Read 𐴘𐴡𐴇𐴝𐴥𐴕𐴧𐴝 19

𐴘𐴡𐴇𐴝𐴥𐴕𐴧𐴝19

¹𐴁𐴝𐴦𐴊𐴠 𐴉𐴞𐴓𐴝𐴃𐴠 𐴀𐴞𐴏𐴝𐴤𐴌𐴠 𐴓𐴡𐴘𐴎𐴝𐴘 𐴏𐴡𐴀𐴣𐴑 𐴔𐴝𐴌𐴝 𐴁𐴝𐴀𐴙𐴓𐴢.²𐴀𐴝𐴦𐴌 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴑𐴠𐴣𐴍𐴝𐴌 𐴀𐴠𐴒𐴧𐴗𐴝𐴤 𐴃𐴝𐴏𐴢 𐴁𐴝𐴕𐴝𐴘 𐴀𐴞𐴥𐴁𐴝𐴌 𐴔𐴝𐴃𐴝𐴥𐴃𐴢 𐴊𐴞𐴘𐴝𐴘𐴊𐴞𐴀𐴓𐴢, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴁𐴝𐴘𐴡𐴙𐴕𐴧𐴝 𐴌𐴡𐴚𐴡𐴌 𐴀𐴠𐴒𐴧𐴗𐴝𐴤 𐴎𐴟𐴁𐴧𐴝 𐴉𐴞𐴣𐴊𐴝𐴥𐴘𐴊𐴞𐴓𐴢.³𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢-𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴀𐴡𐴥 𐴘𐴡𐴇𐴟𐴥𐴊𐴞𐴌 𐴁𐴝𐴀𐴣𐴐𐴧𐴝, 𐴔𐴝𐴥𐴌𐴇𐴝𐴁𐴝!“ 𐴇𐴠𐴥𐴀𐴕 𐴈𐴡𐴀𐴘𐴢-𐴈𐴡𐴀𐴘𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴏𐴟𐴖𐴝𐴌 𐴔𐴝𐴙𐴅𐴧𐴠𐴥.

⁴𐴉𐴞𐴓𐴝𐴃𐴢 𐴀𐴝𐴁𐴝𐴌 𐴁𐴝𐴀𐴌𐴠 𐴕𐴠𐴦𐴓𐴞 𐴀𐴝𐴀𐴘𐴢 𐴘𐴡𐴇𐴟𐴥𐴊𐴞 𐴒𐴟𐴥𐴕𐴡𐴌𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴀𐴝𐴀𐴛 𐴀𐴞𐴥𐴁𐴝𐴌𐴠 𐴁𐴝𐴀𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴕𐴝𐴤𐴙𐴌, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴎𐴝𐴕𐴡 𐴊𐴠, 𐴀𐴝𐴀𐴛 𐴀𐴞𐴥𐴁𐴝𐴃𐴧𐴟 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡 𐴉𐴝𐴙𐴌.“⁵𐴃𐴝𐴌𐴉𐴡𐴌𐴠 𐴑𐴠𐴣𐴍𐴝𐴌 𐴃𐴝𐴏𐴢 𐴀𐴠𐴊𐴧𐴠 𐴁𐴝𐴘𐴡𐴙𐴕𐴧𐴝 𐴌𐴡𐴚𐴡𐴌 𐴎𐴟𐴁𐴧𐴝 𐴉𐴞𐴕𐴊𐴝𐴤 𐴇𐴝𐴥𐴓𐴡𐴃𐴠 𐴀𐴞𐴏𐴝𐴤 𐴁𐴝𐴀𐴌𐴠 𐴀𐴝𐴙𐴐𐴧𐴠𐴥. 𐴀𐴝𐴦𐴌 𐴉𐴞𐴓𐴝𐴃𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴏𐴡𐴀 𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝!“

⁶𐴎𐴠𐴣𐴃𐴧𐴠𐴥 𐴋𐴡𐴣𐴀𐴌 𐴀𐴞𐴔𐴝𐴔 𐴔𐴟𐴥𐴕𐴠 𐴀𐴠𐴊𐴧𐴠 𐴉𐴝𐴀𐴌𐴝𐴊𐴝𐴌 𐴒𐴟𐴥𐴕𐴠 𐴀𐴞𐴥𐴁𐴝𐴌𐴠 𐴊𐴠𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴑𐴟𐴥𐴌𐴟𐴐𐴡𐴃𐴢 𐴊𐴞𐴉𐴠𐴥𐴓𐴡, 𐴀𐴞𐴁𐴝𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴡!“
𐴉𐴞𐴓𐴝𐴃𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴡 𐴀𐴞𐴁𐴝𐴤𐴃𐴧𐴟 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡 𐴉𐴝𐴙𐴌, 𐴇𐴠𐴥𐴃𐴡𐴓𐴧𐴝 𐴀𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝 𐴓𐴡𐴘𐴎𐴝𐴘 𐴑𐴟𐴥𐴌𐴟𐴐𐴡𐴃𐴢 𐴊𐴡𐴥𐴒𐴡𐴘.“

