1 Avaarnọng1
Ogbe kw'Devid ikk'ọtama
1Wa Devid kk'ọtama maa, zaa nnabubh-ẹ ọbara, ekok ẹsẹ-ẹ nya.2Ofona nya o, atọhmnọng pẹ aben-ẹ bẹ́, “Ttatta, mochibhẹ bẹ́, wura mororọ ókwúrà-kwúrà wanẹ ochen-ọ kw'min'okker-ọ. Okwura-kwura nwo m'oyima otum-ọ, ọfha ekok ening ọvaarnọng kwamina esi.”3Minna kw'mabin, mad-aror ominanwa kw'ojibhẹ kwanọng ny'Israẹl maphyir, maze Abishag kw'ofon Shunam. Matọk-ẹ achena ọvaarnọng.4Wa ominanwa nwo ojibhẹ kwanọng mawuriji, obir okkerẹ ọvaarnọng k'ọkkọkka. Okenaka, ọvaarnọng kẹ abẹ koyim.5Minna kw'Adonija kw'Hagit ọmaanẹ ọnang Devid obin, ọtọma ẹmma osisi, oben bẹ́, “Kaam m'nde ọvaarnọng!” Ọtọka ijaar s'nnyanya id-itọr, ọmaana ayaar-ọyaar p'ade anọng arọbh afa okwuma ijobh bẹ́, machẹ-ẹ eden.6(Ch'uwa obobe ode, otte kẹ kọgbọbhọ bẹ́, “Osempira asi minna?” Wa kẹ ojibhẹ ojinọng mawuriji. Kẹ wọ iwa otorọ Absalọm nnam.)7Adonija ọd-ọttọhna ọmaana Joab kw'ode nnwa kw'Zeruya, ọmaana Abiyata kw'ode ọfọhn-ẹja. Machera, mabẹ-ẹ k'nnam.8Anọng p'uwa nna k'Adonija abe, made Zadọk kw'ode ọfọhn-ẹja, ọmaana Bẹnaya kw'ode nnwa kw'Jehoyada, ọmaana Natan kw'ode ọgbaak-ettem ch'Ibinọkpaabyi, ọmaana Shimeyi, ọmaana Reyi, ọttara afanọng p'Devid.9Adonija otima arọkimaan, ọmaana adamogbodo, ọttara abhaamva p'mabhaar-ọbhaar, ọfọhnọ ẹja k'Ọta kw'Zohẹlẹt, kw'oning ọnyọma Ẹn Rogẹl. Ọphyẹ ivotte p'ejinọng maphyir p'ọvaarnọng obhonọ, ọttara adukwa p'Juda maphyir.10Wa Natan kw'ode ọgbaak-ettem ch'Ibinọkpaabyi kọphyẹ, Bẹnaya ọmaana afanọng p'Devid kọphyẹ, Sọlọmọn kw'ode ọgbaanotte kobir ọphyẹ.11Nya o, Natan ọbọbh Batshẹba kw'ode ọkka kw'Sọlọmọn bẹ́, “Ma, kọ kabhaang bẹ́, Adonija kw'ode nnwa kw'Hagit node ọvaarnọng, ọvaar Devid kwamina odik nwo kozong o?12Ofona nya, tte nnang-ọ ntọhna k'ose kw'm'akkaana akpen pọ, ọmaana p'Sọlọmọn kw'ode nnwa kwọ.13Zọhng kebha ọvaar Devid aben-ẹ bẹ́, “Ttatta ọvaarnọng kwaam, mba wa achekẹ anang kaam ọtọhmnọng kwọ bẹ́, ‘K'odik ọkkọkka, Sọlọmọn kw'ode nnwa kwọ wọ im'otima ẹvaar chọ o? Kọ zang abir achekẹ bẹ́, kẹ wọ im'oninga ẹwọr ny'ẹvaarkkọhbhọ chọ o? Adonija nosi yen ode ọvaarnọng o?’14Kaam m'nkwu ny'ogbe kw'atim agbaak ọvaarnọng odik nwa, ọfha nttara iwọhng saam ny'odik nwo.”15Minna kw'Batshẹba ofon od-okebha ọvaar Devid kw'ikk'ọtama z'idongọ sẹ, za ch'Abishag kw'ofon Shunam od-okker-ẹ.16Batshẹba ọraka eso ọnang ọvaarnọng k'ekpukpobha-maana.