1 𐴉𐴞𐴃𐴡𐴌 1を読んでください。

1 𐴉𐴞𐴃𐴡𐴌1

𐴏𐴡𐴥𐴓𐴝𐴔

¹𐴀𐴝𐴀𐴛 𐴉𐴞𐴃𐴡𐴌, 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴠𐴥𐴎𐴧𐴡𐴕 𐴏𐴝𐴥𐴇𐴝𐴁𐴞.
𐴀𐴝𐴓𐴧𐴝𐴌 𐴁𐴝𐴏𐴞𐴥𐴓𐴡𐴘𐴧𐴝 𐴀𐴟𐴘𐴃𐴝𐴌𐴝𐴤𐴌 𐴇𐴝𐴣𐴏𐴠 𐴓𐴠𐴑𐴞𐴥𐴌 𐴎𐴠𐴃𐴝𐴌𐴝𐴤 𐴊𐴡𐴌𐴁𐴡𐴊𐴡𐴌 𐴀𐴡𐴥𐴘 𐴂𐴡𐴕𐴃𐴟𐴏𐴢, 𐴒𐴝𐴓𐴝𐴃𐴞𐴥𐴘𐴝, 𐴑𐴝𐴂𐴧𐴝𐴊𐴡𐴥𐴑𐴞𐴘𐴝, 𐴀𐴠𐴐𐴞𐴥𐴘𐴝, 𐴀𐴠𐴊𐴧𐴠 𐴁𐴞𐴃𐴟𐴥𐴕𐴞𐴘𐴝 𐴀𐴠𐴓𐴝𐴑𐴝 𐴀𐴡𐴥𐴑𐴧𐴡𐴓𐴡𐴃𐴢 𐴉𐴡𐴌𐴁𐴝𐴥𐴐𐴞 𐴀𐴞𐴥𐴏𐴝𐴉𐴠 𐴃𐴝𐴥𐴑𐴠𐴌,²𐴎𐴠𐴃𐴝𐴌𐴝𐴤𐴌𐴠 𐴀𐴝𐴓𐴧𐴝 𐴁𐴝𐴉𐴡𐴌 𐴀𐴝𐴒𐴡𐴌𐴞 𐴕𐴞𐴘𐴡𐴃𐴢 𐴔𐴡𐴎𐴞𐴕 𐴀𐴠𐴊𐴧𐴠 𐴂𐴝𐴑-𐴌𐴟𐴀𐴌 𐴂𐴝𐴑 𐴁𐴝𐴕𐴝 𐴓𐴡𐴘 𐴁𐴝𐴏𐴞𐴥𐴓𐴡𐴖𐴝 𐴒𐴞𐴥𐴘𐴠 𐴊𐴠, 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴉𐴡𐴥𐴌𐴔𐴝𐴊𐴝𐴌 𐴀𐴡𐴥𐴘 𐴁𐴡𐴓𐴧𐴝 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴓𐴡𐴖𐴢 𐴖𐴡𐴥𐴌 𐴐𐴞𐴥𐴄𐴑𐴝𐴘𐴠 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥𐴉𐴠𐴓𐴝 𐴎𐴝𐴘 𐴁𐴡𐴓𐴧𐴝.
𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴌𐴝𐴇𐴝𐴥𐴔𐴡𐴃𐴢 𐴀𐴠𐴊𐴧𐴠 𐴐𐴝𐴥𐴕𐴃𐴞 𐴁𐴞𐴐𐴞𐴤𐴒𐴡𐴌𐴞 𐴕𐴝𐴎𐴞𐴓𐴢 𐴀𐴡𐴥𐴑.

𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴌 𐴎𐴞𐴕𐴊𐴝 𐴀𐴝𐴐𐴝𐴤

³𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴝𐴓𐴧𐴝 𐴀𐴠𐴊𐴧𐴠 𐴁𐴝𐴉𐴡𐴌 𐴃𐴝𐴦𐴌𐴞𐴉𐴢 𐴀𐴡𐴥𐴑, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴃𐴡 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴞𐴥𐴘𐴡𐴌𐴠 𐴕𐴞𐴎𐴡𐴌 𐴋𐴡𐴣𐴀𐴌 𐴔𐴠𐴀𐴌𐴁𐴝𐴕𐴞𐴘𐴠 𐴀𐴝𐴣𐴀𐴌𐴝𐴌𐴠 𐴕𐴡𐴘𐴝 𐴎𐴡𐴌𐴔𐴡 𐴊𐴞𐴘𐴠𐴥. 𐴇𐴞𐴥𐴘𐴝𐴕𐴠 𐴀𐴝𐴣𐴀𐴌𐴝 𐴀𐴠𐴑𐴧𐴝𐴥𐴕 𐴎𐴞𐴕𐴊𐴝 𐴀𐴝𐴐𐴝𐴤 𐴉𐴝𐴘𐴧𐴞𐴥,⁴𐴀𐴠𐴕𐴊𐴞𐴓𐴧𐴝 𐴔𐴞𐴌𐴝𐴏𐴢 𐴉𐴝𐴘𐴁𐴝𐴌 𐴎𐴞𐴘𐴝𐴥𐴕 𐴉𐴝𐴥𐴕𐴝 𐴕𐴡, 𐴊𐴝𐴑 𐴕𐴡 𐴉𐴡𐴌𐴠, 𐴀𐴠𐴊𐴧𐴠 𐴀𐴡𐴉𐴝𐴥𐴃𐴢 𐴕𐴡. 𐴇𐴠𐴥 𐴔𐴞𐴌𐴝𐴏𐴢 𐴀𐴝𐴏𐴔𐴝𐴕𐴡𐴃𐴢 𐴃𐴟𐴣𐴀𐴝𐴥𐴌𐴝𐴓𐴧𐴝 𐴌𐴝𐴑𐴝𐴤 𐴒𐴞𐴥𐴘𐴠,⁵𐴎𐴠𐴃𐴝𐴌𐴝𐴤 𐴀𐴞𐴔𐴝𐴕𐴡𐴌 𐴀𐴟𐴏𐴞𐴥𐴓𐴝𐴘𐴠 𐴀𐴝𐴓𐴧𐴝𐴌 𐴑𐴟𐴊𐴟𐴌𐴟𐴃𐴠 𐴀𐴡 𐴕𐴠𐴅𐴝𐴃𐴡𐴓𐴧𐴝 𐴈𐴠𐴥𐴉𐴝𐴎𐴡𐴃𐴢 𐴀𐴝𐴏𐴡𐴤 𐴎𐴞𐴘𐴝𐴥𐴕 𐴐𐴠𐴥𐴐𐴢 𐴇𐴝𐴓𐴠 𐴎𐴝𐴇𐴠𐴥𐴌 𐴀𐴡𐴥𐴘 𐴁𐴡𐴓𐴧𐴝 𐴃𐴡𐴘𐴧𐴝𐴌 𐴀𐴝𐴏𐴠𐴤.⁶𐴇𐴠𐴥𐴃𐴡𐴓𐴧𐴝 𐴃𐴡 𐴃𐴟𐴣𐴀𐴝𐴥𐴌𐴝 𐴁𐴞𐴐𐴞𐴤 𐴑𐴟𐴥𐴐𐴞, 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝𐴃𐴧𐴟 𐴑𐴠𐴏𐴧𐴟𐴥 𐴄𐴝𐴙𐴔𐴡𐴓𐴧𐴝 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴀𐴠𐴕𐴃𐴝𐴥𐴕𐴠 𐴊𐴟𐴑 𐴁𐴡𐴌𐴊𐴝𐴐𐴢 𐴒𐴡𐴌𐴝𐴥 𐴉𐴡𐴌𐴠𐴌 𐴊𐴠 𐴀𐴡𐴥𐴘𐴓𐴠 𐴘𐴡.