Nehemia8
1Now ranit la kung kowi dow maru maten mih Tui Tapplawt pur kowi kowh akuangma mih arah kowi takua talawm khai. Nakhowk khe amatni dow Israeluüa vüi Mosi kowi CHAKRAMANG peah mih ari aiang bowih nauang pawla kownkow kawngmu sara Ezra kowi tek pe khai.2Now ranit la kowi kowh lacher pani khe dow uamow Ezra mih masiuüa kachakuüa hai sünta kowh tukta miuüa maten pur kowi ari aiang bowih mih uang pawla khai bowt.3Now nami ari aiang bowih mih maru kawmuüa kowi naphat pe kownkow Ezra dow singh hown kowh thawpah mih prowng kowi kowphüt khai bowt. Nakhowk khe aia kowh iowng rah dow alowngma chekhai rakowi aia kowi dow maru kawmuüa khi-ah bowk chekhai. Aia dow Tui Tapplawt re-e kowh akuangma mih arah kowi masiuüa kachakuüa hai sünta kowh tukta mih maru maten pra dangah hanow rauchow hownia sat downg mowr nami bowih mih phat pe khai, now maru kawmuüa maten dow süngürma hown sünta rimrim khai. Nami bowih aia lowt mih khin khe maru kawmuüa maten dow awr iowng khai. Nakhowk khe aia dow CHAKRAMANG lang kri lang kraing mih Thurai kowi rowsiah khai, now maru kawmuüa dow chawk rut se tek mih, “Amen! Amen!” pakhai. Nami kung kowi dow krawng kowi tabawkah krawm hanow CHAKRAMANG kowi chupah büah khai. Nami khin khe aia hawmlawm prakowi iowng miuüa dow Matithia, Sema, Anaia, Uria, Hilkia hai Maseia büah chekhai, now aia lakuai prakowi iowng miuüa dow Pedaia, Misael, Malkija, Hasum, Hasbadana, Zekaria hai Mesulam büah chekhai.7Nami khin khe Levi chenchap hownia kowh Jesua, Bani, Serebia, Jamin, Akub, Sabethai, Hodia, Maseia, Kelita, Azaria, Jozabad, Hanan hai Pelaia büah dow ari aiang lawnguan kowi nami re-e kowh iowng mih maru-uüa kowi tüngsangah khai.8Ezra phat pe mih Thurai kowh ari aiang bowih dow maru kawmuüa pacham tukta lah pakowh amatni phat pe hanow nami auan phuang pe khai.9Nami kung kowi dow pren kruitown mih Nehemia, uamow hai kawngmu sara Ezra hown maru kowi tüngsang mih Leviuüa tek pe maru kawmuüa mih, “Ani kowh ni dow CHAKRAMANG a-i kowh Thurai vüi chimsaima chekhai. Naiawng rakowi kar hai nguk hown miapaw hang uowi büa diah,” pakhai. Tawngplawng kowchow panow maru kawmuüa mih ari aiang laiklow tata hanow kar bowk khai.10Maru kawmuüa kowi Nehemia tek pe mih, “Kim kowi kowpowt büah hanow chak iung kham iung kowcha kowkham büa diah, now cha kown kham kown ka dowi miuüa kowi enni kowh chakkham retla pe büa diah. Ani kowh ni dow a-i kowh CHAKRAMANG vüi chimsaima chekhai. Naiawng rakowi hang sak piak büa diah. Tawngplawng kowchow panow CHAKRAMANG pe mih awmrawmra dow enni kowh kürra chekhai,” pakhai.11Now maru kawmuüa kowi Leviuüa paw tawi tek pe mih, “Ririmma uowi büa diah. Tawngplawng kowchow panow ani kowh ni dow chimsaima chekhai. Hangkow sak piak büa diah,” pakhai.12Nahanow maru kawmuüa dow awmrawmma hown nacha nakham kownkow hai ka dowi miuüa kowi naretla pe chakkham kownkow chowlowkkow kim kowi powt khai bowt. Tawngplawng kowchow panow amatni kowi tek pe mih laiklow maten dow tukta büah bowk khowk chekhai.13Now nami la kowi kowh lacher pre ni khe dow chowlowkkow krungchak aluchowuüa, uamowuüa hai Leviuüa mih ari aiang klangiungma natukla kownkow kawngmu sara Ezra tut-e uang takua talawm khai.14Nakhowk khe amatni dow Mosi kowi kowh CHAKRAMANG peah mih ari aiang bowih kowi tawng chow arui uowi mih khi büah khai. Nakowi arui uowi mih, “Ranit la kowi kowh pawi khe dow Israeluüa mih te kowi nauowi kown.15Now amatni kowh kua maten hai Jerusalem marow kowi nakrawi chia nakrawi phuang büah kown mih, ‘Ari aiang kowi arui uowi iawng enni mih hungma mawngma süng kowi cham krawi kowi büa diah, now nathawpla te kownkow kimtawn kanrawn hai kaurawng kanrawn mia, naingsa singh mia, chekmarawng singh mia hai aram chakma mih singh mia uang pawla büa diah,’ napa kown,” pakhai.16Naiawng rakowi maru kawmuüa dow cham krawi kowi hanow uang pawla singh mia khai bowt. Now tawngbak mih dow amatni kowh kimluk kowi, tawngbak mih dow amatni kowh viadawng kowi, tawngbak mih dow Thurai chup kim viadawng kowi, tawngbak mih dow Tui Tapplawt re-e kowh akuangma mih arah kowi, tawngbak mih dow Efraim Tapplawt re-e kowh akuangma mih arah kowi amatni vüi thawp te khai.17Cham takhangra hownia kowh uang plan mih maten dow thawp te büah hanow naiawngün te kowi uowi büah khai. Nun kowh chapa Josua chowng hownia nami ni mowr Israeluüa mih naiawng chang dowi bowt chekhai. Nami ni dow amatni mih lainowmma piaw khai.18Pawi uown ni hownia pawi chur ni mowr Ezra dow ni towng Thurai kowh ari aiang bowih maru kawmuüa kowi phat pe khai. Amatni dow ranit ni mowr nami pawi sun büah khai, now raiat ni mih ni khe dow ari aiang kowi uowi iawng amülüng mih takua talawmra khin sunah büah khai.
The Seed Company