𐴘𐴡𐴇𐴝𐴥𐴕𐴧𐴝18
𐴀𐴞𐴏𐴝𐴤𐴌 𐴒𐴠𐴌𐴠𐴉𐴃𐴝𐴌𐴞
1𐴀𐴞𐴏𐴝𐴤𐴘𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴈𐴡𐴀𐴘𐴢 𐴁𐴝𐴦𐴊𐴠, 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴓𐴡𐴦𐴘𐴢 𐴑𐴞𐴥𐴊𐴌𐴡𐴕 𐴎𐴟𐴥𐴌𐴝 𐴉𐴝𐴌𐴝𐴤𐴘 𐴀𐴡𐴑𐴟𐴓𐴠 𐴒𐴞𐴦𐴘𐴠𐴥. 𐴇𐴠𐴥𐴍𐴠 𐴀𐴠𐴑𐴧𐴝𐴥𐴕 𐴁𐴝𐴒𐴝𐴕 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴥𐴁𐴝 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴇𐴞𐴥𐴘𐴝𐴕𐴡𐴃𐴢 𐴒𐴡𐴥𐴙𐴓𐴧𐴠.2𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴊𐴞𐴘𐴠 𐴊𐴠 𐴘𐴡𐴇𐴟𐴥𐴊𐴝𐴘𐴠 𐴘𐴡𐴥 𐴇𐴠𐴥 𐴎𐴝𐴒𐴝 𐴒𐴝𐴥𐴕 𐴎𐴝𐴙𐴕𐴃𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴏𐴝𐴤 𐴀𐴠𐴒𐴝𐴎𐴝𐴥-𐴀𐴠𐴒𐴝𐴎𐴝𐴥 𐴇𐴠𐴥𐴍𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕 𐴓𐴡𐴥𐴘 𐴔𐴞𐴓𐴞𐴃𐴡𐴥.3𐴇𐴠𐴥𐴃𐴡𐴓𐴧𐴝 𐴘𐴡𐴇𐴟𐴥𐴊𐴝𐴘𐴠 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴑 𐴊𐴡𐴓𐴢 𐴌𐴡𐴔𐴞 𐴉𐴡𐴥𐴗𐴏𐴢 𐴀𐴠𐴊𐴧𐴠 𐴇𐴡𐴊𐴟𐴥𐴕 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢 𐴉𐴝𐴥𐴕𐴡𐴐𐴢, 𐴀𐴟𐴎𐴝𐴓𐴢, 𐴀𐴠𐴊𐴧𐴠 𐴀𐴝𐴥𐴃𐴞𐴘𐴝𐴌 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥.4𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴎𐴞𐴀𐴕 𐴀𐴡𐴥𐴘𐴁𐴡 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴎𐴝𐴕𐴠 𐴀𐴞𐴥𐴏𐴝𐴉𐴠, 𐴁𐴝𐴀𐴌𐴠 𐴕𐴠𐴦𐴓𐴞 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴇𐴝𐴌𐴠𐴤 𐴃𐴟𐴖𐴡𐴀𐴌 𐴊𐴠𐴥؟“5𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴞𐴏𐴝𐴤 𐴕𐴝𐴏𐴝𐴥𐴌𐴞 𐴌𐴠.“𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴀𐴞𐴥𐴁𐴝.