Plan Rui12
1“Enni nakowpowngah kownkow CHAKRAMANG enni pipu-uüa kowh Thurai pe enni mih pren kowi dow maiawngün rirow hai ana pek maten enni nachünah kaneu kown takla. Maiawngün dow enni sing uowi mowr kaneuma enni nachünah kown takla.2Nami prenchak maru-uüa dow aiuk aiukma mih hungh kowi ün, asowmchow mih hungh kowi ün hai aram chakma mih singh klim towng kowi ün cham chupiia amatni kowh thuraiuüa reng chekhai. Now nami pren enni kowpowng mih khin khe dow naiawngün amatni thuraiuüa kowh chupiia rah maten enni napiakta pe kown takla.3Amatni kowh phuchuara ün enni napiakta pe kown. Amatni chupiiaah mih hua ün enni nadita pe nak kown, now amatni phuchuaah mih Asera limpu ün paw enni natikta pe kown. Now amatni kowh akeng mih rup maten paw enni napiakta pe kown. Naiawng hai amatni kowh thuraiuüa ming dow naiawngün arah hownia enni namata pe kown.4Amatni kowh thuraiuüa kowi amatni chupiiaah iawng CHAKRAMANG enni kowh Thurai kowi enni natawi chupiia kown nadowi.5Tawkchedow aia kowi nachupiiala kownkow aia lang kloah kown mih arah kowi aia kowi enni nakowchup kown takla. Nami arah dow enni kowh krungchak maten kowi aia pe enni mih arah maten hownia aia nalang kloah parah kown.6Nami arah kowi dow tikah mih uanap, akeng mih tawncher uanap, hamüt bak kowi pabak mih uanap, amülüngma mih uanap, takhamta khowk mih rakowi kowh uanap hai enni sak nau hown kowh uanap enni nakowpawla kown. Nami klen kowi chia, rua hai ruapur kowi kowh rik pen mih ala chah maten paw enni nakowpawla kown.7Naiawngün dow Thurai prasira hownia kowh enni kaah mih luprak chekhai. Naiawng rakowi naiawngün luprak dow aia lang kloah mih arah kowi CHAKRAMANG enni kowh Thurai pur kowi enni hai enni kowh chauüa hailawm enni nachaah kown, now enni napiaw kown.8“Thaulangma enni nauowila kownkow CHAKRAMANG enni kowh Thurai nape enni kown mih pren kowi kawmat paw enni ting dowi tak chekhai. Nakowi enni kowting khe dow enni riaret kowi kowh ransu-uüa hown tasen mih hownia CHAKRAMANG nape tanai enni bowt kown, now nakowi dow athaulangma enni nauowi bowt kown. Nakhowk khe dow kowmatia sak nau hown kawmat kowh a-i chupiiaah iawng CHAKRAMANG kowi enni nachupiiaah kown nadowi bowt.11“Nakhowk khe dow aia kowi nachupiiala kown mih arah kowi ang kowh ana pek iawng uanh maten enni nauang pawla kown. Nakowi dow tikah mih uanap, akeng mih tawncher uanap, hamüt bak kowi pabak mih uanap, amülüngma mih uanap hai takhamta khowk mih rakowi kowh uanap enni nakowpawla kown.12Nami arah kowi dow CHAKRAMANG enni kowh Thurai pur kowi enni, enni kowh chauüa, enni kowh narma narlauüa hai Leviuüa hown enni napiaw kown. Enni kowh kua hai marow kowi kowh tawi uowi mih Leviuüa kowh dow krawng bawn hai dawngthawnguan uowi dowi chekhai.13“Tawkche tikah mih uanap dow enni nau rah kowi enni naia chang kown nadowi.14Tikah mih uanap dow enni krungchak kowi kowh CHAKRAMANG pe enni mih arah hownia kowh aia lang kloah mih arah kowi chowtaih enni nachangah kown. Nakowi dow ang ana pek maten iawng enni nachang kown takla.15“Nachenganchepaw Thurai prasi hownia kowh prung mih tawncher maten dow lowra kua hai marow kowi enni naia ngen kown, now nau iawng enni naia chaah kown. Naiawngün chaknga dow cha ngahiu nga hai cha naki nga khe kowh iawng sürlawkma mih hai sürlawk dowi mih maru maten naia cha kown.16Tawkche avi tarapdow enni naia cha kown nadowi. Avi dow tui iawng krawng kowi enni nakhükta kown takla.17Nami klen kowi enni kowh luprak sar, grep tui