阅读1 𐴉𐴞𐴃𐴡𐴌 2

1 𐴉𐴞𐴃𐴡𐴌2

¹𐴇𐴠𐴥𐴃𐴡𐴓𐴧𐴝, 𐴇𐴝𐴥𐴀𐴌 𐴊𐴟𐴐𐴧𐴡𐴕𐴞, 𐴇𐴝𐴥𐴀𐴌 𐴊𐴟𐴥𐴑𐴝𐴁𐴝𐴎𐴞, 𐴔𐴟𐴕𐴝𐴉𐴠𐴥𐴑𐴞, 𐴌𐴞𐴐𐴝𐴥𐴌𐴞𐴐𐴞, 𐴀𐴠𐴊𐴧𐴠 𐴒𐴞𐴉𐴡𐴃𐴢 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴡𐴥𐴃𐴧𐴟 𐴊𐴟𐴌 𐴒𐴡𐴌𐴞𐴥𐴉𐴠𐴓𐴡,²𐴀𐴝𐴦𐴌 𐴕𐴡𐴘𐴝-𐴕𐴡𐴘𐴝 𐴎𐴡𐴌𐴔𐴡 𐴀𐴡𐴥𐴘𐴧𐴝 𐴉𐴟𐴀𐴝𐴙𐴕 𐴊𐴡𐴌 𐴋𐴡𐴥𐴙𐴓𐴧𐴝 𐴃𐴟𐴣𐴀𐴝𐴥𐴌𐴝 𐴌𐴟𐴀𐴈𐴝𐴥𐴕𐴞𐴌 𐴇𐴝𐴥𐴄𐴞 𐴊𐴟𐴊𐴢 𐴇𐴝𐴥𐴘 𐴁𐴡𐴓𐴧𐴝 𐴀𐴝𐴎𐴧𐴟 𐴒𐴡𐴌𐴡𐴤, 𐴎𐴠𐴀𐴕𐴠 𐴇𐴞𐴥𐴀𐴕𐴡𐴌 𐴎𐴡𐴌𐴞𐴘𐴝 𐴃𐴟𐴣𐴀𐴝𐴥𐴌𐴝 𐴕𐴠𐴅𐴝𐴃𐴡𐴓𐴧𐴝 𐴁𐴝𐴌𐴝𐴤𐴃𐴢 𐴃𐴝𐴥𐴑𐴡,³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴔𐴝𐴓𐴞𐴑𐴡𐴌 𐴔𐴠𐴀𐴌𐴁𐴝𐴕𐴞𐴌 𐴔𐴡𐴎𐴝 𐴉𐴝𐴘𐴉𐴠𐴓𐴝𐴘𐴧𐴡.