⁷𐴘𐴡𐴇𐴟𐴥𐴊𐴞 𐴒𐴟𐴥𐴕𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴣𐴀𐴌𐴝𐴃𐴧𐴟 𐴀𐴠𐴑𐴧𐴝𐴥𐴕 𐴐𐴡𐴥𐴌𐴞𐴘𐴡𐴃𐴢 𐴀𐴝𐴏𐴠𐴤, 𐴀𐴝𐴦𐴌 𐴇𐴠𐴥 𐴐𐴡𐴥𐴌𐴞𐴘𐴡𐴃𐴢 𐴔𐴡𐴎𐴞𐴕 𐴀𐴞𐴁𐴝𐴤𐴃𐴧𐴟 𐴔𐴡𐴌𐴝𐴌 𐴎𐴡𐴌𐴟𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴁𐴝𐴤𐴘𐴠 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴀𐴝𐴓𐴧𐴝𐴌 𐴉𐴟𐴖𐴝 𐴊𐴝𐴁𐴞 𐴒𐴡𐴙𐴅𐴧𐴠𐴥.“

⁸𐴎𐴠𐴣𐴃𐴧𐴠𐴥 𐴉𐴞𐴓𐴝𐴃𐴠 𐴈𐴡𐴃𐴝𐴤 𐴇𐴞𐴥𐴘𐴝𐴕 𐴉𐴟𐴥𐴙𐴕𐴧𐴠, 𐴘𐴡𐴥𐴒𐴧𐴗𐴝 𐴀𐴝𐴌𐴡𐴤 𐴋𐴡𐴦𐴌𐴝𐴘𐴒𐴞𐴘𐴡𐴥𐴘,⁹𐴀𐴝𐴦𐴌 𐴌𐴝𐴎𐴔𐴡𐴇𐴡𐴥𐴓𐴡𐴌 𐴁𐴟𐴥𐴃𐴡𐴌𐴠 𐴀𐴝𐴁𐴝𐴌 𐴒𐴡𐴥𐴓𐴞 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴇𐴡𐴍𐴞𐴥𐴘𐴝𐴌؟“ 𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴇𐴡𐴕𐴡𐴤 𐴎𐴟𐴖𐴝𐴁𐴢 𐴕𐴡𐴥 𐴊𐴠𐴥.¹⁰𐴇𐴠𐴥𐴃𐴡𐴓𐴧𐴝 𐴉𐴞𐴓𐴝𐴃𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴀𐴝𐴣𐴀𐴌 𐴓𐴧𐴡𐴥𐴘 𐴈𐴡𐴃𐴝𐴤 𐴕𐴡 𐴈𐴡𐴘𐴁𐴝𐴤 𐴕𐴞𐴥𐴑𐴞؟ 𐴃𐴟𐴀𐴛 𐴑𐴞𐴥 𐴕𐴡 𐴎𐴝𐴕𐴡, 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴣𐴌𐴠 𐴀𐴠𐴌𐴞𐴊𐴞𐴁𐴝𐴌 𐴀𐴡𐴥 𐴑𐴠𐴥𐴔𐴡𐴃𐴝 𐴀𐴝𐴏𐴠𐴤 𐴊𐴠, 𐴀𐴝𐴦𐴌 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴁𐴝𐴌 𐴀𐴡𐴥 𐴑𐴠𐴥𐴔𐴡𐴃𐴝 𐴀𐴝𐴏𐴠𐴤 𐴊𐴠𐴥؟“

¹¹𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴎𐴡𐴊𐴞 𐴃𐴟𐴣𐴀𐴝𐴥𐴣𐴌𐴠 𐴖𐴡𐴃𐴧𐴟𐴥 𐴑𐴠𐴥𐴔𐴡𐴃𐴝 𐴊𐴞𐴦𐴘𐴝 𐴕𐴡 𐴎𐴝𐴘𐴃𐴡, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌 𐴖𐴡𐴌𐴠 𐴃𐴟𐴣𐴀𐴝𐴥𐴣𐴌 𐴇𐴡𐴕𐴡𐴤 𐴑𐴠𐴥𐴔𐴡𐴃𐴝 𐴕𐴡 𐴃𐴝𐴥𐴑𐴞𐴃𐴡. 𐴇𐴠𐴥𐴃𐴡𐴓𐴧𐴝 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴠𐴥 𐴃𐴟𐴣𐴀𐴝𐴥𐴣𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴞𐴘𐴠 𐴀𐴞𐴥𐴃𐴝𐴌 𐴒𐴟𐴕𐴝𐴤 𐴀𐴝𐴌𐴡𐴤 𐴋𐴡𐴣𐴀𐴌.“

¹²𐴇𐴠𐴥 𐴀𐴡𐴑𐴃𐴡𐴥𐴃𐴢 𐴓𐴡𐴥𐴃𐴞 𐴉𐴞𐴓𐴝𐴃𐴠 𐴀𐴞𐴏𐴝𐴤𐴌𐴠 𐴀𐴠𐴌𐴞𐴊𐴞𐴁𐴝𐴌 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴘𐴡𐴇𐴟𐴥𐴊𐴞 𐴒𐴟𐴥𐴕𐴠 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴈𐴡𐴖𐴝𐴤𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠, ”𐴃𐴟𐴀𐴛 𐴎𐴡𐴊𐴞 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴀𐴠𐴌𐴞𐴊𐴡, 𐴃𐴡𐴥𐴀𐴘𐴓𐴠 𐴃𐴟𐴀𐴛 𐴑𐴝𐴥𐴘𐴏𐴝𐴌𐴡𐴌 𐴊𐴟𐴏𐴃𐴡𐴥 𐴕𐴡. 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴁𐴝𐴀𐴣𐴐𐴧𐴝 𐴊𐴝𐴁𐴞 𐴒𐴡𐴌𐴠𐴥, 𐴀𐴞𐴥𐴃𐴠 𐴃𐴡 𐴑𐴝𐴥𐴘𐴏𐴝𐴌𐴡𐴌 𐴊𐴟𐴐𐴧𐴡𐴕.“

