Суд19
1Израильын кугыжаже уке улмо жапыште Ефрем курыклаште ик левит илен. Тудо шкаланже изватым Иуда мландысе Вифлеем гыч налын.2Изватыже тудлан сырен да тудын деч шке ачажын пӧртышкыжӧ, Иуда мландысе Вифлеемыш, каен. Тушто тудо ныл тылзе илен.3Тудын дене кутыралташ да мӧҥгеш пӧртылташ манын, марийже шке изватыже почеш каен. Левит пелен тарзыже да кок осёл лийыныт. Ватыже тудым ачажын пӧртышкыжӧ пуртен.4Самырык ӱдырамашын ачаже веҥыжым куанен вашлийын да тудым колтен огыл. Левит тудын дене кум кече лийын. Нуно тушто кочкыныт, йӱыныт да маленыт.5Нылымше кечын нуно эр кынелыныт. Левит каяш тарванен, но самырык ӱдырамашын ачаже веҥыжлан каласен: «Корно деч ончыч киндым пурл, вийым пого, вара кает».6Нуно шинчыныт, коктын кочкыныт, йӱыныт. Тидын деч вара оньыкугызаже тудлан каласен: «Эше ик йӱдлан код, жапетым ласкан эртаре».7Левит кайынеже улмаш, но оньыкугызаже, код манын, пеш йодын, сандене тудо эше ик йӱдлан кодын.8Визымше кечын эрдене, кунам тудо корныш лекташ тарванен, самырык ӱдырамашын ачаже адакат каласен: «[Киндым] пурл да вийым пого. Ида вашке, кечывал эртымешке вучалтыза». Нуно коктын адакат кочкыныт, [йӱыныт].9Вара саде еҥ, изватыж да тарзыж дене каяш манын, кынел шогалын. Тудлан оньыкугызаже, ӱдырамашын ачаже, каласен: «Теве кече кас велыш каен. Йӱдлан тыштак кодса, вет вашке пычкемышалтеш. Мале тыштак, жапетым ласкан эртаре, а эрла эрден эр корныш лектыда, мӧҥгышкыда каеда».10Но левит йӱдлан кодаш келшен огыл, тудо кынелын да каен. Тудо Иевус деке, вес семынже Иерусалим деке, миен шуын. Пеленже пӧштыртымӧ кок осёл да изватыже лийыныт.11Кунам нуно Иевусыш лишемыныт, кече шинчаш тӱҥалын. Тарзе шке озажлан каласен: «Айда иевусей-влакын олашкышт пурена да йӱдым тушто эртарена».12Озаже тудлан вашештен: «Уке, ме йот тукым еҥ-шамычын олашкышт огына кай, нуно израиль эрге-влак кокла гыч огытыл. Ме Гиваш каена».13Вара ешарен: «Каена, Гиваш але Рамаш миен шуына да иктаж-кудыштыжо йӱдым эртарена».14Тыге нуно умбакыла каеныт. Кунам нуно Вениамин мландысе Гива воктене лийыныт, кече шинчын.15Гиваште мален лекташ манын, нуно корныштым тушко савыреныт. Олашке пуреныт да уремыш шинчыныт, но нуным нигӧ пӧртышкыжӧ малаш ӱжын огыл.16Ик шоҥго кугыза кастене паша деч вара пасу гыч мӧҥгыжӧ пӧртылын. Тудо Ефрем курыклаште шочын-кушкын улмаш, а илен Гиваште. А тыштыже Вениамин эрге-влак иленыт.17Тудо вуйжым нӧлталын да ола уремыште корныеҥым ужын. Шоҥго кугыза йодын: «Кушко тый кает, кушечын толат?»18Тудыжо вашештен: «Ме Иуда мландысе Вифлеем гыч Ефрем курыклашке каена. Мый тушто илем. Иуда мландысе Вифлеемыш коштынам, а кызыт Господьын пӧртышкыжӧ каем. Нигӧ мыйым шкеж деке ок ӱж.19Осёлна-влаклан мемнан олым ден курго уло. Тыгак тарзет-влаклан – мыланем, кул ӱдырамашетлан да тиде тарзылан – кинде ден йошкар арака уло. Мыланна нимо огеш кӱл».20Кугыза тудлан каласен: «Ит тургыжлане: мо тыланда кӱлеш, мый чыла пуэм. Уремыште гына ида мале».21Тудо нуным мӧҥгышкыжӧ конден, осёлыштлан кургым пуэн. А корныеҥ-влак йолыштым мушкыныт, вара кочкын-йӱыныт.22Кунам нуно жапым ласкан эртареныт, олаште илыше йӧрдымӧ еҥ-влак пӧртым авырен налыныт. Нуно омсам кыреныт да пӧрт озалан, шоҥго кугызалан, кычкыреныт: «Лук тыйын пӧртышкет пурышо еҥым, ме тудын дене мален налына».23Пӧрт оза нунын деке лектын да каласен: «Иза-шольым-влак, огеш кӱл, осалым ида ыште. Вет тудо мыйын унам, тыгай шакше пашам ида ыште.24Теве мыйын пӧръеҥым палыдыме ӱдырем да тиде еҥын изватыже. Мый тендан деке нуным луктам. Нуным намыслыза, мом шонымыдам шуктыза. А тиде еҥ дене тыгай шакше пашам ида ыште».25Но нунын тудым колыштмыштат шуын огыл. Тунам левит шке изватыжым налын да нунын дек уремыш луктын. Нунышт тудым йӱдвошт виешленыт, мыскыленыт, ӱжара лекме годым веле колтеныт.26Волгыжаш тӱҥалмеке, ӱдырамаш шке озажын улмо пӧрт деке толын, омса воктене шуҥгалтын да эр марте туштак киен.27Тудын озаже эрдене кынелын, шке корныжым умбакыже шуяш манын, пӧрт омсам почын да ужын: омса воктене изватыже кия, кидше – омсалондемыште.28Марийже тудлан каласен: «Кынел, каена». Но вашмут лийын огыл, [ӱдырамаш колен улмаш]. Тудо изватыжым осёл ӱмбак пыштен да мӧҥгыжӧ каен.29Мӧҥгыжӧ толмеке, тудо кӱзым налын, изватыжын капшым латкок ужашлан пӱчкын да Израильын чыла кундемышкыже колтен.30Кажныже, кӧ тидым ужын, ойлен: «Израиль эрге-влакын Египет мланде гыч лекме кече деч таче марте тыгае лийын огыл, ужалтын огыл!» [Шкеж деч колтымо еҥ-влаклан тудо тыге кӱштен каласен: «Уло Израильлан тыге ойлыза: ”Тыгае иктаж-кунам лийын мо?”] Шоналтыза тидын нерген! Икте-весыда дене каҥашыза да мом ыштыман, каласыза».
Institute for Bible Translation, Finland