1 Avaarnọng2
Ikpongannamtọhna s'Devid ọnang Sọlọmọn
1Wa ch'ogbe kk'ọnyọma kw'Devid m'ope, oyerẹ nnwa kwẹ Sọlọmọn, ọnang-ẹ ntọhna, oben-ẹ bẹ́,2“Oning ka ọdọhbh-m e. Gaangẹ ifor asi mach'ojinọng!3Si idik s'Ọvaar Ibinọkpaabyi kw'ode Ibinọkpaabyi kwọ oben-ọ bẹ́, asi. Kpobha idik sẹ, ọmaana asana pẹ, ọmaana apaanga pẹ, ọttara ntọhna sẹ, k'ose kw'makkẹrẹ z'nnwẹr kw'apaanga p'Mosẹs. Si minna, ọfha ojibh ọnang-ọ k'ọttọhk kpenamkpen f'asi, ọttara k'ibyi kpenamkpen s'ata.4M'ofona nya, Ọvaar Ibinọkpaabyi osi k'ose kw'uwa ochekẹ ọnang-m bẹ́, ‘Ó̱de iva p'iva pọ mazeng k'eden ọkkọkka, matima nttem sabẹ maphyir, ọmaana agbagba pabẹ maphyir mator-m, eden za kede ch'ọnọng ina nya moninga kw'im'ọnana ny'ẹvaarkkọhbhọ ch'Israẹl.’5“Kọ oyenẹ azong ọttọhk f'uwa Joab kw'ode nnwa kw'Zeruya osi-m ma. Wa kẹ ọfhọ asonọng afa p'asoja p'Israẹl, p'ade Abnẹr kw'ode nnwa kw'Nẹr, ọmaana Amasa kw'ode nnwa kw'Jẹtẹr. Wa ọfhọ bẹ mach'moning k'egbong, zangke, moning k'ẹmẹm. Ọzẹ fabẹ ọpyak-ẹ z'odikpa kw'ọkpaam z'erin, ọmaana z'ntọkọ s'oke z'mmo.6Kọ tima ezonga chọ sẹ-ẹ k'ose kw'ọdaak-ọ. Kẹ ọbọhk kàtte otima ẹmẹm ọsaka izek k'atam.7“Ṉ́nòde iva p'Barzilayi kw'ofon Gilead, tte bẹ mattara k'anọng p'mm'achi ọttọhk amaan-ọ. Kirẹ wa bẹ mabe amaan-m k'ogbe kw'nrọbhọ z'mbọhk s'agbaanakka Absalọm.8“Kàzaama bẹ́, Shimeyi kw'Gẹra obhonọ, kw'ofon Bahurim, z'ẹkọma ch'Bẹnjamin, oning nya ọmaan-ọ. Wa ọtwọ-m mawuriji ny'ewu ch'nd-nchina z'Mahanaim. Ch'iwa nokwu okebh-m z'ọraanga kw'Jọrdan, nchekẹ nnang-ẹ k'eche ch'Ọvaar Ibinọkpaabyi bẹ́, ‘Kaam ọkkangkkang mìntima mfhọ-ọ.’9Okenaka, tọma ma, tọk-ẹ mach'ọnọng kw'ikk'opina. Kọ mach'ọnọng kw'oyen ezonga, azong ọttọhk f'm'asẹ-ẹ ma. K'eden kpenamkpen, kẹ ọbọhk katte oruk akpen.”10Devid o, okwu ope, otor ab'ttatta pẹ za. Manọhng-ẹ z'ebhondim ch'Devid.11Kibung-kibungọ, wa Devid otim ẹvaar ch'Israẹl k'icho arọbh afa. Ọbaabh Hẹbrọn k'icho ichenọmfa, ọbaabha Jẹrusalẹm k'icho ẹrọbh okwuma ijobh kkanttaan.12Minna kw'Sọlọmọn okwu otima ẹvaar ch'otte Devid. Ẹvaar chẹ ettima.Ẹvaar ch'Sọlọmọn ettim