¹³𐴇𐴠𐴥𐴃𐴡𐴓𐴧𐴝, 𐴎𐴠𐴣𐴃𐴧𐴠𐴥 𐴉𐴞𐴓𐴝𐴃𐴠 𐴇𐴞𐴥𐴘𐴝𐴕 𐴉𐴟𐴥𐴙𐴕𐴧𐴠, 𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤𐴌𐴠 𐴁𐴝𐴀𐴌𐴠 𐴀𐴝𐴙𐴕𐴧𐴠𐴤, 𐴁𐴝𐴦𐴊𐴠 𐴎𐴠 𐴎𐴝𐴒𐴝 𐴒𐴝𐴥𐴕𐴡𐴌𐴠 𐴉𐴝𐴃𐴧𐴡𐴥𐴌-𐴀𐴡𐴌-𐴀𐴟𐴍𐴝𐴥𐴕 𐴈𐴡𐴀, 𐴀𐴝𐴦𐴌 𐴇𐴞𐴁𐴌𐴟𐴤 𐴎𐴟𐴁𐴝𐴕𐴡𐴃𐴢 𐴒𐴝𐴁𐴧𐴝𐴃𐴝 𐴁𐴡𐴓𐴞 𐴈𐴡𐴀, 𐴇𐴞𐴥𐴘𐴝𐴕𐴡𐴃𐴢 𐴁𐴞𐴏𐴝𐴌𐴡𐴌 𐴃𐴡𐴑𐴃𐴡𐴥𐴃𐴢 𐴁𐴡𐴙𐴐𐴧𐴠𐴥.¹⁴𐴇𐴠𐴥 𐴊𐴞𐴕 𐴕𐴗𐴝𐴥 𐴀𐴝𐴐𐴧𐴞𐴥𐴓𐴢 𐴀𐴝𐴎𐴝𐴊𐴞𐴌-𐴀𐴞𐴊𐴡𐴌 𐴃𐴡𐴘𐴧𐴝𐴌𐴞𐴌 𐴊𐴞𐴕، 𐴀𐴝𐴦𐴌 𐴇𐴠𐴥𐴣𐴃𐴧𐴠 𐴊𐴞𐴕𐴡𐴌 𐴊𐴟𐴀𐴣𐴙𐴅𐴧𐴝 𐴀𐴝𐴥𐴕𐴞𐴑 𐴀𐴡𐴥𐴘𐴧𐴠.
𐴉𐴞𐴓𐴝𐴃𐴠 𐴘𐴡𐴇𐴟𐴥𐴊𐴞 𐴒𐴟𐴥𐴕𐴡𐴌𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴃𐴟𐴣𐴀𐴝𐴥𐴌𐴝𐴌 𐴁𐴝𐴀𐴣𐴐𐴧𐴝!“

¹⁵𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴊𐴟𐴌 𐴒𐴡𐴌𐴡𐴤, 𐴊𐴟𐴌 𐴒𐴡𐴌𐴡𐴤, 𐴀𐴞𐴁𐴝𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴡!“
𐴉𐴞𐴓𐴝𐴃𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌 𐴁𐴝𐴀𐴣𐴐𐴧𐴝𐴌𐴠 𐴀𐴝𐴀𐴛 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴝𐴘𐴃𐴝𐴔؟“
𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴣𐴀𐴌𐴝𐴃𐴧𐴟 𐴑𐴝𐴥𐴘𐴏𐴝𐴌 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤 𐴁𐴝𐴀𐴣𐴐𐴧𐴝 𐴕𐴝𐴥𐴘.“

𐴀𐴞𐴏𐴝𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴉𐴠𐴓𐴝𐴘𐴧𐴠

¹⁶𐴃𐴡𐴥𐴘 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴉𐴞𐴓𐴝𐴃𐴠 𐴀𐴞𐴏𐴝𐴤𐴌𐴠 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴞𐴘𐴠. 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌𐴠 𐴓𐴡𐴘𐴒𐴞𐴘𐴠𐴥𐴒𐴡𐴘.¹⁷𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴑𐴟𐴥𐴌𐴟𐴐𐴢 𐴕𐴞𐴎𐴠 𐴈𐴝𐴣𐴊𐴡𐴥𐴃𐴢 𐴓𐴡𐴦𐴘𐴢 𐴁𐴝𐴀𐴌𐴠 𐴔𐴝𐴃𐴝𐴥𐴌-𐴔𐴝𐴓𐴝 𐴈𐴡𐴀 𐴊𐴠 𐴎𐴝𐴒𐴝 𐴉𐴡𐴙𐴅𐴧𐴡𐴕𐴃𐴡 𐴓𐴡𐴘𐴒𐴞𐴘𐴠𐴥, 𐴎𐴞𐴘𐴝𐴥𐴕𐴡𐴌𐴠 𐴇𐴞𐴁𐴌𐴟𐴤 𐴎𐴟𐴁𐴝𐴕𐴡𐴃𐴢 𐴒𐴡𐴓𐴒𐴡𐴃𐴝 𐴁𐴡𐴓𐴞 𐴈𐴡𐴀.¹⁸𐴇𐴠𐴥𐴍𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴌 𐴊𐴟𐴘 𐴎𐴡𐴕 𐴔𐴝𐴕𐴟𐴥𐴙𐴐𐴡𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴘𐴠, 𐴀𐴠𐴎𐴧𐴡𐴕𐴡𐴌𐴠 𐴀𐴠𐴑 𐴑𐴟𐴓𐴃𐴟𐴥 𐴀𐴠𐴑 𐴑𐴟𐴓𐴃𐴟𐴥, 𐴀𐴝𐴦𐴌 𐴀𐴞𐴏𐴝𐴤𐴌𐴠 𐴔𐴝𐴎𐴠𐴥.

¹⁹𐴉𐴞𐴓𐴝𐴃𐴠 𐴀𐴠𐴑𐴧𐴝𐴥𐴕 𐴏𐴝𐴥𐴙𐴕𐴁𐴟𐴥𐴄𐴢 𐴀𐴡𐴥 𐴓𐴠𐴑𐴞𐴥 𐴀𐴞𐴏𐴝𐴤𐴌 𐴑𐴟𐴥𐴌𐴟𐴐𐴡𐴃𐴢 𐴔𐴝𐴌𐴞𐴊𐴞𐴀𐴓𐴢. 𐴇𐴞𐴥𐴘𐴝𐴕𐴡𐴃𐴢 𐴓𐴠𐴙𐴑𐴧𐴞𐴥𐴓𐴢 𐴊𐴠: 𐴀𐴞𐴏𐴝𐴤 𐴕𐴝𐴏𐴝𐴥𐴌𐴞, 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝.²⁰𐴁𐴡𐴀𐴗𐴃𐴢 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴇𐴠𐴥 𐴏𐴝𐴥𐴙𐴕𐴁𐴟𐴥𐴄𐴢 𐴄𐴝𐴥𐴕 𐴉𐴡𐴙𐴅𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠 𐴎𐴝𐴒𐴝 𐴒𐴝𐴥𐴕𐴡𐴃𐴢 𐴀𐴞𐴏𐴝𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴓𐴢 𐴇𐴞𐴥𐴘𐴝𐴕 𐴐𐴡𐴥𐴀𐴌𐴡𐴌 𐴋𐴝𐴥𐴑𐴠; 𐴀𐴝𐴦𐴌 𐴏𐴝𐴥𐴙𐴕𐴁𐴟𐴥𐴄𐴢 𐴄𐴝𐴥𐴕 𐴇𐴞𐴁𐴌𐴟𐴤, 𐴒𐴞𐴌𐴞𐴥𐴑 𐴀𐴠𐴊𐴧𐴠 𐴓𐴠𐴄𐴞𐴥𐴕 𐴎𐴟𐴁𐴝𐴕𐴡𐴃𐴢 𐴓𐴠𐴙𐴑𐴧𐴞𐴥𐴓𐴢.²¹𐴇𐴞𐴥𐴘𐴝𐴕 𐴊𐴠𐴑𐴞𐴥 𐴘𐴡𐴇𐴟𐴥𐴊𐴞𐴌 𐴋𐴡𐴣𐴀𐴌 𐴀𐴞𐴔𐴝𐴔 𐴔𐴟𐴥𐴕𐴠 𐴉𐴞𐴓𐴝𐴃𐴡𐴌𐴠 𐴈𐴡𐴘𐴧𐴠𐴥 𐴊𐴠, ”’𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝‘ 𐴕𐴡 𐴓𐴠𐴑𐴞𐴥𐴘𐴡, 𐴁𐴡𐴥𐴓𐴑𐴠 𐴀𐴠𐴕𐴊𐴞𐴓𐴧𐴝 𐴓𐴠𐴑𐴡𐴥, ’𐴀𐴞𐴁𐴝𐴤𐴘𐴠 𐴈𐴡𐴘𐴃𐴡𐴤 𐴊𐴠, 𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴀𐴣𐴐𐴧𐴝.‘ “

²²𐴉𐴞𐴓𐴝𐴃𐴠 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠, ”𐴀𐴝𐴀𐴛 𐴓𐴠𐴙𐴑𐴧𐴞𐴥 𐴊𐴠 𐴇𐴞𐴥𐴘𐴝𐴕 𐴀𐴝𐴀𐴛 𐴓𐴠𐴙𐴑𐴧𐴞𐴥.“

²³𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴁𐴝𐴦𐴊𐴠, 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴖𐴡𐴌𐴡𐴌 𐴇𐴡𐴦𐴌 𐴑𐴟𐴥𐴓𐴞 𐴓𐴡𐴦𐴘𐴢 𐴏𐴝𐴙𐴌 𐴁𐴝𐴥𐴑 𐴒𐴡𐴙𐴅𐴧𐴠𐴥, 𐴀𐴠𐴑 𐴉𐴡𐴥𐴗𐴏𐴡𐴓𐴧𐴝 𐴀𐴠𐴑 𐴁𐴝𐴥𐴑𐴡𐴌 𐴊𐴡𐴥𐴌𐴠; 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴎𐴟𐴁𐴧𐴝 𐴖𐴝 𐴘𐴡𐴥 𐴓𐴡𐴘𐴧𐴠𐴥. 𐴇𐴠𐴥 𐴎𐴟𐴁𐴧𐴝 𐴖𐴝 𐴇𐴡𐴕𐴡𐴤 𐴎𐴟𐴌𐴝𐴊𐴞𐴘𐴝 𐴏𐴝𐴥𐴌𐴝, 𐴀𐴝𐴦𐴌 𐴖𐴡𐴃𐴧𐴟𐴥 𐴓𐴡𐴥𐴃𐴞 𐴕𐴞𐴏𐴠 𐴉𐴡𐴙𐴅𐴧𐴡𐴕𐴃𐴡 𐴀𐴠𐴑 𐴇𐴡𐴦𐴌.