Ọvaarnọng ọbọbh-ẹ bẹ́, “Arorọ mbọng o?”17Ọpọhn-ẹ bẹ́, “Ttatta kwaam, wa achekẹ k'eche ch'Ọvaar Ibinọkpaabyi, kw'ode Ibinọkpaabyi kwọ, anang kaam ọtọhmnọng kwọ bẹ́, ‘Sọlọmọn kw'ode nnwa kwọ wọ im'otima ẹvaar chọ, obir oninga ewọr ny'ẹvaarkkọhbhọ chọ.’18Okenaka, Adonija nosi yen ọtọka ẹvaar, kọ ttatta ọvaarnọng kwaam odik nwo kazong o?19Kẹ kk'adamogbodo, ọmaana àbhàamvà p'mabhaar-ọbhaar, ọttara arọkimaan k'ọsaabh otima ọfọhnọ ẹja. Obira ọphyẹ ivotte p'ejinọng maphyir p'ọvaarnọng obhonọ, ọmaana Abiyata kw'ode ọfọhn-ẹja, ọttara Joab kw'ode oso kw'asoja. Okenaka, Sọlọmọn kw'ode ọtọhmnọng kwọ, kọphyẹ.20Ttatta ọvaarnọng, anọng p'Israẹl maphyir natikẹ kọ bẹ́, atek bẹ ọnọng kw'im'oninga ẹwọr ny'ẹvaarkkọhbhọ chọ.21Ína minna ode, óde ttatta ọvaarnọng kwaam obubh ẹmma, otor ab'otte za, mm'asi kaam ọmaana nnwa kwaam Sọlọmọn mach'arurubha.”22Ny'ẹmma ndo ch'otim ọgbaak odik ọnang ọvaarnọng, Natan, kw'ode ọgbaak-ettem ch'Ibinọkpaabyi opyirẹ.23Matek ọvaarnọng bẹ́, “Natan, kw'ode ọgbaak-ettem ch'Ibinọkpaabyi kk'opyira ma.” Minna kw'ofon okebha ọvaarnọng za, ọraka eso k'ekpukpobha-maana ọnang-ẹ.24Natan oben bẹ́, “Ttatta ọvaarnọng kwaam, ma, kk'abena bẹ́, Adonija wọ im'otima ẹvaar chọ, obira ọnana ny'ẹvaarkkọhbhọ chọ o?25Ch'nd-mgbaak ma, kẹ kk'adamogbodo, ọmaana àbhàamvà p'mabhaar-ọbhaar, ọttara arọkimaan k'ọsaabh, otima ọfọhnọ ẹja. Oyerẹ ivotte p'ejinọng maphyir p'ọvaarnọng obhonọ, ọmaana Abiyata kw'ode ọfọhn-ẹja, ọttara Joab kw'ode oso kw'asoja. Ch'moning ma, maning za ator-ẹ machi, mabira agwo, mad-aben bẹ́, ‘Tte ọvaar Adonija oruk akpen p'adum-odum!’26Okenaka, kaam ọtọhmnọng kwọ, ọmaana Zadọk kw'ode ọfọhn-ẹja, ọmaana Bẹnaya kw'ode nnwa kw'Jehoyada, ọttara ọtọhmnọng kwọ Sọlọmọn, kọphyẹ.27Oyinẹ bẹ́, ttatta ọvaarnọng kwaam kk'odik nwoma ọsa, mina atọhmnọng pẹ kotekẹ ọnọng kw'im'ọtọka ẹvaar chẹ, obira oninga ẹwọr