2 Corinthians10
1अखनी हम अपना, मतलब कि पौलुस के बारे में बोलम। हम विनम्र होके आउर सही ढंग से तोरा से ई निवेदन कर रहली हे कि जे सही हे ओही करऽ, जईसे मसीह के नम्रता आउर दया हलन। कुछ लोग कहऽ हथन कि जखनी हम तोहनी के साथे शारीरिक रूप में मौजूद हली, तऽ हम तोहनी के प्रति नम्र हली, बाकि अखनी जब दूर ही तऽ तोहनी साथे जबरदस्ती कर रहली हे।2जखनी हम ई आदमियन के विरोध हिम्मतगर होके काम करऽ ही जे अईसन सोचऽ हथन कि हम आउर हमरा जौरे सेवा करे वाला लोग खाली सांसारिक तरीका से काम करऽ हथन, तऽ हम जबरदस्ती करे के मनसा रखऽ ही। येहिगुने, जेकरा में जिनगी हे ओही काम करे लागी हम तोरा से निवेदन करऽ ही ताकि जब हम तोरा से मिले आयेम तऽ हमरा भी तोहनी जौरे जबरदस्ती करे के जरुरत नऽ पड़ी।3सचमुच में, जबकि हम देह के रूप में काम तऽ करऽ ही आउर चलऽ भी ही, बाकि हम अपन बचाव खाली इंसानी रीति से नऽ करऽ ही।4काहेकि हमर लड़ाई के हथियार देह के नऽ हे, बाकि गढ़ के ढाह देवे वाला आउर रणनीती के विफल कर देवे लागी परमेश्वर दने से सामर्थी हे।5हम अईसन कोई भी बात के हरावऽ ही जेकर बारे में लोग ई दावा करऽ हथन कि ऊ परमेश्वर के जाने से भी बढ़ के हे। एकरा अलावे, हम लोगवन द्वारा विचार करल जाय वाला सभे बात पर असर डाले लागी भी काम करऽ ही जेकरा से ओखनी मसीह के आज्ञा पालन करतन।6जौन घड़ी तूँ पूरा रीति से मसीह के आज्ञा के पालन करवऽ, ऊ घड़ी जे कोई भी उनकर आज्ञा के उल्लंघन करतन ओखनी के दंड देवे लागी हम तईयार रहम।7ई बारे में विचार करऽ कि कौन वाला बात साफ हे। मान लऽ कि लोगवन के ई भरोसा हे, कि ओखनी मसीह के अगुवाई करऽ हथन। अईसन लोगवन के याद रखे के चाही कि हम भी मसीह के प्रतिनिधित्व ओईसहीं करऽ ही, जईसे ओखनी करऽ हथन।8सचमुच में, जखनी हम ई बारे में बड़ी बड़का-बड़का बात बोलऽ ही कि कईसे प्रभु यीशु हमनी के उनकर अधिकार कर प्रतिनिधित्व करे लागी मजबूत करलन हे, तऽ हम अपने आप के अपमान नऽ करऽ ही। ऊ अईसन येहिगुने करलन ताकि हमनी परमेश्वर पर आउर जादे भरोसा करे लागी तोहनी के प्रोत्साहित कर सकम आउर तोहनी के सहायता कर सकम, येहिगुने नऽ कि हम परमेश्वर पर भरोसा करे से तोहनी के निराश कर सकम।9येहिगुने, तूँ ई बता सकलऽ हे कि जखनी हम जबरदस्ती तोहनी भीर चिट्ठी भेजऽ ही तऽ हम तोहनी के डेरावे के कोशिश नऽ करऽ ही।10हम ऊ चिट्ठियन येहिगुने लिखऽ ही काहेकि कुछ लोग हमर बारे में कहऽ हथन, “ऊ हमनी के कड़ा आउर मजबूत चिट्ठियन भेजऽ हथन, बाकि ऊ देह के कमजोर हथन आउर जखनी ऊ हमनी जौरे रहऽ हथन, तऽ बड़ी खराब बोलऽ हथन।”11जे लोग अईसन बात कहऽ हथन उनका ई जाने के जरुरत हे कि जे बात तोहनी के भेजल गेल आउर हम अपन चिट्ठी में लिखऽ ही कि जौन घड़ी हम तोहनी जौरे नऽ रहऽ ही, तऽ ओही काम हम तोहनी जौरे रहला पर भी करऽ ही।12हम ई कहे में बड़ी विनम्र ही कि हम ऊ लोगवन के जेतना अच्छा ही जेकरा तूँ जानऽ हऽ आउर, जे कहऽ हथन कि ऊ भरोसेमंद हथन। ओखनी मूरख हे। जखनी ऊ कहऽ हे कि ऊ महान हथन तऽ ओखनी खाली अपने आप के ही देख रहल हे।13एकर उल्टा, हम सच में, जे करऽ ही ओकरा से बढ़ के हम अपन बारे में बड़का-बड़का बात नऽ करऽ ही। बाकि, हम अपना बारे में अईसन बड़का-बड़का बात कहऽ ही, जे ऊ काम से मेल खाय जेकरा परमेश्वर हमनी के करे लागी अधिकार देलन हे। एकरा में ऊ काम भी शामिल हे जे हम तब करऽ ही जखनी हम तोहनी साथे रहऽ ही।14सचमुच में, जदि हम सचमुच में तोहनी भीर आयेल नऽ रहती हल, तऽ जे कुछ परमेश्वर हमरा करे लागी देलन हे ओकरा में तोहनी शामिल नऽ होतऽ हल। बेशक, हम सच में तोहनी भीर पहिलहीं आ गेली हे आउर तोहनी के मसीह के बारे में शुभ संदेश बता देली हे।15दोसर लोग जे करऽ हे ओकरा चलते हम अपन बारे में बड़का-बड़का बात नऽ बोलऽ ही, बलुक सच में हम जे करऽ ही ओकरे चलते बोलऽ ही। सच में, हम पूरा आश्वस्त होके ई आशा करऽ ही कि परमेश्वर हमरा तोहनी जौरे करे लागी आउर जादे काम देतन। ऊ बात तब घटित होत जखनी तूँ परमेश्वर पर आउर भी विश्वास करवऽ।16ऊ रीति से, हम ऊ लोगवन के शुभ संदेश बता सकऽ ही जे हमरा से आउर तोरा से भी जादे दूर रहऽ हथन। परमेश्वर ओखनी के जे करे लागी देलन हल ओकरा दोसर आदमी कईसे करलन, ओकरा चलते अपना बारे में बड़का-बड़का बात कहे के बजाय हम एही करे के योजना बना रहली हे।17हर एगो अादमी के ओही करे के चाही जे यिर्मयाह भविष्यद्वक्ता लिखलन हे,“जे कोई भी बड़का-बड़का बात बोलऽ हे ऊ ओकरा प्रभु परमेश्वर के बारे में बोलतन कि परमेश्वर महान हथन।” 18सभे अादमी के अईसन येहिगुने करे के चाही काहेकि प्रभु यीशु ऊ लोगवन के सिफारिश करऽ हथन जिनका ऊ भरोसेमंद कहऽ हथन, नऽ कि ऊ आदमी के जे खुद ही अपना बारे में ऊ बात के कहऽ हथन जे ग्रहण के लायक हे।
Bridge Connectivity Solutions Pvt. Ltd.