Суд17
1Ефрем курыклаште Миха лӱман ик еҥ илен.2Тудо аважлан каласен: «Тыйын тӱжем шӱдӧ сикль шиет йомын ыле, да тудын верч тый шолыштшо еҥым каргышыч – тидым мый кольым. Тиде шиет – мый денем, нуным мый налынам». Аваже вашештен: «Тек Господь мыйын эргым суапландара!»3Миха аважлан тӱжем шӱдӧ сикль шийым пӧртылтен, да аваже манын: «Тиде шийым мый эргым верч Господьлан святой пӧлек семын пуэм. Тек тудын дене юмын статуйжым велен ыштат».4Михан шийым мӧҥгеш пуымекше, аваже тушеч кокшӱдӧ сикльым налын да велен ыштыше мастарлан наҥгаен. Тудыжо тиде ший дене юмын статуйым велен ыштен. Тиде юмо Михан пӧртыштыжӧ шоген.5Михан мӧҥгыштыжӧ святой вер лийын. Тудо ефодым, юмо-влакын изи статуйыштым ыштен да эргыж-влак кокла гыч иктыжым иерейлан шогалтен.6Тиде жапыште Израильын кугыжаже лийын огыл, да кажныже мом чынлан шотлен, тудым ыштен.7Иуда мландысе Вифлеемыште илыше ик рвезе, Иуда тукым коклаште илыше левит,8Вифлеемым коден, илаш верым кычал каен. Тудо Ефрем курыклашке, Михан пӧртшӧ деке, толын лектын.9«Кушеч тый толат?» – Миха тудын деч йодын. «Мый Иуда мландысе Вифлеем гыч левит улам, илаш верым кычалам», – тудыжо вашештен.10Миха тудлан каласен: «Код тышан. Тый мылам ача семын, иерей семын лият. Мый тылат ик ийлан лу сикль шийым, кӱлеш вургемым да кочкышым пуаш тӱҥалам».11Левит тудын дене илаш келшен, Михалан эргыж семын лийын.12Миха левитым иерейлан святитлен шогалтен, да рвезе тудын пӧртыштыжӧ иерей лийын илен.13Миха тыге ойлен: «Ынде мый палем: Господь мылам сайым ышташ тӱҥалеш, вет мыйын Левий тукым гыч улшо иереем уло».
Institute for Bible Translation, Finland