ny'ẹvaarkkọhbhọ chẹ o?”28Nya o, ọvaar Devid oben bẹ́, “Màyerẹ Batshẹba chen-m.” Mayer-ẹ, odim z'ẹtaanga, obe ny'ititika s'ọvaarnọng.29Ọvaarnọng ochekẹ, oben bẹ́, “K'ose kw'Ọvaar Ibinọkpaabyi kw'ọrọhbh-m k'adama kpenamkpen oruk akpen,30kaam m'nsi nnang-ọ menda nwa, k'ose kw'uwa nwọhngọ k'eche ch'Ọvaar Ibinọkpaabyi, kw'ode Ibinọkpaabyi kw'Israẹl bẹ́: Sọlọmọn kw'ode nnwa kwọ wọ im'otima ẹvaar chaam, obir oninga ẹwọr ny'ẹvaarkkọhbhọ chaam.”31Nya o, Batshẹba ọraka maa otwu ititika z'izek k'ekpukpobha-maana, oben bẹ́, “Tte ọvaar Devid, kw'ode ttatta kwaam, oruk akpen ttattampe!”32Ọvaar Devid oben bẹ́, “Màyerẹ Zadọk kw'ode ọfọhn-ẹja, ọmaana Natan kw'ode ọgbaak-ettem ch'Ibinọkpaabyi, ọttara Bẹnaya kw'ode nnwa kw'Jehoyada, makwu.” Minna kw'makwu akebha ọvaarnọng nya.33Oben bẹ bẹ́, “Màtọka atọhmnọng p'kaam ọvaarnọng kwabọnga tima zọhng. Mànana Sọlọmọn kw'ode nnwa kwaam ny'ẹnyanya chaam, matim-ẹ achina z'Gihọn.34Ṉ́kk'apyira za, Zadọk kw'ode ọfọhn-ẹja, ọmaana Natan kw'ode ọgbaak-ettem ch'Ibinọkpaabyi, mm'ayaan-ẹ, masẹ-ẹ ọvaarnọng kw'Israẹl. Màje enyisa, màbira akwọhrọ k'ẹrọng bẹ́, ‘Tte ọvaar Sọlọmọn oruk akpen p'adum-odum!’35Bọnga mm'atọn azenga maa, okwu oninga ny'ẹvaarkkọhbhọ chaam, obira ọtọka eninga chaam mach'ọvaarnọng. Kaam kk'ẹ ntéka bẹ́, ọbaabha Israẹl ọmaana Juda.”36Bẹnaya kw'ode nnwa kw'Jehoyada, ọpọhna ọvaarnọng bẹ́, “Tte ode minna! Tte Ọvaar Ibinọkpaabyi, kw'ode Ibinọkpaabyi kw'ttatta ọvaarnọng kwaam oben minna.37Tte Ọvaar Ibinọkpaabyi oninga ọmaana Sọlọmọn k'ose kw'oning ọmaana ttatta ọvaarnọng kwaam. Tte osi ẹvaar chẹ ekpobha ẹyọhnga ch'ttatta ọvaar Devid kwaam!”38Minna kw'Zadọk kw'ode ọfọhn-ẹja, ọmaana Natan kw'ode ọgbaak-ettem ch'Ibinọkpaabyi, ọmaana Bẹnaya kw'ode nnwa kw'Jehoyada, ọmaana anọng p'Kẹrẹt, ọttara anọng p'Pẹlẹt, manan Sọlọmọn k'ẹnyanya ch'ọvaar Devid, matim-ẹ achina z'Gihọn.39Zadọk kw'ode ọfọhn-ẹja, odim z'ikkira s'awuriji, ọtọka mpyi kw'ana ayik, ọyaana Sọlọmọn. Minna kw'maje enyisa, anọng maphyir makwọhrọ k'ẹrọng bẹ́, “Tte ọvaar Sọlọmọn oruk akpen p'adum-odum!”40Anọng maphyir mazenga ayak-ẹ nnam, malobh, mabira aje nsa