Зак.уш34
1Вара Моисей Моав тӧрвер гыч Нево курыкыш – Иерихон ваштареш улшо Фасга курык вуйыш – кӱзен. Господь тудлан пӱтынь Галаад мландым Дан марте,2Неффалимын уло мландыжым, Ефрем ден Манассийын пӱтынь мландыштым, Иудан уло мландыжым Касвел теҥыз марте,3Кечывалвел мландым да Иерихонын – Пальме олан – тӧрверже деч шуйналтше пӱтынь кундемым Сигор ола марте ончыктен.4Господь Моисейлан каласен: «Теве тиде мланде, кудым Мый Авраамлан, Исааклан да Иаковлан ”тендан ончыкылык тукымланда пуэм” манын товатлен сӧренам. Мый тудым тылат шке шинчат дене ужаш пуышым, но тый тушко от пуро».5Господьын каласымыж семынак Моисей, Господьын тарзыже, тушан, Моав мландеш, колен.6Тудым Моав мландысе лапверыште Беф-Фегор ваштареш тойымо. Тачысе кече мартеат Моисейын шӱгарже кушто улмым нигӧ ок пале.7Колымыж годым Моисей шӱдӧ коло ияш лийын, но тунамат тудын шинчаже начарештын огыл да вийже пытен огыл.8Израиль эрге-влак Моисей шотышто Моав тӧрверыште, [Иерихон лишне Иордан воктене,] кумло кече шортыныт. Вара Моисей шотышто шортмо кече-влак эртен каеныт.9Иисус, Навын эргыже, кугу уш-акыл шӱлыш дене темше лийын, вет Моисей, тудын ӱмбак шке кидшым пыштен, тудым суапландарен коден. Израиль калык Иисусым колыштын да Господьын Моисейлан мом кӱштымыжым шуктен шоген.10Израильын тидын деч вара Моисей гай пророкшо лийын огыл, вет тудын дене Господь шинчаваш кутырен.11Нигӧ нигунам тыгай палдарыше пале ден ӧрыктарыше паша-влакым ыштен огыл, могайжым Моисей Египет мландыште Господьын кӱштымыж почеш фараонлан, тудын тарзыж ден уло мландыжлан ончыктен.12Нигӧ тыгай куатым, кугу да лӱдмашан паша-влакым ончыктен огыл, могайым Моисей уло Израиль шинча ончылно ыштен.
Institute for Bible Translation, Finland