Нав3
1Эрден эр кынелын, Иисус ден уло израиль калык Ситтим гыч лектыныт да Иордан деке толыныт. Эҥерым вончымо деч ончыч нуно тушан стан дене шогалыныт.2Кум кече гыч калык вуйлатыше-влак стан мучко коштыныт3да калыклан тыге кӱштен ойленыт: «Кунам Господь Юмыдан ойпидыш шондыкшым, иерей-влакым да шондыкым нумалше левит-влакым ужыда, теат шке верда гыч тарваныза да шондык почеш кайыза.4Тыге те кайышаш корным ужыда, вет тудын дене нигунам коштын огыдал. Но тендан ден шондык коклаште кок тӱжем кынергут лийшаш – тудын деке чак ида мий».5Калыклан Иисус каласен: «[Эрденлан] шкендам святитлыза да эрныктыза – эрла Господь тендан коклаште ӧрыктарыше паша-влакым ышта».6Иерей-влаклан Иисус каласен: «[Господьын] ойпидыш шондыкшым налза да калык ончыч кайыза». Иерей-влак Господьын ойпидыш шондыкшым налыныт да калык ончыч каеныт.7Тунам Господь Иисуслан каласен: «Таче Мый израиль эрге-влак ончылно чапетым нӧлташ тӱҥалам. Тек нуно пален налыт: кузе Мый Моисей дене лийынам, тугак тыйын пеленет лиям.8Ойпидыш шондыкым нумал кайыше иерей-влаклан кӱштен каласе: Иордан вӱдыш пурымеке, тек нуно тушан чарнен шогалыт».9Иисус израиль эрге-влаклан каласен: «Тышке толза да Господь Юмыдан шомакшым колыштса».10Тудо манын: «Илыше Юмо тендан коклаште ила да ончычда хананей, хеттей, евей, ферезей, гергесей, аморрей, иевусей-влакым поктен колта. Тидым теве кушеч пален налыда.11Тендан ончыч Иордан гочын пӱтынь мландын Господьшын ойпидыш шондыкшо каяш тӱҥалеш.12Израиль тукым-влак деч латкок еҥым, кажне тукым гыч ик еҥым, ойырыза.13Кунам пӱтынь мландын Господь Юмыжын шондыкшым нумалше иерей-влакын йолышт Иордан вӱдыш тошкалыт, эҥер йогымыжым чарна, йоген толшо вӱд пырдыж семын шогалеш».14Иорданым вончашлан калык шке шогалме верже гыч тарванен каен, нунын ончыч иерей-влак [Господьын] ойпидыш шондыкшым нумал каеныт.15Тунам шыдаҥ тӱредме жап лийын. Тиде жапыште Иордан вӱд эҥер сер гычын эре лектеш улмаш. [Господьын ойпидыш] шондыкшым нумалше иерей-влак Иордан серыш шуыныт да йолышт дене вӱдыш тошкалыныт веле,16йоген толшо вӱд йогымыжым чарнен. Тудо умбалне, Цартан воктенысе Адам ола дене, пырдыж семын шогалын. А ӱлыкыла, Шинчалан теҥызыш, йогышо вӱд йоген каен.17Калык эҥерым Иерихон воктене вончен. Господьын ойпидыш шондыкшым нумалше иерей-влак Иордан покшелне кукшо мландыште шогеныт, а израиль эрге-влак кукшо эҥер пундаш дене вес серыш вонченыт. Уло калыкын Иордан гоч вончымешкыже тыге лийын.
Institute for Bible Translation, Finland