Ezekiel38
1Akung kowi CHAKRAMANG laiklow dow ang tut-e uang ting khai. Aia tek ang mih,2“Aw maru chapa, Magawg pren kowi kowh Mesek hai Tubal chenchap kowh kruitown mih Gawg prakowi dangah now pur prakowi nauang ting kown mih lawnguan maiawng kowtek pe diah:3CHAKRAMANG tek mih, ‘Aw Mesek hai Tubal pren kowi kowh kruitown mih Gawg, ang dow en kowh ransu chekhai.4Kung prakowi ang naui en hanow kuai kowi kowh dam tauowk iawng en kowh kammow kowi auowk müa hown ang nauowk en kown. Now en kowh siphai hawmh maten hown, kawrnga hawmh, klangiungma mih tawnguat khupma mih kawrnga luk kowi kowh chowm mih siphai hawmh, aiukma mih hai asowmchow mih kawngma hai saidawng hailawm thumchak aiukma Israel pren kowi ang nauang lawtla en kown.5Enni hown Persia, Ethiawpia hai Libia pren siphaiuüa kowi paw ang nauang pawla kown. Amatni dow kawngma dowkma hai lukruk krukma kangowh naown kown.6Nami klen kowi Gomer pren siphaiuüa hai tawngphak pra kowh prenchur rihi kowi uowi mih Bet-Togarma pren siphaiuüa kowi paw en hown ang nauang pawla kown. Naiawng en hown chenchap ahuma nauang tawi kown.7“‘En mih kamrütma hown uowi diah. En hai en riaret kowi kowh uang tawi takua mih enni bowkbowk kamrüt büa diah, now en mih amatni kowh siphai aluchow chowng diah.8Ning ahuma rawn kung kowi nasen Israel kownkow ang nahaw en kown. Nakhowk khe Israel dow tasenra hownia tanai kowh thaulangma nauowi kown. Nami pren kowi kowh maru-uüa dow chenchap ahuma mih pungmadawng hownia uang plan hanow Israel pren kowi kowh hungma mawngma kowi uang takua talawm miuüa chekhai.9En hai en kowh siphaiuüa maten hai en hown kowh akeng chenchapuüa mih nami pren nakowsen kownkow liku iawng nakowtarü kown. Nami pren kowi mih uangnim iawng enni nakowtaluk khup kown.10“‘Nami ni khe dow en sak kowi mih tuakra ahuma nauang ting kown, now sangkrangra ngak en nathawp kown.11Nakhowk khe mih tap uowi dowi mih kua hai marow nakrawi sen kown mih en nakamrüt kown. Tap, tapplawt hai tapplawt klia uowi dowi kowi tuak krat pusa uowi dowi hai thaulangma uowi mih maru-uüa kowi en nakrawi sen kown.12Apiaknama mih kowi rawta kaneu mih pren hai akeng chenchap hownia kowh uang plan mih chenchapuüa kowi en nasenah kown, now amatni kowh dawngthawnguan mih en nakrawi paw kown. Tawngplawng kowchow panow amatni dow kurengma chekhai, now amatni kowh pren dow palusama kowi kowh lang pankri mih chekhai.13“‘Nakhowk khe Seba, Dedan hai Tarsis pren kowi kowh kun chang miuüa natek en kown mih, “En uang rup uanh kownkow en uang mih bow? Now kuh, tai, tawncher, dawngthawnguan hai akeng uanh nauang rup kownkow en kua maru kawm mih bow?” napa kown,’ pakhai.14“Naiawng rakowi aw maru chapa, Gawg kowi mami laiklow kowtek pe diah. Aia kowi en natek pe kown mih maiawng: CHAKRAMANG tek mih, ‘Ang kowh maru-uüa thaulangma uowi mih en nakhi kown. Nakhowk khe amatni kowi nasenah kownkow en nakamrüt kown.15Tawngphak pra kowh pren sünghi kowi en kowh uowi rah hownia en hai en hown kowh akeng chenchapuüa mih kawrnga luk kowi chowm hanow thumchak aiukma hai akürma enni nauang kown.16Ang kowh maru-uüa uowi rah pren kowi uangnim iawng nataluk khup kownkow en hai en kowh maru-uüa mih nauang kown. Aw Gawg, ning kawmma rawn kung kowi dow ang kowh pren kowi nauang senah kownkow ang nauang pawla en kown. En luk kowi tawng chow phaw mih hownia ang kowh chimsaira mih ang natüngah kown. Nakhowk khe dow ang chowtaih CHAKRAMANG pami chenchap maten natuk bowt kown.17“‘Ang CHAKRAMANG tek khowk, achük alai kowh ang kowh nar Israeluüa kowi risiuüa hown ang kowtek pe mih dow en lawnguan kowi chekhai. Nami khin khe Israeluüa kowi en nakingküaah kown mih lawnguan dow amatni kowi risiuüa ning towng ning towng kowtek pe khai.18Nachenganchepaw Gawg uang sen Israel pren mih ni khe dow aia luk kowi lainowmma ang nakunmarau kown.19Ang kowh kunmarau lün pluplup mih hown ang tek khowk. Nami khin khe mih Israel pren kowi lainowmma lihowng nauang kown.20Nakhowk khe mih sata kowi kowh dam, kuang kowi kowh uakling uaber, kaurawng kowi kowh asadua, krawng luk kowi kowh kam hai sowr mih chap maten hai lusa maru maten ang pur kowi nachür kown. Aiuk aiukma mih hungh nataplan lut kown, alowng alowngma mih hungh natadi iawm kown, now tap maten krawng kowi natim kown.21Israel pren kowi kowh hungma mawngma maten luk kowi Gawg kowi nasenah kownkow ang nauang pawla pe saidawng kown. Nakhowk khe dow aia kowh maru-uüa mih amatni lala saidawng hown natasen büah kown.22Gawg kowi mih makowng hawi hai tasen hown ang naripah kown. Now uangchak mang, ria hai napawksi maih mih aia hai aia kowh siphaiuüa luk kowi hai aia hown kowh tabawng mih chenchap maten luk kowi ang nauang hüng pe kown.23Naiawng hown chenchap ahuma pur kowi ang matia kowi ang natüngah kown. Ang dow chimsaima hai kri kraingma mih ang natüngah kown. Nakhowk khe dow amatni mih ang chowtaih CHAKRAMANG pami natuk bowt kown,’ pakhai.
The Seed Company