²⁴𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴀𐴠 𐴎𐴟𐴁𐴧𐴝 𐴖𐴝 𐴕𐴡 𐴉𐴝𐴥𐴍𐴞, 𐴁𐴡𐴥𐴓𐴑𐴠 𐴓𐴡𐴄𐴝𐴥𐴌𐴞 𐴔𐴝𐴌𐴞 𐴏𐴝𐴀𐴘𐴢 𐴘𐴞𐴁𐴝𐴤 𐴇𐴝𐴌 𐴇𐴠𐴥𐴍𐴠 𐴉𐴡𐴌𐴠.“
𐴇𐴞𐴥𐴘𐴝𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴂𐴝𐴑-𐴑𐴝𐴓𐴝𐴔𐴡𐴌 𐴘𐴝𐴀𐴕 𐴉𐴟𐴌𐴝 𐴀𐴡𐴥,”𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴀𐴝𐴣𐴀𐴌 𐴇𐴡𐴦𐴌𐴡𐴌𐴠 𐴁𐴡𐴌𐴝𐴃𐴢 𐴒𐴡𐴙𐴅𐴧𐴠𐴥,𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌 𐴇𐴡𐴦𐴌𐴡𐴓𐴧𐴝 𐴓𐴡𐴄𐴝𐴥𐴌𐴞 𐴔𐴝𐴙𐴅𐴧𐴠𐴥.“𐴉𐴡𐴥𐴗𐴏𐴢 𐴏𐴟𐴥𐴕𐴠 𐴇𐴠𐴥𐴕𐴊𐴞𐴓𐴧𐴝 𐴇𐴞𐴥𐴀𐴕 𐴇𐴠𐴥𐴃𐴡𐴓𐴧𐴝 𐴒𐴡𐴙𐴅𐴧𐴠𐴥 𐴊𐴠.

²⁵𐴀𐴞𐴏𐴝𐴤𐴌 𐴑𐴟𐴥𐴌𐴟𐴐𐴡𐴌 𐴋𐴝𐴥𐴑𐴠 𐴀𐴞𐴥𐴁𐴝𐴌 𐴔𐴝𐴦, 𐴀𐴞𐴥𐴁𐴝𐴌 𐴔𐴝𐴦𐴌 𐴁𐴡𐴥𐴙𐴕, 𐴀𐴝𐴦𐴌 𐴑𐴓𐴡𐴂𐴝𐴏𐴡𐴌 𐴁𐴡𐴖𐴢 𐴔𐴡𐴌𐴞𐴘𐴝𐴔 𐴀𐴠𐴊𐴧𐴠 𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢.²⁶𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴔𐴝𐴦𐴌𐴠 𐴀𐴠𐴊𐴧𐴠 𐴕𐴞𐴎𐴠 𐴀𐴝𐴊𐴡𐴌 𐴒𐴡𐴙𐴃𐴧𐴡𐴥 𐴊𐴠 𐴐𐴝𐴥𐴌𐴞𐴃𐴧𐴗𐴝𐴌𐴠 𐴋𐴝𐴥𐴑𐴠 𐴃𐴞𐴥𐴘𐴝𐴘𐴧𐴝 𐴊𐴠𐴙𐴑𐴧𐴠𐴥, 𐴀𐴞𐴥𐴁𐴝𐴘𐴠 𐴔𐴝𐴦𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴔𐴝𐴦, 𐴏𐴡𐴀 𐴃𐴟𐴣𐴀𐴝𐴥𐴣𐴌 𐴉𐴟𐴖𐴝 𐴀𐴡𐴥𐴙𐴓𐴊𐴠 𐴀𐴞𐴁𐴝𐴤.“

²⁷𐴁𐴝𐴦𐴊𐴠 𐴇𐴠𐴥 𐴐𐴝𐴥𐴌𐴞𐴃𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴏𐴡𐴀, 𐴃𐴟𐴣𐴀𐴝𐴥𐴣𐴌 𐴔𐴝𐴦 𐴀𐴡𐴥𐴙𐴓𐴊𐴠 𐴀𐴞𐴁𐴝𐴤.“𐴇𐴠𐴥𐴣𐴃𐴧𐴠 𐴓𐴡𐴥𐴃𐴞 𐴇𐴠𐴥 𐴐𐴝𐴥𐴌𐴞𐴃𐴧𐴗𐴝𐴘𐴠 𐴇𐴞𐴥𐴁𐴝𐴌𐴠 𐴘𐴡𐴥𐴒𐴧𐴗𐴝𐴌 𐴕𐴞𐴎𐴡𐴌 𐴒𐴡𐴥𐴌𐴡𐴃𐴢 𐴓𐴡𐴘𐴒𐴞𐴥𐴓𐴒𐴡𐴘.