“𐴀𐴞𐴥𐴁𐴝𐴌𐴠 𐴊𐴡𐴥𐴌𐴞𐴊𐴠𐴌 𐴊𐴠 𐴘𐴡𐴇𐴟𐴥𐴊𐴝 𐴘𐴡𐴥 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴞𐴥𐴘𐴝𐴘 𐴀𐴝𐴏𐴠𐴤.6𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴘𐴝𐴀𐴕 𐴈𐴡𐴘𐴧𐴠𐴥, ”𐴀𐴝𐴀𐴛 𐴀𐴞𐴥𐴁𐴝,“𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴉𐴞𐴏𐴧𐴝𐴥 𐴎𐴝𐴘 𐴔𐴠𐴍𐴞𐴃𐴢 𐴉𐴡𐴌𐴞𐴒𐴞𐴘𐴡𐴥𐴘.7𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴁𐴝𐴌 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴇𐴝𐴌𐴠𐴤 𐴃𐴟𐴖𐴡𐴀𐴌 𐴊𐴠𐴥؟“
𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴞𐴏𐴝𐴤 𐴕𐴝𐴏𐴝𐴥𐴌𐴞 𐴌𐴠.“8𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴀𐴞𐴥𐴁𐴝 𐴊𐴠 𐴇𐴞𐴥𐴘𐴝𐴕 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴘𐴉𐴠𐴓𐴝𐴘𐴧𐴞. 𐴇𐴠𐴥𐴃𐴡𐴓𐴧𐴝 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴃𐴟𐴖𐴡𐴀𐴌 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴀𐴞𐴃𐴝𐴌𐴝𐴤 𐴎𐴡𐴒𐴧𐴡𐴥𐴘.“9𐴇𐴞𐴥𐴘𐴝𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴀𐴞𐴥𐴁𐴝𐴘𐴠 𐴈𐴡𐴀𐴙𐴓𐴢 𐴊𐴠 𐴀𐴠 𐴈𐴡𐴃𐴝𐴤 𐴉𐴟𐴌𐴝 𐴀𐴡𐴥, ”𐴎𐴠𐴃𐴝𐴌𐴝𐴤𐴌𐴠 𐴃𐴟𐴀𐴛 𐴀𐴝𐴣𐴀𐴌 𐴀𐴝𐴥𐴃𐴡𐴃𐴢 𐴊𐴞𐴦𐴘𐴡𐴥, 𐴀𐴝𐴀𐴛 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕𐴡𐴌𐴠 𐴀𐴟𐴥𐴊𐴧𐴗𐴝 𐴕𐴡𐴥 𐴀𐴝𐴥𐴣𐴎𐴝𐴘.“ 10𐴏𐴝𐴥𐴘𐴔𐴡𐴕 𐴉𐴞𐴃𐴡𐴌𐴡𐴃𐴧𐴟 𐴀𐴠𐴑𐴧𐴝𐴥𐴕 𐴃𐴡𐴓𐴟𐴖𐴝𐴌 𐴀𐴝𐴐𐴧𐴞𐴥𐴓𐴢 𐴀𐴞𐴥𐴏𐴝𐴉𐴠, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴘𐴝𐴕 𐴕𐴠𐴦𐴓𐴝𐴘 𐴁𐴡𐴌𐴡 𐴀𐴞𐴔𐴝𐴔𐴡𐴌 𐴒𐴟𐴓𐴝𐴔𐴡𐴌 𐴖𐴡𐴌𐴠 𐴏𐴡𐴓𐴝𐴘 𐴀𐴞𐴥𐴃𐴝𐴌 𐴊𐴠𐴕 𐴋𐴝𐴥𐴑𐴡𐴌 𐴈𐴝𐴕 𐴕𐴝𐴥𐴕 𐴈𐴝𐴍𐴞𐴉𐴠𐴥𐴓𐴝𐴘𐴧𐴠. 𐴇𐴠𐴥 𐴒𐴟𐴓𐴝𐴔𐴧𐴗𐴝𐴌 𐴕𐴝𐴔 𐴔𐴝𐴓𐴑𐴟𐴏𐴢.11𐴇𐴠𐴥𐴃𐴡𐴓𐴧𐴝 𐴀𐴞𐴏𐴝𐴤𐴘𐴠 𐴉𐴞𐴃𐴡𐴌𐴡𐴌𐴠 𐴈𐴡𐴀𐴌 𐴊𐴠, ”𐴃𐴡𐴓𐴟𐴖𐴝𐴌 𐴋𐴝𐴉𐴡𐴃𐴢 𐴒𐴡𐴥𐴓𐴝𐴘 𐴀𐴠𐴌. 𐴎𐴠 𐴉𐴞𐴘𐴝𐴓𐴝 𐴁𐴝𐴉𐴠 𐴀𐴝𐴣𐴀𐴌𐴠𐴥 𐴊𐴞𐴦𐴘𐴠𐴥, 𐴀𐴝𐴀𐴛 𐴇𐴠𐴥 𐴉𐴞𐴘𐴝𐴓𐴝 𐴕𐴡 𐴉𐴞𐴀𐴃𐴝𐴔 𐴕𐴠𐴥؟“
