2 Куг5
1Израильын чыла тукымжо Давид деке Хевроныш толын да каласен: «Ме тый денет ик вӱр улына.2Тидын деч ончыч, кунам Саул мемнан дене кугыжаланен, тый Израильын сарзыж-влакым вуйлатен шогенат. Господь тылат каласен: ”Тый Израиль калыкем кӱташ тӱҥалат, тудын вуйлатышыже лият”».3Израильын чыла кугуракше-влакат кугыжа деке Хевроныш толыныт. Тушто, Господь чурий ончылно, Давид нунын дене ойпидышым ыштен, да нуно тудым [пӱтынь] Израильын кугыжажлан шӱрен палемденыт.4Кугыжалан шогалмыж годым Давидлан кумло ий лийын. Тудо чылаже нылле ий кугыжаланен:5Хевронышто Иудан кугыжажлан шым ият пеле шоген, а Иерусалимыште уло Израиль ден Иудам кумло кум ий вуйлатен.6Кугыжа ден тудын еҥже-влак Иерусалимыш, тудо мландыште илыше иевусей-шамыч ваштареш сар дене каеныт. Но нунышт каласеныт: «Тый тышке от пуро, тыйым эсогыл сокыр ден окшак-влак поктен колтат». Тидын дене нуно «Давид олашке пурен ок керт» манын каласынешт улмаш.7Но Давид Сион карманым сеҥен налын, да тудо Давид-Ола лийын.8Кугыжа тудо кечын каласен: «Кажне, кӧ иевусейым пуштеш, тек умдо дене сокыр ден окшакышт-влакымат пытара, вет нунын Давидым ужмышт ок шу». Санденак вет тыге ойлат: «Сокыр ден окшак [Господьын] пӧртышкыжӧ огыт пуро».9Давид карманыште илаш тӱҥалын да тудым «Давид-Ола» манын лӱмден. Уло олам, Милло гыч кӧргӧ могырышкыла, у чоҥеж-влак дене авырен налын.10Давид вияҥын, куатше ешаралтын: Господь Юмо Саваоф тудын пеленже лийын.11Хирам, Тирын кугыжаже, Давид деке шке еҥже-шамычым, кедр пушеҥгым, тыгак чоҥышо ден кӱмастар-влакым колтен. Нунышт Давидлан полатым чоҥеныт.12Тунам Давид умылен: Господь тудым Израильын кугыжажлан пеҥгыдемден, шке Израиль калыкшылан кӧра тудын кугыжа кучемвийжым кӱшкӧ нӧлталын.13Хеврон гыч толмекше, Давид шкаланже Иерусалим гыч эше вате ден кулвате-влакым налын.14Давидын эрге-ӱдыржӧ-шамыч эше шочыныт. Теве Иерусалимыште шочшо эргыже-влакын лӱмышт: Шаммуй, Шовав, Нафан, Соломон,15Ивхар, Елисуа, Нефек, Иафий,16Елишама, Елиада, Елифелет, [Самае, Иосиваф, Нафан, Галамаан, Иеваар, Феисус, Елифелет, Нагев, Нефек, Ионафан, Леасамис, Ваалимаф да Елифааф].17Давидым Израильын кугыжажлан шӱрен палемдыме нерген колмеке, ӱмбакше керылташ манын, филистим-влак тудым кычал каеныт. Тидым пален налмеке, Давид карманыш каен.18А филистим-шамыч толыныт да Рефаим лапвереш рат дене шогалыныт.19Давид Господь деч йодын: «Мылам филистим-влак ваштареш каяш мо? Нуным мыйын кидыш пуэт мо?» Господь тудлан вашештен: «Кай. Мый филистим-шамычым кидышкет пуэм».20Давид Ваал-Перацимыш каен да тушто нуным кырен шалатен. Тудо каласен: «Кугу вӱд пытарыме семын Господь тушманемым шинча ончылнем шалатыш». Садланак тиде верым Ваал-Перацим манын лӱмденыт.21Тушан филистим-влак шке шояк юмыштым кудалтен коденыт. Давид нуным шке еҥже-шамыч дене наҥгаен [да йӱлалташ кӱштен].22Филистим-влак угыч толыныт да Рефаим лапвереш рат дене шогалыныт.23Давид Господь деч йодын: [«Мылам филистим-шамыч ваштареш каяш мо? Нуным мыйын кидыш пуэт мо?»] Тудыжо вашештен: «Ваштарешышт ит лек, но ӧрдыж гыч эртен каен, ӱмбакышт шеҥгечын, шопкер велым керылт.24Кунам шопкер ӱмбалне сарзывий ошкылмо гай йӱкым колат, тарване: филистим сарзывийым кырен шалаташ манын, тыйын ончычет Господь кая».25Давид Господьын кӱштымыж семынак ыштен да филистим-влакым Гева гыч Газер марте кырен шалатен.
Institute for Bible Translation, Finland