𐴀𐴞𐴏𐴝𐴤𐴌 𐴔𐴡𐴦𐴃𐴢

²⁸𐴘𐴝𐴥𐴌𐴁𐴝𐴦𐴊𐴠, 𐴀𐴞𐴏𐴝𐴤𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴒𐴡𐴙𐴅𐴧𐴝𐴥 𐴀𐴡𐴥𐴘𐴒𐴞𐴘𐴡𐴘 𐴊𐴠 𐴇𐴞𐴥𐴘𐴝𐴕 𐴇𐴡𐴘 𐴉𐴝𐴌𐴞, 𐴂𐴝𐴑-𐴑𐴝𐴓𐴝𐴔 𐴉𐴟𐴌𐴝 𐴀𐴡𐴥𐴘 𐴁𐴡𐴓𐴧𐴝 𐴈𐴡𐴀𐴌 𐴊𐴠, ”𐴀𐴝𐴣𐴀𐴃𐴧𐴟 𐴃𐴞𐴌𐴝𐴥𐴐𐴢 𐴓𐴝𐴙𐴒𐴧𐴠𐴥.“²⁹𐴇𐴠𐴥 𐴎𐴝𐴒𐴝𐴃𐴢 𐴀𐴠𐴒𐴧𐴗𐴝𐴤 𐴏𐴞𐴥𐴌𐴑𐴝𐴌 𐴃𐴝𐴥𐴌𐴝 𐴁𐴟𐴀𐴝𐴥𐴒𐴝𐴌𐴝𐴘𐴧𐴝 𐴀𐴝𐴐𐴧𐴞𐴥𐴓𐴢; 𐴀𐴞𐴥𐴃𐴝𐴌𐴝 𐴇𐴞𐴥𐴁𐴝𐴃𐴢 𐴀𐴠𐴑𐴧𐴝𐴥𐴕 𐴀𐴠𐴏𐴉𐴡𐴥𐴕𐴅 𐴁𐴟𐴌𐴝𐴘𐴧𐴡𐴌𐴠 𐴇𐴞𐴥𐴏𐴡𐴂𐴢-𐴒𐴝𐴏𐴡𐴌 𐴀𐴠𐴒𐴧𐴗𐴝𐴤 𐴋𐴠𐴥𐴀𐴘𐴓𐴝𐴌 𐴔𐴝𐴃𐴝𐴥𐴃𐴢 𐴁𐴝𐴎𐴝𐴥𐴘𐴊𐴞 𐴀𐴞𐴏𐴝𐴤𐴌 𐴒𐴝𐴓𐴡𐴃𐴢 𐴊𐴞𐴦𐴘𐴠𐴥.³⁰𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴃𐴧𐴟 𐴇𐴠𐴥 𐴏𐴞𐴥𐴌𐴑𐴝 𐴈𐴝𐴥𐴘𐴧𐴝 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴒𐴡𐴙𐴅𐴧𐴝𐴥 𐴀𐴡𐴥𐴘𐴒𐴞𐴘𐴡𐴘.“𐴃𐴝𐴌𐴉𐴡𐴌𐴠 𐴔𐴝𐴃𐴝𐴥𐴌𐴠 𐴇𐴠𐴥𐴔𐴧𐴞𐴑𐴧𐴝 𐴒𐴡𐴌𐴞𐴥 𐴀𐴞𐴥𐴁𐴝𐴌 𐴉𐴡𐴌𐴝𐴕 𐴊𐴞𐴉𐴠𐴥𐴓𐴝𐴘𐴧𐴠.