⁷𐴇𐴞𐴥𐴀𐴕 𐴀𐴝𐴘𐴧𐴠𐴤 𐴊𐴠 𐴀𐴠𐴃𐴡𐴓𐴧𐴝𐴤, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕, 𐴎𐴞𐴘𐴝𐴥𐴕 𐴀𐴡𐴦𐴙𐴕 𐴓𐴡𐴘 𐴎𐴝𐴥𐴓𐴝𐴘 𐴒𐴡𐴌𐴞𐴥 𐴁𐴝𐴦𐴊𐴠 𐴘𐴡 𐴁𐴡𐴌𐴁𐴝𐴊𐴢 𐴎𐴝𐴒𐴡𐴥𐴘 𐴊𐴠 𐴐𐴟𐴥𐴕𐴝𐴌 𐴃𐴟𐴥𐴖𐴝𐴌𐴡 𐴑𐴞𐴔𐴡𐴃𐴞, 𐴇𐴞𐴥𐴘𐴝𐴕𐴡𐴌 𐴏𐴝𐴥𐴁𐴟𐴃𐴢 𐴀𐴡𐴥𐴘𐴧𐴝 𐴀𐴝𐴏𐴡𐴥𐴓𐴞𐴘𐴠 𐴎𐴠𐴕 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡 𐴊𐴠 𐴀𐴡𐴑𐴃𐴡𐴥𐴃𐴢 𐴃𐴝𐴦𐴌𐴞𐴉𐴢, 𐴔𐴡𐴈𐴞𐴥𐴔𐴝, 𐴀𐴠𐴊𐴧𐴠 𐴀𐴞𐴎𐴧𐴡𐴃𐴢 𐴀𐴝𐴕𐴠𐴤.⁸𐴃𐴟𐴣𐴀𐴝𐴥𐴌𐴝 𐴃𐴡 𐴀𐴞𐴥𐴁𐴝𐴌𐴠 𐴕𐴡𐴥 𐴊𐴠𐴑𐴡𐴥, 𐴃𐴡𐴀 𐴀𐴞𐴥𐴁𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤; 𐴀𐴝𐴦𐴌 𐴀𐴠𐴇𐴡𐴥𐴕 𐴕𐴡 𐴊𐴠𐴑𐴡𐴥 𐴊𐴠 𐴀𐴡𐴥𐴘𐴓𐴠 𐴘𐴡 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴌𐴝𐴙𐴑𐴧𐴡𐴥, 𐴀𐴠𐴊𐴧𐴠 𐴁𐴡𐴘𐴧𐴝𐴕 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥𐴌 𐴌𐴝𐴀 𐴕𐴝𐴥𐴘 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴀𐴠𐴊𐴧𐴠 𐴒𐴝𐴁𐴞 𐴑𐴟𐴥𐴐𐴞𐴘𐴠 𐴃𐴟𐴣𐴀𐴝𐴥𐴌𐴝 𐴁𐴞𐴐𐴞𐴤 𐴑𐴟𐴥𐴐𐴞,⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴕𐴞𐴎𐴡𐴌 𐴀𐴞𐴔𐴝𐴕𐴡𐴌 𐴕𐴡𐴃𐴞𐴎𐴝 𐴉𐴡𐴀𐴌, 𐴘𐴝𐴥𐴕𐴞 𐴃𐴟𐴣𐴀𐴝𐴥𐴌𐴝𐴌 𐴌𐴟𐴀𐴌 𐴕𐴠𐴅𐴝𐴃𐴢.