𐴁𐴡𐴌𐴡 𐴀𐴞𐴔𐴝𐴔𐴡𐴌 𐴔𐴟𐴀𐴕𐴃𐴟 𐴀𐴞𐴏𐴝𐴤
12𐴃𐴡𐴥𐴘 𐴇𐴠𐴥 𐴉𐴡𐴥𐴗𐴏𐴢 𐴏𐴟𐴕𐴠𐴥, 𐴀𐴞𐴥𐴃𐴝𐴌𐴝𐴌 𐴎𐴡𐴕𐴧𐴝𐴓𐴠, 𐴀𐴠𐴊𐴧𐴠 𐴘𐴡𐴇𐴟𐴥𐴊𐴞𐴌 𐴉𐴝𐴀𐴌𐴝𐴊𐴝𐴌 𐴒𐴟𐴥𐴕𐴠 𐴀𐴞𐴏𐴝𐴤𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥 𐴁𐴝𐴣𐴊𐴞𐴥𐴉𐴠𐴓𐴝𐴘𐴧𐴠.13𐴁𐴝𐴦𐴊𐴠 𐴀𐴞𐴥𐴁𐴝𐴌𐴠 𐴀𐴝𐴒𐴠 𐴇𐴝𐴥𐴕𐴝𐴕𐴡𐴌 𐴇𐴠𐴥𐴍𐴠 𐴓𐴡𐴘𐴒𐴞𐴘𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠 𐴑𐴝𐴥𐴘𐴧𐴝𐴉𐴝𐴏𐴢 𐴇𐴠𐴥 𐴁𐴡𐴏𐴡𐴥𐴌 𐴁𐴡𐴌𐴡 𐴀𐴞𐴔𐴝𐴔 𐴀𐴝𐴐𐴧𐴞𐴥𐴓𐴢, 𐴘𐴡𐴥𐴒𐴧𐴗𐴝𐴌 𐴈𐴡𐴥𐴗𐴀𐴌 𐴀𐴡𐴥𐴙𐴓𐴊𐴠 𐴇𐴝𐴥𐴕𐴝𐴕.14𐴇𐴠𐴥 𐴑𐴝𐴥𐴘𐴧𐴝𐴉𐴝𐴏𐴢 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤 𐴎𐴠𐴦𐴕𐴞𐴑𐴞 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴔𐴡𐴐𐴖𐴝𐴌𐴝 𐴊𐴞𐴀𐴓𐴢 𐴊𐴠, 𐴁𐴠𐴀𐴃𐴡𐴌 𐴀𐴡𐴥𐴙𐴓𐴊𐴠 𐴉𐴟𐴌𐴝 𐴑𐴡𐴗𐴔𐴡𐴓𐴧𐴝 𐴀𐴠𐴑𐴎𐴡𐴕 𐴔𐴝𐴕𐴟𐴥𐴙𐴐𐴢 𐴔𐴡𐴌𐴡𐴕.𐴀𐴞𐴏𐴝𐴤𐴌𐴠 𐴉𐴞𐴃𐴡𐴌𐴡𐴌 𐴀𐴞𐴕𐴑𐴝𐴌
15𐴏𐴝𐴥𐴘𐴔𐴡𐴕 𐴉𐴞𐴃𐴡𐴌 𐴀𐴠𐴊𐴧𐴠 𐴀𐴝𐴌 𐴀𐴠𐴎𐴧𐴡𐴕 𐴐𐴝𐴥𐴌𐴞𐴃𐴢 𐴀𐴞𐴏𐴝𐴤𐴌 𐴑𐴟𐴌𐴠-𐴑𐴟𐴌𐴠 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢. 𐴇𐴠𐴥 𐴐𐴝𐴥𐴌𐴞𐴃𐴧𐴗𐴝𐴌𐴠 𐴁𐴡𐴌𐴡 𐴀𐴞𐴔𐴝𐴔𐴠 𐴏𐴞𐴕𐴞𐴥𐴃𐴡 𐴀𐴞𐴥𐴏𐴝𐴉𐴠, 𐴘𐴡𐴥𐴒𐴧𐴗𐴝 𐴀𐴞𐴏𐴝𐴤𐴌 𐴉𐴟𐴣𐴊𐴠-𐴉𐴟𐴣𐴊𐴠 𐴁𐴡𐴌𐴡 𐴀𐴞𐴔𐴝𐴔𐴡𐴌 𐴀𐴟𐴍𐴝𐴥𐴕𐴡𐴃𐴢 𐴒𐴡𐴥𐴙𐴓𐴧𐴠𐴒𐴡𐴘,16𐴓𐴠𐴑𐴞𐴕 𐴉𐴞𐴃𐴡𐴌 𐴁𐴝𐴀𐴌𐴠 𐴊𐴟𐴖𐴝𐴌𐴡𐴃𐴢 𐴃𐴞𐴥𐴘𐴝𐴘 𐴃𐴝𐴥𐴙𐴑𐴧𐴞𐴓𐴢. 𐴇𐴠𐴥𐴃𐴡𐴓𐴧𐴝 𐴎𐴠 𐴐𐴝𐴥𐴌𐴞𐴃𐴧𐴗𐴝𐴌𐴠 𐴁𐴡𐴌𐴡 𐴀𐴞𐴔𐴝𐴔𐴠 𐴏𐴞𐴕𐴞𐴥𐴃𐴡, 𐴘𐴡𐴥𐴒𐴧𐴗𐴝𐴘𐴠 𐴁𐴝𐴀𐴌𐴠 𐴕𐴠𐴦𐴓𐴞 𐴊𐴟𐴖𐴝𐴌 𐴏𐴡𐴦𐴛𐴊𐴝𐴌𐴒𐴗𐴝𐴥𐴌𐴠 𐴈𐴡𐴀𐴘𐴢 𐴉𐴞𐴃𐴡𐴌𐴡𐴌𐴠 𐴁𐴟𐴥𐴃𐴡𐴌𐴠 𐴀𐴝𐴙𐴕𐴧𐴠𐴤.17𐴊𐴟𐴖𐴝𐴌 𐴏𐴡𐴦𐴛𐴊𐴝𐴌 𐴁𐴝𐴣𐴊𐴞 𐴔𐴝𐴘𐴝𐴉𐴟𐴖𐴝 𐴖𐴝𐴘𐴠 𐴉𐴞𐴃𐴡𐴌𐴡𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴘𐴡𐴥 𐴇𐴡𐴥𐴕𐴡 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴐𐴝𐴥𐴌𐴞𐴃𐴡𐴃𐴧𐴟 𐴕𐴠𐴥؟“𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴕𐴡.“18𐴇𐴠𐴥𐴣𐴃𐴧𐴠 𐴐𐴞𐴥𐴃𐴑𐴝𐴓𐴢 𐴊𐴠 𐴇𐴠𐴥𐴃𐴡𐴓𐴧𐴝 𐴒𐴟𐴓𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴉𐴝𐴀𐴌𐴝𐴊𐴝𐴌 𐴀𐴡𐴥𐴑𐴧𐴡𐴓𐴠 𐴀𐴝𐴦𐴣𐴌𐴝 𐴓𐴡𐴘 𐴀𐴡𐴦𐴙𐴕 𐴊𐴡𐴥𐴌𐴝𐴘 𐴀𐴞𐴥𐴣𐴘𐴡𐴃𐴢 𐴃𐴞𐴥𐴘𐴝𐴘 𐴀𐴡𐴦𐴙𐴕 𐴉𐴟𐴖𐴝𐴥𐴃𐴢 𐴀𐴝𐴐𐴧𐴞𐴥𐴓𐴢; 𐴀𐴝𐴦𐴌 𐴉𐴞𐴃𐴡𐴌 𐴕𐴞𐴎𐴠 𐴘𐴡𐴥 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴞𐴥𐴘𐴝𐴘 𐴀𐴡𐴦𐴙𐴕 𐴉𐴟𐴖𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.
𐴋𐴡𐴣𐴀𐴌 𐴀𐴞𐴔𐴝𐴔𐴠 𐴀𐴞𐴏𐴝𐴤𐴌𐴠 𐴎𐴠𐴌𐴝𐴥 𐴒𐴡𐴙𐴅𐴧𐴠𐴥
19𐴇𐴠𐴥𐴣𐴃𐴧𐴠 𐴁𐴡𐴌𐴡 𐴀𐴞𐴔𐴝𐴔𐴠 𐴀𐴞𐴏𐴝𐴤𐴃𐴧𐴟 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴃𐴝𐴦𐴓𐴞𐴔𐴡𐴌 𐴁𐴝𐴦𐴁𐴟𐴃𐴠 𐴏𐴟𐴥𐴖𐴝𐴓𐴢 𐴒𐴡𐴌𐴠𐴥𐴌.20𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴊𐴟𐴕𐴞𐴘𐴝𐴙𐴌 𐴇𐴝𐴣𐴏𐴠 𐴑𐴟𐴥𐴓𐴝𐴔𐴠𐴓𐴝 𐴒𐴡𐴥𐴌𐴞 𐴈𐴡𐴃𐴝𐴤 𐴈𐴡𐴘𐴧𐴞𐴥. 𐴀𐴝𐴀𐴛 𐴇𐴝𐴥𐴔𐴞𐴐𐴝 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴠𐴊𐴧𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴎𐴠𐴍𐴠𐴥 𐴃𐴝𐴔𐴝𐴥𐴔 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴎𐴡𐴔𐴝 𐴀𐴡𐴥 𐴇𐴠𐴥𐴍𐴠 𐴃𐴝𐴦𐴓𐴞𐴔 𐴊𐴞𐴘𐴞𐴥, 𐴀𐴝𐴦𐴌 𐴀𐴝𐴀𐴛 𐴃𐴡 𐴓𐴟𐴑𐴝𐴘 𐴑𐴠𐴏𐴧𐴟𐴥 𐴈𐴡𐴘𐴧𐴞𐴥 𐴊𐴠 𐴕𐴝𐴥𐴘.21𐴃𐴟𐴀𐴛 𐴀𐴝𐴣𐴀𐴃𐴧𐴟 𐴑𐴞𐴘𐴝𐴥 𐴉𐴟𐴏𐴝𐴥𐴌 𐴒𐴡𐴌𐴡𐴤𐴌؟ 𐴉𐴟𐴥𐴙𐴕𐴧𐴠 𐴊𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴡𐴤𐴕𐴝 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌𐴠 𐴑𐴞𐴦 𐴈𐴡𐴘𐴧𐴞𐴥. 𐴁𐴠𐴐𐴡𐴥𐴑 𐴀𐴝𐴀𐴛 𐴎𐴞𐴀𐴕 𐴈𐴡𐴘𐴧𐴞𐴥 𐴇𐴞𐴥𐴀𐴕 𐴀𐴞𐴥𐴃𐴝𐴌𐴝 𐴎𐴝𐴕𐴠.