𐴀𐴞𐴏𐴝𐴤𐴌 𐴒𐴝𐴦𐴌 𐴋𐴝𐴥𐴑 𐴁𐴝𐴘 𐴏𐴠𐴥𐴓𐴢 𐴔𐴝𐴙𐴅𐴧𐴠𐴥

³¹𐴇𐴠𐴥 𐴊𐴞𐴕 𐴕𐴗𐴝𐴥 𐴎𐴠𐴃𐴧𐴡𐴥𐴃𐴢 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕𐴡𐴌 𐴃𐴡𐴘𐴧𐴝𐴌𐴞𐴌 𐴊𐴞𐴕 𐴀𐴝𐴐𐴧𐴞𐴥𐴓𐴢, 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴑𐴟𐴥𐴌𐴟𐴐𐴡𐴃𐴢 𐴇𐴡𐴕𐴡𐴤 𐴓𐴝𐴐𐴢 𐴕𐴡 𐴃𐴝𐴥𐴑𐴠 𐴉𐴝𐴥𐴕 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴉𐴞𐴓𐴝𐴃𐴡𐴌𐴠 𐴀𐴝𐴌𐴡𐴏𐴢 𐴒𐴡𐴙𐴅𐴧𐴠𐴥 𐴊𐴠, 𐴎𐴠𐴃𐴝𐴌𐴝𐴤 𐴑𐴟𐴥𐴌𐴟𐴐𐴡𐴃𐴢 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴌 𐴄𐴠𐴥𐴚 𐴒𐴟𐴥𐴕 𐴁𐴝𐴥𐴚𐴒𐴞𐴊𐴞 𐴀𐴞𐴥𐴃𐴝𐴌𐴝𐴌 𐴓𐴝𐴐𐴢 𐴓𐴝𐴔𐴝𐴘𐴉𐴠𐴥𐴓𐴝𐴘 𐴁𐴡𐴓𐴧𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴕𐴗𐴝𐴥 𐴈𐴝𐴥𐴀𐴏𐴢 𐴀𐴝𐴐𐴧𐴞𐴥𐴓𐴢.³²𐴃𐴡𐴥𐴘 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴢 𐴀𐴝𐴀𐴘𐴢, 𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴘𐴝 𐴒𐴞𐴥𐴀𐴓𐴢 𐴊𐴠 𐴀𐴞𐴥𐴃𐴝𐴌𐴝𐴌 𐴄𐴠𐴥𐴚 𐴒𐴟𐴥𐴕 𐴁𐴝𐴥𐴚𐴒𐴞𐴊𐴞𐴓𐴢, 𐴀𐴝𐴒𐴠 𐴀𐴠𐴎𐴧𐴡𐴕 𐴀𐴡𐴌, 𐴁𐴝𐴦𐴊𐴠 𐴀𐴝𐴌 𐴀𐴠𐴎𐴧𐴡𐴕𐴡𐴌.³³𐴓𐴠𐴑𐴞𐴕 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌 𐴀𐴞𐴥𐴣𐴘𐴡𐴃𐴢 𐴀𐴝𐴀𐴘𐴢 𐴀𐴞𐴥𐴁𐴝 𐴔𐴡𐴌𐴞𐴒𐴞𐴘𐴡𐴥𐴘 𐴊𐴠 𐴊𐴠𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴄𐴠𐴥𐴚 𐴕𐴡𐴥 𐴁𐴝𐴥𐴚𐴒𐴠.³⁴𐴔𐴡𐴕𐴃𐴡𐴌 𐴀𐴠𐴒𐴧𐴗𐴝𐴤 𐴉𐴡𐴥𐴗𐴏𐴠 𐴀𐴞𐴏𐴝𐴤𐴌 𐴒𐴝𐴦𐴌 𐴋𐴝𐴥𐴑 𐴁𐴝𐴘 𐴏𐴠𐴥𐴓𐴢 𐴔𐴝𐴙𐴅𐴧𐴠𐴥, 𐴀𐴝𐴦𐴌 𐴀𐴠𐴥𐴇𐴡𐴕 𐴈𐴠𐴥𐴕𐴃𐴟 𐴓𐴡𐴖𐴢 𐴀𐴠𐴊𐴧𐴠 𐴉𐴝𐴕𐴞𐴥 𐴕𐴠𐴦𐴓𐴞𐴀𐴝𐴙𐴐𐴧𐴞𐴥𐴓𐴢.³⁵𐴕𐴞𐴎𐴡𐴌 𐴏𐴟𐴑𐴠𐴤 𐴊𐴠𐴙𐴑𐴧𐴠𐴥 𐴊𐴠 𐴘𐴡𐴥𐴒𐴧𐴗𐴝𐴘𐴠 𐴁𐴠 𐴇𐴞𐴥𐴘𐴝𐴕 𐴒𐴡𐴁𐴝𐴤 𐴊𐴞𐴥𐴘𐴠, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌 𐴒𐴡𐴁𐴝𐴤 𐴏𐴡𐴥𐴘𐴧𐴞; 𐴘𐴡𐴥𐴒𐴧𐴗𐴝𐴘𐴠 𐴎𐴝𐴕𐴠 𐴊𐴠 𐴘𐴡𐴥𐴒𐴧𐴗𐴝 𐴏𐴡𐴥𐴘𐴧𐴞 𐴒𐴝𐴥𐴕 𐴈𐴡𐴀𐴌 𐴊𐴠, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴠𐴑𐴞𐴕 𐴒𐴡𐴌𐴡𐴤.³⁶𐴇𐴞𐴥𐴀𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴂𐴝𐴑-𐴑𐴝𐴓𐴝𐴔𐴡𐴌 𐴘𐴝𐴀𐴕 𐴉𐴟𐴌𐴝 𐴀𐴡𐴥, ”𐴀𐴞𐴥𐴁𐴝𐴌 𐴀𐴠𐴑𐴧𐴝𐴥𐴕 𐴀𐴝𐴥𐴣𐴋𐴧𐴞 𐴀𐴟𐴥𐴊𐴧𐴗𐴝 𐴁𐴝𐴥𐴣𐴒𐴝 𐴕𐴡 𐴎𐴝𐴘𐴁𐴡.“ ³⁷𐴂𐴝𐴑-𐴑𐴝𐴓𐴝𐴔𐴡𐴃𐴢 𐴘𐴝𐴀𐴕 𐴀𐴡𐴥 𐴀𐴝𐴏𐴠𐴤, ”𐴀𐴞𐴥𐴃𐴝𐴌𐴝 𐴎𐴞𐴁𐴝𐴤𐴌𐴠 𐴒𐴝𐴣𐴙𐴃𐴧𐴠𐴥 𐴀𐴞𐴥𐴁𐴝𐴌 𐴇𐴞𐴥𐴑𐴧𐴝 𐴀𐴞𐴥𐴃𐴝𐴌𐴝 𐴏𐴝𐴀𐴘𐴢 𐴃𐴝𐴥𐴑𐴞𐴁𐴡.“

