Суд4
1Егуд колымеке, израиль эрге-влак Господь шинча ончылно адакат осалым ышташ тӱҥалыныт.2Господь нуным Асорышто кугыжаланыше ханаан кугыжа Иавин кидышке пуэн. Иавинын сарзывуйжо Сисара лийын, тудо Харошеф-Гоимыште илен.3Сисаран индешшӱдӧ кӱртньӧ орваже лийын, да тудо израильтян-влакым коло ий пеш чот индырен. Сандене израиль эрге-шамыч Господь деч полышым йодын кычкыреныт.4Тиде жапыште Израильын судьяже Девора лӱман пророк ӱдырамаш, Лапидоф вате, лийын.5Тудо Ефрем курыкышто, Рама ден Вефиль коклаште улшо Деворан Пальмыж йымалне, шинчен, [тушко] тудын деке израиль эрге-влак судыш коштыныт.6Девора шкеж деке Неффалим мландысе Кедес гыч Варакым, Авиноам эргым, ӱжаш колтен да тудлан каласен: «Господь, Израильын Юмыжо, [тылат] кӱшта: ”Кай, пеленет Неффалим ден Завулон тукым гыч лу тӱжем еҥым нал да Фавор курыкыш кӱзӧ.7Мый тый декет Киссон эҥер деке Сисарам, Иавинын сарзывуйжым, тудын орваж ден сарзывийжым колтем да тудым тыйын кидыш пуэм”».8Варак тудлан каласен: «Тый мый денем пырля кает гын, каем. А от кай гын, мыят ом кай. [Вет Господь Суксыжым мыйын пеленем могай кечын колта, мый ом пале]».9Девора [тудлан] каласен: «Йӧра, мый тый денет пырля каем. Но [пален лий:] коштмо корнет тунам тылат чапым ок кондо: Господь Сисарам ӱдырамаш кидыш пуа». Девора кынелын да Варак дене Кедесыш каен.10Варак Завулон ден Неффалим эрге-влакым Кедесыш ӱжын. Варак почеш лу тӱжем еҥ ошкылын, тудын дене тыгак Девора каен.11Кеней Хевер тунам моло кеней деч – Моисейын Ховав оньыкугызажын эргыж-влак деч – посна ойырлен да шке омашыжым Кедес воктенысе Цаанним тумо дене шогалтен.12Варакын, Авиноам эргын, Фавор курыкыш кӱзымыж нерген Сисаралан каласеныт.13Тунам Сисара чыла сарлык орважым – индешшӱдӧ кӱртньӧ орважым – да чыла сарзыжым поген, нуным Харошеф-Гоим гыч Киссон эҥер деке конден.14Девора Вараклан каласен: «Тарване, Господьын Сисарам тыйын кидыш пуымо кече толын. Господь Шкежак тыйын ончычет кая». Варак Фавор курык гыч волен, почешыже – лу тӱжем сарзе.15Кунам Варак Сисара ӱмбак кержалтын, Господь Сисарам да тудын чыла орваж ден сарзыжым ӧрткымашке пуртен. Сисара орваж гыч тӧрштен волен да йолын куржын.16Варак тудын орваж ден сарзыже-влакым Харошеф-Гоим марте поктен каен. Сисаран уло сарзывийже керде дене пытарыме лийын, нигӧ илыше кодын огыл.17Сисара гын Иаильын, кеней Хеверын ватыжын, омашышкыже куржын толын. Асор кугыжа Иавин ден кеней Хеверын тукымжо тунам келшен иленыт.18Иаиль Сисара ваштареш лектын да каласен: «Пуро, мыйын озам. Пуро мый декем, ит лӱд». Сисара тудын омашышкыже пурен, Иаиль тудым шке леведышыже йымаке шылтен.19Сисара тудлан каласен: «Мылам изишак вӱдым пу, йӱмем шуэш». Иаиль шӧран шувышым почын да тудым йӱктен, вара адакат леведын.20Сисара тудлан каласен: «Омашыш пурымо вер деке шогал. Иктаж еҥ толеш да тый дечет ”тыште иктаж-кӧ уло мо?” манын йодеш гын, ”уке” манын каласе».21Но Иаиль, Хевер вате, омашым пеҥгыдемдыме кошар пашкар ден чӧгытым кидышкыже налын, нойымыж дене мален колтышо Сисара дек шыпак лишемын да вуйвичкыжышкыже пашкарым керын – тудыжо вуйжым шӱтен. Сисара мландыш пудалалтын да верешыжак колен.22Кунам Сисарам поктышо Варак толын, Иаиль тудын ваштарешыже лектын да каласен: «Пуро, мый тылат кычал толмо еҥетым ончыктем». Варак тудын омашышкыже пурен да ужын: Сисара колышо кия, вуйвичкыжыштыже – кошар пашкар.23Тиде кечын [Господь] Юмо израильтян-влаклан ханаан кугыжа Иавин дене кредалмаште сеҥымашым пӧлеклен.24Тидын деч вара израиль эрге-влак Иавиным, ханаан кугыжам, чотрак да чотрак шыгыремдылаш тӱҥалыныт да варажым пытареныт.
Institute for Bible Translation, Finland