“22𐴀𐴞𐴏𐴝𐴤𐴘𐴠 𐴇𐴞𐴥𐴀𐴕 𐴈𐴡𐴘𐴧𐴠𐴥 𐴌𐴝𐴥𐴌, 𐴇𐴠𐴥𐴍𐴠 𐴋𐴝𐴥𐴑𐴠 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢 𐴊𐴠 𐴉𐴝𐴀𐴌𐴝𐴊𐴝𐴌𐴡𐴃𐴧𐴟 𐴀𐴠𐴎𐴧𐴡𐴕𐴠 𐴀𐴞𐴥𐴁𐴝𐴌𐴠 𐴏𐴟𐴖𐴝𐴌 𐴔𐴝𐴌𐴞 𐴈𐴡𐴀𐴌 𐴊𐴠, ”𐴁𐴡𐴌𐴡 𐴀𐴞𐴔𐴝𐴔𐴡𐴌𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴎𐴟𐴖𐴝𐴁𐴢 𐴊𐴠𐴊𐴠 𐴕𐴞𐴑𐴞؟“23𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴎𐴡𐴊𐴞 𐴀𐴝𐴀𐴛 𐴇𐴡𐴕𐴡𐴤 𐴒𐴡𐴓𐴧𐴡𐴃𐴢 𐴈𐴡𐴘𐴧𐴞𐴥 𐴊𐴠 𐴀𐴡𐴥𐴘𐴓𐴠, 𐴒𐴡𐴓𐴧𐴡𐴃𐴢 𐴇𐴞𐴥𐴘𐴝𐴕 𐴊𐴝𐴈𐴝𐴤𐴘𐴊𐴠; 𐴔𐴡𐴕𐴃𐴡𐴌 𐴎𐴡𐴊𐴞 𐴏𐴡𐴥𐴘𐴧𐴞 𐴈𐴡𐴘𐴧𐴞𐴥 𐴊𐴠 𐴀𐴡𐴥𐴘𐴓𐴠, 𐴀𐴝𐴣𐴀𐴌𐴠𐴥 𐴔𐴝𐴌𐴡𐴥𐴌 𐴑𐴞𐴘𐴝𐴥؟“24𐴁𐴝𐴦𐴊𐴠 𐴇𐴝𐴥𐴕𐴝𐴕𐴠 𐴀𐴞𐴏𐴝𐴤𐴌𐴠 𐴁𐴝𐴙𐴕𐴊𐴝𐴤 𐴇𐴝𐴥𐴓𐴡𐴃𐴠, 𐴁𐴡𐴌𐴡 𐴀𐴞𐴔𐴝𐴔 𐴑𐴝𐴥𐴘𐴧𐴝𐴉𐴝𐴏𐴡𐴌 𐴇𐴠𐴥𐴍𐴠 𐴊𐴞𐴉𐴠𐴍𐴝𐴥𐴘𐴊𐴞𐴘𐴠.𐴉𐴞𐴃𐴡𐴌𐴠 𐴀𐴝𐴁𐴝𐴌 𐴀𐴞𐴕𐴑𐴝𐴌 𐴒𐴡𐴙𐴅𐴧𐴠𐴥
25𐴏𐴝𐴥𐴘𐴔𐴡𐴕 𐴉𐴞𐴃𐴡𐴌 𐴀𐴝𐴙𐴅𐴧𐴡𐴤 𐴉𐴡𐴙𐴅𐴧𐴡𐴕𐴃𐴡 𐴃𐴞𐴥𐴘𐴝𐴘 𐴀𐴡𐴦𐴙𐴕 𐴉𐴟𐴖𐴝𐴥𐴃𐴢 𐴀𐴝𐴐𐴧𐴞𐴥𐴓𐴢. 𐴔𐴝𐴙𐴕𐴐𐴠𐴥 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴘𐴡𐴥 𐴇𐴡𐴥𐴕𐴡 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴡𐴌 𐴁𐴟𐴥𐴃𐴡𐴃𐴧𐴟 𐴕𐴠𐴥؟“𐴘𐴡𐴥𐴒𐴧𐴗𐴝𐴘𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴀𐴝𐴀𐴛 𐴕𐴡.“26𐴁𐴡𐴌𐴡 𐴀𐴞𐴔𐴝𐴔𐴡𐴌 𐴒𐴟𐴓𐴝𐴔𐴡𐴃𐴧𐴟 𐴀𐴠𐴎𐴧𐴡𐴕 𐴎𐴠𐴦𐴕𐴞𐴑𐴞 𐴉𐴞𐴃𐴡𐴌𐴠 𐴈𐴝𐴕 𐴈𐴝𐴍𐴞𐴉𐴠𐴓𐴝𐴙𐴓𐴢 𐴊𐴠 𐴀𐴞𐴥𐴃𐴝𐴌 𐴀𐴠𐴒𐴝𐴕𐴝, 𐴀𐴞𐴥𐴃𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴡𐴌𐴠𐴥 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴁𐴝𐴒𐴝𐴕𐴡𐴃𐴢 𐴕𐴡𐴥 𐴊𐴠𐴑𐴞𐴥 𐴕𐴞𐴑𐴞؟“27𐴉𐴞𐴃𐴡𐴌𐴠 𐴀𐴝𐴁𐴝𐴌 𐴀𐴞𐴕𐴑𐴝𐴌 𐴒𐴡𐴙𐴅𐴧𐴞𐴥𐴓𐴢; 𐴀𐴝𐴦𐴌 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴌𐴝𐴃𐴝𐴑𐴟𐴌𐴝𐴤 𐴁𐴝𐴑 𐴊𐴞𐴘𐴠𐴥.
𐴉𐴞𐴓𐴝𐴃𐴡𐴌 𐴔𐴟𐴀𐴕𐴃𐴟 𐴀𐴞𐴏𐴝𐴤