13Adonija kw'ode nnwa kw'Hagit obina od-okebha Batshẹba kw'ode ọkka kw'Sọlọmọn. Batshẹba ọbọbh-ẹ bẹ́, “Mba ẹkwa nda chọ, ch'ọdaam dọ o?” Adonija apọhn-ẹ bẹ́, “Iye, nkwu k'ọdaam e.”14Obira ọttara bẹ́, “Nyen odik kw'nd-mben bẹ́, mgbaak-ọ.”Batshẹba ọpọhn-ẹ bẹ́, “Gbaak-m.”15Adonija oben-ẹ bẹ́, “Kọ azong ma bẹ́, wa ẹvaar ndo ede chaam. Anọng p'Israẹl maphyir asokọ ichen bẹ́, kaam wọ im'mbaabha bẹ. Okenaka, idik ikwu ibhakẹ. Ọvaar Ibinọkpaabyi noter ọtọka ẹvaar ndo ọnang agbaanatte kwaam.16Nyen ọttọhk mavanẹ f'm'mphyem-ọ. Ototo, kaam ọttọhk mvo karaam o.”
Batshẹba oben-ẹ bẹ́, “Gbaak-m.”17Adonija oben-ẹ bẹ́, “Ototo, ben ọvaar Sọlọmọn bẹ́, ọtọka Abishag kw'ofon Shunam ọnang-m mach'kwanọng kwaam. Kaam nzong bẹ́, kọ mọraam.”18Batshẹba ọpọhn-ẹ bẹ́, “Iya, ojibhẹ ma. Kaam m'mgbaak ọvaarnọng odik nwo k'kọ k'eso.”19K'ogbe kw'Batshẹba ofon bẹ́, ọd-ọgbaak Sọlọmọn kw'ode ọvaarnọng odik kw'Adonija ọtọhm-ẹ. Ọvaarnọng ọzẹ-ẹ nya o, obina okebh-ẹ, ọraka eso ọnang-ẹ, pira nofon od-oninga ẹwọr z'ẹvaarkkọhbhọ chẹ. Ọtọhm bẹ́, matọka ọvaargbera anang ọkka oninga ẹwọr. Ọkka o, oninga otum-ẹ ny'odimbọhk.20Oben ọvaarnọng bẹ́, “Oyen ẹttọhkva ch'nd-nkam bẹ́, mphyem-ọ. Ototo, kaam karaam o.”
Ọvaarnọng ọpọhn-ẹ bẹ́, “Nna kwaam, phyem-m, kaam kọ mìnram.”21Nya o, Batshẹba oben ọvaarnọng bẹ́, “Tte Abishag kw'ofon Shunam ọbọhk nang Adonija kw'ode agbaanatte mach'kwanọng kwẹ.”22Ọvaar Sọlọmọn ọbọbh ọkka bẹ́, “Osempira aphyem-m bẹ́, ntte Abishag kw'ofon Shunam ọbọhk nnang Adonija k'ọbada? Ina akkerẹ, ewu danẹ maphyem-m bẹ́, ntte ẹvaar ọbọhk nnang-ẹ, okurọ ch'ode agbaanatte kwaam kwiden. Mabira aphyem anang Abiyata kw'ode ọfọhn-ẹja, ọttara Joab kw'ode nnwa kw'Zeruya!”23Nya o, ọvaar Sọlọmọn ochekẹ k'eche ch'Ọvaar Ibinọkpaabyi bẹ́, “Tte Ibinọkpaabyi ọnang-m irem, zaa m'bar yen, óde Adonija ina akpen pẹ otim otera eso ch'ọttọhk mva f'ophyemẹ ma!24Ofona nya, k'ose kw'Ọvaar Ibinọkpaabyi orukọ akpen, kẹ nwo kw'ọnang-m ẹvaar, osi dẹ ettima mach'ẹvaar ch'atte kwaam Devid, obira osi ivaartaak saam ibe, k'ose kw'uwa ochekẹ, Adonija m'ope menda!”25Minna kw'ọvaar Sọlọmọn ọnang Bẹnaya kw'ode nnwa kw'Jẹhoyada ẹfa bẹ́, ọfhọ Adonija. Bẹnaya obin-ẹ ọttọhk, ope.26Ọvaarnọng oben Abiyata kw'ode ọfọhn-ẹja bẹ́, “Kpa nnam z'iwonọ sọ z'Anatọt. Kọ abaan k'obo, okenaka, kọ mimkponga mfhọ okurọ bẹ́, kọ w'uwa ad-atima Ẹkkọhbhọ ch'Echekẹ ch'Ọvaar Ibinọkpaabyi kw'Ọyọhng, ny'ogbe kw'atte kwaam Devid, abira atọka irem amaan-ẹ k'adiktama maphyir p'akebh-ẹ.”27Minna kw'Sọlọmọn ọrọhbh Abiyata z'ọtọhm f'ẹja ch'Ibinọkpaabyi ofufọhnọ, k'ose kw'uwa Ọvaar Ibinọkpaabyi ikk'ocheka ọmaana ọsọhm kw'Ẹli z'Shilo.28K'ogbe kw'ẹkkaabha ndo etto Joab k'itọhng o, ọrọbh odim z'ikkira s'Ọvaar Ibinọkpaabyi, ọd-ọbọka abhik p'ija-byi, okurọ ch'iwa ikk'ikwu ọcha ọmaana Adonija, obhum ẹkaan ch'Absalọm.29Itekẹ ipyirẹ ọvaar Sọlọmọn bẹ́, Joab kk'ọrọbha odim z'ikkira s'Ọvaar Ibinọkpaabyi, od-oninga ọnyọma ija-byi. Sọlọmọn ọnang Bẹnaya kw'ode nnwa kw'Jẹhoyada ẹfa bẹ́, “Zọhng bin-ẹ ọttọhk, afhẹ-ẹ!”30Bẹnaya odim okebha Joab z'ikkira s'Ọvaar Ibinọkpaabyi, oben-ẹ bẹ́, “Ọvaarnọng obenẹ bẹ́, ayin k'iyaan!”
Okenaka, Joab ọpọhn-ẹ bẹ́, “Minna mode, m'mpe ma.”
Bẹnaya o, ọkpa nnam od-otek ọvaarnọng k'ose kw'Joab ọpọhn-ẹ.31Ọvaarnọng oben Bẹnaya bẹ́, “Si k'ose kw'obenẹ. Bin-ẹ ọttọhk afhẹ-ẹ, anọhng-ẹ, mfha itama s'anọng p'mbọhk sabẹ iwur-owur p'Joab ọfhọ, obyenga izẹ sabẹ, ining kaam ọmaana ẹsọhmmọr chaam kibungọ, ibẹ.”32Ọzẹ f'anọng mbo afa p'ọbọr atte kwaam Devid nnam, otima ọkkangkkang ọfhọ, Ọvaar Ibinọkpaabyi m'otuka ny'Joab. Wa anọng mbo afa p'ọfhọ made Abnẹr, kw'ode nnwa kw'Nẹr, obira ode oso kw'asoja p'Israẹl. Nwoza ode Amasa, kw'ode nnwa kw'Jẹtẹr, obira ode oso kw'asoja p'Juda. Bẹ anọng mbo afa wa majibhẹ ọtam, mabir ator ọtam ayọhnga Joab.33Tte ọzẹ fabẹ ọkpẹkẹ Joab ọmaana iva p'iva pẹ ttattampe. Ṉ́nòde Devid ọmaana iva p'iva pẹ, ọmaana ẹsọhmmọr chẹ, ọttara ẹvaar chẹ, tte