BAKA 225
Yerusalem Kanɔɔ
1Nioso di lɛlɛɛ naasinle kamɛ di Sedekia sɛka ole kamɛ, di kɔwɛntɛ fosile dii fosile suoto, Babel ɔka Nebukadnesar lataka di Yerusalem suoto manko bakpɛtɛ nɔɔ bamuu. Aabla kasiɛkɔ di okpoo kplɛ nwu ɔlɔɔkɔ, ni baatofo oyoyiɛ baakyisa nwu nɛ.2Baamana okpoo kplɛ nwu baakyi dialaadu Ɔka Sedekia sɛka ole lefosi lɛlɛɛ ninwii kamɛ.3Di kɔwɛntɛ naafa dii naasinle suoto, kɔka kanya latɛ kuawɛ osie di okpoo kplɛ nwu alɛ alesaa kuanwii ditawɛ di batii nwu kale nii.4Ninfɛ baabiɛ okpoo kplɛ nwu oyoyiɛ, ni di bakpɛtɛ bamuu latoso ku kakyɛ nwu baafe di eyoyiɛ nwu ɛnyɔ obo di kayoko ka ninkaako ni ɔka kɔba, nu di Babel batii lamana okpoo kplɛ nwu baakyi. Baatoso baafe di Araba,5kafɔɔ Babel batii bakpɛtɛ latikanko ɔka Sedekia baalaamufũ nwɔ di Yeriko ɔtaata. Bakpɛtɛ nɔɔ bamuu labla di suoto nɔɔ baasamii,6ni baamufũ nwɔ nɛ. Ni baakpaa nwɔ baasifiko Babel ɔka nfũ di Ribla, nfa di Nebukadnesar lalo nwɔ lɛpɔɔ nɛ.7Ni baalo Sedekia babisuɔtɔbi di anu nɔɔ. Ninfɛ baabiɛ nwɔ anu, baakpee nwɔ abɔɔsaa sɛɛle anyɛnɛ, baakpaa nwɔ baasifiko Babel nɛ.Baalalaasa SAATE Nwu Olekatakɔ
8Di kɔwɛntɛ nɔɔnle dii kuɛsinle, di Babel ɔka Nebukadnesar sɛka ole lɛfosi lɛlɛɛ naasinle kamɛ yi, Nebusaradan wɔ niale ni mba ninnyu ni ɔka kakpɛ kanyayilatɛ, aale ni Babel ɔka onɔɔfotii onwii lawa Yerusalem.9Ni aakpee ɔtɔ di SAATE nwu olekatakɔ, lɛkayo ku ayo ya amuu di Yerusalem nɛ. Aafiɛ leyo finle biala aatɛ kaasɔ.10Babel batii bakpɛtɛ bamuu di ɔka kakpɛ kanyayilatɛ kalɔ labibiɛ oyoyiɛ wɔ niayila kuakyi ni Yerusalem.11Ni di Nebusaradan, banyuntɛ nwu kanyayilatɛ lakpaa batii ba niabu ni di okpoo kplɛ nwu ku babule ba niasiɛ ni ninfa ku mba niasifi ni di Babel ɔka nfũ aasifiko sɛlanle kamɛ nɛ.12Kafɔɔ kakpɛ kanyayilatɛ nwu ladiɛ batii ba di dipii latɛ diaklee ni di kasɔ nwu suoto alɛ bakpɛ afe ku nta awosobi afe.13Babel batii labibiɛ abɔɔsaa sɛɛle akpaka ku atikasaa ya mankyisa ni ku abɔɔsaa sɛɛle Lekpo babɛɛsi ba niawɛ ni di SAATE nwu olekatakɔ kamɛ, ni baayɔ abɔɔsaa nwu baasifiko Babel nɛ.14Baayɔ kafɔɔ abukii, basoofi, kandiɛ sikũ ayiensasaa, nsɛfɛ ku abɔɔsaa asaa ya amuu baayɔ baatɔɔblako ni ɔkpɛ di olekatakɔ nwu kamɛ.15Ɔka banyuntɛ nwu kakpɛ kanyayilatɛ layɔ olufui afiɛsaa ku babɛɛsi- asaa ya amuu baayɔ koto sɛɛle nwaa ee koto fututu nwaa baabla ni aasifiko.16Abɔɔsaa akpaka nwu anyɔ, Lɛkpo bɛɛsi, ku atikasaa ya mankyisa ni ya di Solomon labla aata ni SAATE nwu olekatakɔ lasii onutũ ɔwɛ baakadi nii.17Osi ditikasaa di lɛkpaka biala suoto lɛtaka labla nkpaa afosi-anyɔ-nkuɛnsĩ. Abɔɔsaa sanale di lɛkpaka ninwii osi lɛtaka labla nkpaa nna ku kakuu. Ni aabla abɔɔsaa awosobi ya ninte ni fɛle goowa aalososaa aatika aakyisa nimuu nɛ. Akpaka bule ku aalososaa nwu okle late fɛ nnya nkpo.Baakpaa Yuda Batii Baasifiko Babel