28𐴘𐴝𐴥𐴌𐴁𐴝𐴦𐴊𐴠 𐴘𐴡𐴇𐴟𐴥𐴊𐴞𐴌 𐴕𐴠𐴃𐴝 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴑𐴝𐴥𐴘𐴧𐴝𐴉𐴝𐴏𐴡𐴌 𐴈𐴠𐴥𐴕𐴃𐴟 𐴌𐴡𐴔𐴞 𐴌𐴝𐴎𐴔𐴡𐴇𐴡𐴥𐴓𐴡𐴃𐴢 𐴓𐴡𐴘𐴒𐴞𐴘𐴠𐴥, 𐴇𐴠𐴥𐴣𐴃𐴧𐴠 𐴁𐴞𐴀𐴕𐴧𐴝 𐴏𐴡𐴥𐴀𐴌𐴠 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴕𐴞𐴎𐴠 𐴇𐴠𐴥 𐴔𐴡𐴇𐴡𐴥𐴓𐴡𐴃𐴢 𐴕𐴡𐴥 𐴒𐴡𐴥𐴓𐴠, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴕𐴝𐴉𐴝𐴑 𐴀𐴡𐴥𐴘 𐴕𐴡 𐴎𐴝𐴒𐴡𐴥𐴘, 𐴁𐴡𐴥𐴓𐴑𐴠 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴈𐴝𐴥𐴕𐴝 𐴇𐴝𐴥𐴘 𐴉𐴝𐴌𐴠.29𐴇𐴠𐴥𐴃𐴡𐴓𐴧𐴝 𐴉𐴞𐴓𐴝𐴃𐴢 𐴁𐴝𐴀𐴌𐴠 𐴕𐴠𐴦𐴓𐴞 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥 𐴀𐴝𐴦𐴌 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴀𐴟𐴓𐴋𐴝 𐴑𐴞𐴦 𐴈𐴡𐴏𐴟𐴥𐴌𐴞 𐴀𐴝𐴙𐴕𐴧𐴡𐴤 𐴊𐴠𐴥؟“30𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴀𐴞𐴥𐴁𐴝 𐴀𐴝𐴐𐴝𐴥𐴔𐴞 𐴕𐴡 𐴀𐴡𐴥𐴘𐴃𐴡, 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌𐴠 𐴃𐴟𐴣𐴀𐴝𐴥𐴣𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘 𐴕𐴡 𐴊𐴞𐴃𐴝𐴔.“31𐴉𐴞𐴓𐴝𐴃𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌𐴠 𐴓𐴡𐴘𐴎𐴝𐴘 𐴃𐴟𐴣𐴀𐴝𐴥𐴌𐴝𐴌 𐴐𐴡𐴥𐴌𐴞𐴘𐴡𐴃𐴢 𐴔𐴡𐴎𐴞𐴕 𐴁𐴞𐴏𐴝𐴌 𐴒𐴡𐴌𐴡𐴤𐴒𐴡𐴘.“𐴇𐴠𐴥 𐴘𐴡𐴇𐴟𐴥𐴊𐴞 𐴒𐴟𐴥𐴕𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴃𐴧𐴟 𐴇𐴡𐴕𐴡𐴤𐴑𐴞𐴘𐴡𐴌𐴠 𐴎𐴝𐴕𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴀𐴠𐴎𐴝𐴎𐴡𐴃𐴢 𐴕𐴝𐴥𐴘.