maa, izek inyengẹ bẹ́ tikitiki.41Adonija, ọmaana anọng maphyir p'ọphyẹ eninga, maninga za abhaanga ch'mad-alobh k'ogbe kw'eninga min'ẹsa. Mabhaang enyisa ch'ed-eje nya o, Joab ọbọbh bẹ́, “Izozo s'nd-ọbhaanga kina ebhondim iyinẹ yen o?”42Nya ch'otim otim odik ny'ẹmma, Jonatan kw'ode nnwa kw'Abiyata, kw'ode ọfọhn-ẹja, opyirẹ. Adonija oben-ẹ bẹ́ “Dim ka ẹtaanga. Ọnọng ọkkọkka mach'ikọ ọbaan bẹ́, otima ẹkkaabha ọkkọkka okwu.”43Jonatan ọpọhn-ẹ bẹ́, “Minna kode! Ọvaar Devid kwamina kk'Sọlọmọn ẹvaar ọsa e.44Ọvaarnọng kk'Zadọk kw'ode ọfọhn-ẹja, ọmaana Natan kw'ode ọgbaak-ettem ch'Ibinọkpaabyi, ọmaana Bẹnaya kw'ode nnwa kw'Jehoyada, ọmaana anọng p'Kẹrẹt, ọttara anọng p'Pẹlẹt ọtọhma bẹ́, mazenga amaan-ẹ. Nkk'ẹ anana z'ẹnyanya ch'ọvaarnọng.45Zadọk kw'ode ọfọhn-ẹja, ọmaana Natan kw'ode ọgbaak-ettem ch'Ibinọkpaabyi, nkk'ẹ ayaana bẹ́, ode ọvaarnọng z'Gihọn. Nkk'atọma za alobh maa, matọka ebhondim kibungọ. Izozo s'ad-abhaanga jọ nya e.46Ch'nd-mgbaak-ọgbaak ma, Sọlọmọn kk'ẹwọr oninga z'ẹvaarkkọhbhọ e.47Adukwa p'ọvaarnọng kk'abira akwa bẹ́, makwu azima ttatta ọvaar Devid kwamina. Nkk'ẹ abena bẹ́, ‘Tte Ibinọkpaabyi kwọ osi eche ọmaana ẹvaar ch'Sọlọmọn ekpobha ẹyọhnga chọ!’ Minna kw'ọvaarnọng ọrak eso ny'ikẹ k'ebin,48oben bẹ́, ‘Ẹtọhnga ede ch'Ọvaar Ibinọkpaabyi kw'Israẹl kw'ikk'ọsa bẹ́, ntima achen paam nze ọnọng kw'im'otera eso chaam menda.’ ”49Anọng p'Adonija ọphyẹ, mabhaang nya o, opoma osi bẹ, maffurọ maphyir.50Minna kw'ojora f'Adonija oyen k'Sọlọmọn ọwọhkọ Adonija ọd-ọbọka abhik p'ija-byi bẹ́ gwẹk.51Itekẹ ipyirẹ Sọlọmọn bẹ́, “Ọvaar Sọlọmọn ojor Adonija ojora. Ofona nya, kk'abhik p'ija-byi odo ọbọka. Obenẹ za bẹ́, ‘Tte ọvaar Sọlọmọn ochekẹ bẹ́, ọkkangkkang mòtima ọfhọ kaam ọtọhmnọng kwẹ.’ ”52Sọlọmọn ọpọhna bẹ́, “Ó̱de ọkọhk bẹ́, ode ọnọng ọkkọkka, osisa-naanga mawanẹ kw'eso chẹ, k'izek mòtto. Okenaka, óde itama ining-ẹ z'ettem, m'opope.”53Minna kw'ọvaar Sọlọmọn ọtọhm anọng bẹ́, mad-atọk-ẹ z'ija-byi atima akwu. Adonija opyirẹ nya o, ọraka eso k'ekpukpobha-maana ọnang ọvaar Sọlọmọn, pira Sọlọmọn oben-ẹ bẹ́, “Zọhng bhana z'ikọ k'ọsọhm.”
The Seed Company