¹⁰𐴇𐴠𐴥 𐴕𐴠𐴅𐴝𐴃𐴡𐴌 𐴁𐴝𐴦𐴁𐴟𐴃𐴠 𐴀𐴡 𐴕𐴡𐴁𐴞 𐴀𐴡𐴥𐴑𐴧𐴡𐴓𐴠 𐴊𐴞𐴥𐴘𐴝𐴕𐴠 𐴃𐴝𐴓𐴝𐴐𐴢 𐴀𐴠𐴊𐴧𐴠 𐴃𐴝𐴇𐴝𐴥𐴑𐴞𐴃𐴢 𐴒𐴡𐴙𐴅𐴧𐴞𐴥𐴓𐴢, 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌𐴠 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴡𐴥𐴘𐴁𐴝𐴌 𐴌𐴝𐴇𐴝𐴥𐴔𐴡𐴃𐴡𐴌 𐴁𐴝𐴦𐴁𐴟𐴃𐴠 𐴀𐴝𐴒𐴟𐴕 𐴎𐴝𐴕𐴝𐴀𐴙𐴓𐴢.¹¹𐴀𐴞𐴥𐴃𐴝𐴌𐴝 𐴃𐴝𐴇𐴝𐴥𐴑𐴞𐴃𐴢 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴑𐴞, 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴔𐴡𐴀𐴏𐴞𐴤𐴌 𐴎𐴠 𐴌𐴟𐴀 𐴀𐴝𐴐𐴧𐴞𐴥𐴓𐴢 𐴀𐴞𐴥𐴁𐴝𐴘𐴠 𐴎𐴠𐴣𐴃𐴧𐴠𐴥 𐴔𐴡𐴀𐴏𐴞𐴤𐴌 𐴊𐴟𐴑 𐴉𐴝𐴦𐴌 𐴀𐴠𐴊𐴧𐴠 𐴘𐴝𐴥𐴌𐴁𐴝𐴦𐴊𐴠 𐴔𐴡𐴈𐴞𐴥𐴔𐴝 𐴉𐴝𐴦𐴌 𐴁𐴝𐴦𐴁𐴟𐴃𐴠 𐴎𐴝𐴕𐴝𐴘𐴊𐴠𐴌, 𐴇𐴠𐴥𐴣𐴃𐴧𐴠 𐴀𐴞𐴥𐴁𐴝𐴘𐴠 𐴇𐴡𐴣𐴃𐴧𐴞𐴥𐴘𐴝𐴌𐴡𐴌 𐴀𐴠𐴊𐴧𐴠 𐴇𐴡𐴕 𐴇𐴝𐴥𐴓𐴡𐴃𐴡𐴌 𐴁𐴝𐴦𐴁𐴟𐴃𐴠 𐴀𐴞𐴐𐴝𐴥𐴌𐴝 𐴒𐴡𐴌𐴠𐴥𐴌 𐴊𐴠.¹²𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴘𐴝𐴀𐴕 𐴎𐴝𐴇𐴠𐴥𐴌 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴑𐴞, 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴠𐴥𐴌 𐴊𐴠 𐴕𐴡 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌; 𐴀𐴟𐴀𐴙𐴕 𐴈𐴡𐴀𐴘𐴢 𐴎𐴞𐴀𐴕 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴟𐴘𐴃𐴝𐴌𐴝𐴤 𐴁𐴡𐴘𐴧𐴝𐴕 𐴒𐴡𐴙𐴅𐴧𐴠𐴥 𐴎𐴠𐴃𐴝𐴌𐴝𐴤 𐴀𐴝𐴏𐴔𐴝𐴕𐴡𐴃𐴧𐴟 𐴊𐴞𐴉𐴠𐴍𐴝𐴥 𐴒𐴞𐴥𐴘𐴠 𐴊𐴠 𐴂𐴝𐴑-𐴌𐴟𐴀𐴌 𐴇𐴠𐴥𐴊𐴝𐴘𐴧𐴡𐴃𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥𐴓𐴢; 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝 𐴇𐴠𐴥 𐴏𐴞𐴎𐴢 𐴇𐴞𐴥𐴀𐴕𐴡𐴌 𐴁𐴝𐴦𐴁𐴟𐴃𐴠 𐴎𐴝𐴕𐴞 𐴁𐴡𐴓𐴧𐴝 𐴀𐴝𐴎𐴧𐴟 𐴒𐴡𐴌𐴠𐴥.