odiriji kw'Ọvaar Ibinọkpaabyi oninga ọmaana bẹ ttattampe.34Minna kw'Bẹnaya kw'ode nnwa kw'Jẹhoyada ofon od-obin Joab ọttọhk, ọfhẹ-ẹ. Manọhng-ẹ z'obhon kwẹ, z'ibyi s'anọng nna arukọ.35Ọvaarnọng oteka Bẹnaya kw'ode nnwa kw'Jẹhoyada bẹ́, ọtọka eninga ch'Joab kw'ode oso kw'asoja. Obira oteka Zadọk kw'ode ọfọhn-ẹja bẹ́, ọtọka eninga ch'Abiyata.36Ọvaarnọng ọtọhm bẹ́, mayerẹ Shimeyi okwu. Okwu nya o, oben-ẹ bẹ́, “Si ọsọhm kwọ z'Jẹrusalẹm, aruk nya. K'ibyi ọdọk-ọdọk kata o.37Ewu kpenamkpen ch'asọbhọ ẹtọkọ ajeka ilokodo s'Kidrọn, zonga bẹ́, m'apope. Izẹ sọ m'ibira ibhakẹ ikpẹk-ọ.”38Shimeyi ọpọhna ọvaarnọng bẹ́, “Ttatta, odik kw'agbaakẹ ojibh-ojibh. Kaam ọtọhmnọng kwọ m'nsi k'ose kw'ttatta ọvaarnọng kwaam obenẹ.” Minna kw'Shimeyi orukọ ny'Jẹrusalẹm maa, ogbe ode.39Okwu opyirẹ icho ittaan o, abira afa p'Shimeyi arọbh akebha Akish kw'ode nnwa kw'Maaka kw'ode ọvaarnọng kw'Gat. Itekẹ ipyirẹ Shimeyi bẹ́, “Abira pọ aning z'Gat e.”40Shimeyi odo ibyi s'im'oninga ẹwọr ny'ẹnyanya chẹ, ochina z'Akish, od-oror abira pẹ. Oze bẹ nya o, otima bẹ z'Gat ọkpa nnam ka Jẹrusalẹm.41K'ogbe kw'matekẹ Sọlọmọn bẹ́, Shimeyi kk'obina ny'Jẹrusalẹm, ọta z'Gat okwuna,42ọvaarnọng oyerẹ Shimeyi oben-ẹ bẹ́, “Kọ zang kw'nsi achekẹ k'eche ch'Ọvaar Ibinọkpaabyi, mbira ntọr-ọ itọhng bẹ́, ‘Ewu kpenamkpen ch'abin ma, ata ibyi kpenamkpen, zonga bẹ́, m'apope?’ Kọ zang apọhn-m bẹ́, ‘Odik kw'agbaakẹ ma, ojibh-ojibh, kaam m'mkpobha wẹ?’43Osempira ọdọk kasi k'ose kw'achekẹ anang Ọvaar Ibinọkpaabyi, abira akpobha ọgbaakadik kwaam o?”44Ọvaarnọng obira oben Shimeyi bẹ́, “Ny'ettem chọ, kọ azong itama maphyir s'iwa asi anang Devid kw'ode atte kwaam ma. Ọvaar Ibinọkpaabyi m'otuka idiktama njo s'asi.45Ṉ́nòde ọvaar Sọlọmọn, Ọvaar Ibinọkpaabyi m'ọdẹ-ẹ, obira osi ẹvaar ch'Devid kw'ode otte, ekpen ttattampe.”46Ọvaarnọng ọnang Bẹnaya kw'ode nnwa kw'Jẹhoyada ẹfa bẹ́, ọd-ọfhọ Shimeyi. Minna kw'ofon od-obin-ẹ ọttọhk, ope.
Wa ẹvaar ndo ekwu ettima k'ogbe kw'Sọlọmọn.
The Seed Company