Ezekiel28
1Akung kowi CHAKRAMANG laiklow dow ang tut-e uang ting khai. Aia tek ang mih,2“Aw maru chapa, Tura pren mang kowi CHAKRAMANG kowh laiklow maiawng kowtek pe diah,“‘En kowh saktuak dow abawrima chekhai;en matia kowi dow thurai iawng en tanü khai,now Tura marow dow en kowh mang chowm rah pahai en ka tuak khai.Tawkche en dow lusa maru chowtaih, thurai nadowi chekhai;nachepaw en dow en matia kowi thurai iawng en ka tuakah khai.3En dow Daniel lak-e en lang chanlai pahai en tatuak khai,now laipet maten paw en tuk pahai en matia mik kowi en tatuak chekhai.4En kowh dawngthawnguan dow chanlaira hai prengia hown en kramah khai,now dawngthawnguan nungra kowi dow kuh hai tai en towah khai.5En kowh kri kraingma mih chanlaira hown en kowh dawngthawnguan en huah khai,now en kowh dawngthawnguan rakowi en kowh saktuak dow uang bawri khai.6“‘En dow en matia kowi thurai iawng chanlaima en tanü khai;naiawng rakowi khaleng dow uang kingküa en kownkowmaru lang nga mih ransu-uüa kowi ang nauang pawla en kown.Nakhowk khe amatni dow tukra hai prengia hown kowhen kramah mih klangiung klangiungma mih uanh maten napiakta en kown.8En kowh ransu-uüa dow nasaita en kown,now sata dow en kowh tadupra nachowng kown.9Amatni sai en mih khin khe ang thurai pahai en nachang bawri kown tak bow?Nami khin khe en dow amatni tut-e lusa maru iawng krowngchow naphaw kown,thurai iawng naphaw kown nadowi.10Prenlang maru-uüa dow nasai en kown,now en dow chupiia ang dowi mih maru-uüa iawng nakowng kown.Ang CHAKRAMANG mami laiklow ang tek khowk,’ pape diah,” pakhai.11Nami kung kowi CHAKRAMANG laiklow dow ang tut-e uang ting khai iawk. Aia tek ang mih,12“Aw maru chapa, Tura pren mang lawnguan kowi maiawng kowtek kar meng diah: CHAKRAMANG tek mih,“‘En dow achinawmma chowdiah,now chanlaira atekma hai klangiungra atekma chowdiah.13En dow Thurai kowh Eden krum kowi uowi mih chowdiah,en kowi dow asung khakma mih hua chap maten hown tawng en chowdiah.En kowi dow Sardius hua, Topaz hua, Karbun hua, Emeral hua, Safir hua hai Daimawn hua ün dan pe mih tawnguat hown tawng en chowdiah,now Agate hua, Amethis hua, Beril hua, Oniks hua hai kuh ün dan pe mih tawnguat hown tawng en chowdiah.Naiawngün dow thawp en mih ni khe kamrüt en khai.14En kowi dow maru mingkhetah mih akürma mih Cherup iawng ang nümnap en chowdiah.Ang kowh chimsaima mih hungh luk kowi ang pe uowi en chowdiah,now maih iawng tawk pluplup mih hua luk kowi en dow mang reng chowdiah.15En kowi ang thawp en mih ni howniaen kowh chowm krang uowi krang dow achinawmma chowdiah.Tawkche achur kowi dow en uown chang lup ngak khai.16En dow chang kun hu lai bowt rakowi akeng chenchapuüa kowien krawi chang nowng hanow en chang ngak khai.Naiawng rakowi ang kowh chimsaima mih hungh hownia kür hown ang prüt en khai.Aw maru mingkhet mih Cherup rup, hua iawng maih hownia ang prütta en khai.17En klangiung lai rakowi en kowh saktuak kowi dow bawrira atekma,en kowh kraingra kowi en sakrau rakowi en piakta chanlaira khai.Naiawng rakowi ang dow bawn kowi ang iu kuakta en khai,now akeng manguüa dow khi en hanow changla en rensi kau khai.18En dow kuan maru mih kun chang mih iawng chang ngak khai,naiawngün angak hown en kowh chupiiara kim dow en sürlawkah khai.Naiawng rakowi en kowh marow ang towkta khai,nahanow nami marow dow asaima kam khai.Maru maten mü khe ang towk en khai.19Tuk mat en mih maru-uüa dow khi en hanow lainowmma awda khai,en dow kramra uowima hown ka ripra khai.En kowh kür dow nauowi kown nadowi bowt,’ pape diah,” pakhai.20Akung kowi CHAKRAMANG laiklow dow ang tut-e uang ting khai. Aia tek ang mih,21“Aw maru chapa, Sidawn marow prakowi haidangah hanow aia lawnguan kowi maiawng kowtek pe diah:22CHAKRAMANG tek mih,“‘Aw Sidawn marow, ang dow en kowh ransu chekhai;ang rip en mih hownia ang kowh kraingra mih ang natüngah kown,now ang CHAKRAMANG pami maru maten natuk kown.23En luk kowi dow ang nauang chin en makowng hawi kown,nami makowng hawi hown dow marow kowi kowh tiama kowi ransu-uüa howntasen khe kowh kowng mih iawng maru uak nataling plawt kown.Ransu-uüa dow sen en kownkow nauang rumta en lut kown,nahanow en maru-uüa dow nakowng kown.Nakhowk khe dow en maru-uüa mih ang chowtaih CHAKRAMANG pami natuk bowt kown,’ pape diah,” pakhai.24CHAKRAMANG plan tek ang iawk mih, “Israel chenchapuüa riaret kowi kowh pe ngarau mih chuh singh hai achukma mih chuh iawng mih kingküa dawma mih kimping namkhetuüa dow nauowi kown nadowi bowt. Nakhowk khe chiang ang chowtaih CHAKRAMANG pami natuk büah kown.25“Akeng chenchap tut-e ang cham setta plawt mih Israeluüa kowi dow ang nakua nalawmah kown. Israeluüa pungmadawng kowi ang kowh kraingra ang natüngah kown, now chenchap maten nami dow nakhi kown. Now Israeluüa dow ang nar Jakawb kowi kowh ang peah mih amatni matia kowh pren kowi nauowi büah kown.26Nami pren kowi dow amatni mih nathawp kim üa hai nachang grep krum büah kown, now nakowi mih athaulangma nauowi büah kown. Tawngplawng kowchow panow amatni kowi suiah mih kimping namkhetuüa kowi dow ang naripah kown. Nahanow Israeluüa dow ang chowtaih CHAKRAMANG amatni kowh Thurai pami natuk büah kown,” pakhai.
The Seed Company