𐴂𐴝𐴑 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘𐴁𐴝𐴥𐴌 𐴋𐴝𐴑

¹³𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝𐴌 𐴊𐴠𐴔𐴝𐴑𐴡𐴌𐴠 𐴕𐴝𐴓𐴢 𐴒𐴡𐴌𐴞𐴥 𐴀𐴝𐴦𐴌 𐴀𐴟𐴥𐴣𐴐𐴡𐴃𐴢 𐴃𐴝𐴥𐴑𐴞, 𐴃𐴟𐴣𐴀𐴝𐴥𐴌𐴝𐴌 𐴀𐴝𐴐𐴝𐴤 𐴉𐴟𐴌𐴝𐴉𐴟𐴌𐴞 𐴀𐴡 𐴌𐴝𐴇𐴝𐴥𐴔𐴡𐴃𐴡𐴌 𐴖𐴡𐴌𐴠 𐴌𐴝𐴑𐴡𐴥, 𐴎𐴞𐴘𐴝𐴥𐴕 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡 𐴊𐴠 𐴀𐴡𐴑𐴃𐴡𐴥𐴃𐴢 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴡𐴥𐴘𐴁𐴡.¹⁴𐴉𐴡𐴥𐴌𐴔𐴝𐴊𐴝𐴌 𐴉𐴟𐴀𐴝𐴙𐴕 𐴁𐴡𐴕𐴡, 𐴀𐴝𐴓𐴧𐴝𐴌𐴠 𐴕𐴡𐴥 𐴏𐴞𐴕𐴞𐴥𐴃𐴠 𐴀𐴝𐴒𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴠 𐴁𐴟𐴌𐴝 𐴀𐴝𐴎𐴧𐴟 𐴀𐴡𐴥𐴑𐴧𐴡𐴓𐴢 𐴀𐴝𐴐𐴧𐴞𐴥𐴓𐴢, 𐴇𐴞𐴥𐴀𐴕 𐴔𐴡𐴎𐴞𐴕 𐴕𐴡 𐴏𐴡𐴓𐴞𐴘𐴡𐴥,¹⁵𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴌𐴝𐴌𐴠 𐴋𐴝𐴙𐴑𐴧𐴠𐴥 𐴊𐴠 𐴀𐴞𐴥𐴁𐴝 𐴎𐴠𐴕𐴊𐴞𐴓𐴧𐴝 𐴂𐴝𐴑, 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴕𐴞𐴎𐴡𐴌 𐴇𐴝𐴥𐴀𐴌 𐴏𐴡𐴓𐴝𐴏𐴡𐴓𐴡𐴃𐴢 𐴂𐴝𐴑 𐴁𐴡𐴕𐴡;¹⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴂𐴝𐴑 𐴀𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴂𐴝𐴑.“

