Нав4
1Уло калыкын Иордан гоч вончымекше, Иисуслан Господь каласен:2«Калык кокла гыч латкок еҥым ойырен налза – кажне тукым гыч ик еҥым,3да нунылан кӱштен каласыза: ”Тышечын, Иордан покшечын, иерей-влакын тарваныде шогымо верышт гыч, латкок кӱм налза, нуным пеленда наҥгайыза да таче малаш шогалме верышкыда пыштыза”».4Израиль тукым гыч ойырен налме латкок еҥым – кажне тукым гыч ик еҥым – Иисус шкеж деке ӱжын5да нунылан каласен: «Иордан покшеке, Господь Юмыдан шондыкшо ончыко, кайыза. Тек кажныже, Израиль тукым чот почеш, [тушеч] ик кӱ гычын налын, шке вачышкыже пышта.6Нуно тыланда [эре шогышо] шарныктыш лийыт. Илен-толын, йочада-влак ”тиде могай кӱ улыт?” манын йодыт гын,7те нунылан тыге вашештыза: ”Кунам [уло мландын] Господьшын ойпидыш шондыкшым Иордан гоч вончыктареныт, тудын ончылно вӱд йогымым чарнен”. Нине кӱ-влак [тендан дене] израиль эрге-влаклан курымешлан шарныктыш лийыт».8Израиль эрге-влак Иисусын кӱштымыж семынак ыштеныт. Господьын Иисуслан каласымыж семынак, Израиль тукым чот почеш нуно Иордан покшечын латкок кӱм налыныт да малаш шогалме верышкышт наҥгаеныт, тушан пыштеныт.9Иисус [вес] латкок кӱм [Господьын] ойпидыш шондыкшым наҥгайыше иерей-влакын шогымо верышкышт, Иордан покшеке, шогалтен. Нуно таче кечынат туштак улыт.10[Господьын ойпидыш] шондыкшым нумалше иерей-влак Иордан покшелне шогеныт да Господьын Иисус гоч калыклан пуымо кӱштымыжым шуктымым вученыт, тидымак Моисей Иисуслан кӱштен коден улмаш. А калык тиде жапыште писын эҥерым вончен.11Уло калыкын [Иорданым] вончымекше, иерей-влак Господьын [ойпидыш] шондыкшым вончыктареныт да калык ончыч каеныт.12Тыгак Рувим ден Гад тукым-влак да Манассийын пел тукымжо, Моисейын нунылан кӱштымыж семынак, саргуралым кучен, эҥерым моло израиль эрге-влак деч ончыч вонченыт.13Саргуралан нылле тӱжем наре еҥ Господь ончылно Иерихон тӧрверыш кредалаш вончен.14Господь тиде кечын Иисусын чапшым пӱтынь Израиль калык ончылно нӧлталын. Кузе израильтян-влак Моисейым жапленыт, тыгак Иисусымат чыла илыме кечылаштыже пагаленыт.15Господь Иисуслан каласен:16«Ойпидыш шондыкым нумалше иерей-влаклан Иордан гыч лекташ кӱштӧ».17Иисус иерей-влаклан кӱштен: «Иордан гыч лекса».18Кунам Господьын ойпидыш шондыкшым нумалше иерей-влак Иордан гыч лектыныт да йолышт дене мландыш тошкалыныт, Иордан вӱд тунамак шке верышкыже пӧртылын да ончычсо семынак ташлен йогаш тӱҥалын.19Икымше тылзын луымшо кечынже калык Иорданым вончен лектын да станым Галгалыште, Иерихонын эрвел могырыштыжо, шогалтен.20Тыгак Иисус Галгалыште Иордан гыч налме латкок кӱм шогалтен21да израиль эрге-влаклан каласен: «Илен-толын йочада-влак тендан деч ”тиде могай кӱ улыт?” манын йодыт гын,22нунылан ”Израиль тиде эҥер гоч кукшо вер дене лектын” манын вашештыза.23Вет Господь Юмыда, Иорданым вончымешкыда, тудым кукшемден. Тудо Йошкар теҥыз денат тидымак ыштен: мыланна вончаш манын, Господь Юмо тудым мемнан ончылно кукшо верыш савырен.24Тидым Тудо мландысе чыла калык Господьын кидшын виян улмыжым палыже да те Господь Юмыда деч лӱдын илыза манын ыштен».
Institute for Bible Translation, Finland