Суд18
1Тиде жапыште Израильын кугыжаже лийын огыл. Дан тукым шкаланже илаш мландым кычалын, вет тудын тымартеат Израильын моло тукымжо коклаште шке мланде ужашыже лийын огыл.2Дан эрге-влак Цора ден Ештаол гыч шке тукымысо виян вич еҥым мландым ончен лекташ колтеныт. Нунылан каласеныт: «Кайыза, мландым шымлен лекса». Нине еҥ-влак Ефрем курыкыш Михан пӧртшӧ деке толын лектыныт да тушто маленыт.3Михан пӧртшӧ воктене лиймышт годым нуно самырык левитын кутырымыжым колыныт. Нуно тудын деке миеныт да йодыныт: «Кӧ тыйым тышке конден? Мом тыште ыштет да молан тый тыште улат?»4Тудыжо нунылан вашештен: «Мыйым Миха тарлен, мый тудын дене иерей улам». Вара Михан тудлан чыла мом ыштымыж нерген каласкален.5Нуно каласеныт: «Мемнан корнына сай лиеш мо? Ме тидын нерген палынена. Тидым Юмо деч йод».6Иерей нунылан вашештен: «Тыныс дене кайыза. Корныштыда Господь тендан пелен лиеш».7Саде вич еҥ каен да Лаисыш толын. Нуно ужыныт: калык тыште Сидонышто илыше-влак семынак тыныслын да шып-тымыкын ила. Тиде кундемыште нуным нигӧ темден огыл, нигӧ озаланыше лийын огыл. Нуно Сидонышто илыше-влак деч умбалне верланеныт, нигӧ дене кылым кучен огытыл.8Тиде вич еҥ шке тукым иза-шольышт деке Цораш да Ештаолыш пӧртылын. Нунын деч йодыныт: «Ну мо вара?»9Нуно вашештеныт: «Каена, нунын ӱмбак керылтына! Ме тиде мландым ужна, тудо пеш сай. Мом вучеда? Тиде мландым руалтен налаш манын, ида шуйкале.10Тушко мийымеке, те шып-тымыкын илыше калыкым ужыда. Мланде тушто кумда. Юмо тудым тендан кидыш пуа, тиде мландыште чылажат ситышын».11Тунам Дан тукым гыч саргуралан кудшӱдӧ еҥ Цора ден Ештаол гыч лектын каен.12Кайышыштла, нуно стан дене Иуда мландысе Кириаф-Иаримеш шогалыныт. Сандене таче кече мартеат тиде верым Данын станже маныт. Тудо Кириаф-Иарим шеҥгелне верланен.13Тушеч нуно Ефрем курыклаш каеныт да Михан пӧртшӧ деке толыныт.14Лаис мландым ончаш коштшо саде вич еҥ шке тукым иза-шольыштлан каласеныт: «А те паледа, нине пӧрт кокла гыч иктыштыже ефод, юмо-влакын изи статуйышт, тыгак пӱчкын лукмо да велен ыштыме шояк юмо-влак улыт? Шоналтыза, мом ышташ лиеш!»15Нуно тушкыла савырненыт да Михан пӧртышкыжӧ самырык левит деке пуреныт, тудын дене саламлалтыныт.16Тиде жапыште Дан тукым гыч саргуралан кудшӱдӧ еҥ капка дене шоген.17Мландым ончаш коштшо вич еҥ тушко пурен да ефодым, юмо-влакын изи статуйыштым, тыгак пӱчкын лукмо да велен ыштыме шояк юмо-влакым налын. Иерей тиде жапыште саргуралан кудшӱдӧ еҥ дене капка воктене шоген,18а нине еҥ-влак Михан пӧртышкыжӧ пуреныт да ефодым, юмо-влакын изи статуйыштым, пӱчкын лукмо да велен ыштыме шояк юмо-влакым налыныт. Иерей нунылан каласен: «Мом те ыштеда?»19Нуно вашештеныт: «Шып лий, ик мутымат ит пелеште. Пеленна кай да мемнан дене ачана семын, иерей семын лий. Ик еҥын пӧртыштыжӧ иерей лиймешке, тыланет Израильын ик тукымжын але урлыкшын иерейже лияш сайрак огыл мо?»20Иерей куанен. Тудо ефодым, юмо-влакын изи статуйыштым, пӱчкын лукмо [да велен ыштыме] шояк юмо-влакым налын да сарзе калык дене пырля каен.21Йочаштым, вольык ден погыштым ончыко колтен, нуно корным умбакыже шуеныт.22Кунам нуно Михан пӧртшӧ деч чот торленыт, [Миха да] пошкудо пӧртлаште илыше-влак погыненыт да Дан эрге-шамычым поктен каеныт.23Нуно Дан тукым эрге-влаклан кычкыраш тӱҥалыныт. Нунышт савырненыт да Миха деч йодыныт: «Мо тылат кӱлеш? Мом тынар кычкырет?»24Миха вашештен: «Те мыйын ыштыме юмем-влакым да иереем налын каенда. А мыламже мо кодын? Кузе те мый дечем ”тылат мо кӱлеш” манын йодыда?»25Дан эрге-влак тудлан каласеныт: «Шып лий, йӱкетат ынже шокто, уке гын мемнан чыдыртан сарзына-влак ӱмбакет кержалтыт. Тунам тылатат, ешетланат мучаш лиеш!»26Нуно умбакыла ошкылыныт. А Миха, нунын виянрак улмыштым ужын, савырнен да мӧҥгыжӧ каен.27Михан ыштыме юмыж-влакым да тудын дене лийше иерейым налын, Дан эрге-шамыч Лаисыш шып-тымыкын илыше калык деке каеныт да тудым керде дене кырен шалатеныт, а олам йӱлалтеныт.28Лаис Сидон деч тораште верланен да нигӧ денат кылым кучен огыл, сандене тудлан нигӧ полшаш толын огыл. Тиде ола Беф-Рехов воктенысе лапверыште лийын. Дан эрге-влак олам угыч чоҥеныт да тушто илаш тӱҥалыныт.29Шке Дан ачаштын, Израильын ик эргыжын, лӱмеш олалан Дан лӱмым пуэныт. А олан ончычсо лӱмжӧ Лаис лийын.30Дан эрге-влак шояк юмым шкешт дене шогалтеныт. Израиль калыкым Вавилоныш кусарыме жап марте Дан тукымын иерейже Ионафан, Манассийын Гирсон эргыжын эргыже, да тудын эргыже-влак лийыныт.31Юмын пӧртшӧ Силомышто улмо жапыште Михан ыштыме шояк юмыжо нунын дене шоген.
Institute for Bible Translation, Finland