𐴀𐴞𐴏𐴝𐴤𐴌𐴠 𐴊𐴡𐴇𐴡𐴥𐴕 𐴒𐴡𐴌𐴝𐴥𐴘𐴧𐴠

³⁸𐴇𐴞𐴥𐴀𐴕 𐴁𐴝𐴦𐴊𐴠, 𐴀𐴝𐴌𐴝𐴔𐴝𐴥𐴃𐴞𐴘𐴝 𐴐𐴡𐴥𐴀𐴌𐴡𐴌 𐴘𐴟𐴏𐴟𐴥𐴉𐴠 𐴀𐴞𐴏𐴝𐴤𐴌 𐴓𐴝𐴐𐴢 𐴓𐴡𐴘𐴎𐴝𐴘𐴃𐴡𐴥𐴘 𐴉𐴞𐴓𐴝𐴃𐴡𐴃𐴧𐴟 𐴀𐴠𐴎𐴝𐴎𐴡𐴃𐴢 𐴔𐴝𐴙𐴒𐴧𐴞𐴥𐴓𐴢. 𐴘𐴟𐴏𐴟𐴥𐴉𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴞𐴏𐴝𐴤𐴌 𐴀𐴠𐴥𐴎𐴧𐴡𐴕 𐴓𐴟𐴑𐴝𐴘𐴧𐴝 𐴀𐴟𐴔𐴧𐴡𐴃𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴘𐴡𐴇𐴟𐴥𐴊𐴞𐴌 𐴕𐴠𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴋𐴡𐴦𐴌𐴝𐴘𐴃𐴡𐴥. 𐴉𐴞𐴓𐴝𐴃𐴡𐴌 𐴀𐴠𐴎𐴝𐴎𐴡𐴃𐴢 𐴉𐴝𐴘𐴧𐴡𐴌𐴠 𐴘𐴡𐴥𐴒𐴧𐴗𐴝 𐴀𐴝𐴀𐴘𐴢 𐴀𐴞𐴏𐴝𐴤𐴌 𐴓𐴝𐴐𐴢 𐴓𐴡𐴘𐴒𐴞𐴘𐴠𐴥𐴒𐴡𐴘.³⁹𐴉𐴟𐴥𐴖𐴝𐴣𐴃𐴞 𐴕𐴞𐴑𐴡𐴥𐴊𐴠𐴔𐴝𐴏𐴢 𐴎𐴠𐴦𐴕𐴞𐴑𐴞 𐴀𐴝𐴒𐴠 𐴌𐴝𐴙𐴃𐴧𐴝 𐴀𐴞𐴏𐴝𐴤𐴌 𐴇𐴠𐴥𐴍𐴠 𐴒𐴞𐴀𐴓𐴢, 𐴘𐴡𐴥𐴒𐴧𐴗𐴝 𐴘𐴡𐴥 𐴀𐴝𐴙𐴐𐴧𐴠𐴥; 𐴘𐴡𐴥𐴒𐴧𐴗𐴝𐴘𐴠 𐴔𐴟𐴌 𐴀𐴝𐴣𐴃𐴡𐴌 𐴀𐴠𐴊𐴧𐴠 𐴀𐴝𐴓𐴡𐴤-𐴒𐴝𐴏𐴢 𐴔𐴞𐴘𐴝𐴥𐴘 𐴁𐴝𐴕𐴝𐴘𐴧𐴝 𐴃𐴞𐴌𐴞𐴥𐴐𐴢 𐴃𐴞𐴕 𐴐𐴠𐴥𐴌 𐴀𐴝𐴥𐴕𐴞𐴑 𐴑𐴟𐴥𐴐𐴁𐴡𐴌 𐴒𐴟𐴌𐴞 𐴀𐴝𐴙𐴕𐴧𐴞𐴤𐴓𐴢.⁴⁰𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌 𐴓𐴝𐴐𐴧𐴗𐴝 𐴓𐴡𐴘𐴎𐴝𐴘 𐴑𐴟𐴥𐴐𐴁𐴡 𐴒𐴟𐴥𐴕 𐴊𐴞𐴦 𐴉𐴟𐴥𐴣𐴃𐴝𐴌 𐴇𐴡𐴦𐴌 𐴓𐴡𐴥𐴘 𐴇𐴡𐴇𐴡𐴥𐴕 𐴏𐴡𐴓𐴝𐴘𐴧𐴠𐴥, 𐴎𐴠𐴕𐴊𐴞𐴓𐴧𐴝 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴊𐴡𐴇𐴡𐴥𐴕 𐴒𐴡𐴌𐴝𐴥𐴌 𐴕𐴞𐴘𐴡𐴔 𐴀𐴝𐴏𐴠𐴤.⁴¹𐴎𐴠 𐴎𐴝𐴒𐴝𐴃𐴢 𐴀𐴞𐴏𐴝𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥𐴓𐴢 𐴇𐴠𐴥𐴍𐴠 𐴀𐴠𐴑𐴧𐴝𐴥𐴕 𐴁𐴝𐴒𐴝𐴕 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴇𐴠𐴥 𐴁𐴝𐴒𐴝𐴕𐴡𐴃𐴢 𐴀𐴠𐴒𐴧𐴗𐴝𐴤 𐴕𐴡𐴘𐴝 𐴈𐴡𐴁𐴡𐴌 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴃𐴢 𐴇𐴡𐴕𐴡𐴤𐴊𐴞𐴕 𐴇𐴡𐴕𐴡𐴤𐴑𐴞𐴘𐴡𐴌𐴠 𐴊𐴡𐴇𐴡𐴥𐴕 𐴒𐴡𐴌𐴝𐴥𐴙𐴓𐴢 𐴊𐴠 𐴕𐴝𐴥𐴘.⁴²𐴇𐴠𐴥 𐴊𐴞𐴕 𐴕𐴗𐴝𐴥 𐴘𐴡𐴇𐴟𐴥𐴊𐴞𐴌 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕𐴡𐴌 𐴃𐴡𐴘𐴧𐴝𐴌𐴞𐴌 𐴊𐴞𐴕 𐴀𐴞𐴥𐴏𐴝𐴉𐴠, 𐴇𐴠𐴥 𐴈𐴡𐴁𐴡𐴌𐴒𐴗𐴝𐴥 𐴎𐴠𐴃𐴧𐴡𐴥𐴃𐴢 𐴋𐴝𐴥𐴑𐴠, 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌𐴠 𐴘𐴞𐴥𐴁𐴝𐴃𐴢 𐴊𐴡𐴇𐴡𐴥𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.

The Word for the World International

https://app.library.bible/content/87faca8b51c22590