𐴎𐴞𐴕𐴊𐴝 𐴉𐴝𐴃𐴧𐴡𐴥𐴌 𐴀𐴠𐴊𐴧𐴠 𐴂𐴝𐴑 𐴑𐴡𐴖𐴔

⁴𐴀𐴞𐴥𐴁𐴝𐴌 𐴇𐴝𐴣𐴏𐴠, 𐴘𐴝𐴥𐴕𐴞 𐴇𐴠𐴥 𐴎𐴞𐴕𐴊𐴝 𐴉𐴝𐴃𐴧𐴡𐴥𐴌 𐴎𐴞𐴁𐴝𐴤𐴌𐴠 𐴔𐴝𐴙𐴕𐴐𐴠𐴥 𐴀𐴞𐴕𐴑𐴝𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴠 𐴔𐴡𐴕𐴃𐴡𐴌 𐴀𐴝𐴓𐴧𐴝𐴌 𐴁𐴝𐴏𐴞𐴥𐴓𐴡𐴘𐴧𐴝 𐴀𐴠𐴊𐴧𐴠 𐴑𐴞𐴔𐴡𐴃𐴢 𐴀𐴡𐴓𐴝, 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴘𐴧𐴡𐴤𐴕𐴠,⁵𐴃𐴟𐴣𐴀𐴝𐴥𐴌𐴝𐴌𐴠 𐴘𐴡𐴥 𐴎𐴞𐴕𐴊𐴝 𐴉𐴝𐴃𐴧𐴡𐴥𐴌 𐴀𐴡𐴥𐴑𐴧𐴡𐴓𐴢 𐴀𐴞𐴥𐴏𐴝𐴉𐴠 𐴀𐴠𐴑𐴧𐴝𐴥𐴕 𐴌𐴟𐴀𐴈𐴝𐴥𐴕𐴞𐴌 𐴒𐴡𐴥𐴌 𐴁𐴝𐴕𐴝 𐴎𐴝𐴌, 𐴎𐴠𐴀𐴕𐴠 𐴂𐴝𐴑 𐴀𐴞𐴔𐴝𐴔 𐴁𐴡𐴕𐴞 𐴃𐴟𐴣𐴀𐴝𐴥𐴌𐴝 𐴌𐴟𐴀𐴈𐴝𐴥𐴕𐴞𐴌 𐴀𐴠𐴕𐴊𐴞𐴓𐴧𐴝 𐴑𐴟𐴌𐴁𐴝𐴕𐴞 𐴀𐴡𐴥𐴑𐴧𐴡𐴓𐴢 𐴂𐴠𐴦𐴐𐴢 𐴒𐴡𐴌𐴡𐴤, 𐴎𐴞𐴀𐴕 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴀𐴝𐴓𐴧𐴝𐴘𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥.⁶𐴇𐴠𐴥𐴃𐴡𐴓𐴧𐴝 𐴃𐴡 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,”𐴏𐴡𐴀, 𐴀𐴝𐴀𐴛 𐴏𐴞𐴥𐴘𐴡𐴕𐴡𐴃𐴢 𐴀𐴠𐴒𐴧𐴗𐴝𐴤 𐴉𐴝𐴃𐴧𐴡𐴥𐴌 𐴌𐴝𐴑𐴞𐴥𐴌,𐴁𐴝𐴏𐴞𐴥𐴓𐴡𐴘𐴧𐴝 𐴀𐴠𐴊𐴧𐴠 𐴑𐴞𐴔𐴡𐴃𐴢 𐴀𐴡𐴓𐴝 𐴑𐴟𐴕𐴝𐴌-𐴉𐴝𐴃𐴧𐴡𐴥𐴌.𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤𐴁𐴡,𐴘𐴡𐴥𐴒𐴧𐴗𐴝 𐴁𐴞𐴓𐴑𐴟𐴥𐴓𐴢 𐴐𐴡𐴥𐴌𐴔𐴞𐴕𐴊𐴝 𐴕𐴡 𐴀𐴡𐴥𐴘𐴁𐴡.“

⁷𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤 𐴃𐴟𐴣𐴀𐴝𐴥𐴌𐴝𐴓𐴧𐴝 𐴇𐴠𐴥 𐴉𐴝𐴃𐴧𐴡𐴥𐴌 𐴑𐴞𐴔𐴡𐴃𐴢 𐴀𐴡𐴓𐴝, 𐴔𐴡𐴕𐴃𐴡𐴌 𐴎𐴠𐴃𐴝𐴌𐴝𐴤 𐴀𐴞𐴔𐴝𐴕 𐴕𐴟𐴥 𐴀𐴝𐴕𐴠𐴤 𐴀𐴞𐴥𐴃𐴝𐴌𐴝𐴓𐴧𐴝 𐴘𐴝𐴀𐴕 𐴇𐴝𐴥𐴙𐴄𐴧𐴠:”𐴎𐴠 𐴉𐴝𐴃𐴧𐴡𐴥𐴌 𐴔𐴞𐴏𐴃𐴞𐴥𐴌𐴞 𐴀𐴡𐴥𐴑𐴧𐴡𐴓𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴠,𐴘𐴞𐴥𐴁𐴝 𐴉𐴝𐴃𐴧𐴡𐴥𐴌 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴎𐴡𐴌𐴟𐴌𐴞 𐴖𐴝 𐴀𐴡𐴥𐴘𐴒𐴞𐴘𐴡𐴘,“

⁸𐴘𐴝𐴀𐴕 𐴀𐴡𐴥:”𐴘𐴞𐴁𐴝𐴤 𐴀𐴠𐴒𐴧𐴗𐴝𐴤 𐴀𐴟𐴅𐴝𐴥𐴄𐴢 𐴇𐴝𐴥 𐴊𐴠 𐴉𐴝𐴃𐴧𐴡𐴥𐴌,𐴀𐴠𐴊𐴧𐴠 𐴉𐴡𐴌𐴝𐴁𐴝 𐴊𐴠 𐴀𐴠𐴒𐴧𐴗𐴝𐴤 𐴐𐴞𐴥𐴓𐴢.“ 𐴀𐴞𐴥𐴃𐴝𐴌𐴝 𐴀𐴟𐴅𐴝𐴥𐴄𐴢 𐴇𐴝𐴥 𐴊𐴠 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴀𐴞𐴥𐴃𐴝𐴌𐴝 𐴑𐴝𐴓𐴝𐴔 𐴀𐴝𐴔𐴡𐴥𐴓𐴢 𐴕𐴡 𐴒𐴡𐴌𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴇𐴞𐴥𐴘𐴝𐴕𐴡𐴓𐴧𐴝 𐴁𐴠 𐴄𐴞𐴥𐴑 𐴒𐴡𐴌𐴝𐴥 𐴒𐴞𐴥𐴘𐴠.