¹⁷𐴃𐴟𐴣𐴀𐴝𐴥𐴌𐴝 𐴃𐴡 𐴎𐴞𐴁𐴝𐴤𐴘𐴠 𐴇𐴡𐴕𐴡𐴤 𐴀𐴠𐴑𐴃𐴡𐴌𐴉𐴞𐴥𐴘𐴝 𐴏𐴝𐴥𐴌𐴝 𐴕𐴞𐴎𐴡𐴌-𐴕𐴞𐴎𐴡𐴌 𐴈𐴝𐴔 𐴔𐴡𐴎𐴞𐴕 𐴁𐴞𐴏𐴝𐴌 𐴒𐴡𐴌𐴠𐴥 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴊𐴟𐴖𐴝 𐴒𐴡𐴙𐴃𐴧𐴠𐴤 𐴁𐴝𐴉𐴢 𐴋𐴝𐴑𐴡, 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴀𐴠 𐴉𐴡𐴌𐴁𐴝𐴥𐴐𐴞𐴌 𐴀𐴡𐴑𐴃𐴡𐴥𐴃𐴢 𐴀𐴞𐴥𐴁𐴝𐴌 𐴋𐴡𐴦𐴌 𐴌𐴝𐴑𐴞𐴥 𐴏𐴡𐴓𐴝𐴏𐴡𐴓𐴢 𐴒𐴡𐴌𐴡𐴤;¹⁸𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴎𐴠 𐴁𐴠𐴇𐴝𐴌 𐴏𐴡𐴓𐴝𐴏𐴡𐴓𐴢 𐴔𐴞𐴌𐴝𐴏𐴢 𐴉𐴝𐴀𐴘𐴓𐴝 𐴈𐴠𐴥𐴕𐴃𐴟 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴎𐴝𐴊𐴢 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠, 𐴕𐴝𐴐𐴢 𐴀𐴡𐴥𐴘𐴎𐴝𐴒𐴡𐴘 𐴊𐴠 𐴏𐴞𐴎𐴢 𐴘𐴝𐴥𐴕𐴞 𐴐𐴟𐴥𐴕𐴝-𐴌𐴟𐴉𐴝 𐴓𐴡𐴥𐴘 𐴕𐴡,¹⁹𐴁𐴡𐴥𐴓𐴑𐴠 𐴕𐴞𐴑𐴟𐴥𐴃𐴢 𐴀𐴠𐴊𐴧𐴠 𐴕𐴞𐴊𐴝𐴑 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀𐴌, 𐴘𐴝𐴥𐴕𐴞 𐴔𐴡𐴀𐴏𐴞𐴤𐴌 𐴑𐴞𐴔𐴡𐴃𐴞 𐴓𐴡𐴖𐴢 𐴓𐴡𐴘.²⁰𐴁𐴠𐴐𐴡𐴥𐴑, 𐴀𐴞𐴥𐴁𐴝𐴌𐴠 𐴊𐴟𐴕𐴞𐴘𐴝𐴙𐴌 𐴉𐴡𐴘𐴊𐴝𐴘𐴠𐴐𐴞𐴌 𐴀𐴝𐴒𐴠 𐴓𐴡𐴥𐴃𐴞 𐴁𐴝𐴏𐴞𐴥𐴌𐴝𐴑𐴝 𐴒𐴞𐴥𐴀𐴓𐴢, 𐴔𐴡𐴕𐴃𐴡𐴌 𐴀𐴠 𐴀𐴝𐴇𐴠𐴥𐴌𐴞 𐴎𐴡𐴁𐴝𐴕𐴝𐴃𐴢 𐴃𐴟𐴣𐴀𐴝𐴥𐴌𐴝𐴌 𐴖𐴝𐴏𐴃𐴠𐴥 𐴎𐴝𐴇𐴠𐴥𐴌 𐴒𐴡𐴌𐴝𐴥 𐴒𐴞𐴥𐴘𐴠.²¹𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌 𐴊𐴟𐴖𐴝𐴌𐴝 𐴀𐴠𐴥𐴕𐴝 𐴀𐴝𐴓𐴧𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤, 𐴎𐴞𐴁𐴝𐴤𐴘𐴠 𐴀𐴞𐴥𐴁𐴝𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴞𐴥 𐴔𐴡𐴈𐴞𐴥𐴔𐴝 𐴊𐴞𐴦𐴘𐴠𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕 𐴀𐴠𐴊𐴧𐴠 𐴀𐴝𐴐𐴝𐴤 𐴀𐴝𐴓𐴧𐴝𐴌 𐴖𐴡𐴌𐴠 𐴁𐴠 𐴀𐴡𐴥.