“32𐴇𐴞𐴥𐴘𐴝𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴀𐴞𐴏𐴝𐴤𐴌 𐴀𐴡 𐴈𐴡𐴃𐴝𐴤 𐴉𐴟𐴌𐴝 𐴀𐴡𐴥, 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴀𐴞𐴥𐴁𐴝 𐴇𐴡𐴕𐴊𐴞𐴓𐴧𐴝 𐴔𐴡𐴌𐴝 𐴔𐴡𐴌𐴞𐴁𐴡𐴥 𐴊𐴠 𐴇𐴞𐴥𐴘𐴝𐴕𐴡𐴌 𐴀𐴞𐴐𐴝𐴥𐴌𐴝𐴘𐴠 𐴈𐴡𐴀𐴙𐴓𐴢.33𐴃𐴝𐴌𐴉𐴡𐴌𐴠 𐴉𐴞𐴓𐴝𐴃𐴢 𐴀𐴝𐴁𐴝𐴌 𐴌𐴝𐴎𐴔𐴡𐴇𐴡𐴥𐴓𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴧𐴠, 𐴀𐴝𐴦𐴌 𐴀𐴞𐴏𐴝𐴤𐴌𐴠 𐴔𐴝𐴃𐴝𐴘 𐴈𐴡𐴀𐴌 𐴊𐴠, ”𐴃𐴟𐴀𐴛 𐴘𐴡𐴇𐴟𐴥𐴊𐴞𐴌 𐴁𐴝𐴀𐴣𐴐𐴧𐴝 𐴕𐴞𐴑𐴞؟“34𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴀𐴛 𐴈𐴡𐴃𐴝𐴤 𐴘𐴝𐴀𐴕 𐴕𐴞𐴎𐴡𐴌 𐴃𐴡𐴌𐴉𐴡𐴥𐴃𐴧𐴟 𐴈𐴡𐴀𐴌 𐴊𐴠 𐴕𐴠𐴥, 𐴕𐴝𐴥𐴑𐴞 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴣𐴌𐴠 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴈𐴡𐴘𐴧𐴠𐴥 𐴊𐴠𐴥؟“35𐴉𐴞𐴓𐴝𐴃𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴘𐴡𐴇𐴟𐴥𐴊𐴞 𐴕𐴞𐴥𐴑𐴞؟ 𐴃𐴟𐴣𐴀𐴝𐴥𐴣𐴌 𐴕𐴞𐴎𐴡𐴌 𐴑𐴡𐴗𐴔𐴠 𐴀𐴠𐴊𐴧𐴠 𐴋𐴡𐴣𐴀𐴌 𐴀𐴞𐴔𐴝𐴔 𐴔𐴟𐴥𐴕𐴠 𐴀𐴠𐴥𐴕𐴝 𐴃𐴟𐴣𐴀𐴝𐴥𐴣𐴌𐴠 𐴀𐴝𐴣𐴀𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴞𐴘𐴠. 𐴃𐴟𐴀𐴛 𐴑𐴞𐴦 𐴒𐴡𐴙𐴅𐴧𐴡𐴥 𐴊𐴠𐴥؟“36𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴣𐴀𐴌 𐴌𐴝𐴙𐴅𐴧𐴡 𐴀𐴠 𐴊𐴟𐴕𐴞𐴘𐴝𐴙𐴌 𐴕𐴡. 𐴎𐴡𐴊𐴞 𐴀𐴝𐴣𐴀𐴌 𐴌𐴝𐴙𐴅𐴧𐴡 𐴀𐴠 𐴊𐴟𐴕𐴞𐴘𐴝𐴙𐴌 𐴀𐴡𐴥𐴘𐴃𐴡, 𐴀𐴝𐴣𐴀𐴌 𐴒𐴟𐴓𐴝𐴔 𐴀𐴡𐴥𐴑𐴧𐴡𐴓𐴠 𐴔𐴝𐴌𐴝𐴔𐴝𐴌𐴞 𐴒𐴡𐴙𐴃𐴧𐴡𐴥, 𐴎𐴠𐴀𐴕𐴠 𐴀𐴝𐴣𐴀𐴌𐴠𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴞𐴘𐴝 𐴕𐴡 𐴎𐴝. 𐴔𐴡𐴕𐴃𐴡𐴌 𐴀𐴝𐴣𐴀𐴌 𐴌𐴝𐴙𐴅𐴧𐴡 𐴃𐴡 𐴀𐴠𐴍𐴞𐴥𐴘𐴝𐴌 𐴕𐴡.“37𐴇𐴞𐴥𐴘𐴝𐴕𐴡𐴓𐴧𐴝 𐴉𐴞𐴓𐴝𐴃𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴡𐴥𐴀𐴘𐴓𐴠 𐴃𐴟𐴀𐴛 𐴁𐴝𐴀𐴣𐴐𐴧𐴝 𐴕𐴞𐴥𐴑𐴞؟“ 𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴀𐴛 𐴏𐴡𐴥𐴘𐴧𐴞 𐴈𐴡𐴀𐴌, 𐴀𐴝𐴀𐴛 𐴁𐴝𐴀𐴣𐴐𐴧𐴝. 𐴀𐴝𐴕𐴞𐴤 𐴀𐴠𐴃𐴡𐴓𐴧𐴝𐴤 𐴎𐴡𐴌𐴔𐴡 𐴀𐴡𐴥𐴘𐴧𐴞 𐴀𐴝𐴦𐴌 𐴀𐴠𐴃𐴡𐴓𐴧𐴝𐴤 𐴊𐴟𐴕𐴞𐴘𐴝𐴙𐴃𐴢 𐴀𐴝𐴙𐴐𐴧𐴞𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥: 𐴏𐴡𐴥𐴘𐴧𐴞𐴌 𐴀𐴟𐴎𐴟 𐴒𐴡𐴁𐴝𐴤 𐴊𐴞𐴥 𐴁𐴡𐴓𐴧𐴝. 