Yeremia9
1Oo, dilaale alɛ disi nii kale ntu kataakɔ,di anumbi nii kafɔɔ ale ntu nnumɛɛ!Ntabawi kaku kakũ ku kakyɛnta batii nii ba beelo nii.2Oo, dilaale alɛ nkpe lɛba di ɔfaafuu kamɛkatenkɔ diɛta ni osuku bakyɛntɛ,alɛ kadie ndiɛ batii niinsifi ndiɛ ma;diekye basɔnɔkpeetɛ bale bamuu lɛma,onukwale ɔtanle batii dikudi bale.3“Beelolaa sɛkplalomii lɛmafɛle kɔtaa, alɛ babataa sɛlaa ku afunu;diele di onukwale kanyaman-wɛ lelenkee di kasɔ nwu suoto.Mandie di okpile onwii kamɛ mambuo di ɔbamba kamɛ;baaye mi,”SAATE nwu niebuɛ.4“Bilolaa binyu di basiɛwo lee suoto;bitantika babilee-suɔtɔbi disi.Diekye kyɔnkyɔtɛ di obilee-suɔtɔbi biala nle,siɛwo biala kafɔɔ nle batii kanya buditɛ5Siɛwo nkyɔnkyɔ siɛwo,otii kuonwii kafɔɔ nimbuɛ onukwale.Batootuo sɛkplalomi lɛma sɛlaa ku afunu;mankpee suoto lɛma kubuɛ ku sikpile ɔbla.6Kakyɔnkyɔ obo kamɛ fasi;beesĩ mi otofo di kakyɔnkyɔ lɛma kamɛ,”SAATE nwu niebuɛ.7Nkpo oso, nnya ɔlaa wɔ di SAATE wɔ Ninlenke ni kobuɛ ni alɛ:“Nyu lo, kamanyanakĩisa ma ninsɔ ma nnyu,diekye obe lɛsaa kamakple nfuo ɔblata batii nii sikpile oso?8Ɔkplalomii lɛma nle kɔtaa kpile;kakyɔnkyɔ kunkakatɛ.Obiala n-yɔ kanya nɔɔ ankakatɛko owo nɔɔ sibilɛma kanya,kafɔɔ ankyɔɔ nwɔ okũ di otu nɔɔ kamɛ.9Ntaananfi ma kootoko ta nle mmle oso?”SAATE nwu niebuɛ.“Ntaambla lakyisa lata suoto niidi kale fɛ nka mmle nwu suoto?”10Kamawi kaku ku kudu nta abokote nwuninsa kafɔɔ okunu di ɔfaafuu nwu sɛfa nweekɔ suoto.Bate ofukuti, batii kafɔɔ dilosinfe ninfa,mansinnu kafɔɔ banankyue diwi.Bakansiɛ di kɔfɛɛfɔ ntootosobabɔkɛɛ kafɔɔ ntoosifi.11“Kamabla Yerusalem ayokuu ya niɛwɔɔ ate nii,dibale ni lepoo kamɛ bawewee nsiɛkɔ;kamata kafɔɔ Yuda sekpoo nwu nlalaa sintedi mmle di otii kuonwii dilaafuo ni osiɛ ninfa.”12Ɔmɛ otii niɛtɛ eebe anu alɛ aanu nle mmle kasɔ? Owe di SAATE nwu lediki kanya alɛ aafuo kasɔ odiki? Obe oso di kasɔ nwu lɛwɔɔ kɛlalaa kate kafɔɔ fɛle ɔfaafuu wɔ di otii kuonwii dilaafuo ni ɔwaalɛ ofe?13Ni di SAATE nwu labuɛ alɛ, “Diekye batoosĩ kufiofa nii, nko layɔ latɛ ni di anu lɛma; baakyɔɔ mi atoko ee batikanko kufiofa nii.14Kafɔɔ, beetikanko situ lɛma nwu onunsie; beetikanko Baal, fɛ mmle di bate lɛma latuo ma nii.”15Nkpo oso, nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: “Nyu lo, kamata bati ba mmle nle alesaa ya ninkpe ni olo, man-nyi kafɔɔ ntu be di kɔfa kpile nsi nii.16Kamasamiisa ma nkpete di nnle be di mma ee bate lɛma ditatofo ni kamɛ, kamakusa ntikanko ma ku kapamii ninnaase di obe wɔ kamawɔɔsa ma nii.”
Yerusalem Batii Lafaa Baakaalɛ Lɛkyakaako
17Nnya ɔlaa wɔ di SAATE wɔ Ninlenke ni kobuɛ ni alɛ:“Bibu nwu binyu nunua! Bilɛɛ basanko nwu nikowi ni osie kanya biwako;bikpee baalɛɛ mba niɛtɛ baye ni owi kamɛ nwaa bawako.18Bita ma bawa walabaabawi osie kanya di suoto loodilaase di obe wɔ di anumbi loo kamawi ni nnumɛɛ blɔblɔblɔdi ntu kafɔɔ kamasoo ninkye ni sinumpoo loo.19Boonu kaku kudu nwu kanya mankyeko Sion alɛ:‘Nkpo butɔɔwɔɔ nɛ!Nkpo di sinunsɔ loo lemuɔ nɛ!Dikpeni buodie di kasɔ loodiekye ayo loo ntoobibiɛ ate kaasɔ.’ ”20Oo basanko, kanunua yi, binu SAATE nwu ɔlaa;bitikiti atoko lee bita kanya nɔɔ kamɛ sɛlaa.Bituo babisankobi lee mmle manwi ni osie kanya;bietuo kafɔɔ bawo lee okunu.21Kukpi ntɔɔkata kuofe di basafle loo kamɛni kutoobuo kuɔwa di akayo loo kamɛ nɛ;kutoolo babisɔ loo eediki di akpaka,eelo kafɔɔ bakosopo eediki di okpoo bawo nlɛɛkɔ.22Buɛ falɛ, “Nnya ɔlaa wɔ di SAATE nwu kobuɛ ni alɛ:“ ‘Batii nwu bakpi kamatefɛle aku di afe kamɛ,fɛle sɛmɔɔbuu di fiɛlɛtɛ sɛmaa,di kuonwii nnaa aasiisa sĩ nii.’ ”23Nnya ɔlaa wɔ di SAATE nwu kobuɛ ni alɛ:“Numbentɛ atankanta di ninumbe nɔɔ suotoee sientɛ akanta di osie nɔɔ suotoee asaawɛntɛ akanta di lɛsaawɛ nɔɔ suoto,24kafɔɔ otii wɔ ninkanta ni, akanta di nle mmle suoto:alɛ aanu kasɔ antofo mi,alɛ ami ninle SAATE nwu, nnwɔ nimbla ni sifutulɛ,ninka ni lɛka biene, ambla ni ɔsaabla tinini kaasɔ suoto,diekye n-ya mmle ninta suoto n-yɔɔ mi nɛ,”SAATE nwu niebuɛ.25SAATE nwu niebuɛ alɛ, “Nyu lo, obe kɔwa, kamananfi ni batii ba bamuu niɛkyɛlɛnsa ni suoto di suoto sina lete kamɛ kootoko-26Egipte, Yuda, Moab ku mba bamuu ninsi ni di ɔfaafuu kamɛ di aba ya niekyo nii. Diekye nwaako nnle be mmle nwu mmuu diɛkyɛnlɛsa suoto, bia Israel batii bamuu diɛkyɛlɛnsa suoto di situ lɛma kamɛ.”The Seed Company