⁹𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴠𐴒𐴧𐴗𐴝𐴤 𐴁𐴝𐴏𐴞𐴥𐴓𐴡𐴘𐴧𐴝 𐴕𐴡𐴏𐴡𐴥𐴓𐴢, 𐴁𐴝𐴀𐴣𐴐𐴧𐴝𐴌 𐴀𐴞𐴔𐴝𐴔, 𐴂𐴝𐴑 𐴑𐴡𐴗𐴔, 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴕𐴞𐴎𐴡𐴌 𐴈𐴝𐴥𐴀𐴏𐴢 𐴁𐴡𐴕𐴊𐴝, 𐴎𐴠𐴀𐴕𐴠 𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴕𐴊𐴝𐴤𐴌𐴡𐴃𐴧𐴟 𐴕𐴞𐴎𐴡𐴌 𐴃𐴝𐴦𐴅𐴟𐴙𐴂𐴧𐴝 𐴉𐴡𐴀𐴌𐴡𐴃𐴢 𐴋𐴝𐴈𐴝𐴘 𐴀𐴝𐴙𐴕𐴧𐴠𐴤 𐴀𐴞𐴥𐴁𐴝𐴌 𐴑𐴟𐴊𐴟𐴌𐴟𐴃𐴞 𐴈𐴝𐴔𐴡𐴌 𐴁𐴡𐴘𐴧𐴝𐴕 𐴒𐴡𐴌𐴡𐴤.¹⁰𐴀𐴠𐴑 𐴇𐴝𐴓𐴠 𐴃𐴡 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴔𐴝𐴕𐴟𐴥𐴙𐴐𐴢 𐴕𐴟 𐴀𐴝𐴐𐴧𐴞𐴥𐴓𐴝, 𐴔𐴡𐴕𐴃𐴡𐴌 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌 𐴔𐴝𐴕𐴟𐴥𐴙𐴐𐴢; 𐴀𐴝𐴒𐴠 𐴃𐴟𐴣𐴀𐴝𐴥𐴌𐴝 𐴌𐴝𐴇𐴝𐴥𐴔 𐴕𐴡𐴥 𐴉𐴡𐴦, 𐴔𐴡𐴕𐴃𐴡𐴌 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴌𐴝𐴇𐴝𐴥𐴔 𐴉𐴝𐴘𐴧𐴡𐴥.

𐴀𐴝𐴓𐴧𐴝𐴌 𐴒𐴟𐴓𐴝𐴔 𐴀𐴞𐴥𐴏𐴝𐴉𐴠 𐴎𐴞𐴕𐴊𐴞𐴒𐴞 𐴈𐴝𐴍𐴡

¹¹𐴀𐴡𐴥 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥𐴌, 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌𐴠𐴥 𐴁𐴞𐴊𐴠𐴐𐴞𐴥 𐴀𐴠𐴊𐴧𐴠 𐴉𐴡𐴌𐴁𐴝𐴥𐴐𐴞 𐴁𐴟𐴎𐴞𐴥 𐴅𐴞𐴏𐴞𐴥𐴔𐴞 𐴀𐴝𐴎𐴧𐴟 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴝𐴏𐴞 𐴃𐴝𐴥𐴑𐴡, 𐴎𐴞𐴀𐴕𐴠 𐴌𐴟𐴀 𐴓𐴡𐴥𐴘 𐴓𐴝𐴌𐴝𐴥𐴘 𐴒𐴡𐴌𐴠𐴥.¹²𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴃𐴟𐴣𐴀𐴝𐴥𐴌𐴝𐴌 𐴏𐴡𐴓𐴝𐴏𐴡𐴓𐴢 𐴄𐴞𐴥𐴑 𐴌𐴝𐴙𐴑𐴧𐴡, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴁𐴟𐴌𐴝𐴘-𐴒𐴡𐴌𐴡𐴤𐴘𐴝 𐴇𐴡𐴘 𐴀𐴠𐴓𐴎𐴝𐴔 𐴓𐴝𐴒𐴝𐴘𐴓𐴠𐴥 𐴘𐴡, 𐴃𐴟𐴣𐴀𐴝𐴥𐴌𐴝𐴌 𐴁𐴝𐴥𐴓𐴝 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴊𐴠𐴑𐴞𐴥 𐴇𐴞𐴥𐴀𐴕𐴡𐴌 𐴎𐴡𐴌𐴞𐴘𐴝, 𐴀𐴝𐴓𐴧𐴝 𐴀𐴝𐴘𐴁𐴝𐴤𐴌 𐴊𐴞𐴕 𐴀𐴞𐴥𐴁𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴠𐴥.