18Banyuntɛ nwu kakpɛ kanyayilatɛ nwu lamufũ oletatɛ-nɔɔfo Seraia ku Sefania, oletatɛ wɔ niatikanko nwɔ ni ku kayoko banyuntɛ batiɛ aalaatɛ di leyo kantenkɔ.19Di mba niakple baawɛ ni di okpoo kplɛ nwu kamɛ yi, aakpaa ɔnɔɔfotii wɔ niayila ni di bakpɛtɛ kanya ku mba ninkakatɛ manta ni ɔka banɔɔ aasifiko. Aakpaa kafɔɔ kukũ kpanatɛ wɔ niale ni ɔnɔɔfotii-nɔɔfo wɔ niayila ni kaanya aatoofũ ni kasɔ nwu batii di bakpɛtɛ kamɛ ku bakpɛtɛ nɔɔ afosi-akuɔ ba baanya ni di okpoo kplɛ nwu kamɛ.20Ni di kanyayilatɛ Nebusaradan lakpaa bamuu lɛma aawako Babel ɔka di Ribla nɛ.21Ninfɛ di ɔka lata baalo ma di Ribla, di Hamat kasɔ suoto nɛ.Nioso baakpaa Yuda baadieko di kasɔ nɔɔ baasifiko sɛlanle kamɛ.
Gedalia Labale Abaa Kanyayilatɛ Di Yuda
22Ni di Babel ɔka Nebukadnesar ladiki Safan obisuɔtɔbi, Ahikam obisuɔtɔbi, Gedalia alɛ ayila di batii ba aadiɛ aatɛ ni di Yuda kanya nɛ.23Obe wɔ di bakpɛtɛ banɔɔfotii ku bakpɛtɛ lɛma lanu alɛ Babel ɔka ntoodiki Gedalia eese ni fɛ abaa kanyayilatɛ yi, ni baawa Gedalia nfũ di Mispa nɛ. Mma niale Netania obisuɔtɔbi, Ismael, Karea obisuɔtɔbi, Yohanan, Tanhumet, Netofa otii nwu obisuɔtɔbi Seraia, Maakat otii nwu obisuɔtɔbi Yaasania, ku bakpɛtɛ lɛma nɛ.24Ni di Gedalia laka ntam aata ma ku bakpɛtɛ lɛma alɛ, “Bitanyɛkɛ Babel banɔɔfotii nwu, bisiɛ di kasɔ nwu, biesumu Babel ɔka nwu, ni dibalɛ ninta ye.”25Kafɔɔ di kɔwɛntɛ kuɛnsinle kamɛ, Elisama obisuɔtɔbi, Netania obisuɔtɔbi, Ismael wɔ niakye ni ɔka leyo kamɛ lawa ku basuɔtɔ lefosi baabalo Gedalia ku Yuda batii ku Babel batii ba niawɛ ni di ɔkyɛ nɔɔ di Mispa.26Ta nle mmle oso, batii nwu bamuu, diayɔ ni di obisɔ dialaase ni di ɔnɔɔfo, di bakpɛtɛ banɔɔfotii nwu lakyaakaa ni latoso baasifi Egipte, ta baatɔɔyɛkɛ ni Babel batii oso.Baadiki Yehoiakin Di Leyo Katenkɔ
27Di alɛɛ afosi-atiɛ-dikuɛsinle kamɛ di Yuda ɔka Yehoiakin lasiɛ ni di bafɔɔ kale, di Ewil-Merodak labale ni Babel ɔka yi, ni aadiki Yehoiakin di leyo katenkɔ di lefosi kɔwɛntɛ nyɔɔfa, afosi-anyɔ dii dikuɛsinle suoto nɛ.28Ewil-Merodak lakakatɛko nwɔ buɛɛ, ni aatɔɔ dibu kasiɛkɔ ka niataka katoo kaalenkee ni baka ba niawɛ ni di ɔkyɛ nɔɔ di Babel nɛ.29Nioso Yehoiakin ladiki leyo katenkɔ aakpeele nɔɔ aatɛ, ni di obe lele di nkpa nɔɔ mmuu kamɛ, aatoole alesaa di ɔka opunu suoto nɛ.30Dii biala ɔka latɔɔta Yehoiakin koto di obe wɔ akpe ni nkpa.The Seed Company