lepoo kamɛ,asaawolatɛ kafɔɔ n-wola kũ andiki ku lɛfɛbi nɔɔ.4Man-yɔ koto fututu ku koto sɛɛle manklɛɛ ni;man-yɔ ɔmankyi mampɛ sibuɛ ninmufũ ni ninkleemmle ninaatũkũ nii.5Afiɔ lɛma nwu nte fɛle asaa ya nintososa ni bakansiɛ di afe,ananfuo ni ɔkakatɛ;ɔkɛnkɛ dikpeni bɛɛkɛnkɛ nyadiekye anfuo ɔkyɛ.Bitanyɛkɛ nya;blɔbafuo ye okpile kuninwii ɔblaee babla dibiene kuninwii.”6Oo SAATE, kuonwii diete fɛle afɔ;feemuɔ,leyooto lɛfɔ kafɔɔ nkpe onutũ di osie kamɛ.7Oo nnle nwu Ɔka,Owe ninamayɛkɛ fɔ?Nle mmle ninle lele fɔ nɛ.Di nnle nwu banumbentɛ bamuu kamɛku sɛkanlekɔ lɛma nwu mmuu kamɛ yi,kuonwii nnaa fɛle afɔ.8Bamuu lɛma banaa disibu, baaye kafɔɔ lɛsaa;afiɔ awosoku ya ninandie ni lɛsalɛsaa nintuo ma asaa.9Mankyeko koto fututu ko bɛɛbɛntɛ ni Tarsisku koto sɛɛle di Ufas manwako.Nse batoololaa asaa ya di asaawolatɛ ku koto sɛɛle asaatukatɛ lɛyɔdibula bluu ku nle niɛbla ni fɛ ɔsɛɛ bɛɛbla nii-bakpɛntɛ ba ninkpe ni kusi-ɛ niabla nya amuu.10Kafɔɔ SAATE nwu ninle onukwale Yaa nwu nɛ;Yaa wɔ ninkpe ni nkpa ale, Ɔka wɔ ninaa ni kaloo.Nse ɔblɔ lɛfiɛ nwɔ yi, kasɔ ntũkũ;nnle nwu dilɔbafuo oyila di lɛblɔfiɛ yakayaka nɔɔ nwu kanya.11“Tɔkɔ ma ɔlaa wɔ mmle falɛ: ‘Bayaa ba mmle, ninambla ni osi ku kasɔ, kamawɔɔ mandie kaasɔ suoto di osi kalɔ.’ ”Katansa Onu Kuɔta Ni Yaa
12Kafɔɔ Yaa labla kasɔ di osie nɔɔ kamɛ;ninumbe nɔɔ aayɔ aabla kayini aablɛfɛsa osi di lɛsɔnu nɔɔ kamɛ nɛ.13Nse eekpududuu yi, ntu nwu di osi nkpanko suoto;anta alokonkyɛ ntaka di kasɔ nwu nyɛntɛlekɔ.Anta ɔtɔ mmunaa ku kantoandieko afɛɛfɔ kafɔɔ ankyeko asaa nɔɔ ntɛkɔ anwako.14Otii biala dieye lɛsaa, banaa kafɔɔ lɛsaatofo;sinunsɔ kɔkpɛ koto sɛɛle asaatukatɛ biala di afiɔ nɔɔ suoto.Atembi nɔɔ nwu nle kakyɔnkyɔ;ninwuna diesi ma kaamɛ.15Baadie lɛsalɛsaa, amansaa di asaa nwu nle;nse lɛkanko lɛma lɛwa yi, babawɔɔ.16Otii wɔ ninle ni Yakob kalekɔ diete fɛle n-ya mmle,diekye nnwɔɔ ninle asaa amuu Blatɛ nɛ,dikyakaa ni di Israel, atesaa nɔɔ nwu kɔna-leyooto nɔɔ ninle SAATE wɔ Ninlenke ni nɛ.Sɛlanle Kamɛ Osifi Wɔ Nikɔwa Nii
17Aye ba ninsi ni di ɔmana okyi nwu kamɛ,bisiisa asaa lee biedie di kasɔ nwu bisifi.18Diekye nnya ɔlaa wɔ di SAATE nwu kobuɛ ni alɛ:“Kamadiki batii ba ninsi ni di kasɔ ka mmle suotonfuki n-yu di obe wɔ mmle kamɛ;kamayɔ nimiina n-wako ma di suotoalɛ baafuo ma omufũ.”19N-yɔɔsa ta nkɔ be lefũ ni oso!Kakɔ nii ninkpi!Kafɔɔ latɔkɔ suoto nii nlɛ,Ofiɛ nii ninle nnwɔ mmle nɛ, dikpeni lekpee otu lefe nwu kaamɛ.”20Batɔɔlalaasa akpanta nii;batoobubudi sikũ nini simuu.Babi nii kafɔɔ ntoodie di ɔkyɛ nii beesifi, basinnaa;kuonwii nsinnaa kanunua aapɛ ni akpanta niiee abatakatɛ lɛkpaayo nii anse nii.21Babɔkɛɛ bakpatɛ nwu dieye lɛsaamannwolaa kafɔɔ asaa kamɛ baakyeko SAATE nwu ɔkyɛ;nkpo oso asaa ninlɛ ata ma,babɔkɛɛ lɛma bamuu kafɔɔ ntɔɔsamii.22Bikyɔɔ atoko bienu! Sɛlaa nwu nfɛ kɔwa-kakpɔtɔkpɔtɔ kplɛ ka niekye ni katookasɔ kɔwa!Dibata Yuda sekpoo nwu nte sifukuti,simmabla lepoo kamɛ baweewee kasiɛkɔ.Yeremia Ɔlaa ɔpɛ
23Oo SAATE, n-ye nlɛ otii nkpa diele nle nwɔ mmu;diɛlɛ dita otii alɛ aatofo nkpaa nɔɔ kasekɔ.24Oo SAATE, lolaa mi, kafɔɔ di onukwale kanya lete-diele di ɔblɔ lɛfɔ kanya,nse diele nkpo fabawakosɛɛ kasɔ ninamadie ni lɛsalɛsaa.25Nyɛɛnɛ lɛblɔfiɛ yakayaka lɛfɔ fakpete di nnle beninanta fɔ ni dibu suoto,faakpete kafɔɔ di batii ba ninanansumu fɔ ni suoto.Diekye batɔɔbɛbɛɛ Yakob;batɔɔbɛbɛɛ nwɔ fɛɛbɛɛwɔɔsa kafɔɔ okpoo nɔɔ.The Seed Company