¹³𐴔𐴝𐴓𐴞𐴑𐴡𐴌 𐴖𐴝𐴏𐴃𐴠𐴥 𐴕𐴞𐴎𐴡𐴌𐴠𐴥 𐴇𐴝𐴥𐴀𐴌 𐴀𐴞𐴕𐴏𐴝𐴥𐴕𐴞 𐴇𐴡𐴥𐴑𐴟𐴔𐴡𐴃𐴡𐴃𐴢 𐴒𐴡𐴏𐴝𐴥𐴘𐴊𐴡: 𐴀𐴞𐴥𐴁𐴝 𐴁𐴝𐴀𐴣𐴐𐴧𐴝 𐴀𐴡𐴥𐴑 𐴎𐴞𐴁𐴝𐴤 𐴖𐴡𐴌𐴡𐴌 𐴃𐴡𐴑𐴧𐴝𐴃𐴢,¹⁴𐴘𐴝𐴥 𐴇𐴝𐴥𐴑𐴞𐴔 𐴀𐴡𐴥𐴑𐴧𐴡𐴓𐴢, 𐴎𐴠𐴃𐴝𐴌𐴝𐴤𐴌𐴠 𐴁𐴝𐴀𐴣𐴐𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴊𐴞𐴉𐴠𐴍𐴝𐴥 𐴎𐴝 𐴊𐴠, 𐴁𐴟𐴌𐴝𐴘 𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌𐴠 𐴏𐴝𐴥𐴣𐴎𐴝 𐴊𐴞𐴥 𐴁𐴡𐴓𐴧𐴝 𐴀𐴝𐴦𐴌 𐴁𐴝𐴥𐴓𐴝 𐴈𐴝𐴔 𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌𐴠 𐴃𐴝𐴦𐴌𐴞𐴉𐴢 𐴒𐴡𐴌𐴞𐴥 𐴁𐴡𐴓𐴧𐴝.¹⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴀𐴡𐴥𐴙𐴓𐴊𐴠 𐴇𐴞𐴥𐴘𐴝𐴕, 𐴃𐴟𐴣𐴀𐴝𐴥𐴌𐴝 𐴎𐴠𐴕 𐴁𐴝𐴥𐴓𐴝 𐴈𐴝𐴔 𐴒𐴡𐴌𐴞𐴥 𐴁𐴠𐴑𐴟𐴉𐴢 𐴀𐴡𐴥𐴑𐴧𐴡𐴓𐴡𐴌 𐴀𐴝𐴉𐴝𐴥𐴍𐴝𐴙𐴚𐴒𐴝 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴕𐴞𐴎𐴝𐴥𐴔 𐴒𐴡𐴌𐴞𐴥𐴉𐴠𐴓𐴝𐴘 𐴉𐴝𐴌𐴡.¹⁶𐴀𐴝𐴎𐴝𐴊𐴢 𐴉𐴝𐴘𐴧𐴝𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴎𐴞𐴕𐴊𐴞𐴒𐴞 𐴈𐴝𐴍𐴡, 𐴔𐴡𐴕𐴃𐴡𐴌 𐴕𐴞𐴎𐴡𐴌 𐴀𐴝𐴎𐴝𐴊𐴞𐴌𐴠 𐴁𐴟𐴌𐴝𐴙𐴌 𐴒𐴟𐴥𐴌𐴡𐴕𐴞 𐴀𐴞𐴥𐴏𐴝𐴉𐴠 𐴀𐴠𐴏𐴃𐴠𐴔𐴝𐴓𐴢 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴀𐴝𐴓𐴧𐴝𐴌 𐴒𐴟𐴓𐴝𐴔 𐴀𐴞𐴥𐴏𐴝𐴉𐴠 𐴒𐴡𐴙𐴅𐴧𐴡𐴥.¹⁷𐴁𐴠𐴒𐴧𐴟𐴥𐴕𐴡𐴌𐴠 𐴀𐴞𐴎𐴧𐴡𐴃𐴢 𐴒𐴡𐴙𐴅𐴧𐴡𐴥; 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴡𐴥; 𐴀𐴝𐴓𐴧𐴝𐴌 𐴋𐴡𐴦𐴌 𐴌𐴝𐴙𐴑𐴧𐴡; 𐴁𐴝𐴀𐴣𐴐𐴧𐴝𐴌𐴠 𐴀𐴞𐴎𐴧𐴡𐴃𐴢 𐴒𐴡𐴙𐴅𐴧𐴡𐴥.