sar hai kanrawn sau hamüt bak kowi pabak chi, chia, ruapur, rua kowi kowh rik pen mih ala chah, enni takhamta mih uanap, enni sak nau hown kowh uanap hai amülüngma mih uanap dow kua hai marow kowi enni naia cha kown nadowi.18Naiawngün uanap dow CHAKRAMANG enni kowh Thurai lang kloah mih arah kowi aia pur kowi enni nachaah kown takla. Naiawngün enni kawmah mih luprak hownia kowh uanap dow enni, enni kowh chauüa, enni kowh narma narlauüa hai Leviuüa hown enni nachaah kown, now enni kowh Thurai pur kowi enni napiaw kown.19Enni pren kowi enni uowi mowr dow Leviuüa kowi enni nakhetla reng kown takla.20“CHAKRAMANG enni kowh Thurai dow aia takhamta mih iawng naphia enni pren sünghi kown. Nami khin khe dow aia kowi nachupiiala kown mih arah enni hown alakma chepaw naia kown. Naiawng rakowi enni prüa chaknga towng dow nami arah kowi enni kownowng kowi dowi chepaw naia kown. Naiawng alakma kowi enni uowi miuüa dow ang kowh ana pek iawng CHAKRAMANG pe enni mih chia, ruapur hai rua mih enni kowh kua hai marow kowi enni naia ngen kown, now enni sak nau iawng enni naia cha kown.22Naiawngün chaknga dow cha naki nga hai cha ngahiu nga khe kowh iawng asürlawkma mih hai sürlawk dowi mih maru-uüa naia cha kown.23Nachenganchepaw kaneu büa diah! Vi dow enni nacha kown nadowi. Tawngplawng kowchow panow vi dow sing müa chekhai; chaknga dow avi hailawm enni nacha kown nadowi.24Vi dow enni nacha kown nadowi; nami dow tui iawng krawng kowi enni nakhükta kown.25Enni hai enni kowh chauüa nakala iungra kownkow vi mih enni nacha kown nadowi. Enni cha vi dowi mih dow CHAKRAMANG mik kowi iung iawng enni chang mih chekhai.26“CHAKRAMANG lang khowmah mih arah kowi dow enni kowh chimsaima mih uanap hai takhamta mih rakowi kowh uanap mih enni nakowpawla kown takla.27Enni kowh tikah mih uanap kowi kowh tawncher nga hai avi dow CHAKRAMANG enni kowh Thurai kowh phuchuara kowi enni natikta bowk kown takla. Now taking tasangra uanap kowi kowh tawncher vi dow phuchuara kowi enni nakhükta kown takla. Nachenganchepaw anga dow enni naia cha kown taih.28Enni hai enni kowh chauüa nakala iungra kownkow maiawngün ang pe enni mih ana pek maten dow kaneuma enni nachünah kown. Ang kowh ana pek enni chün mih dow CHAKRAMANG mik kowi iung iawng enni chang mih chekhai.29“Enni nakowpowngah kown mih pren kowi kowh maru-uüa kowi dow enni pur hownia CHAKRAMANG enni kowh Thurai mih nahing mata kown. Now nami pren dow enni powngah hanow nakowi enni nauowi kown.30Nachenganchepaw amatni kowi mata mih kung kowi dow amatni kowh chowm krang uowi krang iawng enni natawi uowila dowi kownkow kaneuma uowiah büa diah. Amatni kowh chowm krang uowi krang iawng enni che tawi uowi khai hanow leng kowi tasowk khe kowh iawng enni naown kown. Now tawng iawng chow amatni kowh thuraiuüa kowi naiawngün chenchapuüa chupiia mih lawnguan paw enni nakrawi lünta kown nadowi.31Amatni kowh thuraiuüa kowi amatni chupiiaah iawng CHAKRAMANG enni kowh Thurai kowi mapaw enni natawi chupiia kown nadowi. Tawngplawng kowchow panow naiawngün maru-uüa dow chupiia amatni kowh thuraiuüa mih khin khe CHAKRAMANG suiah mih iawng suiiai kaniaima mih lup chang büah reng chekhai. Amatni dow amatni kowh chauüa kowi khowm padow maih kowi nawmah hanow amatni kowh thuraiuüa vüi kowi phuchuala büah khai.32“Ang pe enni mih ana pek maten dow kaneuma enni nachünah kown; nami ana kowi dow tawngpaw enni nachütla kown nadowi, now tawngpaw enni nabatla kown nadowi.
The Seed Company