𐴎𐴠𐴦𐴕𐴞𐴑𐴞 𐴏𐴡𐴥𐴘𐴧𐴞𐴌, 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌 𐴈𐴡𐴃𐴝𐴤 𐴉𐴟𐴥𐴕𐴠.“38𐴉𐴞𐴓𐴝𐴃𐴠 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴏𐴡𐴥𐴘𐴧𐴞 𐴑𐴞𐴦؟“ 𐴀𐴞𐴏𐴝𐴤𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴇𐴡𐴥𐴑𐴟𐴔 (𐴔𐴡𐴃𐴢 27:15-31; 𐴔𐴝𐴑 15:6-20; 𐴓𐴟𐴑 23:13-25)
𐴇𐴞𐴥𐴘𐴝𐴕 𐴈𐴡𐴀𐴘𐴢 𐴁𐴝𐴦𐴊𐴠 𐴘𐴡𐴥𐴒𐴧𐴗𐴝 𐴀𐴝𐴁𐴝𐴌 𐴁𐴝𐴀𐴌𐴠 𐴕𐴠𐴦𐴓𐴞 𐴘𐴡𐴇𐴟𐴥𐴊𐴞 𐴒𐴟𐴥𐴕𐴡𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴀𐴞𐴥𐴁𐴝𐴃𐴧𐴟 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡 𐴉𐴝𐴙𐴌.39”𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝𐴃𐴧𐴟 𐴃𐴡 𐴀𐴠𐴑𐴧𐴝𐴥𐴕 𐴕𐴞𐴘𐴡𐴔 𐴀𐴝𐴏𐴠𐴤, 𐴑𐴞 𐴈𐴡𐴘𐴓𐴠𐴥, 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴀𐴡𐴑𐴃𐴡𐴥𐴃𐴢 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴇𐴡𐴕𐴡𐴤 𐴀𐴠𐴑 𐴇𐴡𐴊𐴞𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴝𐴌 𐴎𐴡𐴌𐴟𐴌. 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴝𐴣𐴀𐴌𐴠𐴥 𐴘𐴡𐴇𐴟𐴥𐴊𐴞𐴌 𐴁𐴝𐴀𐴣𐴐𐴧𐴝 𐴖𐴝𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴝 𐴁𐴝𐴘𐴃𐴡𐴥 𐴔𐴡𐴕𐴠𐴈𐴡𐴀𐴌 𐴕𐴠𐴥؟“40𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴝𐴁𐴝𐴌 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴕𐴡, 𐴁𐴡𐴥𐴓𐴑𐴠 𐴁𐴝𐴥𐴌𐴝𐴁𐴧𐴝 𐴌𐴠!“ 𐴇𐴠𐴥 𐴁𐴝𐴥𐴌𐴝𐴁𐴧𐴝 𐴀𐴠𐴥𐴎𐴧𐴡𐴕 𐴁𐴝𐴒𐴞 𐴀𐴝𐴐𐴧𐴞𐴥𐴓𐴢.
The Word for the World International