𐴔𐴡𐴀𐴏𐴞𐴤𐴌 𐴊𐴟𐴑 𐴉𐴝𐴦𐴌 𐴔𐴠𐴀𐴏𐴝𐴓𐴢

¹⁸𐴒𐴟𐴓𐴝𐴔 𐴀𐴡𐴥𐴑𐴧𐴡𐴓𐴢, 𐴉𐴟𐴌𐴝𐴉𐴟𐴌𐴞 𐴀𐴞𐴎𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴕𐴞𐴎𐴡𐴌𐴠𐴥 𐴕𐴞𐴎𐴡𐴌 𐴒𐴞𐴌𐴡𐴥𐴏𐴡𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴡, 𐴏𐴞𐴌𐴞𐴥𐴉𐴢 𐴒𐴡𐴔 𐴀𐴠𐴊𐴧𐴠 𐴐𐴞𐴥𐴊𐴝 𐴒𐴟𐴥𐴕𐴡𐴌 𐴇𐴝𐴣𐴏𐴠 𐴕𐴡, 𐴁𐴡𐴥𐴓𐴑𐴠 𐴒𐴝𐴥𐴀𐴣𐴌 𐴒𐴟𐴥𐴕𐴡𐴌 𐴇𐴝𐴣𐴏𐴠 𐴘𐴡𐴥.¹⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴝𐴀𐴕 𐴃𐴡 𐴌𐴝𐴇𐴝𐴥𐴔𐴡𐴃𐴡𐴌 𐴓𐴝𐴦𐴘𐴠𐴑, 𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴕𐴞𐴎𐴡𐴌 𐴑𐴞𐴥𐴘𐴝𐴓𐴡𐴃𐴢 𐴀𐴝𐴓𐴧𐴝𐴌𐴠 𐴌𐴝𐴑𐴞𐴥 𐴕𐴝𐴀𐴞𐴕𐴏𐴝𐴥𐴉𐴞 𐴊𐴟𐴑𐴡𐴌 𐴃𐴡𐴑𐴡𐴓𐴞𐴉𐴢 𐴁𐴡𐴌𐴊𐴝𐴐𐴢 𐴒𐴡𐴌𐴠𐴥.²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴈𐴡𐴏𐴟𐴥𐴌𐴞 𐴒𐴡𐴌𐴡𐴤𐴕𐴠 𐴉𐴞𐴍𐴝 𐴈𐴡𐴥𐴀 𐴊𐴠 𐴇𐴞𐴥𐴀𐴕 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴁𐴡𐴌𐴊𐴝𐴐𐴢 𐴒𐴡𐴌𐴡𐴤, 𐴇𐴞𐴥𐴘𐴝𐴕𐴡𐴃𐴢 𐴑𐴞𐴦 𐴏𐴟𐴥𐴖𐴝𐴁𐴢 𐴀𐴝𐴏𐴠𐴤؟ 𐴔𐴡𐴕𐴃𐴡𐴌 𐴎𐴡𐴊𐴞 𐴏𐴡𐴥𐴘𐴧𐴞 𐴒𐴝𐴥𐴕 𐴒𐴡𐴌𐴞𐴥 𐴊𐴟𐴑 𐴉𐴡𐴦 𐴊𐴠 𐴇𐴞𐴥𐴀𐴕 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴁𐴡𐴌𐴊𐴝𐴐𐴢 𐴒𐴡𐴌𐴡𐴤, 𐴇𐴞𐴥𐴘𐴝𐴕 𐴃𐴡 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴌𐴝𐴇𐴝𐴥𐴔𐴡𐴃𐴡𐴌 𐴓𐴝𐴦𐴘𐴠𐴑.²¹𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴃𐴡𐴓𐴧𐴝𐴤 𐴀𐴠𐴥𐴕𐴝 𐴋𐴝𐴑𐴝 𐴒𐴞𐴘𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤𐴘𐴠 𐴃𐴡 𐴃𐴟𐴣𐴀𐴝𐴥𐴌𐴝𐴓𐴧𐴝 𐴊𐴟𐴑 𐴉𐴝𐴘 𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴌𐴝𐴑𐴞𐴥 𐴒𐴞𐴥𐴘𐴠, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌 𐴈𐴝𐴛𐴘𐴠-𐴈𐴝𐴛𐴘𐴠 𐴏𐴡𐴓𐴡.²²𐴀𐴞𐴥𐴁𐴝𐴘𐴠 𐴕𐴡 𐴇𐴡𐴕𐴡𐴤 𐴒𐴟𐴕𐴝𐴤 𐴒𐴡𐴙𐴅𐴧𐴠𐴥,𐴀𐴝𐴦𐴌 𐴕𐴡 𐴀𐴞𐴥𐴁𐴝𐴌 𐴔𐴟𐴑𐴡𐴃𐴢 𐴇𐴡𐴕𐴡𐴤 𐴉𐴠𐴥𐴌𐴡𐴑𐴁𐴝𐴎𐴞 𐴉𐴝𐴦 𐴒𐴞𐴘𐴠𐴥.

