Plan Rui13
1“Enni pungmadawng kowi risi hai nowng phuang mang mih maru uowi chepaw naia kown. Amatni dow awdara lup hai awdara uowima mih amatra lawnguanün uang tek enni chepaw naia kown. Now naiawngün dow aia tekah iawng uang phaw khai chepaw naia kown. Now aia dow katpaw enni tukah dowi mih thuraiuüa lawnguan kowi, ‘Chu, akeng mih thuraiuüa kowi a-i cham chupiia lah,’ padow natek enni chepaw naia kown.3Naiawng che tek enni khai hanow nami maru kowh laiklow dow hangkow sünta büa diah. Tawngplawng kowchow panow CHAKRAMANG enni kowh Thurai kowi enni kowh sak maiow hown enni sakrauah chünchü mih natukla kownkow aia chaing enni mih chekhai.4CHAKRAMANG enni kowh Thurai laiklow iawng enni namang kown, now aia kowi enni naring nakawah kown. Aia kowh ana pek enni nachün kown, now aia tek iawng enni nachang kown. Aia kowh lup enni nachang kown, now aia kowi akhawtma enni naowmah kown.5Risi lah, nowng phuang mang mih maru lah, naiawng mih maru kowi dow enni nakowngta ngengche kown takla. Tawngplawng kowchow panow nami maru dow Aigupta pren kowi kowh nar lup changra hownia uang lawtla enni mih CHAKRAMANG enni kowh Thurai kowi nakingküaah kownkow chawktowk mih chekhai. Nami maru dow CHAKRAMANG pe enni mih ana pek iawng enni nachowm nauowi dowi kownkow sangkrang mih chekhai. Naiawng rakowi enni pungmadawng hownia naiawng mih angak dow enni namata kown takla.6“Enni kowh tainau lah, enni kowh chauüa lah, enni sakrauah mih masi lah, enni kowh auiua sinma mih lah kukpa nape enni prengia chepaw naia kown. Aia dow, ‘Chu, akeng thuraiuüa kowi achi cham chupiia lah,’ padow natek enni chepaw naia kown. Naiawngün dow enni hai enni pipu-uüa tukah dowi mih akeng thuraiuüa chekhai; naiawngün dow enni riaret kowi kowh maru-uüa hai alakma kowi kowh maru-uüa chupiiaah mih thuraiuüa chekhai.8Akeng thuraiuüa lawnguan kowi che naiawng uang tek enni khai hanow nami maru kowh laiklow dow enni nauta pe kown nadowi, now enni nasünta pe kown nadowi. Aia kowi dow enni nasanaah kown nadowi, enni nalawtah kown nadowi, now lawng paw enni nalawngah kown nadowi.9Aia kowi dow enni nakowngta ngengche kown takla. Aia kowi nakowngta kown mih lup dow en narik uown kown. Nami kung kowi dow bowkbowk maru nauang tawi tabawng kown.10Aia kowi dow kowng pat huaklu hown enni nakuakah kown takla. Tawngplawng kowchow panow Aigupta pren kowi kowh nar lup changra hownia uang lawtla enni mih CHAKRAMANG enni kowh Thurai hownia akeng prakowi cham pawla enni kown mih aia dow nau khai.11Nahanow enni Israeluüa bowkbowk dow nami satang ta hanow nakram kown. Now enni pungmadawng kowi dow naiawng mih angak miapaw nachang iawk kown nadowi bowt.12“Enni nauowiah kownkow CHAKRAMANG enni kowh Thurai pe enni mih marow kowi kowh maru-uüa lawnguan kowi maiawng enni nata chepaw naia kown: Nami marow kowi dow Israeluüa pungmadawng hownia anowm nadowi mih maru-uüa uowi chekhai. Amatni dow nami marowchakuüa kowi Thurai hownia akeng prakowi cham pawla reng chekhai. Amatni dow, ‘Chu, akeng thuraiuüa kowi a-i cham chupiia lah,’ padow maru-uüa kowi tek pe büah reng khai. Naiawngün dow katpaw enni tukah dowi mih thuraiuüa chekhai.14Naiawng che enni ta khai hanow nami lawnguan kowi enni nakrawi paw pe satang kaneu kown takla. Enni nakrawi chetah kown, now enni nakrawi lüntaah kaneu kown takla. Naiawng mih suiiai kaniaima mih lup che enni pungmadawng kowi phaw nowm khai hanow15nami marowchakuüa maten kowi dow enni nakowngta ngengche kown takla. Now amatni kowh tawncher hawmh kowi paw saidawng hown enni nasaita pe bowk kown takla. Nami marow dow asaima enni napiakta kown.16Nami marow kowi kowh enni kaah mih uanh maten dow nami marow dawnglang kowi enni nakowpawla kown. Nahanow naiawngün uanh hailawm marow dow asaima natowkta kown. Nami dow CHAKRAMANG enni kowh Thurai vüi kowi kowh maih kowi tikah mih uanap iawng chekhai. Nami maih kamah mih marow dow chowngchowng saksakma apiaknama pacham uowi reng lah; nami dow naplan thawpah iawk kown nadowi bowt.17Nami marow kowi kowh uanh maten dow enni matia vüi mapaw enni natowah kown nadowi. Nahanow enni luk kowi kowh CHAKRAMANG kowh kramra uowima mih kunmaraura dow narim kown, enni kowh pipu-uüa tut-e aia khamta khowk iawng dow aia nasaksing sana enni kown, now nape prung enni kown.18Naiawng rakowi CHAKRAMANG enni kowh Thurai laiklow enni nachün kown takla. Aia kowh ana pek hai ari aiang dow ani mih ang pe enni khowk. Naiawngün dow enni nachünah ngengche kown takla.
The Seed Company