²²𐴃𐴟𐴣𐴀𐴝𐴥𐴌𐴝 𐴏𐴡𐴥𐴘𐴧𐴞𐴌𐴠 𐴔𐴝𐴕𐴞 𐴕𐴞𐴎𐴡𐴌𐴠𐴥 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥𐴉𐴠𐴓𐴝𐴘𐴧𐴡 𐴀𐴞𐴥𐴏𐴝𐴉𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴡𐴓𐴧𐴝 𐴇𐴝𐴥𐴄𐴞 𐴔𐴟𐴇𐴝𐴥𐴁𐴧𐴡𐴃𐴢 𐴉𐴡𐴘𐴊𐴝 𐴀𐴡𐴥𐴘𐴧𐴠, 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴅𐴡𐴏𐴁𐴝𐴌 𐴏𐴝𐴥𐴀𐴣𐴃𐴠 𐴊𐴞𐴓𐴡𐴃𐴧𐴟 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴘𐴡.²³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴕𐴡𐴘𐴝 𐴒𐴡𐴌𐴞 𐴎𐴡𐴌𐴔𐴡 𐴀𐴡𐴥𐴘𐴧𐴡 𐴊𐴠, 𐴕𐴝𐴐𐴢 𐴀𐴡𐴥 𐴊𐴠 𐴁𐴞𐴏𐴡𐴃𐴧𐴟 𐴕𐴡 𐴁𐴡𐴥𐴓𐴑𐴠 𐴕𐴝𐴐𐴢 𐴕𐴡 𐴀𐴡𐴥 𐴊𐴠 𐴁𐴞𐴏𐴢 𐴀𐴡𐴃𐴧𐴟, 𐴘𐴝𐴥𐴕𐴞 𐴀𐴝𐴓𐴧𐴝𐴌 𐴎𐴞𐴕𐴊𐴝 𐴀𐴠𐴊𐴧𐴠 𐴇𐴝𐴥𐴔𐴞𐴐𐴝 𐴎𐴝𐴌𐴞 𐴃𐴝𐴥𐴑𐴠 𐴊𐴠 𐴑𐴝𐴓𐴝𐴔 𐴀𐴡𐴃𐴧𐴟.²⁴𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠,”𐴇𐴝𐴥𐴀𐴌 𐴔𐴡𐴕𐴞𐴐𐴧𐴡𐴥 𐴑𐴠𐴥𐴌𐴡𐴌 𐴋𐴡𐴥𐴙𐴓𐴧𐴝,𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴃𐴝𐴔𐴝𐴥𐴔 𐴌𐴟𐴁𐴢 𐴑𐴠𐴥𐴌𐴒𐴗𐴝 𐴉𐴟𐴥𐴓𐴡𐴌 𐴋𐴡𐴥𐴙𐴓𐴧𐴝.𐴑𐴠𐴥𐴌 𐴉𐴟𐴥𐴖𐴝𐴘𐴎𐴝𐴒𐴡𐴘, 𐴀𐴝𐴦𐴌 𐴉𐴟𐴥𐴓𐴢 𐴎𐴡𐴥𐴌𐴞𐴎𐴝𐴒𐴡𐴘,²⁵𐴔𐴡𐴕𐴃𐴡𐴌 𐴔𐴝𐴁𐴟𐴊𐴡𐴌 𐴑𐴝𐴓𐴝𐴔 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴎𐴝𐴌𐴞 𐴃𐴝𐴥𐴑𐴠.“ 𐴇𐴠𐴥 𐴑𐴝𐴓𐴝𐴔 𐴀𐴡𐴥𐴙𐴓𐴊𐴠 𐴀𐴡 𐴑𐴟𐴥𐴐𐴈𐴡𐴥𐴁𐴡𐴌, 𐴎𐴞𐴘𐴝𐴥𐴕 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴒𐴞𐴥𐴘𐴠.

The Word for the World International

https://app.library.bible/content/87faca8b51c22590