²³𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴘𐴠 𐴒𐴝𐴙𐴓𐴢 𐴇𐴝𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴀𐴟𐴎𐴝𐴕 𐴒𐴝𐴙𐴓𐴢 𐴕𐴡𐴥 𐴊𐴠; 𐴀𐴝𐴦𐴌 𐴎𐴠𐴣𐴃𐴧𐴠𐴥 𐴊𐴟𐴑 𐴉𐴝𐴘𐴧𐴠𐴥, 𐴀𐴞𐴥𐴁𐴝𐴘𐴠 𐴊𐴡𐴥𐴔𐴑𐴞 𐴕𐴡𐴥 𐴊𐴠, 𐴁𐴡𐴥𐴓𐴑𐴠 𐴀𐴞𐴕𐴏𐴝𐴥𐴉𐴢 𐴁𐴞𐴏𐴝𐴌 𐴒𐴡𐴌𐴠𐴥 𐴊𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴕𐴞𐴎𐴡𐴌𐴠𐴥 𐴒𐴡𐴏𐴝𐴥𐴘𐴊𐴞𐴘𐴠.²⁴𐴀𐴝𐴦𐴌 𐴕𐴞𐴎𐴠 𐴀𐴝𐴣𐴀𐴌𐴝𐴌 𐴒𐴟𐴕𐴝𐴤𐴌𐴠 𐴀𐴞𐴥𐴁𐴝𐴌 𐴒𐴝𐴦𐴃𐴢 𐴒𐴡𐴌𐴞 𐴓𐴡𐴦𐴘𐴢 𐴑𐴟𐴥𐴌𐴟𐴐𐴡𐴃𐴢 𐴓𐴡𐴘𐴒𐴞𐴘𐴠𐴥, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴒𐴟𐴕𐴝𐴤𐴃𐴧𐴟 𐴔𐴡𐴌𐴞 𐴉𐴡𐴌𐴇𐴠𐴥𐴏𐴒𐴝𐴌𐴞𐴓𐴧𐴝 𐴁𐴝𐴏𐴞 𐴃𐴝𐴥𐴑𐴞. 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌 𐴎𐴡𐴈𐴡𐴥𐴔𐴠 𐴁𐴠 𐴒𐴡𐴔 𐴀𐴡𐴥𐴘𐴧𐴡.²⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴋𐴡𐴥𐴙𐴓𐴧𐴝 𐴃𐴟𐴣𐴀𐴝𐴥𐴌𐴝 𐴃𐴡 𐴒𐴡𐴓𐴧𐴡𐴃𐴢 𐴌𐴝𐴏𐴃𐴝𐴃𐴢 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢; 𐴔𐴡𐴕𐴃𐴡𐴌 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌 𐴏𐴡𐴌𐴡𐴘𐴝 𐴀𐴠𐴊𐴧𐴠 𐴌𐴟𐴀𐴌 𐴏𐴝𐴀𐴏𐴞𐴃𐴝-𐴒𐴡𐴌𐴡𐴤𐴘𐴝𐴌 𐴇𐴝𐴣𐴏𐴠 𐴉𐴞𐴥𐴌𐴞 𐴀𐴝𐴘𐴒𐴞𐴘𐴡𐴒𐴡𐴥𐴘.

The Word for the World International

https://app.library.bible/content/87faca8b51c22590